Chanchin Ṭha Hrilh Dân Kawngte

ISUA chuan chanchin ṭha ṭhahnemngai taka hrilhna kawngah a hnungzuitute tân entawn tûr a hnutchhiah a. Mite va panin, an inah leh vântlâng hmunahte anni chu biain, a zirtîr a ni. (Mt. 9:35; 13:36; Lk. 8:1) Isua chuan mite chu a bia a, a zirtîrte chu a hrangin a zirtîr a, mi a sâng têlte hmaah thu a sawi bawk. (Mk. 4:10-13; 6:35-44; Joh. 3:2-21) Hun remchâng a neih apiangah fuihna leh beiseina thute a sawi ṭhîn. (Lk. 4:16-19) Chawlh hahdam a mamawh hunah pawh, thu hrilhna hun remchâng awm chu a bawh pelh chuang lo. (Mk. 6:30-34; Joh. 4:4-34) Isua rawngbâwlna chanchin kan chhiarna hian amah entawn tûrin min chêttîr a ni lâwm ni? Tirhkohte ang chiaha chêttîrin kan awm ve a ni.—Mt. 4:19, 20; Lk. 5:27, 28; Joh. 1:43-45.

² Kum 2,000 dâwn lai kaltaa Isua Krista bul lo ṭan hnathawha Kristiante tel theihna chanvo chu han ngaihtuah teh.

IN TINA THU HRILHNA

³ Jehova Thuhretute kan nih angin, awmze nei taka in tina chanchin ṭha hrilh a hlutna chu kan hria a. In tina thu kan hrilh nasat êm avângin, mite min hriatna ber a ni hial tawh a ni. A rah chhuah lungâwithlâk takte hian rei lo te chhûnga mi maktaduai tam takte hnêna thu kan hrilh theihna he tih dân hi a finthlâk tih a finfiah a ni. (Mt. 11:19; 24:14) In tina thu hrilh rawngbâwlna hi Jehova leh ṭhenawmte kan hmangaihzia târ lanna ṭha tak a ni.—Mt. 22:34-40.

⁴ In tina thu hrilhna hi tûn hnaia Jehova Thuhretute tihchhuah mai a ni lo. Tirhkoh Paula chuan mite ina thu a hrilh thu a sawi a. Ephesi kohhran upate hnênah a rawngbâwlna chungchâng sawiin: “Asia ram ka tlawh tirh nî ata kha in hnêna ka awm chhûng zawng khân . . . a sâwt tûr thu in hnênah engmah hrilh ka tîm lo va, . . . in tinah te ka zirtîr ṭhîn che u a,” tiin a sawi. Hetiang kawng leh kawng dangin, Paula chuan ‘Judate leh Grikte hnênah pawh Pathian lama rilru lamlêt thu leh, kan Lalpa Isua Krista lam rin tûr thu a hriattîr ṭhîn.’ (Tirh. 20:18, 20, 21) Chutih hun lai chuan, Rom lalte chuan milem biakna an chawisâng a, mi tam takte chu “sakhaw ngaihsak tak” an ni a. Chuvângin, mite chuan “khawvêl leh a chhûnga thil zawng zawng siamtu,” chutih laia ‘ram tina mi zawng zawng sim tûr thu petu’ chu an zawn a hmanhmawhthlâk a ni.—Tirh. 17:22-31.

⁵ Tûn laiah hian mite hnêna chanchin ṭha hrilh chu a hmanhmawhthlâk lehzual a. He khawvêl kalhmang suaksual tâwpna hi a lo thleng thuai dâwn. Chumi kan hriatthiamna chuan taihmâk chhuah lehzual tûrin min chêttîr a ni. Thutaka rilṭâmte chu, kum tam tak chhûng kan lo hman tawh in tina kala zawn chhuah aia zawn chhuah dân kawng ṭha zâwk a awm lo. Isua leh a tirhkohte hun laia a hlawhtlin ang bawkin tûn laiah pawh in tina rawngbâwlna chu a hlawhtling reng a ni.—Mk. 13:10.

⁶ In tina rawngbâwlnaah i tel ṭha thei em? I thei a nih chuan, i chungah Jehova a lâwm tih i chiang thei a ni. (Eze. 9:11; Tirh. 20:35) In tina thu hrilh chu i tan a awlsam lo mai thei a. Hrisêl lohna i nei pawh a ni thei, a nih loh leh ngaithla duh lotu tam tak an awmna bialah thu i hril pawh a ni thei bawk. Sawrkârin thu hrilh an khuahkhirh hial pawh a ni thei. A nih loh leh, i zakzum hle pawh a ni thei a; bâkah, hmêl hriat lohte han biak hmasak chu harsa i ti pawh a ni thei. Chuvângin, in tina thu hrilhnaa i kal apiangin, huphurh riauna i nei ṭhîn a ni. Mahse, lunghnual suh. (Ex. 4:10-12) Chutiang chu hmun danga unau tam takte pawhin an tawng a ni.

