Chhiartute Zawhna

Engvângin nge Jehova Thuhretute thu leh hla chhuahte chu website dangah leh social media-ahte pho chhuah phal a nih loh?

Mi ṭhenkhat chuan kan thu leh hla chhuahte chu a thlâwnna kan pêk avângin chûngte chu copy a, website dangah leh social media-ahte pho chhuah theih tûrah an ngai thei a. Mahse, chu chuan buaina khîrh tak tak a siam theih bâkah, kan website tâna Terms of Usea chu a bawhchhe thei a ni. Chûng Terms chuan “milem te, mobile leh tablet aṭanga hmuh theih thu leh hla chhuah te, chhinchhiahna te, rimawi te, thlalâk te, video-te, a nih loh leh Internet (file sharing site-te, video-sharing site, a nih loh leh social network engpawh) website aṭanga thuziakte chu pho chhuah” phal a ni lo tih chiang takin a sawi a ni. Engvângin nge chûng dânte awm chu a ngaih?

Kan website-a thil awm zawng zawng hi copyrighted a ni a, chu chu dân hmanga humhim tihna a ni. Hei hi hman sualna laka vênghimtu a nih avângin a pawimawh hle. Kalpêngte leh kan hnathawh tihkhaw loh tumtute chuan Jehova Thuhretute leh mi dangte ngaihvên tûrin an website-ah kan thu leh hla chhuahte an dah ṭhîn a. Chu bâkah, chûng site-ahte chuan mite rinhlehna neihtîr thei thilte pawh an dah a ni. (Sâm 26:4; Thufingte 22:5) Mi dang lehte chuan kan thu leh hla chhuahte, leh kan jw.org-a kan chhinchhiahnate chu an faknaah te, mobile app-ah te, leh an thil zawrhah te an hmang a. Mahse, kan thu leh hla chhuahte leh kan chhinchhiahnate chu dân hmanga humhim a nih avângin, chutianga ti tawh lo tûrin court-ah kan khing thei a ni. (Thufingte 27:12) Mahse, mi ṭhenkhat emaw, kan unaute emaw pawh ni se, kan thu leh hla chhuahte chu website danga post, a nih loh leh kan jw.org-a chhinchhiahnate chu an thil zawrhnaa hman kan phal a nih chuan, court-in min ṭanpui duh lo pawh a ni thei.

Kan thu leh hla chhuahte chu kan jw.org aṭang ni lovin, website dang aṭanga kan download a nih chuan, chu chu a hlauhawm thei a ni. Jehova chuan thlarau lam chaw chu “bawi rinawm, fing tak” kal tlang chauhvin min pe a. (Matthaia 24:45) Chu “bawi” chuan thlarau lam chaw pêk chhuah nân kan official website—www.jw.org, tv.jw.org, leh wol.jw.org-te chauh a hmang a ni. Chu bâkah, mobile hmangtute tân official app pathum chuah kan nei a, chûngte chu—JW Language, JW Library, leh JW Library Sign Language-te a ni. Chûng site-te leh app-ahte chuan eng fakna mah, a nih loh leh Setana khawvêla thil engmah kan hmu lo vang. Mahse, website, a nih loh leh app dang aṭanga kan thu leh hla chhuahte kan la a nih chuan, an siam danglam mai theih avângin a hlauhawm thei a ni.—Sâm 18:26; 19:8.

Chu bâkah, mite’n comment an pêk theihna hmun website-ah kan thu leh hlate kan dah chhuah chuan kalpêngte leh mi dangte’n Jehova inawpna pâwl chu an sawichhe thei a. Tichuan, unau ṭhenkhat chu chûng mite nên an inhnial a, chu chuan Jehova hming a tihliau lehzual a ni. Internet-a chutianga sawihona neih chu mite ngaihtuahna siam ṭhat nân leh thutak hre tûra ṭanpui nân tih dân ṭha a ni lo. (1 Timothea 6:3-5; 2 Timothea 2:23-25) Chu bâkah, mi ṭhenkhat chuan website-te leh social media-te siamin inawpna pâwla mi emaw, Governing Body emaw ni angin an inchhâl a. Mahse, chûngte chu inbumna a ni. Governing Body member tumah hian eng social media site-ah mah mi mal Web page emaw, account emaw an nei lo.

Mite chu jw.org tlawh tûra kan hrilh hian, “ram chanchin ṭha” hriattîrna chu kan thlâwp a ni. (Matthaia 24:14) Kan website-te leh app-te chu a changkâng telh telh a. Mi zawng zawngin hlâwkpui ṭheuh se tih kan duh a ni. Chuvângin, mi dangte chu e-mail hmanga kan thu leh hla chhuahte pêk emaw, kan website luh theihna link emaw thawn chu phal a ni. Chutiang kawng chuan, Jehova’n “bawi, rinawm leh fing” hmanga thlarau lam chaw a pêk chhuahna awm chhun chu mite kan hriattîr a ni ang.