Engvângin Nge Inkhâwmnaah Ṭha Taka Kan Inchei?

He brochure-a milemahte hian kohhran inkhâwmnaa Jehova Thuhretute inchei ṭhat dân hi i lo hmu em? Engah nge silhfên leh inchei dân chu kan ngaih pawimawh êm êm?

Pathian kan zahzia târ lan nân. Pathian chuan pâwn lama kan lan dân piah lam a en ṭhîn tih chu a dik ngei mai. (1 Samuela 16:7) Mahse, amah chibai bûk tûra kan kal khâwm hian, amah leh kan unaute zahna lantîr chu kan duh a ni. Court-a rorêltu hmaa ding tûr ni ta ila, a nihna kan zah avângin kan lan dân chu kan ngaih pawimawh ngei a rinawm. Chutiang bawkin, inkhâwmnaa kan lan dân ṭha chuan “lei chung zawng zawng Rorêltu,” Pathian Jehova leh amah biakna hmun kan zahzia a târ lang a ni.—Genesis 18:25.

Kan nunpui Pathian thu bulte târ lan nân. Bible chuan Kristiante chu ‘inthlahdah lo leh inbel lutuk lo’ tûrin min fuih a. (1 Timothea 2:9, 10) ‘Inbel lutuk lo’ tih awmzia chu inchei uar tak, mipat hmeichhiatna lama mi hîp thei chi, a nih loh leh taksa lang lo lai tûr lang ang chi silhfênte hmanga mahni lama mi rilru lâkna pumpelh hi a ni a. Tin, ‘inthlahdah lohna’ chuan thawmhnaw ṭha pângngai tak, duhdah tak leh lian hliap hluap emaw, a lutuka cheimawi emaw ni lote thlang tûrin min ṭanpui bawk. Hêng thu bulte huam chhûngah pawh hian mi mal duh thlan tûr tam tak a la awm tho a ni. Engmah sawi lo pawhin, kan lan dân mawi leh ṭha tak chuan ‘min Chhandamtu zirtîrna thu a cheimawi’ thei a, ‘Pathian a chawimawi’ thei bawk. (Tita 2:9, 10; 1 Petera 2:12) Inkhâwmnaa ṭha taka kan inchei hian, mi dangte chu Jehova biakna thlîr dân ṭha kan neihtîr a ni.

Thawmhnaw ṭha pângngai i neih loh pawhin Kingdom Hall-a inkhâwm chu hreh suh ang che. Thawmhnaw inâwm tâwk, fai tak leh mawi hnai tak ni tûr chuan man to tak a nih kher a ngai lo a ni.

• Pathian kan biak huna kan inchei dân chu eng ang takin nge a pawimawh?

• Kan silhfên leh inchei dân tûr thlanna kawngah eng thu bulte’n nge min kaihruai?