⁷ Isua chuan a hnungzuitute chu: “Ngai teh u, kei khawvêl tâwp thleng pawhin, in hnênah ka awm zêl ang,” tiin a tiam a. (Mt. 28:20) Chu thutiam chuan zirtîr siamnaah min tichak a ni. “Mi tichaktuah chuan engkim ka ti thei a ni,” tia sawitu tirhkoh Paula ang niin kan inhria a ni. (Phil. 4:13) Kohhranin a ruahman in tina thu hrilhnaah chuan tel vek tum rawh. Mi dangte nêna thawhhona aṭangin tihchakna leh ṭanpuina i dawng ang. Harsatna i tawh mai theihte tuar chhuak thei tûra ṭanpuina dîlin ṭawngṭai la, chanchin ṭha hriltu i nih angin theihtâwp chhuah rawh.—1 Joh. 5:14.

⁸ Mi dangte hnênah chanchin ṭha i hrilh hian, “nangmahnia awm in beisei chhan” hrilh theihna hun remchâng i nei ang. (1 Pet. 3:15) Lalram beiseina neitute leh nei lotute danglamna chu i hre chiang tawlh tawlh ang. (Is. 65:13, 14) “In êng chu mi mit hmuhin êng rawh se,” tia Isua thupêk i zâwm tih inhriatna aṭanga lungawina i nei ang a, Jehova hre tûr leh chatuan nunna thlentu thutak hre tûrin mi dangte ṭanpui theihna hun ṭha i nei thei a ni.—Mt. 5:16; Joh. 17:3; 1 Tim. 4:16.

⁹ Chawlhkâr chhûng leh kâr tâwpah in tin kal tûra ruahmanna siam a ni a. Chhûna mite ina hmuh an har ṭhinna hmunah kohhran ṭhenkhat chuan tlai lama thu hrilhna neihte an ruahman ṭhîn. Mite chuan tlai lam emaw, thim hlim emawa in lêng neih chu zîng kâra neih aiin an duh zâwk thei a ni.

A THLENG TLAKTE ZAWNG CHHUAKIN

¹⁰ Isua chuan a zirtîrte chu a thleng tlâkte “zawng chhuak” tûrin a hrilh a. (Mt. 10:11) Mi rilru ṭhate chu in tin kalnaah chauh a zawng lo. Hun remchâng apiangah in tinah leh tawn chawpin thu a hril a ni. (Lk. 8:1; Joh. 4:7-15) Tirhkohte pawhin hmun hrang hrangah thu an hril bawk.—Tirh. 17:17; 28:16, 23, 30, 31.

¹¹ Tûn laiah pawh, kan tum chu mi tinte hnêna Lalram chanchin ṭha hrilh hi a ni a. Zirtîr siam rawngbâwlnaa Isua leh a zirtîrte kan entawn bâkah, hun inthlâk danglam dân leh kan thu hrilhna biala mite dinhmun inthlâk dânte milin kan insiam rem tihna a ni. (1 Kor. 7:29-31) Entîr nân, sumdâwnna hmuna mite tlawhnaah thuchhuahtute chu an hlawhtling hle a. Mipui lênvahna hmunte, lirthei dahna hmunte, a nih loh leh mite hmuh theihna hmun apianga thu hrilhna a hlawhtlin ang chiahin, ram tam takah chuan kawtthlêra thu hrilhna pawh a hlawhtling hle. Kohhran ṭhenkhat chuan an thu hrilhna bial chhûngah dawhkân, a nih loh leh hûn sawn theih thu leh hla pho chhuahnate an dah chhuak bawk. Chu bâkah, ram ṭhenkhatah branch office chuan kohhran tam taka mi unaute an tel theihna kêa vei vâk an tamna hmunah a bîk taka vântlâng hmuna thu hrilhna a ruahman thei a. Chuvângin, thuchhuahtute’n in lama an tlawh laia ina awm lote pawhin chanchin ṭha an hriat theih phah a ni.

¹² Vântlâng hmunah Bible thuchah ngaihventute kan hmuh hian, thu leh hla chhuah inâwm takte chu kan pe chhuak thei a. An tuina chawhthawhsak nân, tuina neitu hnênah chuan min biak pawh theihna tûr i pe thei a, jw.org i kawhhmuh theiin, a nih loh leh kohhran inkhâwm neihna hmun hnai ber address chu i pe thei ang. Vântlâng hmuna thu hrilhna chu i rawngbâwlna zauh dân kawng hlimawm tak a ni tih i hria ang.

