Pathianin Abrahama Hnênah Thu A Thlung

NOVA dam laia Tuilêt a thlenna pawh kum 350 vêl a ni tawh a. Thlahtu Abrahama chu Ur khawpui hausa takah a khawsa a, chu mi hmun chu tûn laia Iraq ram chhûngah a awm a ni. Abrahama chuan rinna nasa tak a nei a. Mahse a rinna chu fiah a ni ta.

Pathian Jehova chuan Abrahama hnênah a pianna ram chhuahsan a, ram danga kal tûrin a hrilh a, chu ram chu Kanaan a lo ni reng a. Abrahama chuan î-hê lovin a âwih nghâl vat a ni. Ani chuan a nupui Sari leh a unaupa fapa Lota pawh tiamin a chhûngte chu a hruai a, rei tak an zin hnuah chuan Kanaan rama puan ina khawsa mi an lo ni ta a. Pathian Jehova chuan Abrahama hnêna thu a thlunnaah, a thlahte chu hnam ropui tak a nihtîr ang a, amahah chuan leia chhûngkua zawng zawngte malsâwm an ni bawk ang a; tin, a thlahte chuan Kanaan ram an luah dâwn tih A tiam a ni.

Abrahama leh Lota chu an hausa ta hle a, berâm leh bâwng rual an nei ṭeuh va. A hnua an awm hran a han ngaih tâkah, Abrahama chuan mahni hmasialna nei lovin Lota chu a ram duhna lai a thlantîr a. Lota chuan Jordan Lui kiang lei ṭhatna hmun chu thlangin, Sodom khaw kiangah a inbêngbel ta hrih a ni. Amaherawhchu, Sodom khaw mite nungchang chu a bawlhhlawh êm êm a—Pathian Jehova laka mi sual takte an ni.

A hnuah, Pathian Jehova chuan Abrahama hnênah a thlahte chu vâna arsi zât ang tluk zetin an tam dâwn tih a tiam nawn leh a. Abrahama chuan chu thutiam chu a ring a ni. Mahse, Abrahama nupui duh tak Sari chuan fa a la nei si lo. Tichuan, Abrahama chu kum 99 mi a nih a, Sari chu kum 90 dâwn lai a han nih chuan, Pathianin Abrahama hnênah Sari’n fapa a neih tûr thu a hrilh ta a. Pathian sawi ang ngei chuan, Sari chuan Isaaka a hring a. Abrahama chuan fa dangte pawh nei mah se, Eden huana Pathian tiam Chhan Chhuaktu chu Isaaka thlah aṭanga lo lang tûr a ni.

Chutih lai chuan, Lota leh a chhûngkua chu Sodom khuaah an khawsa a; mahse, mi fel Lota chu khawpuia awm mi bawlhhlawhte ang a ni ve lo. Pathian Jehova’n Sodom khaw chunga rorêlna thlentîr a tum chuan, ani chuan chhiatna lo thleng tûr laka Lota vaukhân tûrin vântirhkohte a tîr a. Chûng vântirhkohte chuan Lota leh a chhûngte chu Sodom khua tlân chhiatsan tûrin an tur a, hnung lama hawi lêt lo tûrin an hrilh a ni. Tichuan Pathianin Sodom leh a kianga khawpui dang Gomorra chungah vân ata mei leh kât surtîrin a chhûnga awm zawng zawngte chu a tiboral vek a ni. Lota leh a fanu pahnihte chu an dam khawchhuak a. Mahse, Lota nupui chu a hawi lêt a, a chhan chu a thil neih a kalsan tâkte a ui vâng a ni ngei ang. Chu a thu âwih lohna avâng chuan, a nun a chân ta a ni.

—Genesis 11:10–19:38 a ṭanchhan.