Kût Nîte Kan Lâwm Tûr A Ni Em?

TUN lai khawvêl hmun tam taka an lawm sakhua leh sawrkâr kût nîte hi Bible aṭanga chhuak a ni lo. A nih leh chûng kût nîte lawmna chu khawi aṭanga lo inṭan nge ni? Library-ah lehkhabu chhiar tûrin i kal ṭhîn a nih chuan, i chênna rama sakhaw kût nî lâr takte chungchâng lehkhabu chi hrang hrangin an sawi dân chu mak i ti ngawt ang. Entîrna ṭhenkhat lo târ lang ta ila.

Easter. “Thuthlung Thar bu-ah hian Easter hman a nih thu târ lanna rêng rêng a awm lo,” tiin The Encyclopedia Britanica chuan a sawi a. Engtin nge Easter chu a lo inṭan? Milem betute hnên aṭanga lo chhuak a ni. He kût nî hi Isua thawhlehna hriat reng nâna lawm ni mah se, Esther nêna inkûngkaiha thiltih ṭhinte hi Kristiante tih chi a ni lo.

Kum Thar Lawmna. Kum thar lawmna nêna inkûngkaih thiltih dânte chu a ram azirin a inang lo thluah a. He thil lo chhuah dân chungchângah The World Book Encyclopedia chuan: “Rom hruaitu Julius Caesar chuan B.C. 46 khân January ni 1 hi Kum Thar Nî atân a lo ruat a. Rom-ho chuan chu nî chu kawngkapui te, kawngkâ te, leh thil bulṭanna te pathian, Jenus-a tân an serh hrang a ni. January thla hming hi an pathian Janus hming chawia phuah a ni a; ani chuan hmai pahnih a nei a, pakhat chuan hma lam a en a, pakhat chuan hnung lam a hawi thung a ni,” tiin a sawi. Chuvângin, Kum Thar lawm hi milem be-ho thiltih aṭanga lâk a ni.

Kût Ni Dangte. Khawvêl pumpuia an kût ni lawmte zawng zawng chu sawi zawh vek theih a ni lo va. Mahse, mihring emaw, mihringte pâwl din emaw chawimawina kût nîte rêng rêng chu, Jehova tân pawm theih a ni lo. (Jeremia 17:5-7; Tirhkohte 10:25, 26) Chu bâkah, sakhaw kût ni lawmte chu a lo chhuahna azirin, Pathianin a pawmin, a pawm lo dâwn tih hre reng bawk ang che. (Isaia 52:11; Thu Puan 18:4) He lehkhabu Bung 16-naa sawi lan Bible thu bulte chuan sawrkâr kût ni lawmnaa tel chungchâng Pathian thlîr dân hre thei tûrin a ṭanpui ang che.