¹³ Mahse, chanchin ṭha puan chhuah chauh hi tûn lai Kristiante mawhphurhna dawn awmchhun a ni lo. Nunna petu thutak pawm tûra mi dangte hlawhtling taka ṭanpui tûr chuan, tuina neite chu Kristian puitling an nih thlenga i tlawh zui zêl a ngai a ni.

TLAWHKIRNA NEIIN

¹⁴ Isua chuan a hnungzuitute chu: “Kâwlkil thleng pawhin ka thuhretute in ni ang,” tiin a hrilh a. (Tirh. 1:8) Mahse, “Chutichuan kal ula, hnam tina mi zirtîrahte siam ula, . . . thu ka pêk zawng zawng che u pawm tûrin zirtîr rawh u.” tiin a hrilh bawk a ni. (Mt. 28:19, 20) Tlawhkîr neih chu Jehova rawngbâwlnaa hlimna min neihtîrtu a ni thei. I tlawh hmasak ber ṭuma tuina lantîrtute chuan hmuh leh che an châk a rinawm. Bible thute hrilh belhin, Pathian an rinna i tihchaksak thei ang a, an thlarau lam mamawh hre tûrin i ṭanpui thei ang. (Mt. 5:3) Inbuatsaihna ṭha i neih a, an remchân anga tlawhkîr theih dân i ruahman chuan, in lamah Bible zirna i neihpui thei ang. Chu chu i tlawhkîr chhan ber a ni tûr a ni a. Thutak chî chu kan tuh mai ni lovin, tuiin kan châwm bawk a ni.—1 Kor. 3:6.

¹⁵ Ṭhenkhat tân chuan tlawhkîr neih chu thil harsa tak a ni thei a. Mite hnêna chanchin ṭha tâwi têa hrilh chu i thiam viauin, nuam i ti hle pawh a ni thei e. Mahse, Bible sawiho tûra tlawhkîr leh i ngaihtuah hian i huphurh viau pawh a ni thei a ni. Inbuatsaihna ṭha chuan mahni inrintâwkna nei tûrin a ṭanpui ang che. Chawlhkâr chhûng inkhâwma rawtna ṭha tak takte chu hmang rawh. Tawn hriat ngah deuh zâwk thuchhuahtu chu kalpui tûr chein i sâwm duh mai thei bawk.

IN LAMA BIBLE ZIRNA KAIHRUAIIN

¹⁶ Pathian Thu chhiartu Juda saphun pakhat a biak khân, chanchin ṭha hriltu Philipa chuan: “I chhiar kha a awmzia i hria em?” tiin a zâwt a. Chu pa chuan: “Tuma mi hrilhfiah lovin engtin nge ka hriat theih ang?” tiin a chhâng a ni. Pathian Lehkha Thua chu pa chhiar lai thu aṭanga sawiin, “Philipa chuan a hnênah Isua thu a hrilh” tih Tirhkohte bung 8-na chuan min hrilh a. (Tirh. 8:26-36) Engtia rei nge Philipa chuan chu pa bulah hun a hman kan hre lo va, mahse ringtu a lo nih a, baptisma chan a ngen thlengin chanchin ṭha a hrilh a. Isua Krista zirtîr a lo ni ta a ni.

¹⁷ Tûn laia mi tam takte chuan Bible an hre chiang lo va, chuvângin rinna nei tûr leh baptisma chang thei tûr khawpa tling thei tûr chuan vawi tam tak, kâr tam tak, thla tam tak, a nih loh leh kum khat emaw, a aia rei emaw tlawhkîr an ngai thei a ni. Mahse, Isua ngei pawhin: “Englo lâk aiin pêkin lukhâwng a nei zâwk,” tia a sawi angin, mi rilru ṭha pute zirtîr tûra dawhthei tak leh hmangaih taka inṭanpuina chuan hlâwkna a nei a ni.—Tirh 20:35.

¹⁸ Bible zir nâna siam, thu leh hla chhuah pakhat hmanga in lama Bible zirna kaihhruai chu i duh ngei ang. Chawlhkâr chhûng inkhâwma kaihhruaina pêkte i nunpui a, kohhrana tawn hriat ngahte i thawhpui chuan, zirna ṭha takin i kaihruai thei ang a, Isua Krista zirtîr ni tûrin mi dangte chu i ṭanpui thei ang.

