Tûn Hriatrengna Hun Chhûng Hian, Jehova leh Isua Ṭhahnemngaihna I Entawn Ang Em?

1. Jehova Thuhretute chuan Hriatrengna hun chhûngin eng tih nge an tum tlat?

¹ Jehova chuan a thiltum chu ṭhahnemngahna nên a hlen chhuak a. Pathian Ram malsâwmna ṭhenkhat chungchângah, Isaia 9:7 chuan: “Sipaihote LALPA ṭhahnemngaihna chuan chûng chu a ti ang,” tiin a sawi a ni. Chutiang bawkin leia rawng a bâwl chhûng khân, Pathian Fapa chuan biakna dik atâna ṭhahnemngaihna nasa tak a lantîr a. (Joh. 2:13-17; 4:34) Kum tina Hriatrengna hun a lo thlen apiang hian, khawvêl puma thuchhuahtu maktaduai tam tak chuan an rawngbâwlna tipungin Jehova leh Isua ṭhahnemngaihna chu an entawn a ni. An zîngah i tel ve ang em?

2. Ṭhahnemngaihna chuan March 7-ah eng ti ṭan tûrin nge min chêttîr ang?

² Hriatrengna Campaign: Kumin Hriatrengna sâwmna campaign chu Inrinni, March 7-ah ṭan a ni ang. Rawngbâwlnaah ṭhahnemngai taka tel theih nân tûna ṭanin ruahmanna insiam ang che. Kohhrante chuan a tam thei ang bera an thuhrilhna bialte tlawh chhuah an phûr hle ngei ang. I Bible zirpuite, tlawhkîr te, hnathawhpui te, chhûngkhat te, leh school kalpui te chu sâwmna pein emaw, jw.org hmangin emaw theih tâwp chhuahin sâwm ang che.

3. Engtin nge March leh April thla chhûng hian kan rawngbâwlna kan zauh theih?

³ Auxiliary Pioneer: Ṭhahnemngaihna chuan kan rawngbâwlna zauh tûrin min chêttîr bawk ang. March leh April thlaah hian, dârkâr 30 hmua auxiliary pioneer thawh theih a nih dâwn avângin, mi tam tak chuan an thawk thei ngei ang. Chhûngkuaa Pathian biakna neih hunah emaw, mahnia inzirna neih hunah emaw i thawh theih dân tûr chu ṭawngṭaina nên ngun takin ngaihtuah ang che. (Thuf. 15:22) He campaign tûr atâna i phûrna hian mi dangte pawh ṭhahnemngai taka thawk tûrin a chawktho thei a ni. Thawk tam leh zual tûra mi mal insiamremna i neih chuan, Isua ṭhahnemngaihna chu i entawn a ni ang.—Mk. 6:31-34.

4. Jehova leh Isua ṭhahnêmngaihna entawnna aṭangin eng lâwmmante nge lo awm?

⁴ He Hriatrengna hun chhûnga Jehova leh Isua ṭhahnemngaihna kan entawnna chuan lâwmman tam tak a thlen ngei ang. Thu hrilhna biala mi tam takte chuan thu hrilhna a dawng ang a. Jehova rawngbâwlna leh mi dangte ṭanpuina aṭanga lo awm hlimna leh lungâwina chu kan dawng ang. (Tirh. 20:35) A pawimawh berah chuan, kan Pathian ṭhahnemngai tak leh a Fapa kan tilâwm ang.