“Pathian Thiltih Ropuite” Tihphura Awm

“Pathian thiltih ropuite an sawi, mahni ṭawng ṭheuhvin kan hriat si hi!”​—TIRHKOHTE 2:11.

1, 2. C.E. 33, Pentikost nî khân eng thil mak tak nge Jerusalemah thleng?

C.E. 33, nipui tâwp dâwn lam tûk khat chu, Jerusalem in pakhata awm khâwm Isua Krista zirtîr a hmei a pate chungah thilmak tak mai a lo thleng a. “Thâwklehkhatan vân ata ri, thlipui tleh angin a lo thleng ta phut a. Tin, chu chuan an ṭhutna in chu a tikhat ta vek a, tin, leite te, . . . mei angin an hnênah a lo inlâr ta a. . . . An zain thlarau thianghlimin an khat ta vek a, thlarauvin a ṭawngtîr ang zêlin ṭawng dangin an lo ṭawng ta a.”​—Tirhkohte 2:​2-4, 15.

² Kawngka bulah chuan mipui tam tak an lo pungkhâwm a. Chûng zîngah chuan Pentikost hmang tûra Jerusalema rawn kal “Pathian ngaihsak,” ram danga piang Juda mite pawh an tel a. Chûng mi zawng zawngte chuan “Pathian thiltih ropuite” chungchâng zirtîrte sawi chu anmahni ṭawng ṭheuhva an hriat avângin mak an ti êm êm a ni. Chuta thusawitu zawng zawng chu Galili mi vek an ni si a, engtin nge a ngaithlatute’n mahni ṭawng ṭheuhva an hriat theih si?​—Tirhkohte 2:​5-8, 11.

3. Pentikost nî khân, eng thu nge Petera’n mipuite hnêna a hrilh?

³ Chûng Galili mite zînga pakhat chu tirhkoh Petera a ni. Ani chuan, chawlhkâr engemaw zât lek kalta khân, Isua Krista chu mi sualte’n an thah thu a sawi a. Nimahsela, Pathianin a Fapa thi tawh chu a kaitho leh a ni. Chu mi hnuah, Isua chu a zirtîr mi tam takte hnênah a inlâr a, chûng a inlârnate zîngah chuan Petera leh tûna an zînga awmve mi dangte pawh an tel a ni. Tin, ni sâwm lek kalta khân, Isua chu vânah a lâwn chho va. Amah chu a ni, a zirtîrte chunga thlarau thianghlim leihbawtu chu ni. Chu chuan Pentikost hmangtute tân chuan awmzia engemaw tal a nei em? Nei tehrêng mai. Isua thihna chuan an sualte ngaihdamna leh amah an rin phawt chuan “thlarau thianghlim pêk” an dawn theihna kawng a hawng a ni. (Tirhkohte 2:​22-24, 32, 33, 38) Engtin nge chûng a thlîrtute’n “Pathian thiltih ropuite” an hriat chu an chhân lêt? Engtin nge he mi chungchâng thuziak hian Jehova rawng kan bâwlna chu chhût chiang tûrin min ṭanpui theih?

Thil Ti Tûra Chêttîr!

4. C.E. 33 Pentikost nî khân, Joela hrilh lâwkna eng nge thleng famkim?

⁴ Thlarau thianghlim an dawn hnu chuan, Jerusalema zirtîrte chuan mi dangte hnêna chhandamna chanchin ṭha hrilh chu an ṭan nghâl a, chu mi zînga lo kal khâwmte hnênah chuan an hrilh ṭan nghâl a ni. An thuhrilhna chuan an hun hma kum zabi pariata Pethuela fapa, Joela hrilh lâwkna ropui tak chu a tifamkim a ni: “Mi zawng zawng chungah ka thlarau ka leih ang a; tichuan in fapate, in fanuten ka thu an hril [“hrilh lâwk,” NW] ang a, in putarten mumangah an mang ang a, in tlângvâlten inlârnate an hmu ang a: chûng nîahte chuan ka bâwihpate, ka bâwihnute chungah pawh ka thlarau ka leih ang . . . LALPA ni ropui tak leh râpthlâk tak chu a lo thlen hmâin,” tih chu.​—Joela 1:1; 2:​28, 29, 31; Tirhkohte 2:​17, 18,20.