¹⁹ In lama Bible zirna nei ṭan tûr leh kaihruai tûra ṭanpui i ngaih chuan, upa pakhat emaw, Bible zirpui thiam tak pakhat Thuhretu dang emaw chu ṭanpui tûr chein be hreh suh. Nun leh Rawngbâwlna Inzirna Lehkhabu-a lang, inkhâwmnaa lemchana kan hmuh rawtnate chuan a ṭanpui thei bawk ang che. Jehova rinchhan la, Bible zirpui neih i duhna chu ṭawngṭaiin thlen ang che. (1 Joh. 3:22) A theih hrâm chuan, i chhûngte Bible i zirpui bâkah, in lama Bible zirna dang pakhat neih chu thiltumah nei ang che. Bible zirpui i neihna chuan rawngbâwlnaa i hlimna chu a belhchhah ang.

TUINA NEITE CHU JEHOVA INAWPNA PAWL LAMAH HRUAIIN

²⁰ Jehova hre tûr leh Isua Krista zirtîr ni tûra mite kan ṭanpui hian kohhran zînga mi an lo ni a. Bible zirlaite chuan Jehova inawpna pâwl an hriat thiam a, an thlâwp chuan thlarau lamah hma an sâwn ang a, puitlin lam an pan ang. Chutianga tih dân zirtîr chu a pawimawh a ni. Chumi atân chuan video-te leh Tute Nge Tûn Laia Jehova Duhzâwng Titute Chu? tih brochure chu a bîk taka buatsaih a ni. He lehkhabu Bung 4-naa thu ṭhenkhat hi a ṭangkai thei bawk ang.

²¹ Bible thu sawihona in neih aṭangin, Jehova chuan tûn laiah leia thu hrilh rawngbâwlna thawk zo tûrin inawpna pâwl pakhat a hmang tih hre thiam tûrin i zirpui chu ṭanpui rawh. Bible zirna ṭanpuitu atâna buatsaih thu leh hla chhuahte hlutna chu hrilh la, Pathian tâna inpete’n an siam chhuah dân leh khawvêl puma an sem darh dânte hrilhfiah rawh. I Bible zirpui chu Kingdom Hall-a inkhâwm tûrin sâwm ang che. Inkhâwm kan neih dânte hrilh la, inkhâwmnaa mi dangte chu hmêlhriattîr rawh. Inkhâwmpuitea lo kal Thuhretu dangte hmelhriattîr pawh i duh ngei bawk ang. Hêng hunte leh hun dangahte pawh Jehova mite’n Kristian dikte chhinchhiahna ber, hmangaihna an lantîr dân mi thar chu hmuhtîr rawh. (Joh. 13:35) Tuina nei chuan Jehova inawpna pâwl ngaihhlutna a neih chhoh hunah, Jehova a hnaih telh telh ang.

BIBLE THU LEH HLA CHHUAHTE HMANNA

²² Kristian hmasate chu Pathian Thu taima taka puangchhuaktute an lo ni a. Anni chuan an mi mal hman atân leh kohhrana zir atân Pathian Lehkha Thu chu an ziak chhâwng a. Pathian Thu, thutak zir tûrin mi dangte an fuih ṭhîn. Kuta an ziah chhâwnte chu a tam lova, an hlut hle a ni. (Kol. 4:16; 2 Tim. 2:15; 3:14-17; 4:13; 1 Pet. 1:1) Tûn laiah pawh hian, Jehova Thuhretute chuan tûn lai lehkha chhutna khâwl changkâng tak takte hmangin Bible leh Bible zirna ṭanpuitu thu leh hla chhuahte chu bu maktaduai za têlin an tichhuak a ni. Chûng zîngah chuan ṭawng za têla tihchhuah tract te, brochure te, lehkhabu te, leh magazine-te a tel a ni.

²³ Mi dangte hnêna chanchin ṭha i hrilh hian, Jehova inawpna pâwl min pêk Bible zirna ṭanpuitu thu leh hla chhuahte chu hmang ngei ang che. Jehova Thuhretute thu leh hla chhuah chhiar leh zirna i hlâwkpui dân i hriatna chuan mi dangte hrilh chhâwng tûrin a chêttîr ang che.—Heb. 13:15, 16.

²⁴ Chanchin hriat nâna Internet hmangtu an tam tawlh tawlh a. Chuvângin, Bible thu leh hla chhuahte bâkah kan official website, jw.org chu chanchin ṭha theh darh nân a ṭangkai hle. Khawvêl puma mite chuan Bible leh Bible ṭanchhan thu leh hla chhuahte ṭawng tam taka chhiar nân leh ngaihthlâk nân computer an hmang thei a. Jehova Thuhretute min biak hrehtute leh min biakna tûr hun remchâng nei ṭha lote chuan, mahni in lum aṭangin jw.org aṭangin kan rinna chungchâng an lo bih chiang thei tawh a ni.

