Buainate Chinfel Dân

I kawppui nêna nun inhman ṭan chuan buaina chi hrang hrang a lo chhuak ngei ang. Chûng buainate chu in ngaihtuahna, in rilru veizâwng, leh in seilen dân inan lohna vânga lo chhuak a ni thei. A nih loh leh, buainate chu pâwn lam aṭanga lo lût leh beisei loh taka thil lo thleng ṭhînte vângin a lo chhuak thei bawk.

Kan buainate ngaihthah mai chu a châkawm viau thei a; mahse, Bible chuan hmachhawn tûrin min fuih a ni. (Matthaia 5:23, 24) Bible thu bulte nunpui chu i buainate chinfel dân kawng ṭha ber a ni tih i hmu ang.

1 BUAINA CHU SAWIHO RAWH U

BIBLE SAWI DAN CHUAN: “Ṭawng hun a awm.” (Thuhriltu 3:1, 7) Buaina chungchâng sawiho nân hun hmang ngei ang che u. In thusawiho lai chungchânga i ngaih dân leh i rilru veizâwng chu zêp nei lovin i kawppui hriattîr rawh. I kawppui hnênah chuan “thu dik tak” sawi ṭhîn rawh. (Ephesi 4:25) In thin a ur hle hunah pawh, inhnial duhna do hrâm hrâm rawh u. Chhânna nêm chuan sawihona pângngai tak chu inhnial buainaa chang lo tûrin a vêng thei a ni.—Thufingte 15:1; 26:20.

In thu a inhmu lo a nih pawhin, mi khawngaih thei tak ni reng la, i kawppui chunga hmangaihna leh zahna lantîr chu theihnghilh ngai suh. (Kolossa 4:6) Buainate chu a rang thei ang berin chinfel tum la, inbiakpawhna ti tâwp ngai suh ang che.—Ephesi 4:26.

I TIH THEIH CHU:

• Buaina sawiho nân hun ṭha thlang rawh

• I ngaihthlâk hun a thlen chuan, i kawppui thusawi lai pawhchahsak suh. I sawi hun a lo thleng mai ang

2 NGAITHLAIN HRE THIAM RAWH

BIBLE SAWI DAN CHUAN: “Hmangaih takin inlainat tawn ṭheuh rawh u; chawimawi kawngah chuan induhsak tawn ṭheuh ula.” (Rom 12:10) I ngaihthlâk dân hi a pawimawh hle a. I kawppui thil thlîr dân chu ‘lainatna . . . leh thuhnuairawlhnain’ hriatthiam tum rawh. (1 Petera 3:8; Jakoba 1:19) A der maiin ngaithla suh. A theih phawt chuan, i thiltih lai chu dah ṭhain, i kawppui thusawi chu ngaihthlâksak la, a nih loh leh hun danga sawi a rem em tih zâwt rawh. I kawppui chu i hmêlma ang ni lova i thawhpui anga i thlîr chuan, ‘thinur i hmanhmawh lo’ vang.—Thuhriltu 7:9.

I TIH THEIH CHU:

• Rilru inhawng takin ngaithla la, i duh lohzâwng a nih pawhin ngaithla tho rawh

• Ṭawngkam phêna thu awm chu ngaithla rawh. I kawppui taksa chêt dân leh aw phawi chu hria ang che

3 BAWHZUI RAWH

BIBLE SAWI DAN CHUAN: “Thawhrimna zawng zawngah hian hlâwkna a awm a, kâa sawi mai mai erawh chuan tlâkranna mai a thlen a ni.” (Thufingte 14:23) A tihven dân tûr chungchânga inthurual mai chu a tâwk lo. In thu tlûkna siam dun chu in bawhzui a ngai a ni. Chutianga ti tûr chuan thawhrim leh taihmâk chhuah a ngai mai thei; mahse, a manhla dâwn a ni. (Thufingte 10:4) Pâwl khat anga in thawh dun chuan, in thawhrim azâra in “thawh chhuah ṭhat” avângin in hlim ngei ang.—Thuhriltu 4:9.

I TIH THEIH CHU:

• Buaina chingfel tûra hma in lâk dân tûrte thlang fel rawh

• A khât tâwkin hma i sâwn dân ennawn rawh