5. Eng kawngin nge kum zabi pakhatnaa Kristiante khân thu an hrilh lâwk? (Footnote en rawh.)

⁵ Hei hi Pathianin mi zawng zawng, a hmei a pain Davida te, Joela te, leh Debori-te anga zâwlnei nihtîrin, hma lam hun hrilh lâwktuah a hmang vek dâwn tihna em ni? Ni lo ve. Kristian ‘fapate leh fanute, bâwihpate leh bâwihnuten’ thu an hrilh lâwk tih awmzia chu Jehova thlarau chuan a “thiltih ropuite” leh a la tih leh tûrte hriattîr tûrin anni chu a chêttîr dâwn a. Chuvângin, Chungnungbera thusawituah an ṭang dâwn tihna a ni.a A nih leh, engtin nge mipuite’n an chhân lêt?​—Hebrai 1:​1, 2.

6. Petera thusawi an hriatin, mipui tam takte chu engti tûra chêttîr nge an nih?

⁶ Mipuiin Petera thu hrilhfiah an hriat chuan, tam tak chu thil ti tûrin a chêttîr a. Anni chuan lâwm takin ‘a thu an zâwm’ a, “baptisma an chang ta a; chu mi niah chuan mi sâng thum lai belhchhahin an awm a.” (Tirhkohte 2:41) Juda mi dik tak leh Juda saphun an nih angin, Pathian Lehkha Thu hriatna bul chu an nei diam tawh a. Chu an thil hriat tawhsa leh Petera hnên aṭang an zir ṭangkawp chuan “Pa leh Fapa leh thlarau thianghlim hminga” baptisma chan theihna a siam a ni. (Matthaia 28:19) Baptisma an chan hnuah chuan “tirhkohte zirtîrin, . . . an awm reng a.” Chutih rual chuan an rinna chhar thar chu mi dangte an hrilh ṭan bawk a ni. “Nî tin rilru hmun khatin Pathian biak inah chuan ṭhahnemngai takin an awm ṭhîn a, . . . Pathian an fak a, mi zawng zawng lâwmzâwngin an awm ṭhîn.” Chu thuhrilhna avâng chuan, “a chhandam mêk apiangte chu Lalpain nî tin an hnênah a teltîr zêl ṭhîn.” (Tirhkohte 2:​42, 46, 47) Chûng ring tharte awmna ram tam takah chuan Kristian kohhran chu din a ni nghâl zêl a ni. Chutianga pun nachhan engemaw chen chu an in lama an kîrleh hnua “chanchin ṭha” hrilhnaa taihmâk an chhuah nasat vâng a ni tih a chiang hle.​—Kolossa 1:23.

Pathian Thuin Thil A Tithei

7. (a) Engin nge tûn laia hnam tin zînga mite chu Jehova inawpna pâwla hîp? (b) Khawvêl pumpui leh tualchhûng rawngbâwlnaa punna awm thei âwm eng nge i hmuh? (Footnote en rawh.)

⁷ Tûn laia Pathian chhiahhlawh ni duhte chungchâng hi eng nge ni ve? Anni pawhin Pathian Thu ngun taka an zir a ngai a. Chutianga an zir chuan, Jehova chu Pathian “lainatnaa khat, mi khawngaih thei tak, thin nel tak, ngilneihna leh thu tak ngah” a nihzia an lo hre ṭhîn a ni. (Exodus 34:6; Tirhkohte 13:48) A thisena an sual zawng zawng tlêngfai theitu, Isua Krista hmanga Jehova’n ngil nei taka a buatsaih tlanna chu an rawn hria a. (1 Johana 1:7) Tin, “mi felte leh fel lote thawhlehna” awm tûra Pathian thiltum pawh an hriat avângin an lâwm hle ta bawk a ni. (Tirhkohte 24:15) “Hêng thiltih ropuite” Titu hmangaihna chu an rilrua a khah tlat avângin chûng thutak hlu tak chu mi dangte hnêna hrilh tûra chêttîrin an awm a. Tichuan, Pathian chhiahhlawh inpumpêk, baptisma chang lo niin, ‘Pathian hriat famkimna kawngah chuan an lo sâwt deuh deuh’ a ni.b​—Kolossa 1:​10-12; 2 Korinth 5:​14.