²⁵ Chuvângin, hun remchâng kan neih apiangin jw.org website chu tlâng hriatah kan puang a. In neituin kan rinna chungchâng min zawh hunah a chhânna chu mobile emaw, computer emaw aṭangin kan hmuhtîr nghâl zung zung thei a. Zaizir ṭawng pawh tiamin, ṭawng dang hmangte kan tawh hunah pawh Bible leh Bible thu leh hla chhuahte en tûrin kan website kan kawhhmuh thei bawk. Thuchhuahtu tam tak chuan Bible sawipuina neih ṭan nân, kan website-a video a engemaw ber chu an hmang a ni.

TAWNCHAWPA THU HRILHNA

²⁶ A thu ngaithlatute hnênah Isua chuan: “Khawvêl êng in ni e. . . . In êng chu mi mit hmuhin êng rawh se, chutichuan in thil tih ṭhatte an hmu ang a, in Pa vâna mi an chawimawi thei ang,” a ti a. (Mt. 5:14-16) Chûng zirtîrte chuan: “Kei khawvêl êntu ka ni,” tia sawitu Isua entawnin, Pathian kawng an târ lang a. Isua chuan a ngaithlatu tûrte hlâwkpui tûra “nunna êng” pe chhuakin, Kristiante tân entawn tûr a siam a ni.—Joh. 8:12.

²⁷ Tirhkoh Petera pawhin kan tân entawn tûr min hnutchhiah a. (1 Kor. 4:16; 11:1) Atheni khuaa a awm laiin, a hmuh apiangte hnênah nî tin Pathian thu a hrilh a ni. (Tirh. 17:17) Philippi khuaa Kristiante chuan a entawn tûr siam chu an zui a. Chuvângin, Paula chuan an hnênah “chhuan bengtla lo leh tihmawhte” awmna khawvêlah hian “tiêngtu angin in lang ṭhîn,” tiin a ziak thei a ni. (Phil. 2:14-16) Tûn laiah hian, chanchin ṭha hrilh theihna hun remchâng a awm apiangin, Lalram thutak chu kan ṭawngkam leh thiltihin kan tiêng thei a. Rinawmna leh dikna lama entawn tûr ṭha kan siam chuan khawvêl lakah kan danglam tih a târ lang ngei mai. Amaherawhchu, mite hnêna chanchin ṭha kan va hrilh chauhvin, kan danglam chhan an hria ang.

²⁸ Jehova Thuhretu tam takte chuan an hnathawhna, an school kalna, vântlâng motora an chuanna, a nih loh leh an nî tin hnathawhnaa an kal vêlnaa an mi tawnte hnênah chanchin ṭha an hrilh ṭhîn a. Kan zin hunah, kan zinpuite biak theihna hun remchâng kan nei mai thei. A mi mal takin, inbiakna satliahte chu thu hrilhnaa chantîr theihna hun remchângte kan zawng tûr a ni. Hun ṭha kan neih apianga mi dangte be thei tûrin i inrâlring reng ang u.

²⁹ Thu hrilhnain min Siamtu fak leh chawimawina a thlen tih hriat rengna chuan chutianga ti tûrin min chêttîr ang. Chu bâkah, thinlung ṭha pute chu Jehova hre tûrin kan ṭanpui thei ang a, anni pawhin Isua Krista rinna aṭanga neih theih chatuan nun beiseina an nei thei ang. Chutianga thawhrimna chu Jehova chuan a lâwm a, rawngbâwlna thianghlim angin a ngai a ni.—Heb. 12:28; Thup. 7:9, 10.

THU HRILHNA BIAL

³⁰ Khaw lian leh khaw tê pawh tiamin khawvêl puma Lalram thuchah puan chhuah hi Jehova duh zâwng a ni a. Chutianga puan chhuah a nih theih nân, kohhran bâkah hmun kilkhâwr taka rawngbâwltute chuan branch office aṭangin thu hrilhna bial an dawng ṭhîn. (1 Kor. 14:40) Hei hi kum zabi khatnaa Pathian kaihhruaina nên a inrem a ni. (2 Kor. 10:13; Gal. 2:9) He ni hnuhnûngah hian Lalram rawngbâwlnain nasa takin hma a sâwn a; kohhran thu hrilhna bial thawh dân tûr ṭha taka ruahman a nih hian tam tak thawh zawh theih a ni.

