I Chhia leh Ṭha Hriatna Vêng Ṭha Rawh

1. Kum 2013 rawngbâwl kum atâna special inkhâwmpui thupui chu eng nge ni a, chu chuan eng thil tum nge a neih?

¹ Nî tin hian kan chhia leh ṭha hriatna min kalhtîr thei dinhmunte kan tawng ṭhîn a. Chuvângin, September 1, 2012-a inṭan, kum 2013 rawngbâwl kum atâna special inkhâwmpui atân “I Chhia leh Ṭha Hriatna Vêng Ṭha Rawh” tih thupui chu hman a ni. (1 Tim. 1:19) Chu inkhâwmpui chu Siamtu hnên aṭanga kan dawn he thilpêk ropui tak kan hman dân chungchâng ngun taka ngaihven tûra min ṭanpui ṭheuh tûra duan a ni.

2. Thusawite chuan eng zawhna pawimawh takte nge a rawn chhân ang?

² Hêng Thute Hi Hriat Tum Rawh: Thusawite chuan chhia leh ṭha hriatna chungchânga zawhna pawimawh pasarihte a rawn chhâng ang:

• Chhia leh ṭha hriatna tâna thil hlauhawm chu eng nge ni?

• Engtin nge kan chhia leh ṭha hriatna chu kan sawizawi theih?

• Engtin nge mi zawng zawngte thisen laka kan hul theih?

• Bible thu bulte ngaihtuah a, chu mi mila thiltihna chuan kan chungchâng eng nge a târ lan?

• Engtin nge mi dangte chhia leh ṭha hriatna tihhliamna chu kan pumpelh theih ang?

• Ṭhalaite u, tlâwm tûra nêksâwr in nih hunah engtin nge in tuar hram hram theih?

• Thlarau kaihhruai chhia leh ṭha hriatna zuitute chuan eng malsâwmnate nge an dawn?

3. Engtin nge special inkhâwmpui chu kan hlâwkpui theih?

³ Setana’n kan chhia leh ṭha hriatna tihkhawloh a tumna chu Jehova ṭanpuinain kan do tlat thei a. A Thu leh a inawpna kal tlangin, hmangaihna ngah tak kan Pa vâna mi chuan: “Hei hi kawng a nih hi, tah hian kal rawh,” tiin min hrilh a ni. (Is. 30:21) He special inkhâwmpui hi Jehova’n chutiang kaihhruaina min pêk dân kawng khat a ni. Chuvângin, thusawi zawng zawnga tel vek tûrin ruahmanna siam ang che. Ṭha takin ngaithla la, a thute i nunpui dân tûr ngaihtuah bawk rawh. Chhûngkuain thusawite chu sawiho leh ang che u. Kaihhruaina kan dawnte a taka nunpuina chuan “chhia leh ṭha hriatna thiang tak nei” zawm zêl tûrin min tichak ang a, Jehova nêna kan inlaichînna tichhe thei Setana khawvêl nawmsipbâwlna lama thlêmna pumpelh tûrin min ṭanpui ang.—1 Pet. 3:16.