‘Mihringte Hnêna Thilpêkte’ Chungah Lâwmna Lantîr Rawh

1. Isua min pêk thilpêk ṭhenkhat chu eng nge ni?

MIHRINGTE zîngah hian Isua ang tluka thilphal an awm lo va. Isua leia a awm lai khân, a thiltihtheihna chu mi dangte ṭanpui nân phal takin a hmang a ni. (Lk. 9:12-17) Kan aia thiin thilpêk ropui ber min pe a. (Joh. 15:13) Kaihthawh a nih hnuah pawh thilphalna a lantîr zawm zêl a ni. A thutiam angin, min zirtîra min thlamuan tûrin Pathian Jehova hnênah thlarau thianghlim min dîlsak a. (Joh. 14:16, 17; 16:13) Chu bâkah, khawvêl puma zirtîra siam hna thawk thei tûra kan mamawhte chu kohhran inkhâwmnate hmangin min pe bawk a ni.—Mt. 28:18-20.

2. Ephesi 4:7, 8-a târ lan ‘mihringte hnêna thilpêkteah’ chuan tute nge tel?

² Isua thilpêk dang pakhat i lo ngaihtuah ang u. Tirhkoh Paula chuan Isua’n vâna a chhoh hnuin ‘mihringte hnêna thilpêkte a pêk’ thu a sawi a. (Ephesi 4:7, 8 chhiar rawh.) Isua’n chûng thilpêkte chu kawng hrang hranga kohhran ṭanpui nâna a pêk thu a hrilhfiah bawk a ni. (Eph. 1:22, 23; 4:11-13) Tûn laiah, chûng ‘mihringte hnêna thilpêkteah’ chuan kohhranho rawngbâwltute, kohhran upate leh, bial kantute an tel a.a Ni e, chûng mite chu ṭha famkim lo an nih avângin, thil tihsual châng an nei ngei mai. (Jak. 3:2) Mahse, kan Lalpa Isua Krista chuan anni chu min ṭanpui tûrin a hmang a; kan hnêna a thilpêkte an ni tak zet a ni.

3. ‘Mihringte hnêna thilpêkte’ hnathawh kan thlâwp theih dân entîrna pe rawh.

³ Isua’n chûng ‘mihringte hnêna thilpêkte’ chu kohhran tinghet tûrin a ruat a. (Eph. 4:11-13) Anni chu he an chanvo pawimawh tak hlen thei tûrin kan zavaiin kan ṭanpui thei a ni. Entîr nân: Kan zînga ṭhenkhat chu Kingdom Hall saknaah an tel a. Mi dangte chuan ei leh inte pein, an mamawhna hmunahte hruaiin leh kawng hrang hranga ṭanpuiin chu hna chu an thlâwp a ni. Chutiang bawkin, kan za hian kohhranho rawngbâwltute, kohhran upate leh, bial kantute thawhrimna chu kan ṭawngkam leh thiltihin kan thlâwp thei a. Tûnah, an thawhrimna kan hlâwkpui theih dânte leh ‘mihringte hnêna thilpêkte’ min petu Isua leh anmahni chunga kan lâwmzia kan lantîr theih dân i lo sawiho vang u.

‘MI DANGTE ṬANPUITU’ KOHHRANHO RAWNGBAWLTUTE

4. Eng kawng ṭhenkhatin nge kum zabi pakhatnaa kohhranho rawngbâwltute’n ṭanpuina an pêk?

⁴ Kum zabi pakhatnaah khân, unaupa ṭhenkhat chu kohhranho rawngbâwltua ruat an ni a. (1 Tim. 3:8) Anni chu Paula’n “ṭanpui theihna thilpêkte” dawngtu nia a târ lante an nih a rinawm. (1 Kor. 12:28) Kohhranho rawngbâwltute chuan upate’n mi dangte zirtîrna leh berâm tlawhnate ṭha taka an neih theih nân a ṭûl ang apiang an lo ṭanpui ṭhîn a. Entîr nân, Pathian Lehkha Thu ziah chhâwnnaahte, a nih loh leh ziah chhâwn nâna mamawh hmanraw leinaahte an ṭanpui a rinawm a ni.

