‘Pathian Hming Zahawm Rawh Se’
1. Kum 2012 rawngbâwl kum atâna bial inkhâwmpui tûr thupui chu eng nge ni a, chu chuan eng nge a ṭanchhan?
1 Lei leh Vâna Lalchungnungber, Jehova hming putute kan ni hi kan va nihlawh tak êm! A hming min puttîrtu chu Pathian ngei a ni a, a bîk takin kum 1931 aṭang khân Jehova Thuhretute tih hming chu pu ṭanin, Jehova hming bil hmehbela hriat kan lo ni ta. (Is. 43:10) Pathian fapa mal neih chhun, Isua chuan Pathian hming chu a ngaihlu hle a, ṭawngṭai dân tûr a zirtîrnaah pawh a dah hmasa ber a ni. (Mt. 6:9) Chuta Isua ṭawngkam chu rawngbâwl kum 2012-a kan neih tûr bial inkhâwmpui thupui ṭanchhan atân hman a ni ang a. Chu chu ‘Pathian Hming Zahawm Rawh Se’ tih a ni.
2. Eng thute nge ngaihthlâk tûr kan neih?
2 Kan Thu Ngaihthlâk Tûr: Inrinnia thusawi tûr, “Hunbi Kima Rawngbâwlin Pathian Hming Hriattîr Rawh” tih chuan hunbi kima rawngbâwl hi nun kawng lungawithlâk tak a nih chhan a sawifiah ang a. Thang hlauhawm tak ni thei palite awha kan awm loh nâna min ṭanpuitu tûr “Pathian Hming Tihliau Lo Tûrin Fîmkhur Rawh” tih thusawi inzawm pawh kan ngaithla bawk ang. Tin, “Pathian Hming Tihthianghlim A Ngaih Chhan” tih thupui hmanga thusawiah chuan hêng zawhna: Mite’n tuina an lantîr vak loh hunah pawh ṭhahnemngai taka thu hril tûrin engin nge min ṭanpui ang? tih leh Rawngbâwlna hlawhtling tak nei thei tûrin engin nge min ṭanpui ang? tihte hi chhân a ni ang. Chawlhniah chuan kan ngaihtuahna te, ṭawngkam te, thutlûkna siam te, leh nungchang te aṭanga Pathian hming kan tihthianghlim dân chungchânga thusawi inzawm pali kan ngaithla thung ang a. “Jehova Chuan Armageddon-ah A Hming Ropui Tak Chu A Tithianghlim Ang” tih thupui hmanga vântlâng thusawi chu mi tharte tân a ngaihthlâknawm lehzual ang.
3. Eng chanvo ropui tak nge kan neih a, engtin nge bial inkhâwmpui thusawite chuan min ṭanpui ang?
3 Nakin lawkah Pathian Jehova chuan a hming a la tihthianghlim thuai dâwn a. (Ezek. 36:23) Chu mi hun a lo thlen hma chuan, Jehova hming thianghlimin a entîr zawng zawng thlâwp theihna chanvo ropui tak kan nei a ni. He bial inkhâwmpui hian Pathian hming putute anga kan mawhphurhna sâng tak hlen chhuak tûrin min ṭanpui ṭheuh ang tih kan ring tlat a ni.