8-10. (a) Engtin nge Kristian nu pakhat thiltawn chuan Pathian Thuin “thil a tithei” tih a finfiah? (b) He thiltawn hian Jehova chungchâng leh a chhiahhlawhte a cheibâwl dân chungchâng eng nge a zirtîr che? (Exodus 4:12)

⁸ Pathian chhiahhlawhte’n an Bible zirna aṭanga hriatna an neih hi a pâwnlâng mai a ni lo va. Chutiang hriatna chuan an thinlung a chawkphûr a, an ngaihtuah dân a thlâktîr a; tin, chu chu anmahniah a awm reng a ni. (Hebrai 4:12) Entîr nân, Camille-i chu tarte enkawltu a ni a. A enkawlte zînga pakhat Martha-i chu Jehova Thuhretu a ni a. Martha-i chu rilru lam buaina nasa tak a neih avângin, enkawl reng a ngai a ni. A chaw ei tûrte hi hrilh zêl a ngai a, a chaw ei lem tûr takngial pawhin hrilh a ngai a ni. Nimahsela, thil pakhat chu a hnuaia kan hmuh tûr ang hian, Martha-i rilruah a bet tlat a ni.

⁹ Nikhat chu, Martha-i chuan harsatna engemaw avânga Camille-i ṭap chu a hmu a. Martha-i chuan Camille-i chu kuahin Bible zirpuiah a sâwm ta a ni. Mahse, Martha-i ang dinhmuna ding chuan Bible zirna a kaihruai thei dâw em ni? Aw, thei e! A hriatrengna tam tak hloh mah se, Martha-i chuan a Pathian ropui tak chu a theihnghilh lo va; Bible aṭanga a zir thutak hlu tak chu a theihnghilh hek lo. An zir chhûng chuan, Martha-i chuan Camille-i chu paragraph apiang chhiar tûr te, Pathian Lehkha Thu châng târ lante keu tûr te, a phêk tâwpa zawhna chu chhiar a, a chhânna sawi tûrtein a fuih a ni. Chutiang chuan hun engemawti chen an chhunzawm a, Martha-i theihna chu tlêm hle mah se, Camille-i chuan Bible hriatnaah hma a sâwn zêl a ni. Martha-i chuan Camille-i chu Pathian rawngbâwl duh mi dangte nêna an inkawm a ngai tih a hria a. Chu mi atân chuan, Camille-i hnênah chuan Kingdom Hall-a a inkhâwm hmasak ber ṭuma a hâk atâna inâwm, thawmhnaw leh pheikhawk a pe a ni.

¹⁰ Martha-i ngaihsakna te leh a entawn tûr siam te, leh a rin tlatnate chuan Camille-i chu a hneh êm êm mai a. Martha-i chuan Bible aṭanga a thil zirte tih chauh lo chu thil dang zawng zawng a theihnghilh thawthâng avângin, Bible aṭanga zirtîr a tum chu thil pawimawh tâwpkhâwk a ni tih Camille-i chuan a ring nghet ta a ni. A hnua Camille-i chu hmun danga a insâwn chuan, chêt lâk a hun tih a hre ta a. A hun remchâng neih hmasak berah chuan, Martha-i kawr pêk hain, leh a pheikhawk pêk chu bunin, Kingdom Hall-ah a inkhâwm a, Bible zirna neihpui tûrin a dîl nghâl a ni. Camille-i chuan hma a sâwn zêl a, baptisma a chang ta hial a ni.

