Ṭhen 2
Tuarna Awm Tawh Lohna Lei Chu
1, 2. Mi tam takten eng ngaihdân hrang hlak nge an neih?
AMAHERAWHCHU, khawvêl pumpuia mi nuai tam takte chuan thlîr dân hrang hlak an nei thung a. Mihringte tâna hun lo thleng tûr mak tak mai an lo hmu lâwk a ni. He leiah ngei hian sualna leh tuarna awm tawh lohna khawvêl a lo awm thuai dâwn, an ti a. Thil ṭha lo rêng rêng hi thenfai a ni thuai ang a, khawvêl thar hlak din a ni dâwn a ni tih hi an ring tâwk a ni. He khawvêl thar lungphûm chu tûnah ngei hian phûm mêk a nih thu an sawi bawk!
2 Hêng mite hian khawvêl thar chu indona, nunrâwnna, dân bawhchhiatna, dik lo taka rorêlna, leh retheihnate aṭangin a zalên dâwn a ni tih hi an ring a. Natna, lungngaihna, mittui tlâk, leh thihna ngei pawh awm tawh lohna khawvêl a ni dâwn a ni. Chumi hunah chuan mite chu ṭha famkim tûrin an ṭhang chho ang a, lei paradisah hlim takin chatuanin an chêng dâwn a ni. Mitthi tawhte pawh tihnun leh an ni ang a, chatuana nung tûrin hun remchâng an nei ve dâwn asin!
3, 4. Engvângin nge chutiang mite chuan an ngaihdân chu an rin tâwk?
3 He hun lo thleng tûr thlîrna hi mumang mai, duhthusâm mai em ni? Ni lo ve, teuh lo mai. He paradis lo thleng tûr hi pumpelh theih a ni lo tih chu rinna sakhata innghat tlat a ni. (Hebrai 11:1) Engvângin nge chuti taka an chian? A chhan chu khawvêl pumpui Siamtu ropui chuan a lo tiam tawh avângin a ni.
4 Pathian thutiam chungchâng hi, Bible chuan: “Jehova in Pathianin in chungchâng a ṭha lam a lo sawi tawh zawng zawngte kha thlâwn pakhat mah a awm lo; in chungah a lo thleng ta vek a, pakhat mah thlâwn a awm lo ve.” “Pathian chu dâwt hmang mihring mai a ni lo . . . A sawi tawh chu a ti lo vang em ni? A lo sawi tawh chu a tipuitling lo vang em ni?” “Sipaihote Jehova chuan hetianga sawiin chhia a chham ta, ‘Matheilovin ka ngaihtuah ang tak hian a lo thleng ang a; ka ruat ang tak hian a awm bawk ang,’” ti tein a lo sawi a ni.— Josua 23:14; Number 23:19; Isaia 14:24.
5. Eng zawhnate nge chhân ngai?
5 Engpawh nise, tuarna awm tawh lohna lei paradis din chu Pathian thil tum a nih si chuan, engvângin nge atîrah khân thil ṭha lo thlen tîr a phal? Engvângin nge a dik lo tidik tûrin tûn thlenga kum sâng ruk a nghah kher? Kum zabi tam taka tuarna zozaite khân Pathian hian min ngaihsak tak tak lohzia emaw, a awm tak tak lohzia emaw pawh a entîr thei dâwn lâwm ni?