5. Eng kawng ṭhenkhatin nge tûn laia kohhranho rawngbâwltute’n ṭanpuina an pêk?

⁵ In kohhrana kohhranho rawngbâwltute rawngbâwl dân ṭhenkhat hi han ngaihtuah teh. (1 Pet. 4:10) Kohhran sum, a nih loh leh rawngbâwlna bial enkawl tûr te, thuchhuahtute hnêna thu leh hla chhuahte thleng thei tûra chah tûr te, audio video hmanruate enkawl tûr te, attendant hna thawk tûr te leh, Kingdom Hall thawm ṭhatnaa ṭanpui tûrtea mawhphurhna pêk an ni thei. Hêng thiltih zawng zawngte hi kohhrana ruahmannate ṭha taka a kal tluan theih nâna thil pawimawh tak a ni. (1 Kor. 14:40) Chu bâkah, kohhranho rawngbâwltu ṭhenkhat chuan vântlâng thusawite pein, Nun leh Rawngbâwlna Inkhâwmah chanvote an chelh a. Anni chu thlawhhma rawngbâwlna group overseer ṭanpuitu atâna hman an ni thei a. A châng chuan kohhranho rawngbâwltu nih tling takte chuan upate berâm tlawhna neihnaah an ṭawiâwm ṭhîn a ni.

6. Kohhranho rawngbâwltu thawk rim takte chunga kan lâwm chhan ṭhenkhat chu engte nge ni?

⁶ Engtin nge kohhranho rawngbâwltute hnathawh chu kohhranin a hlâwkpui? Bolivia rama unaunu Beberly-ib chuan: “Kohhranho rawngbâwltute zârah inkhâwmah a kimin hlâwkna ka têl thei a; an hnathawh avângin ka zai thei a, chhânnate ka pe thei a, thusawite ka ngaithla thei a, video leh milemte aṭangin ka inzir thei a ni. Inkhâwma rawn telte himna tûr an ngaihtuah bâkah, videoconference hmanga inkhâwmte an ngaihsak bawk a. Inkhâwm bânah Kingdom Hall tihfaina lamah hma an hruai bawk a. Thawhlâwmte an chhiar a, kan mamawh thu leh hla chhuahte kan neih leh neih loh an chian bawk a ni. Chuvângin, an chungah ka lâwm hle!” tiin a sawi a. Colombia rama kohhran upa nupui Leslie-i chuan: “Ka pasal chuan chanvo tam tak hlen tûrin kohhranho rawngbâwltute chu a rinchhan a. Anni hi awm lo ta se, hnathawh tûr a ngah lehzual dâwn a; chuvângin, an taimâkna leh tlâwmngaihna chungah ka lâwm hle a ni,” tiin a sawi bawk. Chutiang rilru put hmang chu i nei ve ngei ang.—1 Tim. 3:13.

7. Kohhranho rawngbâwltute chunga kan lâwmzia engtin nge kan lantîr theih? (Milem en bawk rawh.)

⁷ Kohhranho rawngbâwltute chungah rilru takin lâwmna kan nei a ni thei a; mahse, Bible chuan: “Lâwmthu sawi fo ṭhîn ang che u,” tiin min fuih a ni. (Kol. 3:15) Finland rama kohhran upa Krzysztof-a chuan: “Kohhranho rawngbâwltu pakhat hnênah Bible châng pakhat târ langin min tihchak dân, a nih loh leh a rawngbâwlna ka ngaihhlut chhan chu postcard-in emaw, message-in emaw ka thawn ṭhîn,” tiin a lâwmzia a lantîr dân chu a sawi a. New Caledonia-a chêng Pascal-a leh Jael-i te pawhin kohhranho rawngbâwltute tân bîka ṭawngṭaina an nei ṭhîn a. Pascal-a chuan: “Kan ngenna leh lâwmthu sawi ṭawngṭainate chu kan kohhrana hmahruaitu unaupate tân a ni ṭhîn a ni,” tiin a sawi. Jehova’n chutiang ṭawngṭainate chu a ngaihthlâk avângin kohhran pumin an hlâwkpui a ni.—2 Kor. 1:11.