Jehova Tehkhâwngte Târ Lang Tûra Chêttîr

11. Thuhrilhnaa taihmâk mai bâkah, engtin nge Lalram thuchah tihphûrin kan awm tih kan lantîr theih?

¹¹ Tûn laiah hian, Martha-i leh Camille-i te ang mi maktaduai ruk aia tam chuan “ram chanchin ṭha” chu khawvêl pumpuiah an hril a. (Matthaia 24:14; 28:​19, 20) Kum zabi pakhatnaa Kristiante ang bawkin, “Pathian thiltih ropuite” chuan anni chu nasa takin a chêttîr a ni. Jehova hmingputu nih theihna chanvo an neih chu an hlut a, an chungah a thlarau a leihbuak avângin an lâwm hle bawk. Chuvângin, an nun kawng tinrênga a tehkhâwngte nunpuiin, “kawng tinrênga amah tilungawi tûrin Lalpa zui tlâkin” an awm theih nân theih tâwp an chhuah a ni. He mi thilah hian, thil dang zawng zawngte bâkah, silhfên leh lan dân chungchânga Pathian tehkhâwng pawh a tel a ni.​—Kolossa 1:​10-12; Tita 2:​9, 10.

12. 1 Timothea 2:​9, 10-ah silhfên leh lan dân chungchânga fuihna tlang tak eng nge kan hmuh?

¹² Ni e, Jehova chuan kan lan dân chungchângah pawh tehkhâwng a siam a. He mi chungchânga Pathian thil phût ṭhenkhat chu tirhkoh Paula’n hetiang hian a târ lang a ni. “Hmeichheho pawh inthlahdah lo leh inbel lutuk lovin, thuam inchawih tâwkin inchei sela, sam phiarin emaw, rangkachakin emaw, tuikeplungin emaw, puan man tam tak taktein emaw inchei lovin; amaherawhchu (hmeichhia, Pathian ngaihsak intite chu inphu tâwkin) thil tihṭhatin inchei sela ka duh,” tiin.c Hêng thute aṭang hian eng nge kan zir?​—1 Timothea 2:​9, 10.

13. (a) ‘Thuam inchawih tâwk’ chu eng tihna nge? (b) Engvângin nge Jehova tehkhâwngte chu zawm harsa lutuk a ni lo kan tih theih?

¹³ Paula thu chuan Kristiante chu “thuam inchawih tâwkin [an] inchei” tûr a ni tih a târ lang a. An lan dânah an inthlahdah emaw, an fel fai lo, a nih loh leh an bawrchhawr tûr a ni lo. Mi tin hian​—mi retheite pawhin​—an silhfênte fel fai tak, thianghlim tak, leh mite hmuh tlâka vawnna hmangin he tehkhâwng hi an tlin vek thei a ni. Entîr nân, South America rama Thuhretute chu distric inkhâwmpui chhîm tûrin ram hnuaia mêl tam tak kea an kal hnuah dâr kâr tam tak lawnglênga an kal leh a ngai a. Chuvângin, luia tlâk palh emaw, an zin kawnga hmim bukin an thawmhnaw a tai thlêr vêl emaw chu thil pângngai lo a ni lo. Inkhâwmpuina hmun tûr an rawn thlen meuh chuan an lan dân chu a fel fai lo ta riau ṭhîn a. Chuvângin, inkhâwmpuinaa an hâk tûr silhfêna kawrkilh vuah nân te, zipper siam ṭhat nân te, leh sûkfaia nawh mâm nân te hun an insiam a. Jehova dawhkân kîl tûra sâwm an nihna chu an hlut a; chuvângin, inâwm taka inchei chu an duh a ni.

14. (a) ‘Inthlahdah lo leh inbel lutuk lova’ inchei chu eng tihna nge? (b) ‘Pathian ngaihsak kan nihzia târ lang’ tûr zâwnga incheinaah chuan engte nge tel?

