Rawngbâwlnaah Thiamna Tihmasâwn Rawh—Thuhmahruai Inbuatsaihin

A Pawimawh Chhan: Kan thuhmahruai sawiin tuina a chawhthawh loh chuan in neitu chuan thu kan hrilh theih hmain inbiakna a titâwp thei a. Chuvângin, thuchhuahtu tam tak chuan an thuhmahruai chu thusawi tûr zînga a pawimawh ber niin an hria a ni. Thusawi dân tûr entîrna chu Kan Lalram Rawngbâwlna-ah leh Reasoning bu-ahte pêk ni mah se, dinhmun chi hrang hrang mila hman theih tûr thuhmahruai kimchang tak a ni reng lo. Thusawi dân tûr entîrna chu a kimchang hle a nih pawhin, thuchhuahtute chuan an tidanglam theiin, mahni hman tûr thuhmahruai dang an inbuatsaih thei bawk a ni. In neitu hnêna kan rilrua lo lang apiang sawi chhuah mai aiin kan thuhmahruai sawi tûr ṭha taka kan inbuatsaih chuan kan hlawhtling lehzual ang.—Thuf. 15:28.

A Tih Dân Tûr:

I thusawi tûr chu thlang rawh. Chu chu i pêk chhuah tûr thu leh hla chhuah ṭanchhan leh in thu hrilhna biala mite ngaihven tûr âwm thu a ni tûr a ni.
Dân pângngai anga in inchibai hnuah i sawi tûr sentence pahnih khat vêl chu ṭha takin inbuatsaih rawh. Heti hian i sawi ṭan thei ang: “Ka lo kal chhan chu . . . vâng a nia,” “Mi tam tak chuan . . . chungchâng hi an lungkham a,” “ . . .chungchânga i ngaih dân hriat ka duh a ni,” tiin. A nih loh leh thil dang pawh i sawi thei ang. Sentence tawi tê, tluangtlam taka sawi chu a ṭha ber tlângpui ṭhîn. Thuchhuahtu ṭhenkhat chuan an thuhmahruai sawi tûr chu an by heart a ni.
Inbiaknaa in neitu hruai lût thei tûr ngaih dân sawi chhuahtîr thei zawhna pakhat siam rawh. (Mt. 17:25) I va lên hmain in neitu chuan thil dang a lo ngaihtuah ngei ang a; chuvângin, i zawhna siam chu a tân a harsa lutuk tûr a ni lo va, amah tizak thei tûr a ni lo tih hre reng ang che.

Tûn Thla Chhûng Hian Ti Chhin Rawh:

Chhûngkuaa Pathian biakna in neih hunah thuhmahruai in sawi tûrte inbuatsaih nân leh tihchhin nân hun insiam rawh u.
Rawngbâwla i chhuahin, i thuhmahruai sawi tum chu thuchhuahtu dangte hrilh rawh. (Thuf. 27:17) Rah ṭha a chhuah loh chuan, i thuhmahruai chu thlâk ang che.