Bêlvawtu Ropui leh A Hnathawh
“Bungbêl thinghlim, . . . hnathawh ṭha tinrênga inpeih sa [ni ang che.]”—2 TIMOTHEA 2: 21.
1, 2. (a) Pathian thil siam mipa leh hmeichhiate kha engtin nge hna thawh langsâr tak an nih? (b) Eng atân nge Bêlvawtu Ropuiin Adama leh Evi chu a siam?
JEHOVA chu Bêlvawtu Ropui a ni a. A thil siam ṭha ber chu kan pa hmasa ber Adama hi a ni. Bible chuan, “Tin, LALPA Pathianin leia vaivutin mihring a siam a, a hnârah chuan nunna thaw chu a thaw lût a: tichuan mihring chu mi nung a lo ni ta a,” a ti a, chu chu “thâwkna nei thil nung,” tihna a ni. (Genesis 2:7, footnote) Mihring siam hmasak ber chu ṭha famkim, Pathian anpuia siam a ni a: A chung lam finna, felna dik a hmangaihna leh a rorêl dikna tichiangtu a ni.
2 Adam-a nâkruh hmangin, Pathianin mipa ṭanpuitu leh tifamkimtu a chhûng bawk a—hmeichhia chu. Evi thianghlimna duhawm tak chuan tûn lai hmeichhiate hmêl ṭhatna a khûm a ni. (Genesis 2:21-23) Chu bâkah, mihring nupa hmasa berte chu he lei paradis-a siam tûra an chanvo tihpuitlin nân ṭha famkim taka duan, taksa leh rem hriatna chu pêk an ni. Genesis 1:28-a Pathian thupêk: “Chi tam tak thlaha lo pungin, leilung hi luah khat ula, in thu thuin awmtîr rawh u; tuifinriata sangha chungah te, chunglêng sava chungah te, thil nung leia bawkvâka kal zawng zawng chungah te thu nei bawk rawh u,” tih an hlen chhuah theih nâna thuam an ni bawk. A tâwpah chuan, he khawvêl huan pumpui hi “phuar famkimna” hmangaihnaa phuarkhâwm mi hlim vaibêlchhe tam taka tih khah tûr a ni.—Kolossa 3:14.
3. Kan nu leh pa hmasa berte kha engtin nge bungbêl hlu lo tak an lo nih a, eng rah nge a chhuah?
3 Vânduaithlâk takin, kan nu leh pa hmasa berte chuan an duh thu ngeiin Bêlvawtu Ropui, Siamtu Chungnung Ber thuneihna laka hel chu an thlang a ni. An nun kawng chu Isaia 29:15, 16-a a sawi ang a lo ni ta a. Chumi châng chuan: “An remruat chu LALPA laka thup tûra thûk taka zawngtute chu an chung a pik e! an thiltihte chu thim hnuaiah a awm a, ‘Tuin nge min hmu ang? Tuin nge hriat pawh min hria ang?’ an ti a. . . . Bêl vawtu chu bellei ang leka ngaihin a awm dâwn em ni, thil siam chuan a siamtu chu, ‘Ani mi siam ka ni hlei nêm,’ a tih ni? A nih loh leh, thil din chuan a dintu chu Hriatna rêng a nei lo,’ a tih ni?” a ti a. An luhlulna chuan chhiatna râpthlâk takah a hruai thleng a—chatuan thihnaa hremnaah chuan. Chu bâkah, an thlah mihring zawng zawngte chuan an hnên ata sualna leh thihna an rochung a ni. (Rom 5:12, 18) Bêlvawtu Ropui thil siam mawina chu nasa taka tihchhiat a lo ni ta a ni.
4. Eng thiltum hlu tak atân nge kan ṭan ang?
4 Nimahsela, tûna ṭha famkim lo dinhmunah pawh keini mi sual Adama thlahte chuan Sâm 139:14-a thu ziak: “I hnênah lâwm thu ka hrilh ang che; hlauhawm tak leh mak taka siam ka ni si a: i thiltihte hi mak tak a ni a; chu chu ka nunna hian a hre chiang hle a ni,” tih angin, Pathian Jehova kan fak thei a ni. Nimahsela, Bêlvawtu Ropui kut hnathawh bul ber nasa taka tihchhiata awm hi a va lungchhiat thlâk êm!