¹⁴ Chu mi hnuah Paula chuan ‘inthlahdah lo leh inbel lutuk lo’ tûr kan nih thu a târ lang leh a. A awmzia chu kan lan dân chu inchei uar tak, mak dangdai tak, mipat hmeichhiatna lama mi hîp thei chi, taksa lang lo lai tûr lang, a nih loh leh incheina ringawt ngaihtuah anga lang kan ni tûr a ni lo tihna a ni. Chu bâkah, “Pathian ngaihsak” kan nihzia târ lang tûr zâwngin kan inchei tûr a ni bawk. Ngaituah a titam hle lo maw? Kohhran inkhâwmnaa mawi taka inchei a, hun danga hlamchhiah leh ṭhak si ringawt hi a dik lo. Hun rei lo te chhûng mai ni lo, ni khata dârkâr 24 chhûng Kristian kan nih avângin, kan mi mal lan dân chuan Pathian ngaihsak leh chawimawi tlâk rilru put hmang a lantîr reng tûr a ni. Kan tih tûr azirin hnathawh thawmhnaw emaw, school thawmhnaw emaw kan inbel a ngai tih chu hriatsa a ni a. Chutichung pawh chuan, a âwm tâwk leh zahawm takin kan inchei tûr a ni. Kan thawmhnaw hâkin Pathian kan rinzia a lantîr reng chuan, kan lan dânin a zir loh êm avânga tawnchawpa thuhrilhna neih loh mai zâwk duhna kan nei ngai lo vang.​—1 Petera 3:15.

‘Khawvêl Hi Hmangaih Suh U’

15, 16. (a) Engvângin nge silhfên leh lan dân chungchânga khawvêl mite kan entawn loh chu thil pawimawh tak a nih? (1 Johana 5:19) (b) Eng chhan ṭha tak avângin nge silhfên leh lan dân lârte chu kan pumpelh ang?

¹⁵ 1 Johana 2:​15, 16 thu pawh hian kan silhfên leh lan dân chungchângah kaihhruaina min pe bawk a. Chutah chuan heti hian kan chhiar: “Khawvêl hi hmangaih suh ula, khawvêla thil awmte pawh hi hmangaih hek suh u. Mi tupawhin khawvêl hi a hmangaih chuan Pa a hmangaihna amahah a awm lo. Khawvêla thil awm zawng zawng, tisa châkna te, mit châkna te, dam chhûng ropuina lem te hi Paa chhuak a ni lo va, khawvêla chhuak a ni zâwk si a,” tiin.

¹⁶ A hun taka fuihna chu a va ni êm! Ṭhiante nêksâwrna a nasat ber hun tûn laiah hian, silhfên chungchângah khawvêl hi kan inthununtîr tûr a ni lo va. Silhfên leh lan dân chu tûn hnai kumahte hian a chhe zual a. Office-a hna thawk mite inchei dân tûr tehkhâwng siamte tak ngial pawh Kristiante incheina âwm a ni reng chuang lo. Hei pawh hi Pathian tehkhâwngte mila nung a, ‘Pathian min Chhandamtu zirtîrna thu engkima cheimawi’ tûr chuan, ‘he khawvêl dân anga kan awm loh’ a pawimawhzia kan hriat reng a ṭûl chhan dang a ni.​—Rom 12:2; Tita 2:​9, 10.

17. (a) Thawmhnaw kan lei dâwn emaw, a ṭhui dân kan thlan dâwn emawin eng zawhnate nga kan ngaihtuah tûr? (b) Engvângin nge chhûngkaw lû chuan chhûngkaw mite mi mal lan dân chu a ngaihven ang?

