Mi Hrang Hrangte Hîp Tûra Siam Kan Magazine-te
1. Engtin nge bawih rinawm leh fing chuan tirhkoh Paula a entawn?
1 Tirhkoh Paula’n “mi zawng zawng” chhandam an nih theihna tûra chanchin ṭha a hrilh dân a siam rem angin, bawih rinawm leh fing chuan kan magazine-te hi mi hrang hrang leh rin dân hrang hrang neite hnêna chanchin ṭha thlen nân a hmang a ni. (1 Kor. 9:22, 23) Chuvângin, Vênnainsâng ṭha taka kan hman theih nân tute tâna ziak nge a nih kan hre reng tûr a ni.
2. Vênnainsâng chhûnga thuziak chi hrang hrangte chu tute chhiar atâna ziak nge ni?
2 Vênnainsâng: He magazine-a thuziak ṭhenkhat chu Pathian leh Bible zahna engemaw chen neite tâna ziak a ni a. Anni chuan Bible hriatna an nei a; mahse, a thu zirtîr dik tak erawh an hre lo. Tirhkoh Paul’n “Pathian ṭihtute” tia a sawite ang an ni. (Tirh. 13:14-16) Vênnainsâng chhûnga zir tûr thuziakte hi Jehova Thuhretute tân bîka ziak a ni a. Paula chuan a lehkha thawn chhiartute chu Pathian Lehkha Thu hriatna leh thutak hriatna dik nei angah a ruat a ni. (1 Kor. 1:1, 2) Chutiang bawkin, thuziak dang ṭhenkhat chu kan inkhâwmnaa lo tel ṭhînte leh Thuhretute ṭawngkam hman leh ngaih dân hre ṭhang tawhte tâna ziak a ni.
3. Engvângin nge thlawhhma rawngbâwlnaa kan hman magazine chhuak thar apiangte kan hriat bel ang?
3 A chhuak apiang chu hriat bel lo tum ang che. Chutianga i tih chuan, i mi tawhte rilru la zâwng tûr thuziakte chu i kawhhmuh thei ang.