ZIRLAI 15
Isua Chu Tu Nge Ni?
Isua chu mihring chanchina mi hmingthang berte zînga pakhat a ni a. Chutichung pawhin, mi tam tak chuan a hming tih loh chu a chungchâng an hre tam vak lo va; chu bâkah, Isua nihna chungchângah mi tam tak chuan ngaih dân hrang hrang an nei a ni. A nih, Bible-in a chungchâng eng nge a sawi?
1. Isua chu tu nge ni?
Isua chu vâna awm thlarau mi thiltithei tak a ni a. Ani chu Pathian Jehova’n thil dang engmah a siam hmaa a siam a ni. Chuvâng chuan, “thil siam zawng zawnga piang hmasa ber” tia koh a ni a. (Kolossa 1:15) Bible chuan Isua chu Jehova’n a kut ngeia a siam awmchhun a nih avângin, Pathian “Fapa mal neih chhun” tiin a sawi bawk. (Johana 3:16) Isua chuan thil dang zawng zawng siamnaah a Pa, Jehova chu ṭanpuiin, a bulah hna a thawk a. (Thufingte 8:30 chhiar rawh.) Jehova nêna inlaichînna nghet tak a nei chhunzawm zêl a ni. Ani chuan Pathian aiawha thusawitu, “Thu” a nih angin, A thuchah leh kaihhruainate puang chhuakin rinawm takin rawng a bâwl a ni.—Johana 1:14.
2. Engvângin nge Isua leiah a lo kal?
Kum 2,000 vêl kaltaah khân Jehova chuan, a thlarau thianghlim hmangin Isua nun chu vân aṭangin nula thianghlim Mari chhûlah mak tak maiin a sawn a. Chutiang chuan Isua chu mihring angin a lo piang a ni. (Luka 1:34, 35 chhiar rawh.) Isua chu thutiam Messia, a nih loh leh Krista ni tûr leh mihringte chhandam tûrin leiah a lo kal a.a Bible-a Messia chungchâng hrilh lâwkna zawng zawng chu amahah a thleng famkim a, chu chuan Isua chu “Krista, Pathian nung Fapa” a ni tih hre tûrin mite chu a ṭanpui a ni.—Matthaia 16:16.
3. Isua chu tûnah khawiah nge a awm?
Mihring anga Isua nun a tâwp hnuah, thlarauva kaihthawh a ni a, vânah a lêt leh a ni. Chutah chuan, “Pathianin ani chu nasa takin a chawimawi ve ta thung a.” (Philippi 2:9) Jehova tih lohvah chuan thuneihna sâng ber a chelh tawh a ni.
ZIR BELHIN HMUH BELH RAWH
Isua nihna dik tak leh a chungchâng zir a pawimawh chhan hriat belh tum rawh.
4. Isua chu Pathian Engkimtitheia a ni lo
Bible chuan Isua chu vâna thlarau thil siam thiltithei tak ni mah se, a Pathian leh a Pa, Jehova hnuaiah a intulût tih a zirtîr a. Engvângin nge chu chu kan sawi theih? Pathian engkimtitheia nêna inkûngkaiha Isua nihna chungchâng Bible zirtîrna hriat nân VIDEO chu chhuah rawh.
A hnuaia Bible chângte hian Pathian Jehova leh Isua inlaichînna hre thiam tûrin min ṭanpui a. Bible chângte chu chhiarin, a hnuaia zawhnate hi sawiho vang che u.
Luka 1:30-32 chhiar rawh.
Engtin nge vântirhkohvin Isua leh “Chungnungbera,” Pathian Jehova inlaichînna chu a sawi?
Matthaia 3:16, 17 chhiar rawh.
Isua’n baptisma a chan khân, vân aṭanga aw lo chhuakin eng nge a sawi?
Chu chu tu aw nge nia i rin?
Johana 14:28 chhiar rawh.
Tu nge upa zâwk a, thuneihna nei tam zâwk? Pain nge ni a, fapain?
Isua’n Jehova chu ka Pa tia a koh hian eng a tihna nge ni?
Johana 12:49 chhiar rawh.
Isua’n amah leh a Pa chu mi thuhmun angin a ngai em? Nang, engtin nge i ngaih?
5. Isua chu Messia a ni
Bible-ah hian Messia—mihringte chhandam tûra Pathian mi thlan—hre tûra mite ṭanpuitu tûr hrilh lâwkna tam tak a chuang a. Isua’n leia a rawn kal laia a thlen famkimtîr hrilh lâwkna ṭhenkhat hriat nân VIDEO chu chhuah rawh.
Hêng Bible hrilh lâwknate hi chhiar la, tichuan a hnuaia zawhnate hi sawiho vang che u:
Messia pianna hmun hriat nân, Mika 5:2 chhiar rawh.b
Isua piannain he hrilh lâwkna hi a tifamkim em?—Matthaia 2:1.
Messia thihna chungchânga hrilh lâwkna chipchiar takte hriat nân, Sâm 34:20 leh Zakaria 12:10 chhiar rawh.
Hêng hrilh lâwknate hi a thleng famkim em?—Johana 19:33-37.
Hêng hrilh lâwknate zînga a enga pawh hi thleng famkim tûrin Isua’n a thunun theih i ring em?
Hei hian Isua chungchâng eng nge a hriattîr che?
6. Isua chanchin zir kan hlâwkpui
Bible chuan Isua leh a chanvo chungchâng zir a pawimawhzia a sawi uar a. Johana 14:6 leh 17:3 chhiarin, he zawhna hi sawiho vang che u:
Engvângin nge Isua chanchin zir chu thil pawimawh tak a nih?
Isua chuan Pathian ṭhian nih theihna kawng a hawng a. Ani chuan Jehova chungchâng thutak a zirtîr a, amah kal tlangin chatuana nunna kan nei thei
MI ṬHENKHAT SAWI DAN: “Jehova Thuhretute chuan Isua an ring lo.”
Engtin nge i chhân ang?
KHAIKHAWMNA
Isua chu thlarau thiltithei tak a ni a. Ani chu Pathian Fapa leh Messia a ni.
Ennawnna
Engvângin nge Isua chu “thil siam zawng zawnga piang hmasa ber” tia koh a nih?
Leia a lo kal hmain Isua’n eng nge a tih?
Engtin nge Isua chu Messia a ni tih kan hriat?
HRIAT BELH NAN
Messia a nih anga Isua chanvo zir belh rawh.
“Messia Chungchâng Hrilh Lâwknate Chuan Isua Chu Messia A Ni Tih A Finfiah Em?” (Website thuziak)
Pathianin mihringte fa neih angin Isua a nei tih hi Bible zirtîrna a nih leh nih loh chhiar ang che.
“Engvângin Nge Isua Chu Pathian Fapa Tia Koh A Nih?” (Website thuziak)
Trinity hi Bible zirtîrna a nih loh chhan ngaihtuah rawh.
Nu pakhatin Isua chungchâng Bible sawi a chîk hnua a nun a thlâk dân chhiar rawh.
“Juda Hmeichhe Pakhatin A Rinna A Bih Chian Chhan A Sawi” (Awake!, May 2013)