Engtin Nge Bial Kantute’n Min Ṭanpui?

Bible-a Thuthlung Thar bu-ah chuan Barnaba leh tirhkoh Paula hming hi vawi tam tak a lang a. Anni chuan zin kualin kohhrante chu an tlawh ṭhîn a ni. Engvângin nge? Thlarau lama an unaute ṭhatna tûr an ngaihtuah tak zet vâng a ni. Paula chuan ‘kal leh a,’ an dinhmun hriat nâna “unau awmte kan” chu a duh a. Anmahni tihchak nâna mêl tam tak zin chu a inhuam a ni. (Tirhkohte 15:36) Tûn laia kan bial kantute rilru put hmang pawh chutiang bawk chu a ni.

Min tichak tûra rawn tlawh an ni. Bial kantute chuan kohhran 20 vêl chu tlawh kualin, chawlhkâr khat zêlin kum khatah vawi hnih a tlawh ṭhîn. Hêng unaupate thiltawn leh nupui nei an nih chuan an nupuite thiltawn chu nasa takin kan hlâwkpui thei a. Anni chuan kohhran chhûnga mi apui apangte chu hriat chian vek an tum a, thlawhhma rawngbâwlnaah leh Bible zirpuinaa min zui chu an châk hle a ni. Anni chuan tualchhûng upate rualin berâm tlawhnate an nei a, min tihchak nân inkhâwmnaah leh inkhâwmpuinaahte fuihna thu ṭha tak takte chu an sawi ṭhîn.—Tirhkohte 15:35.

Mi zawng zawng chungah ngaihsakna an lantîr. Bial kantute chuan kohhrana mite thlarau lam dinhmun chu an ngaihsak hle a. Kohhran hmasâwn dân hriat nân leh an mawhphurhnate an enkawl dân chungchânga thurâwn ṭangkai takte pe tûrin upate leh kohhranho rawngbâwltute chu an kâwm ṭhîn a ni. Pioneer-te pawh rawngbâwlnaa an hlawhtlin theih nân an ṭanpui a, mi tharte hriat chian leh thlarau lama hma an sâwn dânte hriat chu nuam an ti hle bawk. Hêng unaute hi ‘kan ṭhatna tûra min thawhpuitu’ angin, phal takin an inpe a. (2 Korinth 8:22) An rinna leh Pathian hnêna an inpêkna chu kan entawn tûr a ni.—Hebrai 13:7.

• Eng atân nge bial kantute chuan kohhrante an tlawh ṭhin?

• Engtin nge an tlawhna chu i hlâwkpui theih?