Mi Dangte’n I Hnên Aṭangin Eng Nge An Zir?
1. Zirtîrte chuan Isua hnên aṭangin eng nge an zir?
1 Isua chuan: “Ka nghâwngkawl bât ula, ka hnênah zir rawh u,” a ti a. (Mt. 11:29) Ani chuan ṭawngkam chauh ni lovin, entawn tûr ṭha siamin mi dangte a zirtîr a ni tih a chiang hle. Zirtîrte’n Isua hnên aṭanga an thil zir chu han ngaihtuah teh. Ani chu mi dimdawi thiam, ngilnei, leh hmangaihna ngah tak a ni. (Mt. 8:1-3; Mk. 6:30-34) Tin, a inngaitlâwm tak zet bawk. (Joh. 13:2-5) Zirtîrte chuan rawngbâwlnaa Isua an zui hian, ani chu mi dangte thutak zirtîr thiam tak leh hah pawh hre lo khawpa mi taima a ni tih an hmu a ni. (Lk. 8:1; 21:37, 38) Rawngbâwlnaa kan tel hian, chu chuan mi dangte chu engtin nge a nghawng?
2. Engtin nge rawngbâwlnaa kan lan dân leh nungchang chuan in neitute chungah nghawng ṭha a neih theih?
2 In Neitute Chungah: Kan incheina pângngai tak, kan hawihhâwmna, leh tih tak zeta mi dangte kan ngaihsakna chuan in neitute chungah nghawng thui tak a nei thei. (2 Kor. 6:3; Phil. 1:27, 28) Anni chuan Bible kan hmang ngun hle tih an hmu a. Mi dangte chu an thusawi lai ngun taka kan lo ngaihthlâksakna chuan an rilru a khawih a ni. Hêng kawnga entawn tûr ṭha siamnain Lalram chanchin lama mite a hîp theih dân chu ngainêp ngai rêng rêng suh.
3. Kan unaute chungah eng ang nghawng ṭha nge kan neih theih?
3 Kan Unaute Chungah: Kan unaute chunga nghawng ṭha kan neih theih dân pawh ngaihtuah bawk teh. Rawngbâwlna atâna ṭhahnem ngaihna chu intihhmuh theih a ni a. Thîrin thîr a tihhriam theih ang bawkin, ṭha taka kan inbuaisaih thusawite chuan mi dangte chu thu hrilhna lama an thiamna tihmasâwn ve tûrin a tur a ni. (Thuf. 27:17) Tuina neite chanchin taima taka chhinchhiah a, kan va tlawh leh ṭhinna chuan mi dangte chu chutiang bawka ti tûrin a chêttîr thei a. Mite kan biak huna kan remhriatna leh fin thiamna chuan mi dangte pawh chutiang mi ni ve tûrin a fuih bawk. Kan rawngbâwlna kan hlen hian, kan rawngbâwlpuite chungah nghawng ṭha tak kan nei ngei ang.—2 Tim. 4:5.
4. Engvângin nge kan entawn tûr siam chu a khât tâwka kan chhût chian ṭhin ang?
4 Engvângin nge a khât tâwkin, i thiltih leh thusawi, leh i entawn tûr siamin mi dangte a nghawng dân chu i chhût loh vang? Kan entawn tûr siam ṭha tak chuan Pathian Jehova a tilâwm ang a, Paula’n: “Mi zirtute ni rawh u, kei pawh Krista zirtu ka ni ang bawk hian,” a tih ang hi min tihtîr ve thei bawk ang.—1 Kor. 11:1.