³¹ He ruahmanna hi service overseer kutah a awm a. Kohhranho rawngbâwltu pakhat chuan thu hrilhna bial pêk chhuahna chu a thawk mai thei ang. Group thu hrilhna bial leh mi mal thu hrilhna bial tiin bial chi hnih a awm a. Bial a zîm chuan, group overseer chuan group thu hrilhna bial a nei ang a, chutah chuan thuchhuahtute’n thu an hril thei ang. Kawng leh lamah, thu hrilhna bial a zau a nih chuan, thuchhuahtute chuan a mi malin thu hrilhna bial an nei thei ang.

³² Mi mala thu hrilhna bial nei thuchhuahtu chuan thu hrilha atâna inhmuhkhâwmna inkhâwm ruahman a nih loh hunah leh group ruala a kal theih loh hunah pawh thu hrilhna tûr hmun a nei thei ang. Entîr nân, thuchhuahtu ṭhenkhat chuan an hnathawhna hmun bulah thu hrilhna bial an la a, chhûn chawlh chhûng emaw, hnathawh bânah emaw thu an hril ṭhîn. Chhûngkaw ṭhenkhat chuan an ṭhenawm vêlah mi mala thu hrilhna bial an nei a, a chângin tlaiahte thu an hril ṭhîn. A remchânna hmuna mi mal thu hrilhna bial neihna chuan thuchhuahtu chu thlawhhma rawngbâwlna atâna a pêk theih a hun chu a ṭha thei ang berin a hman theih phah a ni. Mi mal thu hrilhna bialte chu group in tin kalna atân pawh a hman theih tho va. Mi mala thu hrilhna bial neih i duh chuan, thu hrilhna bial enkawltu hnênah dîl ang che.

³³ Group overseer lâk group thu hrilhna bial emaw, thuchhuahtu lâk mi mal thu hrilhna bial emaw a eng pawh ni se, chumi bial latu chuan in tinah mi pakhat tal biak pawh theih a tum hrâm tûr a ni. Bial tlawh chhuak tûra ruahmanna siamte chu tualchhûng mi mal chanchin vênhimna dân nên a inrem tûr a ni. Thu hrilhna bial latu group overseer leh thuchhuahtu apiangte chuan thla li chhûngin an bial neih chu thawh zawh an tum tûr a ni. Thawh zawh a nih hnuah, thu hrilhna bial enkawltu a hriattîr ang. Dinhmun azirin, group overseer, a nih loh leh thuchhuahtu chuan thu hrilhna bial chu kawlin, an thawk nawn thei a, a nih loh leh bial chhûng enkawltu hnênah an pe lêt thei a ni.

³⁴ Kohhrana awm zawng zawngte’n thawhhona ṭha an neih hian, thu hrilhna bial chu kimchang takin thawh zawh theih a ni ṭhîn. In neitute lungnih lohna thlen thei group hran hrana thuchhuahtute’n bial pakhata rawngbâwlna ang chi chu kan pumpelh thei ang. Chutiang chuan kan unaute leh thu hrilhna bial chhûnga mite chungah ngaihtuahna kan lantîr a ni.

ṬAWNG HRANG HRANG HMANGTE HNENA THU HRIL TURA THAWHHONA

³⁵ Mi tinte hian Pathian Jehova, a Fapa, leh Lalram chungchâng an hriat a ngai a. (Thup. 14:6, 7) Ṭawng hrang hrang hmangte chu chhandam an nih nâna Jehova hming lam tûr leh Kristian miziate nei tûra ṭanpui kan duh a ni. (Rom 10:12, 13; Kol. 3:10, 11) Ṭawng hrang hrang hmanna biala chanchin ṭha hrilhnaa harsatna awm ṭhenkhat chu eng nge ni? An hriatthiam ber ṭawnga Lalram chanchin an hriat theihna tûrin engtin nge chûng harsatnate chu chinfel a nih?—Rom 10:14.

³⁶ Ṭawng hman azirin kohhran tinte tâna thu hrilhna bial chu ruat a ni a. Chuvângin, ṭawng hrang hrang hmanna hmunah chuan kohhran hrang hranga thuchhuahtute chuan bial thuhmunah thu an hril ṭhîn. Chutiang hunah chuan, kohhran hrang hranga thuchhuahtute chuan an kohhran ṭawng hmangtute hnêna thu an hrilh chu a ṭha ber a. Hei hi kum tina sâwmna campaign neih hunah pawh a ni tho vang. Mahse, vântlang hmun leh tawnchawpa thu hrilhna neih hunah erawh thuchhuahtu chuan tu hnênah pawh thu a hrilh thei a, eng ṭawng pawhin thu leh hla chhuahte a pe chhuak thei ang.

