Min Tihlimtu Thurûk Hriatna

Mi tuemaw chuan mi dang hnêna a la hrilh miah loh thu pakhat a hrilh tawh che em?—a Chu chu thurûk a ni. Bible chuan Pathian hnêna mi “thurûk” pawimawh tak chungchâng a sawi a. Thurûk a nih chhan chu mite’n an hriat ve loh vâng a ni. He thurûk hi hmuh theih loh thlarau mi, vantirhkohte pawhin hriat an châk a. Chu thurûk chu hriat i châk em?—

Hmân laiin, Pathianin mipa leh hmeichhe hmasa ber a siam a. An hming chu Adama leh Evi a ni. Pathian chuan an awmna tûrin hmun mawi êm êm, Eden huan chu siamin a pe a. Adama leh Evi’n Pathian thu lo âwih ta sela chuan, an fate nên lei pum pui hi Eden huan ang paradis-ah an siam ang a. Chu Paradis-ah chuan chatuanin an chêng bawk ang. Mahse, Adama leh Evi’n eng nge an tih i hria em?—

Adama leh Evi chuan Pathian thu an âwih loh avângin tûnah hian paradis-ah kan chêng ta lo a ni. Mahse, Pathian chuan lei pum pui hi mawi takin a siam ang a, mi tinte chu chatuana nungin an hlim dâwn tih a sawi a. Chu chu engtin nge a tih ang? Hun rei tak chhûng chu tuman an hre lo va. Chu chu thurûk a ni.

Isua chuan leia a lo kal lai khân, mite hnênah chu thurûk chu a hrilh a. Chu chu Pathian Ram chungchânga thurûk a ni. Isua chuan mite hnênah chu Ram chu lo thleng tûra ṭawngṭai tûrin a hrilh a. Chu chuan lei chu paradis mawi takah a siam dâwn a ni.

Chu thurûk i hria chu i lâwm em?— Paradis-ah chuan Jehova thu zâwmtute chauh an chêng ang tih hre reng la. Bible chuan Jehova thu âwihtu mipa leh hmeichhiate chanchin tam tak pawh min hrilh a. An chanchin hriat chu i duh ang em?— Chûng zînga ṭhenkhat chu tute nge an nih a, anmahni ang kan nih ve theih dân chu i lo en ang u.