Zirlai 13

Engtin Nge Sakhaw Dik I Hmuh Theih Ang?

Sakhua zawng zawng hian Pathian a tilâwm nge, pakhat chauhvin? (1)

Engvângin nge Kristiana inchhâl sakhaw tam tak a awm? (2)

Engtin nge Kristian dikte chu i hriat hran theih ang? (3-7)

1. Isua chuan Kristian sakhaw dik pakhat a rawn din a. Chuvângin, tûn laiah pawh Pathian Jehova betu pâwl dik tak pakhat chauh a awm tûr a ni. (Johana 4:​23, 24; Ephesi 4:​4, 5) Bible chuan mi tlêm tê chauh nunna kawngka zîmah an kal tih min hriattîr a ni.​—⁠Matthaia 7:​13, 14.

2. Bible chuan tirhkohte an thih zawh vek hnuah chuan, Kristian kohhran chhûngah zirtîrna dik lo leh thiltih ṭha lo tak takte zawi zawiin a lo lût dâwn tih a sawi lâwk a. Mite chuan Isua zui lova anmahni zui zâwk tûrin ringtute chu an hîp bo vang. (Matthaia 7:​15, 21-23; Tirhkohte 20:​29, 30) Chu mi avâng chuan, Kristiana inchhâl sakhaw hrang hrang tam tak kan hmu a ni. Engtin nge Kristian dikte chu kan hriat hran theih ang?

3. Kristian dikte chhinchhiahna langsâr ber chu an zînga inhmangaihna tak tak an nei hi a ni. (Johana 13:​34, 35) Vun rawng dangte emaw, hnam dangte emaw aia ṭha zâwka inngai tûra zirtîr an ni lo va. Ram dang mite haw tûra zirtîr lah an ni hek lo. (Tirhkohte 10:​34, 35) Chuvângin, indonaahte an tel lo va. Kristian dikte chu unau angin an inen vek a ni.​—⁠1 Johana 4:​20, 21.

4. Sakhaw dik chhinchhiahna dang leh chu, a mi leh sate’n Bible zahna thûk tak an nei hi a ni. Bible chu Pathian Thu angin an pawm a, a thusawite an ring bawk. (Johana 17:17; 2 Timothea 3:​16, 17) Pathian Thu hi mihring ngaih dânte emaw, thil chînte emaw aiin nasa takin an ngai pawimawh zâwk a. (Matthaia 15:​1-3, 7-9) Bible mila nî tina nun chu an tum bawk. Chuvângin, an sawi loh zâwngin an khawsa ngai lo a ni.​—⁠Tita 1:​15, 16.

5. Sakhaw dik chuan Pathian hming a chawimawi bawk tûr a ni. (Matthaia 6:⁠9) Isua chuan Pathian hming, Jehova chu mi dangte a hriattîr a. Kristian dikte pawhin chutiang chuan an ti ve tûr a ni. (Johana 17:​6, 26; Rom 10:​13, 14) In vêngchhûngah hian tute’n nge Pathian hming mi dangte hnênah hrilh ṭhîn?

6. Kristian dikte chuan Pathian Ram chanchin an hril tûr a ni. Isua pawhin chutiang chuan a ti si a. Ani chuan englai pawhin Lalram chanchin chu a sawi reng ṭhîn a ni. (Luka 8:⁠1) A zirtîrte hnênah pawh, chu thu chu lei pum puia hril tûrin thu a pe a. (Matthaia 24:14; 28:​19, 20) Kristian dikte chuan Pathian Ram chauhvin he leiah hian remna leh muanna dik a rawn thlen dâwn tih an ring a ni.​—⁠Sâm 146:​3-5.

7. Isua zirtîrte chu he suahsualna khawvêla mi an ni tûr a ni lo. (Johana 17:16) Khawvêl politics-ah leh vêngchhûng buainaahte an tel ngai lo va. Khawvêla hluar êm êm, nungchang hlauhawm te, thiltih te, leh rilru put hmangte lakah an inthiar fihlîm a ni. (Jakoba 1:27; 4:⁠4) Hêng Kristianna dik chhinchhiahna neitu sakhaw pâwl pakhat in vêngchhûngah a awm em?

[Phêk 26, 27-naa milemte]

Kristian dikte chuan inhmangaih tawnna an nei a, Bible an zah a, Pathian Ram chanchin an hril bawk