Kohhranho Rawngbâwltute Mawhphurhna Chu Eng Nge Ni?

Bible chuan kohhrana mawhphurhnate latu Kristian mipa pâwl hnih—‘kohhran hotute [upate] leh kohhranho rawngbâwltute’—chungchâng a sawi a. (Philippi 1:1) A tlângpuiin, kohhran tinah hian chutianga rawngbâwl unaupa engemaw zât an awm ṭhîn a ni. Kohhranho rawngbâwltute chuan kan ṭhatna tûrin eng hna nge an thawh?

Kohhran upate an ṭanpui. Kohhranho rawngbâwltute chu thlarau lama chak tak, mi rin tlâk, leh taima tak an ni a, a ṭhen chu la naupang deuh mah se, mi dangte chu upa lam deuhte an ni thung. Anni chuan zirtîrna leh berâm tlawhna lam thil ni lo, kohhran leh Kingdom Hall nêna inkûngkaih hna pawimawh dangte an thawk a. Chu chuan upate chu zirtîrna leh berâm tlawhna ngaihsak lehzual tûrin a ṭanpui a ni.

Hna pawimawh tak an thawk. Kohhranho rawngbâwltu ṭhenkhat chu inkhâwm tûra lo kalte lo lâwm tûrin attendant atâna ruat an ni a. Mi dangte chuan au rinna te, thu leh hla chhuah te, leh kohhran sum te an enkawl a; tin, kohhran mite hnênah thu hrilhna tûr bialte pawh an sem ṭhîn bawk. Kingdom Hall enkawlna pawh an ṭanpui a. Tarte ṭanpui tûr pawhin upate’n an ruat mai thei bawk. Kohhranho rawngbâwltute chuan mawhphurhna an dawn engpawh inhuam taka an thawh avângin, kohhrana mite zah an kai a ni.—1 Timothea 3:13.

Kristian mipate an nih angin entawn tûr ṭha an siam. Kohhranho rawngbâwltute chu an thlarau lam mize ṭhate avânga thlan an ni a. Inkhâwmnaa chanvo an neih hunah kan rinna an tichak a ni. Thu hrilhnaah hma hruaiin, ṭhahnemngaihna min neihtîr bawk a. Upate an thlâwp ṭhat avângin hlimna leh inpumkhatna pawh an awmtîr bawk. (Ephesi 4:16) A hnuah chuan, upa anga rawngbâwl tûrin an rawn tling chho thei a ni.

• Kohhranho rawngbâwltute chu eng ang mi nge an nih?

• Kohhranho rawngbâwltute chuan tluang taka kohhran a kal theih nân engtin nge an ṭanpui?