“IN ZINGA THAWK RIM” KOHHRAN UPATE

8. Engvângin nge Paula chuan kum zabi khatnaa upate chu an “thaw krim” tia a sawi theih? (1 Thessalonika 5:12, 13)

⁸ Kum zabi khatnaa kohhran upate chu kohhran tân an thawkrim hle a. (1 Thessalonika 5:12, 13 chhiar rawh; 1 Tim. 5:17) Anni chuan inkhâwmte kaihruaia, thu tlûknate siamin, kohhranho ‘hotu’ niin hma an hruai a ni. Kohhran vênghim tûrin an unaute chu tlang tak leh hmangaihna nei takin an ‘zilh’ ṭhîn a. (1 Thes. 2:11, 12; 2 Tim. 4:2) Chu bâkah, hêng mipate hian an chhûngte châwm tûr leh anmahni ngei pawh thlarau lama chak taka awm tûrin an thawk rim hle a ni.—1 Tim. 3:2, 4; Tit. 1:6-9.

9. Tûn laiah kohhran upate’n eng chanvo ṭhenkhatte nge an chelh?

⁹ Tûn laia upate pawhin tih tûr an ngah hle a. Anni chu chanchin ṭha hriltute an ni a. (2 Tim. 4:5) Thlawhhma rawngbâwlnaah ṭhahnemngai takin hma an hruai a, tualchhûngah thu hrilh dân tûr an ruahman a, thiam lehzuala thu hrila zirtîr thei tûrin min ṭanpui bawk a ni. Khawngaihna ngah leh thlei bîk nei lo rorêltute angin rawng an bâwl bawk. Kristian tu emawin sual pawi tak a tih hian Jehova nêna an inlaichînna siam ṭha leh tûrin upate chuan theih tâwp chhuahin an ṭanpui a. Chutih rualin, kohhran thianghlimna vawn chu an ngai pawimawh hle bawk a. (1 Kor. 5:12, 13; Gal. 6:1) A bîk takin, kohhran upate chu berâm vêngtute anga hriat an ni. (1 Pet. 5:1-3) Anni chuan ṭha taka inbuatsaihin Bible ṭanchhan thusawite an pe a, kohhrana mi tinte hre chiang tûrin hma an la a, berâm tlawhnate an nei ṭhîn a ni. Chu bâkah, kohhran upa ṭhenkhat chuan Kingdom Hall sakna leh thawm ṭhatnaah te, HLC-ah te (Hospital Liaison Committee) leh, PVG-ahte (Patient Visitation Group) an ṭanpui mai bâkah, chanvo dangte pawh an chelh a ni. Upate chu kan tân an va thawk rim tak êm!

10. Kohhran upa thawk rim takte kan ngaihhlut chhan ṭhenkhat chu eng nge ni?

¹⁰ Jehova chuan berâm pute’n ṭha taka min enkawl dâwn avângin tu ma’n “an hlau tawh lo vang a, an mangang tawh hek lo vang,” tiin a sawi lâwk a ni. (Jer. 23:4) He thu dikzia hi Finland rama unaunu Johanna-i’n a nu nasa taka a dam loh laiin a tawng a. “Mi dangte hnêna ka rilrua awmte hrilh chu harsa ka ti a; mahse, ka nêl vak loh kohhran upa pakhat chuan ka thusawite ṭha takin min ngaihthlâksak a, min ṭawngṭaipuiin Jehova’n min hmangaih tih min hriat nawntîr a. Khatih hun laia a thu min hrilhte kha hre vek tawh lo mah ila, him nia inhriatna ka neih dân kha ka la hre reng. Pathian Jehova’n ka mamawh hun taka min ṭanpuitu atâna a rawn tirh a ni tih ka chiang,” tiin a sawi a ni. Engtin nge in kohhrana upate’n an ṭanpui tawh che?