¹⁷ Thawmhnaw thar i lei dâwn rêng rêngin: ‘He mi hian engvângin nge ka mit a lâk? Mi lâr tak tute emaw, ka mi ngaihsân zâwng tak emaw neih ang a nih vâng a ni em? Mi suaksual awm ṭha duh loho emaw, inlâk hran leh hel hrâtte hâk duh zâwng chi a ni em?’ tihte inzawh hi a finthlâk a ni. Tin, a thuamhnaw pawh ngun takin kan enfiah tûr a ni a. Kawr emaw, pawnfên emaw a nih chuan, eng anga fual nge? A ṭhui dân eng nge? A mawi tâwkin, a âwm tâwkin, a zah awm tâwk em? A nih loh leh a tâwt emaw, mipat hmeichhiatna lama mi hîp thei emaw a ni em? Nge, lian hliap hluap zâwk? Hetiang hian inzâwt ang che, ‘He thawmhnaw hi ha ta ila mi dangte’n an tlûk phah ang em?’ tiin. (2 Korinth 6:​3, 4) Engvângin nge chu chu kan ngaih pawimawh ang? A chhan chu: “Krista pawh chuan mahni lâwmna a zawng si lo,” tia Bible-in min hrilh vâng a ni. (Rom 15:3) Kristian chhûngkaw lû chuan a chhûngte lan dân chu a ngaihsak tûr a ni a. An biak Pathian ropui tak an zahna avângin, chhûngkaw lûte chuan a ṭûl hunah chuan zilhna thu khauh tak chu hmangaih takin a pe hreh tûr a ni lo.​—Jakoba 3:13.

18. I silhfên leh lan dân chungchânga fîmkhur tûrin engin nge chêttîr che?

¹⁸ Kan thuchah ken hi zahawmna leh thianghlimna chhinchhiahna ber, Jehova hnên aṭanga lo kal a ni a. (Isaia 6:3) Bible chuan ‘a fa duh takte anga’ a awm dân latute ni tûrin min fuih a ni. (Ephesi 5:1) Kan silhfên leh lan dân chuan kan Pa vâna mi chu a chhe zâwng emaw, a ṭha zâwng emawin a târ lang thei a ni. A thinlung tihlâwm chu kan va duh tak êm!​—Thufingte 27:11.

19. Mi dangte hnêna “Pathian thiltih ropuite” hriattîrna aṭangin eng hlâwknate nge lo awm?

¹⁹ ‘Pathian thiltih ropui’ i zirte chu engtin nge i ngaih le? Thutak kan hria hi kan va nihlawh tak êm! Isua Krista thisen chhuaka rinna kan lantîr avângin kan sualte ngaihdam a ni a. (Tirhkohte 2:38) Chuvângin, Pathian hmaah zalên takin kan ṭawng ngam a ni. Beiseina nei lote ang tlukin thihna kan hlau ve lo va. Chutih ahnêkin, Isua thutiam engtik nîah emaw chuan “thlâna awm zawng zawngin a aw an hria ang a, an chhuak vek ang” tih chu kan nei a ni. (Johana 5:​28, 29) Hêng thil zawng zawngte min hriattîrin Jehova chu a ngilnei êm êm a. Chu bâkah, a thlarau chu kan chungah a leihbaw bawk a ni. Chuvângin, hêng thilpêk ṭha zawng zawngte chunga lâwmna chuan a tehkhâwng sâng takte zah tûr leh ṭhahnem ngai taka amah faka hêng “thiltih ropuite” hi mi dangte hnêna hrilh chhâwng tûrin min chêttîr tûr a ni. (w02 8/1)

[Footnote-te]

Engtin Nge I Chhân Ang?

• C.E. 33, Pentikost nî khân mipuiin eng “thiltih ropuite” nge an hriat a, engtin nge an chhân lêt?

• Engtin nge mi chu Isua Krista zirtîr a lo nih a, zirtîr nihna chuan eng nge a huam?

• Engvângin nge kan silhfên leh lan dân ngaihsak chu thil pawimawh tak a nih?

• Thawmhnaw emaw, a ṭhui dân emaw chu inbel âwm a nih leh nih loh thutlûkna siam hunah eng thilte nge ngaihtuah tûr?

[Phêk 15-naa milem]

Petera chuan Isua chu mitthi zîng ata kaihthawh a nih thu a puang

[Phêk 17-naa milemte]

I lan dân chuan i biak Pathian a târ lang ṭha em?

[Phêk 18-naa milemte]

Kristian nu leh pate chuan an chhûngkuaa mite lan dân chu an ngaihven tûr a ni