Thiam Takin Hnek Rawh
1. Korinth thawn khat 9:26 chu rawngbâwlna atân eng anga hman nge a nih?
1 Tirhkoh Paula chuan: “Tiam chin lam panin ka tlân ngat ngat a ni, boruak mai hnek lovin mahni ka inhnek zâwk ṭhîn,” tiin a ziak a. (1 Kor. 9:26) Paula sawi chu thlarau lam thiltum ûmna kawnga a rilru a pêk ding nasat dân hi a ni. Mahse, hêng thute hi rawngbâwlna atân pawh a hman theih ve tho a ni. Rah ṭha ber a chhuah theih nâna thiam taka “hnek,” a nih loh leh thawh chu kan duh a. Chu chu engtin nge kan tih theih ang?
2. Thu hrilhna hmun leh hun thlan dân chungchângah engtin nge Paula leh kum zabi khatnaa chanchin ṭha hriltute chu kan entawn theih?
2 Mi Awmnaah Kal Rawh: Paula leh kum zabi khatnaa chanchin ṭha hriltute chuan mipui awmna tûr âwmahte thu an hril ṭhîn a. (Tirh. 5:42; 16:13; 17:17) Chuvângin, kan bial chhûnga mi tam tak chu tlai lama ina an awm chuan chu mi hun chu in tin rawngbâwlna atân a ṭha ber mai thei a ni. Tualchhûng rêl chawlhna leh bus dinnate chu mite hna thawka an kal hun leh an haw hun zîng hma takah emaw, tlai lamah emaw mipuiin a khat em? Bial chhûnga bazârna hmunte chu eng hunah nge a lun ṭhin? Chûng hunte chu kawtthlêra thu hrilhna neihna hun ṭha tak a ni thei ang.
3. Engtin nge kan bial chhûnga rawngbâwlna kawngah thiam taka kan hnek theih?
3 Bial Chhûngah Thiam Takin Thawk Rawh: Kan bial chhûnga rawngbâwlna kawngah pawh thiam taka thawk tûrin kan fîmkhur a ngai a. Entîr nân, hmun pakhata mi tam tak hruai ai chuan, ruahmanna siam a awlsam phah nân tlêm tê têa inṭhen chu a ṭha zâwk mai thei a ni. Chutiang bâwkin, thingtlâng khuaa rawngbâwl hunah pawh mi tam tak kalho loh chu a ṭha zâwk a. Chutiang chuan thusawina hun remchâng kan neiin bial kan hrût chhuak rang zawk ang. Thu hrilhna hmun pan nâna hun kan khawh ral loh nân kan in kiangah mi mal thu hrilhna bial kan nei thei ang em?
4. Engin nge ‘mihring mantu’ hlawhtling tak ni tûra min ṭanpui ang?
4 Isua chuan chanchin ṭha hriltute chu ‘mihring mantu’ nên a tehkhin a ni. (Mk. 1:17) Sangha mantu thiltum chu lên den mai ni lovin sangha man hi a ni. Chuvângin, sangha mantu hlawhtling tak chuan sangha a man theihna hmun leh hunah kalin tâwi muang lovin an man vat ṭhîn. Ni e, anni chuan thiam takin an hnek, a nih loh leh an thawk a ni. Kan rawngbâwlnaah pawh chutianga taihmâkna chu i lantîr ve ang u.—Heb. 6:11.