ZIRLAI 10
Engtin Nge Biakna Dik I Hriat Theih Ang?
1. Sakhaw dik pakhat chauh a awm em?
“Zâwlnei derte lakah fimkhur rawh u.”—MATTHAIA 7:15.
Isua chuan a hnungzuitute hnênah chuan sakhaw dik pakhat chauh a zirtîr a. Chu chu chatuan nunnaa hruaitu kawng ang a ni. Chu kawng chungchângah Isua chuan: “A hmutute pawh tlêmtê an ni,” tiin a sawi. (Matthaia 7:14) Pathian chuan a Thu, Bible-a innghat biakna chauh chu a pawm a. Pathian betu dikte chu rinna hmun khatah an inpumkhat tlat a ni.— Johana 4:23, 24; 14:6; Ephesi 4:4, 5 chhiar rawh.
Pathianin Biakna Zawng Zawng A Pawm Em? tih video en rawh
2. Kristian dik lote chungthu-ah Isua’n eng nge a sawi?
“Pathian hria an inti a, . . . an thiltihin an phatsan si.”—TITA 1:16
Isua chuan zâwlnei derte’n Kristianna an tibawlhhlawh dâwn tih a sawi lâwk a. Anni chu a pâwnlâng mai chuan Pathian betu dikte an ang hle. An kohhrante chu Kristian dik niin an inchhâl a. Mahse, chutiang mite chu an nihna aṭangin i hre thei a ni. Engtin nge? Biakna dik chauhvin mite hriat theih khawp mize ṭha leh thiltih ṭhate târ langtu Kristian dik a rah chhuak si a.—Matthaia 7:13-23 chhiar rawh.
3. Engtin nge Pathian betu dikte chu i hriat hran theih ang?
Hriat hran theih dân chi ngate hi ngaihtuah ang che:
Pathian betu dikte chuan Bible chu Pathian Thu angin an zah. Anni chuan Bible thu bulte mila nun an tum hrâm hrâm ṭhîn. Chuvângin, sakhaw dik chu mihring ngaih dâna innghat sakhuate lakah chuan a danglam hle. (Matthaia 15:7-9) Pathian betu dikte chu an thu hrilh nêna inmilin an nung ṭhîn.—Johana 17:17; 2 Timothea 3:16, 17 chhiar rawh.
Isua hnungzuitu dikte chuan Pathian hming, Jehova chu an chawimawi. Isua chuan Pathian hming chu hriattîrin a chawimawi a. Mite chu Pathian hre tûra ṭanpuiin, Pathian hming zahawm, a nih loh leh thianghlim tûra ṭawngṭai tûrin a zirtîr bawk. (Matthaia 6:9) In vêngah hian eng sakhuain nge Pathian hming hriattîr ṭhîn?—Johana 17:26; Rom 10:13, 14 chhiar rawh.
Kristian dikte chuan Pathian Ram chanchin an hril. Pathian chuan Isua chu Lalram chanchin ṭha hril tûrin a rawn tîr a. Pathian Ram chu mihringte beisei tûr awmchhun a ni. Isua chuan a thih nî thlengin chu Ram chanchin chu a hril a. (Luka 4:43; 8:1; 23:42, 43) A zirtîrte pawhin Pathian Ram chanchin chu an hril dâwn tih a sawi a ni. Mi tuemawin Pathian Ram chanchin hrilh tûra a rawn pan che chuan, eng sakhaw vuantu nge nia i rin?—Matthaia 24:14 chhiar rawh.
Isua hnungzuitute chu he khawvêl suaksual laka mi an ni lo. Anni chu politics emaw, mipui intihbuaina emawa an tel ngai loh dân aṭangin i hre hrang thei a. (Johana 17:16; 18:36) Chu bâkah, khawvêl thil chîn leh rilru put hmang hlauhawm takte pawh an entawn lo bawk.—Jakoba 4:4 chhiar rawh.
Kristian dikte chuan inhmangaih tawnna langsâr tak an nei. Anni chuan Pathian Thu aṭangin hnam tina mite zah dân an zir a. Sakhaw dik lote’n hnam leh ramte indona chu nasa takin thlâwp fo ṭhîn mah se, Pathian betu dikte chuan an thlâwp ve duh lo. (Mika 4:1-3) Chu ai mah chuan, sakhaw dik vuantute chuan mahni hmasial lo takin an hun leh an thil neihte chu mi dangte ṭanpui nân leh fuih nân an hmang zâwk a ni.—Johana 13:34, 35; 1 Johana 4:20 chhiar rawh.
4. Sakhaw dik vuantu pâwl i thliar hrang thei tawh em?
Eng sakhaw pâwlin nge an zirtîrna zawng zawngah Pathian Thu ṭanchhan a, Pathian hming chawimawi a, Pathian Ram chu mihringte beisei tûr awmchhun a nihzia puang chhuak? Eng pâwlin nge hmangaihna nunpui a, indona thlâwp ve duh lo? Eng nge i ngaih dân?—1 Johana 3:10-12 chhiar rawh.