Bêlvawtuin A Hna A Zauh
5. Bêlvawtu Ropui themthiamna chu eng anga hman tûr nge a nih?
5 Hlim-awm takin, Bêlvawtu anga kan Siamtu themthiamna chu a thil siam hmasak mihringte chhûn nân mai bâkah thil tam taka hman tûr a ni. Tirhkoh Paula chuan: “Aw mihring, Pathian hnial veitu chu tunge maw i nih le? Thil siam chuan a siamtu hnênah, ‘Engati nge hetianga mi siam?’ a ti ang em ni? Bellei tlang khat bêl pakhat hlu tak, bêl pakhat hlu lo taka siam tûrin bêlvawtu chuan bellei chungah thu a nei lo vem ni?” tiin, min hrilh a.—Rom 9:20, 21.
6, 7. (a) Engtin nge tûn laia mi tam takten hlu lo taka chhûn an thlan? (b) Engtin nge mi felte chu hlu taka hman tûra chhûn an nih?
6 Ni e, Bêlvawtu Ropui hnathawh ṭhenkhat chu hlu taka hman atân leh a ṭhen chu hlu lo taka hman atân chhûn an ni ang. Khawvêl hi pathian ngaihsak lohna chirhdûpah a inbarh thûk tial tial a, chu mi ruala khawvêl dân anga kal thlangtute chu tihboral atâna chhûn an ni. Isua Krista, Lal ropui tak, rorêl tûra a lo kal hunah, chutiang bungbêl hlu lo, mi luhlul tak kêl ang mihring zawng zawngte chu Matthaia 25:46-a a sawi angin, “kumkhaw hremnaah [“boralnaah,” NW] an kal ang,” a tih zîngah an tel ang. Mahse, ‘hlu taka’ chhûn, berâm ang “mi felte” chuan ‘kumkhaw nunna’ an chang ang.
7 Inngaitlâwm takin, hêng mi felte chu Pathian chhûnna hnuaiah an intulût tûr a ni. Anni chu Pathian nun kawngah chuan an lût a. 1 Timothea 6:17-19-a thurâwn: “Sum rinawm lovah hian [in] beiseina nghat lova, thil zawng zawng lâwmna tûra tam taka min petu Pathian chungah chuan nghat zâwk . . . rawh,” tih thurâwn hi an zâwm a. Anni chuan he thu: “thil ṭha ti tûrin, thil ṭha tih ngah tûrin, thil phala thawhlâwm peih tûrin, nunna, nunna taktak chu an vawn theih nân, hun lo thleng tûr atân chuan lungphûm ṭha tak an tâna khâwl khâwm tûrin fuih rawh,” tih hi a takin an hmang a ni. Anni chu, vân lam thutak hmanga chhûn an ni a, Adama sualna avânga thil chân zawng zawng pe kîr leh tûra “mi zawng zawng tlan nâna inpea,” Isua Krista kaltlanga Jehova ruahmannaa rinna che thei lo an tilang a ni. (1 Timothea 2:6) Paula chuan, “mihring thar chuan [kan] inthuam tawh si a, chu mihring chu hriat famkimna nei tûrin, a siamtu anpui anga siam tharin a awm mêk a ni,” tiin, thurâwn a pe a, chu chu duh taka intukluhna tûr thurâwn a va ni êm!—Kolossa 3:10.
Eng Ang Bungbêl Nge I Nih Ang?
8. (a) Mi pakhat eng ang bungbêl nge lo ni ang tih engin nge thutâwp siam? (b) Mi pakhat chhûnnaah eng thil pahnihin nge ruangâm siam?
8 Mi pakhat eng ang bungbêl nge lo ni ang tih engin nge thutâwp siam? A nungchang leh a rilru put hmangin a ni. Hêngte hi châkna leh rilru ngaihtuahnain ruangâm a siam hmasa a. Lal fing Solomona chuan: “Mihring rilruin a kawng a ruahman a, a ke pên erawh chu LALPAN a hruai ṭhîn,” tiin, a sawi. (Thufingte 16:9) A pahnihnaah chuan, anni chu thil an hmuh leh an hriat te, thil an tawnte leh an ṭhian kawmte hian ruangâm a siam leh a ni. Chuvângin, “Mi fing pâwl la, i lo fing ang a, mi â pâwl erawh chu hrehawm tuar phahna a ni,” tih thurâwn hi ngaihven pawimawh tak a ni. (Thufingte 13:20) 2 Petera 1:16 a min vaukhân angin, “thawnthu fing taka ngaituah chhuah maite,” emaw Knox’s Roman Catholic Version sawi anga “mihring phuahchawp thawnthute,” emaw zawmna kan pumpelh tûr a ni. Hei hian rinna phatsantu Kristianna ram zirtîrnate leh an kût nîte a huam a ni.