³⁷ Dinhmun ṭhenkhatah chuan, ṭawng dang hmang kohhrante chuan ram hla taka awm an thu hrilhna bial chu an tlawh chhuak ṭha thei lo va. Chutiang dinhmunah chuan, kohhran tina service overseer-te chuan lungrual taka an pawm tlân tûr, thu hrilhna bial thawh zawh theih dân an ruat tûr a ni. Chu chuan mi tinte hnênah Lalram thuchah hriat theihna hun ṭha a pe ang a, ṭûl lo taka thawh nawnna a awmtîr lo vang.—Thuf. 15:22.

³⁸ In neitu chuan ṭawng dang hmang ta se, eng nge kan tih ang? A ṭawng hman ang hmang thuchhuahtu’n a tlawh tûrah kan ngai mai tûr a ni lo. Thuchhuahtu ṭhenkhat chuan an bial chhûnga an hmuh fo ṭawng dangin thusawi dân awlsam tê pakhat an zir a ni. Kan mi tawn chu kan official website, jw.org aṭanga ama ṭawnga thu leh hla chhuahte a chhiar emaw, a download emaw theih dân kan hmuhtîr thei a, a nih loh leh an ṭawnga thu leh hla chhuah kan kensak theih thu kan hrilh thei a ni.

³⁹ Miin tuina dik tak a lantîr chuan, a ṭawng hriatthiam hmanga ṭanpui thei tûr mi pakhat hmuhsak kan tum tûr a ni a. A ṭawng hmana inkhâwm neihna hmun kan hrilh thei bawk a. A ṭawng hman ang hmangtu tuemawin a biak pawh a duh chuan, a address jw.org-a ziah luh theih dân kan hmuhtîr thei bawk. Chutianga a tih chuan, branch office chuan amah ṭanpui zawm thei tûr a awmna hnaia awm thuchhuahtu, group, a nih loh leh kohhran zawn chhuahsak a tum dâwn a ni.

⁴⁰ Tuina neitu chuan a ṭawng hman ang hmang tuemawin a rawn tlawh tawh tih min hrilh hma chuan, kan tlawh zawm zêl tûr a ni. Dinhmun ṭhenkhatah, branch office chuan a ṭawng hman ang hmang an zawn hmuh loh thu upate an hrilh mai thei a. Chutiang a nih chuan, in neitu tuina chhawmnunsak zêl tûrin theih tâwp kan chhuah tûr a ni. A theih chuan, ama ṭawnga thu leh hla chhuah hmangin Bible kan zirpui thei a. Lehkhabua milemte kan hman ṭangkai a, Bible châng târ lante kan chhiartîr chuan, Bible thu bulte hriatthiamna ṭhenkhat a nei thei ang. Tualchhûng ṭawng hman leh ama ṭawng hman hre kawp a chhûngte zînga tuemaw chuan ṭawng lettua ṭan a duh thei a ni.

⁴¹ Tuina neitu Pathian inawpna pâwl lama hruai tûr chuan hre kim vek dâwn lo mah se, kan inkhâwmnaahte tel tûrin kan sâwm tûr a ni. A ṭawng hmana Bible a awm chuan, Bible chhiar a nih hunah kan keupui ang a. Kohhrana mi dangte nêna an inkawmna ringawt pawh chuan a tichak thei a, chu chuan thlarau lama hmasâwn tûrin a ṭanpui ang.

⁴² Pregroup-te: Pregroup-ah chuan an kohhran ṭawng hman ni lo, ṭawng danga chawlhkâr tin inkhâwm kaihruaitu tûr upa emaw, kohhranho rawngbâwltu emaw a awm lo chung pawhin, chumi ṭawngin thuchhuahtu ṭhahnem tâwk takin thu an hrilh a ni. A hnuaia târ lante a tlin chuan, branch office chuan kohhran pakhat chu pregroup enkawl a phal thei a ni:

1. (1) Kohhran hman loh ṭawng hmangtu mi ṭhahnem tâwk tak bial chhûnga an awm chuan.

2. (2) Chu ṭawng hmang thiam emaw, zir duh thuchhuahtu tlêm azâwng tal an awm chuan.

3. (3) Upate chuan chumi ṭawnga thu hrilhna huaihawt an inhuam chuan.

Kohhran upate chuan pregroup enkawl an duh chuan, bial kantu an râwn tûr a ni. Chumi ṭawng hmangte hnêna thu hrilhna neih tum kohhran dang pawh a lo hre mai thei a, pregroup enkawl ṭha ber tûr kohhran thlang tûra ṭanpui thei thu ṭangkai tak takte a pe thei ang. Pregroup enkawltu tûr kohhran thlan fel a nih chuan, upate chuan branch office-ah lehkha thawnin, pregroup an enkawl tih pawmsak tûrin an ngên ang.