11. Engtin nge kohhran upate chunga kan ngaihhlutzia kan lantîr theih? (Milem en bawk rawh.)

¹¹ Jehova chuan upate hnêna “an hnathawh vânga” thinlung taka ngaihhlutna lantîr tûrin min duh a. (1 Thes. 5:12, 13) Finland rama Henrietta-i chuan: “Inhuam taka upate’n mi dangte an ṭanpui hi hun leh tha an neih tam bîk vâng emaw, an nuna harsatnate an neih loh vâng emaw a ni lo va. A châng chuan an hnênah: ‘Kohhran upa ṭha tak i ni. Chu chu i hriat ngei ka beisei,’ ka ti ṭhîn,” tiin a sawi a. Türkiyec rama unaunu Sera-i pawhin: “Upate hian an chanvo dawnte an hlen chhuah theih nân ‘tha’ an mamawh a. Chuvângin, card-te ziakin, chaw eiahte sâwmin, rawngbâwlnaahte pawh thawhpuiin kan tichak thei a ni,” tiin a sawi. Kohhrana a thawhrimna avânga mi mal taka ngaihhlutna lantîr i duh upa a awm em? A awm chuan, i lâwmzia i lantîr theih dân kawngte zawng ang che.—1 Kor. 16:18.

MI DANGTE TICHAKTU BIAL KANTUTE

12. Eng ruahmannain nge kum zabi khatnaa kohhrante chu tinghet? (1 Thessalonika 2:7, 8)

¹² Isua Krista chuan kawng danga rawngbâwltu ‘mihringte hnêna thilpêkte’ kohhranah min pe bawk a. A kaihhruaina hnuaiah, Jerusalema kohhran upate chuan Paula, Barnaba leh, mi dangte chu bial kantute nia rawngbâwl tûrin an tîr chhuak a ni. (Tirh. 11:22) Engvângin nge? Kohhranho rawngbâwltute leh kohhran upate ang bawkin, kohhran tinghet tûrin a ni. (Tirh. 15:40, 41) Anni chuan mi dangte zirtîr a, tichak tûrin an nun thâp hial khawpin inpêkna tam tak an nei a ni.—1 Thessalonika 2:7, 8 chhiar rawh.

13. Bial kantute’n eng mawhphurhnate nge an neih?

¹³ Bial kantute chu hmun hrang hranga an zin a ngai a. Ṭhenkhat chu kohhran pakhat aṭanga a danga kal tûrin kilometer za têl an zin a ngai a ni. Chawlhkâr tin hian, bial kantute chuan thusawi chi hrang hrangte pein, berâm tlawhnate an nei a, pioneer inkhâwm te, upa inkhâwm te leh, thlawhhma rawngbâwlna atâna inkhâwmte an kaihruai a ni. Thusawite inbuatsaihin inkhâwmpuinate an huaihawt a, pioneer school-ahte zirtîrin, bial chhûnga pioneer-te tâna a bîk taka buatsaih inkhâwmte an kaihruai a; chu bâkah, branch office-in mawhphurhna a pêk dang—a chânga hmanhmawh taka tih ngaite—an hlen bawk a ni.

14. Kan bial kantu thawk rim takte kan ngaihhlut chhan ṭhenkhat chu eng nge ni?

¹⁴ Engtin nge bial kantute hnathawh hlu tak chu kohhranin a hlâwkpui? Bial kantute tlawhna chungchângah Türkiye-a unaupa pakhat chuan: “Min rawn tlawhnate avângin ka unaute ṭanpui nâna hun tam zâwk hman duhna ka nei lehzual ṭhîn a. Bial kantu tam tak ka lo tawng tawh a; an nêlawm vekin, hun min pe thei lo khawpa buai lutuk angin an lang ngai lo,” tiin a sawi. A tîra kan târ lan tâk Johanna-i’n rawngbâwlnaah bial kantu a thawhpui ṭum chuan, thu hrilh theih tûr tu mah an hmu lo va; mahse, ani chuan: “Kha nî kha ka theihnghilh thei ngai lo vang. Ka ute pahnih chu hmun danga an insawn chhuah hlim a nih avângin ka lung a lên lai tak a ni a. Bial kantu chuan hriatthiampuina lantîrin min fuih a, chhûngte leh ṭhiante bulah Jehova rawngbâwl thei rih lo mah ila, khawvêl tharah chuan chatuanin hun kan hmangho thei tawh dâwn tih hre thiam tûrin min ṭanpui a ni,” tiin a sawi. Kan bial kantute leh min lo ṭanpui tawh dânte chu kan ngaihlu tak zet a ni.—Tirh. 20:37–21:1.