9. Bêlvawtu Ropui chhûnna chu engtin nge duhawm takin kan chhân lêt ang?
9 Tichuan kan chhân lêt ang zêlin, Pathianin min chhûng thei a ni. Davida ṭawngṭaina: “Aw Pathian, ngun takin mi en chhuak la, ka thinlung hi hria ang che: mi fiah la, ka ngaihtuahnate hi hria ang che: tin, keimahah hian suahsualna kawng rêng rêng a awm nge awm lo, en la, chatuan kawngah chuan mi hruai ang che,” tih hi inngaitlâwm takin kan sawi nawn thei a ni. (Sâm 139:23, 24) Jehova chuan Lalram thuchah puan tûr a nei a. Kan thinlung chuan chanchin ṭha leh chu miin a hruai thlen tûr chu ngaihsânna nên a chhâng lêt tawh a. A inawpna pâwl hmangin chanchin ṭha hrilhna nêna inkaihnawih chanvo hrang hrang tam tak min pe a; hêng hi chênin i vuan tlat ang u. (Philippi 1:9-11)
10. Thlarau lam hun duan anga kal tûrin eng anga ṭan la tûr nge kan nih?
10 Nî tin Bible chhiar hun duan zuiin leh Pathian Lehkhathu leh Jehova rawngbâwlna hi kan chhûngkua leh ṭhiante zîngah titi bul berah hmangin Pathian Thu-a kan ngaihsakna pêk reng a pawimawh êm êm a ni. Jehova Hriatpuitute Missionary awmhote leh Bethel chhûngkaw tinte chuan zîng chawei dawhkânah zîng inkhâwmna hun an hmang ṭhîn a; chutah, chawlhkâra inthlâkin Bible emaw Kum Lehkhabu (English) emaw tawitea chhiarna an nei ṭhîn a ni. I chhûngkuain chutiang ruahmanna a nei thei ang em? Keini pawhin Kristian kohhrana inkawmna te, kan inkhâwmhona te, leh a bîk takin chawlhkâr tina Vênnainsâng zirnaa kan tel venate hmangin hlâwkna kan va dawng nasa êm!
Fiahna Hneh Tûra Chhûn
11, 12. (a) Kan nî tin nuna fiahna chungchângah Jakoba fuihna engtin nge kan hman ang? (b) Joba thil tawn khân rinawmna vawng tûrin engtin nge min fuih?
11 Kan nî tin nunah, dinhmun eng engemaw a awm Pathianin a phal a, a ṭhen chu hneh harsa kan ti mai thei a ni. Hêng hi engtin nge kan thlîr ang? Jakoba 4:8-in thurâwn min pêk angin, rilru i tihrehawm ngai lo vang u; ‘amah kan hnaih chuan, anin min hnaih ve ang’ tih kan thinlung zawng zawnga ringin Pathian i hnaih zâwk ang u. Dik takin, fiahna leh harsatnate kan tuar chhuah a ngai ang; mahse, chûng chu rahchhuah hlimawm leh min chhûng tûra phal a ni. Jakoba 1:2, 3 chuan, “Ka unaute u, in rinna fiahna chuan chhêlna a siam tih hriain, thlêmna tinrêng in tawh hunin lâwmna hlîrah ngai rawh u,” tiin, min tiam a ni.
12 Jakoba chuan: “Tuman thlêmna an tawh laiin, ‘Pathian thlêm ka ni’ ti suh se; Pathian chu sual thlêm rual a ni lo, amah pawhin tumah a thlêm ngai lo. Mi tin mahni châknaa hruai bo leh hîpa an awm chuan thlêmna an tâwk a ni zâwk e,” a ti a. (Jakoba 1:13, 14) Thlêna kan tawnte chu tam tak leh chi hrang hrang pawh a ni mai thei; mahse, Joba chungchâng angin, an vaiin min chhûnnaah thawh an nei theuh a ni. Pathian Lehkhathu, Jakoba 5:11 chuan: “Ngai teh u, tuartute chu engthâwl kan ti a; Joba chhelzia chu in hria a, Lalpan a tâwpa a tihzia pawh kha in hmu bawk a, Lalpa chu khawngaihnain a khahzia leh zah a ngaih theihzia pawh kha,” tiin, thutiam ropui tak min pe a ni. Bêlvawtu Ropui kuta bungbêlte angin, a rah chhuah tûra Joba neih ang rinngamna nên, rinawmna i vawng reng ang u!—Joba 2:3, 9, 10; 27:5; 31:1-6; 42:12-15.
