Hlum Bela Kan Rote

“Thiltihtheihna nasatzia chu keimahni hnêna mi ni lovin, Pathian ta a nih theih zâwkna tûrin chu ro chu hlum bêlahte kan vawng a ni.”—2 KORINTH 4:7.

1. Isua entîrna hian engtin nge min tihchak ang?

HE LEIA Jehova chhûna a awm lai khân, Isua’n mihringte chak lohna chu a hmun ngeiah a tawng a. Rinawmna a vawn ngheh dân chuan min va tichak dâwn êm! Tirhkoh chuan: “Krista pawh khân a tuarsak che u avângin hetiang ti tûrin koh in ni asin; a hniaka in zuina tûrin entawn tûr a hnutchhiah che u kha,” tiin, min hrilh a ni. (1 Petera 2:21) Chutiang chhûnnaah intulûtin, Isua chuan khawvêl a hneh a, a tirhkohte pawh hnehtu lo ni tûrin a tihuaisen bawk a ni. (Tirhkohte 4:​13, 31; 9:​27, 28; 14:3; 19:8) An hnêna a thusawi hnuhnûng bera a hnukhâr fuihna a pêk hi a va ropui êm! Ani chuan: “Hêng thu hi in hnênah ka sawi tawh hi, keimahah hian in thlamuanna tûrin. Khawvêlah hian hrehawmin in awm ṭhîn; nimahsela thlamuang takin awm rawh u, keiin khawvêl ka ngam ta,” tiin, a puang a ni.​—Johana 16:33.

2. Khawvêl thimna nêna khaikhinin eng êng nge kan neih?

² Chutiang bawkin, “chanchin ṭha êng” leh thimna thlentu “he khawvêl pathian” chungchâng a khaikhin hnuah, tirhkoh Paula chuan kan rawngbâwlna hlu tak chungchâng chu: “Thiltihtheihna nasatzia chu keimahni hnêna mi ni lovin, Pathian ta a nih theih zâwkna tûrin chu ro chu hlum bêlahte kan vawng a ni. Lehlam lehlama nêksâwrin kan awm a, nimahsela kan thaw a ipik si lo; mangangin kan awm a, nimahsela kan bei a dawng si lo; tihduhdahin kan awm a, nimahsela kalsanin kan awm si lo; vuak thlûkin kan awm a, nimahsela, tihboralin kan awm si lo,” tiin, a sawi a. (2 Korinth 4:​4, 7-9) “Hlum bêl” keh awlsam tak ni mah ila, Pathianin Setana khawvêl hneh pumhlûm thei tûrin a thlarau thianghlimin min chhûng a ni.​—Rom 8:​35-39; 1 Korinth 15:57.

Hmân Lai Israelte Chhûnna

3. Juda hnam chhûn an nih dân engtin nge Isaia’n a sawi?

³ Jehova chuan mimal chauh ni lovin, a hnam pumpui chu a chhûng a ni. Entîr nân, hmân lai Israelten Jehova chhûnnaah an intukluhin, an hlawhtling a. Nimahsela, a tâwpah chuan an intichawlawlin thu awihlohna kawng an zawh a. Chuvângin, Israel hnam dintu chuan a chungah ‘chungpikna’ a thlentîr ta a ni. (Isaia 45:9) B.C.E. kum zabi pariatna-ah, Isaia chuan Israelte sualna tam takte Jehova a hrilh a: “Aw LALPA, nang chu kan pa i ni a; keini hi bellei kan ni a, nang min vawtu i ni; tichuan kan za hian i kut chhuak kan ni. . . . Kan thil duhawmte zawng zawng lah chu tihchhiatin a awm ta vek si a,” tiin. (Isaia 64:​8-11) Israelte chu bungbêl tihchhiat tûra chhûn lek an lo ni ta a ni.

4. Jeremia’n eng entîrna lem nge a chan?

⁴ Kum zabi khat hnuah, ngaituahna nî a hnai tawh hle a, Jehova chuan Jeremia hnênah hlum bêl la a, Jerusalem upa ṭhenkhat nên Hinom ruama kal tûrin a hrilh a, a hnênah: “I kalpuite mithmuhaah bêl chu i tikeh ang a, an hnênah hetiang hian ti ang che, ‘Sipaihote LALPA chuan heti hian a ti: “hetiang bawk hian he mite leh he khua hi ka tikeh ang; bêlvawtu bêl miin a tihkeha, siam that leh rual a ni lo ang hian,”’” tiin, a zirtîr a.​—Jeremia 19:​10, 11.