15. (a) Johana thawn thum 5-8 nêna inmilin, engtin nge bial kantute chunga kan lâwmzia kan lantîr theih? (Milem en bawk rawh.) (b) Engvângin nge bial kantu nupuite chungah ngaihhlutna kan lantîr ang a, engtin nge chutianga kan tih theih? (“An Nupuite Hre Reng Rawh,” tih bâwm chu en rawh.)

¹⁵ Tirhkoh Johana chuan Gaia chu kohhran tichak tûra lo kal unaute chunga khualchhâwn thiamna lantîr tûr leh ‘an zinnaa Pathian mi an nih anga puibâwm tûrin’ a fuih a ni. (3 Johana 5-8 chhiar rawh.) Chutianga kan tih ve theih dân kawng khat chu bial kantute chaw eia sâwmna hmangin a ni a. Kawng dang leh chu, bial kan kâra rawngbâwlna atâna ruahmanna thlâwpna hmangin a ni. Kan târ lan tâk Leslie-i chuan a lâwmzia chu kawng dangte pawhin a lantîr bawk a. “Jehova hnênah an tân ka ṭawngṭaisak a, an mi tlawhnain min tihchak dânte chu ka pasal nên lehkhate ziakin kan thawn a ni,” tiin a sawi. Bial kantute chu mihring pângngai ve mai an ni tih hre reng ang che. Keimahni ang bawkin, natna, lungkhamna leh, lunghnualnate an neih châng a awm a. I ṭawngkam ngilnei tak, a nih loh leh i thilpêk tê tham takte chu an ṭawngṭaina chhânna a ni thei!—Thuf. 12:25.

‘MIHRINGTE HNENA THILPEKTE’ CHU KAN MAMAWH

16. Thufingte 3:27 ṭanchhanin, unaupate chuan eng zawhnate nge an inzawh theih?

¹⁶ Khawvêl pumah ‘mihringte hnêna thilpêkte’ anga rawngbâwltu unaupate chu tam lehzuala mamawh an ni a. Baptisma chang tawh unaupa i nih chuan, chutianga rawngbâwl thei tûrin ‘i kutah tih theihna a awm em?” (Thufingte 3:27 chhiar rawh.) Kohhranho rawngbâwltu nih duhna i nei em? I ni tawh a nih chuan, upa anga rawngbâwl duhna i nei em?d Lalram Chanchin Ṭha Puangtute School kal tûra dîlna theh lût tûrin i dinhmunte i siamrem thei ang em? Chu school chuan Isua tâna tam lehzuala inhmang thei tûrin a zirtîr ang che. Chutianga ti tûra tling lo nia i inhriat chuan Jehova hnênah ṭawngṭai la, i chanvo dawn eng pawh ṭha taka i hlen chhuah theih nân thlarau thianghlim dîl bawk ang che.—Lk. 11:13; Tirh. 20:28.

17. ‘Mihringte hnêna thilpêkte’ chuan kan Lal Krista Isua chungchângah eng nge a nem ngheh?

¹⁷ Isua’n ‘mihringte hnêna thilpêkte’ ni tûra unaupate a ruatna chuan hêng ni hnuhnûng chhûng hian min kaihruai a ni tih a nemnghet a. (Mt. 28:20) Hmangaihna nei tak, thilphal tak, mi ngaihsak tak leh, kan mamawhte min ṭanpui tûra unaupa tling takte min petu kan Lal chungah i lâwm hle ngei ang. Chuvângin, hêng unaupa thawk rim takte chunga i lâwmzia lantîrna hun remchâng zawng ang che. Chu bâkah, “thilpêk ṭha leh thilpêk famkim zawng zawng” lo chhuahna Bulpui, Jehova hnênah lâwmthu sawi theihnghilh ngai suh ang che.—Jak. 1:17.