Kan Naupangte Chhûnna
13, 14. (a) Nu leh pate’n engtikah nge an fate chhûnna an ṭan ang a, a tâwpa eng ang rah chhuah thlîr chungin nge? (b) Eng rah chhuah hlimawm tak nge i târ lan theih?
13 Nu leh pate chuan an fate an têttê aṭanga chhûnnaah chanvo an nei thei a, chutiang a nih chuan kan ṭhalaite chu rinawmna vawngtu ṭha an lo va ni dâwn êm! (2 Timothea 3:14, 15) Hei hi fiahna nasa tak an tawh hunah pawh a dik a ni. Kum engemaw zât kaltaah khân, Africa rama tihduhdahna a nasat hle laiin, chhûngkaw rinawm tak pakhatin an bungraw dahna intê-ah arûkin Vênnainsâng an chhu a. Nikhat chu sipaiten chumi kawtthlêr chu an rawn zawh a, tlangvâl sipaia lâk tûr in tinah an rawn zawng a. He chhûngkuaa tlangvâl pahnihte tân bihrûkna hun awm mah se, an bihrûk chuan sipaiten an zawng anga, chutah lehkha chhutna khâwl chu an hmu chhuak ngei dâwn si a. Hei hian chhûngkuaa nghaisakna emaw, thihna emaw a thlen thei a ni. Eng nge tih tûr ni ta ang? Tlangvâl pahnihte chuan Johana 15:13-a thu ziak: “Mihringin a ṭhian aia a nun a paih aliama hmangaihna nasa zâwk tuman an nei lo,” tih thu chu huai taka la chhuakin, an ṭhutkhâwmna pindanah an la ṭhu ta reng a. Sipaiten anni chu an hmu chhuak thei a, sipaia luh an hnâwl chuan nunrâwng takin an nghaisa emaw, an that hial emaw a ni ngei ang. Mahse, chutiang a nih chuan an zawng chhunzawm lo vang a, lehkha chhutna khâwl leh an chhûngkaw zînga mi dangte an him thung ang. Nimahsela, rah chhuah chhinchhiah tlâk tak a lo awm a ni. Sipaiten in dang panin chu in chu an kal kân hlauh mai le! Chûng mihring bungbêl, hlu taka hman tûra chhûnte chu a hun taka thlarau lam chaw chhuah chhunzawm zêl nân an lehkha chhutna khâwl nên an dam khawchhuak ta a ni. Tûnah, chu tlangvâl pahnihte zînga pakhat leh a unaunu chu Bethel-ah rawngbâwlin an awm a; ani chuan chu khâwl upa tak chu a la enkawl chhunzawm zêl a ni.
14 Naupangte chu ṭawngṭai dân zirtîr theih an ni a, Pathianin an ṭawngṭainate chu a chhâng a ni. Hemi chungchânga entîrna langsâr tak pakhat chu Rwanda rama mihring insâm hun laia thil thleng hi a ni. Hmeichhe naupang kum ruk mi leh a nu leh pate chu hel hoten vawmpuah bomb hmanga thah tuma an inpeih diam tawh laiin, Jehova rawng bâwl zêl thei tûra zuah an nih theih nân, hmeichhe naupangtê chu ring tak leh ṭhahnemngai takin a ṭawngṭai a. “He hmeichhe naupangtê avâng hian kan that thei lo a che u,” tiin, thah tumtute chuan an zuah ta a ni.—1 Petera 3:12.
15. Eng thununna mi tichhe thei tak nge Paula’n a vaukhân?
15 Kan ṭha lai tam takte chuan a chunga kan târ lan anga dinhmun harsa an hneh a ngai lo va; Mahse, an school-ah leh vêng nun khaw lo aṭangin fiahna tam tak an tâwk a: ṭawngkam ṭha lo te, milem lepchhiah tak tak te, intihhlimna ṭha lo te, leh thil sual ti tûra ṭhiante nêksâwrna te chu hmun tam takah chuan a hluar hle a ni. Tirhkoh Paula chuan hemi chungchângah vaukhânna a pe zîng hle a ni.—1 Korinth 5:6; 15:33, 34; Ephesi 5:3-7.
