ZIRLAI 04
Pathian Chu Tu Nge Ni?
Mihringte awm ṭan tirh phat deuhthaw aṭang tawhin, mite chuan pathian leh pathian nu tam tak an bia a. Mahse, Bible chuan “pathian zawng zawng aia ropui” zâwk Pathian pakhat chungchâng a sawi a. (2 Chronicles 2:5) Chu chu tu nge? Engin nge ani chu mite biak pathian dang zawng zawngte aia ropui zâwk nihtîr? He zirlaiah hian, i hnêna a rawn inhmêlhriattîr dân hria ang che.
1. Pathian hming chu tu nge ni a, ani chuan a hming hre tûrin min duh tih engtin nge kan chian theih?
Pathian chu Bible hmangin a rawn inhmêlhriattîr a. Heti hian a sawi: “Kei JEHOVA ka ni,” tiin. (Exodus 6:2 chhiar rawh.) Hebrai hming aṭanga lehlin “Jehova” tih awmzia chu mi thiam tam takte sawi dân chuan “A Nihtîr” tihna a ni a. Jehova chuan a hminga hre tûrin min duh a ni. (Exodus 3:15) Chu chu engtin nge kan hriat theih? Bible-ah a hming vawi 7,000 chuang lai a telh avângin!a Jehova tih hi ‘chung lam vânah leh hnuai lam leia Pathian dik’ hming a ni.—Deuteronomy 4:39.
2. Bible-in Jehova chungchâng eng nge min hrilh?
Bible chuan mihringte biak Pathian zawng zawng zîngah Jehova chauh hi Pathian dik awmchhun a ni a ti a. Engvângin nge? Chhan tam tak a awm. Jehova chuan thuneihna sâng ber a nei a, amah chauh hi “leilung zawng zawng chunga Chungnungber” a ni bawk. (Sâm 83:18 chhiar rawh.) “Engkimtitheia” a ni a, a awmzia chu a duh apiang ti tûrin thiltihtheihna a nei tihna a ni. Ani chuan “engkim”—lei leh vân leh lei chunga thil nung zawng zawng a siam a ni. (Thu Puan 4:8, 10, 11) Mi dangte ang lo takin, Jehova chu a awm reng a, chatuanin a awm bawk ang.—Sâm 90:2.
ZIR BELHIN HMUH BELH RAWH
Pathian nihnate leh a hming bil inan lohnate chu bihchiang la. Tichuan, a hming a hriattîr chhan che leh a hriattîr dân che zir rawh.
3. Pathianin nihna tam tak nei mah se, hming pakhat chauh a nei
Nihna leh hming inan lohna hre tûrin, VIDEO chu chhuah la, a hnuaia zawhna hi sawiho vang che u.
“Lalpa” tih ang chi nihna leh hming danglamna chu eng nge ni?
Bible chuan pathian tam tak leh lalpa tam tak betute an awm niin a sawi a. Sâm 136:1-3 chhiarin, he zawhna hi sawiho vang che u:
Tu nge “pathiante Pathian” leh “lalpate Lalpa” chu?
4. Jehova chuan amah hre tûr leh a hming lam tûrin a duh che
Engin nge Jehova’n a hming hre tûrin a duh che tih târ lang? VIDEO chu chhuah la, a hnuaia zawhnate hi sawiho vang che u.
Jehova’n a hminga i hriat a duh i ring em, engvângin nge?
Jehova’n mite chu a hming lam tûrin a duh. Rom 10:13 chhiarin, hêng zawhnate hi sawiho vang che u:
Pathian hming Jehova tih lam hi engtiang khawpin nge a pawimawh?
Mi tuemawin i hming hria a, i hminga a koh che hian engtin nge i awm?
A hming i lam hunah Jehova chu engtin nge a awma i rin?
5. Jehova’n amah hnaih lehzual tûrin a duh che
Cambodia rama hmeichhe pakhat Soten-i chuan Pathian hming hriatnain “khawvêla hlimna nasa ber” nei tûra a ṭanpui thu a sawi. VIDEO chu chhuah la, a hnuaia zawhna hi sawiho vang che u.
Video-ah khân, engtin nge Pathian hming hriatnain Soten-i a nghawng?
Mi tuemaw nêna in inṭhian hmain, a hming i hre hmasa tlângpui ṭhîn a. Jakoba 4:8a chhiarin, hêng zawhnate hi sawiho vang che u:
Engti tûrin nge Jehova’n a sâwm che?
Engtin nge Pathian hming hria a, a hming lamnain amah hnaih lehzual tûra a ṭanpui che?
MI ṬHENKHAT SAWI DAN: “Pathian pakhat chauh a awm a, eng ang pawhin ko la a pawi lo.”
Jehova tih chu Pathian hming a ni tih i ring em?
Engtin nge Pathianin a hming lam tûrin min duh tih chu i hrilhfiah ang?
KHAIKHAWMNA
Jehova tih chu Pathian dik awmchhun hming a ni a. Amah kan hnaih theih nân a hming chu hria a, a hming lam tûrin min duh a ni.
Ennawnna
Engtin nge Jehova chu mite biak ṭhin pathian dangte lakah a danglam bîk?
Engvângin nge Pathian hming kan lam ang?
Engin nge Jehova’n amah hnaih tûrin a duh che tih târ lang?
HRIAT BELH NAN
Pathian a awm tih kan rin theih chhan pangate bih chiang rawh.
Pathian a awm reng a ni tih rin chu thil inâwm tak a nih chhan ngaihtuah rawh.
Hmân laia Pathian hming an lam dân hre chiang tawh lo mah ila, a hming kan lam a ngaih chhan zir rawh.
Pathian kan koh dân chu a pawimawh em? Pathianin hming bil pakhat chauh a nei tih kan sawi theih chhan hre rawh.
a Pathian hming awmzia leh Bible lehlin ṭhenkhata a hming an paih bo chhan hriat theih nân, ṭawng danga hmuh theih New World Translation of the Holy Scriptures Appendix A4 en rawh.