⁴³ Group-te: A hnuaia târ lante a tlin chuan, branch office chuan kohhran pakhat chu group a enkawl a phal thei a ni:

1. (1) Chumi ṭawnga tuina lantîrtu an tam a, ṭhan chhoh beiseiawm tak a nih chuan.

2. (2) Thu chhuahtu tlêm tê talin chu ṭawng chu an hria, a nih loh leh an zir chuan.

3. (3) Chawlhkâr tin inkhâwm pakhat tal—a nih loh leh chawlhkâr tin inkhâwm a ṭhen, vântlang thusawi emaw, Vênnainsâng Zirna emaw tal—chumi ṭawnga kaihruai thei tûr upa emaw, kohhranho rawngbâwltu emaw a awm chuan.

Hêng thil phûtte hi a âwm tâwka an tlin chuan, kohhran upate chuan branch office-ah chipchiar taka lehkha ziakin an hrilh ang a, group enkawl nei kohhran anga pawmna an dîl ang. Chu group-a hmahruaitu chu upa a nih chuan “group overseer” a ni ang a, kohhranho rawngbâwltu a nih chuan “group servant” a ni ang.

⁴⁴ Group din a nih tawh chuan, kohhran upate chuan inkhâwma a eng laite nge chumi ṭawnga kan neih ang a, thla khat chhûngin vawi eng zât nge inkhâwm neih ṭha ang, tih chungchângah thu tlûkna an siam ang. An tân chuan thlawhhma rawngbâwlna atâna inhmuhkhâwmna inkhâwm a hrana ruahman theih a ni bawk. Group-a tel zawng zawngte chuan an awmna kohhran upate kaihhruaina hnuaiah rawng an bâwl a ni. Upate chuan group mamawh enkawlnaah kaihhruaina inbûk tâwk tak an pe ang a, hma an lâkpui ang. Bial kantuin chu group awmna kohhran a tlawh hunah, chu group chu a thawhpui ang a, hma a sâwn dân leh an thil mamawhte chu tâwi fel takin branch office hnênah a hrilh ang. A hnuah, chu group chu kohhran a rawn ni thei ang. A thawktu zawng zawngte’n theocratic kaihruaina an zawm chuan, Pathian Jehova chu a lâwm ang.—1 Kor. 1:10; 3:5, 6.

A HUHOVA THU HRILHNA

⁴⁵ Kristian inpumpêk tawhte chuan mi dangte hnêna chanchin ṭha hril tûrin mawhphurhna an nei a. Chumi tih theih dân kawng tam tak awm mah se, kan zînga a tam zâwkte chuan mi dangte ruala thu hrilhna neih chu kan ngaihlu a ni. (Lk. 10:1) Hemi avâng hian kohhrana mite chu thlawhhma rawngbâwlnaa chhuak tûrin chawlhkâr chhûng leh kâr tâwpahte hian an inhmukhâwm ṭhîn. Sawrkâr chawlh nîahte hian unau tam takte chuan chawlh an neih theih avângin, chu chuan a huhova thu hrilh theihna hun remchâng tak a pe a. Kohhran Service Committee chuan chhûn leh tlai lama thu hrilhna atâna inhmuhkhâwmna inkhâwm chu a ruahman ang.

⁴⁶ A huhova thu hrilhna avângin thuchhuahtute chuan thawhho theihna leh “inthlamuan tawn theihna” hun an nei a. (Rom 1:12) Thuchhuahtu thar zualte chuan tawnhriat nei thuchhuahtute thawhpuiin, inzirna an nei thei a ni. Hmun ṭhenkhatah chuan, a him zâwk nân thuchhuahtu pahnih emaw, a aia tam emaw inkawp chu a ṭha mai thei. Nangmaha thawh i tum a nih pawhin, inhmuhkhâwmna hmuna kal chuan mi tinte chu a tichak thei a. Mi dangte pawh bial chhûngah rawngbâwlin an chhuak tih hriatna chuan inrintâwkna a pe thei che. Thlawhhma rawngbâwlna atâna inhmuhkhâwmna inkhâwm chu nî tina neih a nih chuan, pioneer-te leh mi dangte chuan chutiang inkhâwm zawng zawnga tel kim ngei ngei tûrah an inngai tûr a ni lo. Mahse, chawlhkâr tinin thlawhhma rawngbâwlna atâna inhmuhkhâwmna inkhâwm ṭhenkhatah tal an tel theih a rinawm.

⁴⁷ Isua leh a tirhkohte entawn tûr siam zui chu i tum ṭheuh vang u! He Ram chanchin ṭha hrilh rawngbâwlna pawimawh taka theih tâwp chhuaha tel kan tumna chu Pathian Jehova’n mal a sâwm ang tih kan chiang thei a ni.—Lk. 9:57-62.