16. Engtin nge mi bungbêl hlu tak a lo nih theih ang?
16 Bungbêl “ṭhenkhatte ngaihhlut tûr a awm bawk a; ṭhenkhatte ngaihhlut loh tûr a awm,” thu a sawi zawhin, Paula chuan: “Chuvângin, chûng thil laka mi a inthiarfihlîm chuan bungbêl thianghlîm, Lalpa hman tlâk, hnathawh ṭha tinrênga inpeih sa, ngaihhlut tûr mi a ni ang,” tiin, a sawi a ni. Chuvângin kan ṭhalaite chu an ṭhian kawmah fîmkhur tûrin i fuih ang u. Anni chu ‘tleirâwl châknate tlânsan a, thinlung thianghlima Lalpa lam apiangte zîngah chuan felna te, rinna te, hmangaihna te, remna te i ûm tîr ang u.’ (2 Timothea 2:20-22) ‘Intihsâwt tawn ṭheuh’ nâna chhûngkaw hun duan chu kan naupangte chhûnnaah thil ṭangkai tak a ni thei ang. (1 Thessalonika 5-:11; Thufingte 22:6) Nî tina Bible chhiarna leh zirna, Society thu chhuah inchawihte hmanna chu ṭanpuitu ṭha tak a ni thei ang.
Mi Tin Tâna Chhûnna
17. Engtin nge thununnain min chhûn ang a, eng rah chhuah hlimawm tak nên nge?
17 Min chhûn nân, Jehova chuan a Thu leh a inawpna pâwl hmangin thurâwn min pe a ni. Chutiang Pathian thurâwn pêkte chu dodâl ngai suh! Fing takin chhâng lêt la, chu chu Jehova hman tûrin hlu takah insiamtîr rawh. Thufingte 3:11, 12 chuan: “Ka fapa, LALPA thununna che ngainêp suh la, a zilhhauna che ning hek suh. LALPA chuan a hmangaihte chu a zilhhau ṭhîn a ni, pa in a fa a lâwm apiangte a zilhhau ṭhîn ang hian,” tiin, thurâwn min pe a ni. Pa anga thurâwnna dang chu Hebrai 12:6-11-ah pêk a ni a, chutah chuan: “Lalpa chuan a hmangaih chu a thunun ṭhîn a . . . Tin, thununna rêng rêng hi tuar lai chuan lâwmawmin a lang lo va, lungchhiatthlâkin a lang zâwk ṭhîn, tuar hnuah erawh chuan chu mia sawizawia awmte tân chuan rah thlamuanawm tak, felna chu a chhuahsak ṭhîn,” tih kan hmu a ni. Chutiang thununna bulpui ber chu Pathian thâwkkhum Thu a ni ngei tûr a ni.—2 Timothea 3:16, 17.
18. Luka bung 15 aṭangin simna chungchâng eng nge kan zir?
18 Jehova chu zahngai thei tak a ni bawk a. (Exodus 34:6) Sual nasa berah pawh rilru tak taka simna lan chhuahtîr a nih phawt chuan a ngaidam a ni. Tûn laia ‘fapa tlânbote’ pawh hi bungbêl hlu taka chhûn theih an ni. (Luka 15:22-24, 32) Kan sualte chu fapa tlânbo sualna anga nasa a ni lo mai thei a; mahse, Pathian thurâwn inngaitlâwm taka chhân lêtna chuan bungbêl hlu tak ni tûra chhûna awm tûrin min hruai reng ang.
19. Jehova kuta bungbêl hlu tak angin engtin nge rawng kan bâwl chhunzawm zêl theih ang?
19 Thutak kan zir hmasak ber ṭumin, Jehova ruangâm siam nih kan duhna kan lantîr a. Khawvêl thilte chu bânsanin, mihring thara inthuamin, leh inpumpêk Kristian baptisma chang kan lo ni ta a ni. Ephesi 4:20-24-a thurâwn, ‘hmân lai kan awm dân kawnga mihring hlui, bumna châkna anga chhe deuh deuh kha hlîp thlain, thutak felna leh thianghlimnaa [“rinawm nghehna,” NW] Pathian anga siam khân inthuam ila,’ tih hi kan zâwm a ni. Hlu taka hman bungbêl anga rawngbâwl rengin, Bêlvawtu Ropui, Jehova kutah chuan mimal takin thunun theihin i awm chhunzawm zêl ang u!
Thlîr Lêtna
◻ Kan lei lama Bêlvawtu Ropui thil tum chu eng nge ni?
◻ Engtin nge hlu taka chhûn i nih ang?
◻ Eng kawngin nge kan fate kan chhûn ang?
◻ Thununna hi engtin nge kan thlîr ang?
[Phêk 10-naa milem]
Hlu taka chhûn i ni dâwn nge hnâwl i ni dâwn?
[Phêk 12-naa milem]
Naupangte chu an têttê aṭanga chhûn theih an ni