5. Israelte chunga Jehova rorêlna chu eng anga nasa nge a nih?

⁵ B.C.E. 607-ah, Nebukanezara’n Jerusalem leh a biak in a tichhia a; tin, Juda dam khawchhuakte chu Babulon-ah salah a man bawk a ni. Nimahsela, hnawhchhuah an nih kum 70-na hnuah, Juda inlamlêtte chu Jerusalem leh a biak in tungding leh tûrin an kîr leh thei a ni. (Jeremia 25:11) Nimahsela, chu hnam chuan C.E. kum zabi pakhatnaah, Bêlvawtu Ropui chu an phatsan leh a, a tâwpah chuan bawhchhiatna nasa ber Pathian Fapa ngei thahnaah an lo tlahniam ta a ni. C.E. 70-ah chuan Pathianin Juda thilte kalhmang paih bo nân Rom Khawvêl Thuneihna chu atâna hremtu anga hmangin Jerusalem leh a biak in chu a tichhe vek a ni. Israel hnam chu “thianghlimna leh mawina” nêna Jehova kuta chhûn an ni leh ngai tawh lo vang.a

Thlarau Lam Hnam Pakhat Chhûnna

6, 7. (a) Paulan engtin nge thlarau lam Israel chhûnna a sawifiah? (b)  ‘Khawngaihna bêlte’ chu engzât nge an nih ang a, eng anga siam chawp nge an nih?

⁶ Juda mi Isua pawmte chu hnam thar, thlarau lam “Pathian Israelte” lungphum zînga mi anga chhûn an ni. (Galatia 6:16) Tichuan, Paula thu: “Bellei tlang khat bêl pakhat hlu tak, bêl pakhat hlu lo taka siam tûrin bêlvawtu chuan bellei chungah thu a nei lo vem ni? Khawngaihna bêl, ropui tûra a lo buatsaih lâwkate chungah chuan a khawngaihna ngahzia a entîr theih nân, thinurna bêl boral tlâkte chungah chuan, Pathianin a thinur leh a thiltihtheihna lantîr duh mahsela a dawh hrâm hrâm chuan eng nge pawi ang?” tih hi inâwm tak a ni.​—Rom 9:​21-23.

⁷ Tho leh Isua chuan, hêng ‘khawngaihna bêlte’ chu 1,44,000 a nih tûr thu a hriattîr a. (Thu Puan 7:4; 14:1) Tisa lam Israelten chu mi zât an tlin loh avângin, Jehova chuan a khawngaihna chu hnamte hnênah a zauh ta a ni. (Rom 11:​25, 26) Kristian kohhran din tharte chu rang taka tihpun a ni a, kum 30 chhûngin chanchin ṭha chu “vân hnuaia thil siam zawng zawngte zînga tlângaupui,” a ni tawh a. (Kolossa 1:23) Hei hian tualchhûnga kohhran darh sarh tam takte chu enkawlna dik hnuaia lâkkhâwm a ngaihtîr a ni.

8. Awptu pâwl hmasa berah tute nge tel a, engtin nge he pâwl a ṭhan chhoh zêl?

⁸ Isua chuan tirhkoh 12-te chu awptu pâwl hmasa ber ni tûrin a buatsaih a, anni leh mi dangte chu rawngbâwlna atân a zirtîr a ni. (Luka 8:1; 9:​1, 2; 10:​1, 2) C.E. 33 Pentikost-ah, Kristian kohhran chu din a ni a, a hun takah chuan, Kristian kohhran awptu pâwl chu “Jerusalem khuaa tirhkohte leh upate” huam tûra tihlen a ni. Tihlen hun chhûng a zawh chuan, Isua unaupa Jakoba chu tirhkoh ni lo mahse, kaihruaitu (chairman) anga a ṭan thu a lang a ni. (Tirhkohte 12.17; 15:​2, 6, 13; 21:18) Thil thleng chanchin ziaktu Eusebius-a sawi dânin, tirhkohte chu tihduhdah tûra a bîk taka tum lo niin, bial hrang hrangah an inṭhen darh ta hlawm a ni. Awptu pâwlte insiam phung chu a ṭul ang zêla siam rem a ni.

9. Eng hmasâwnna lungchhiatthlâk tak lo thleng tûr nge Isua’n a hrilh lâwk?

⁹ Kum zabi pakhatna tâwp lamah chuan, ‘hmêlma, Diabola,’ chuan buh chi ṭha ang “vân ram” ro khâwmtu tûrte zîngah “buh lem a theh” ṭan a. Isua’n he hmasâwnna lungchhiatthlâk tak mai hi buh seng hun he ‘khawvêl tâwpna’ hun thlenga phal a nih tûr thu a sawi lâwk a ni. Tichuan, “mi felte chu an Pa ramah chuan ni angin an êng tawh ang.” (Matthaia 13: 24, 25, 37-43) Chu chu engtikah nge ni ang?

Tûn Laia Pathian Israelte Chhûnna

10, 11. (a) Tûn laia Pathian Israelte chhûnna chu engtin nge a kal zêl? (b) Kristianna ram zirtîrna leh ṭhahnêm ngai taka Bible Zirtute zîngah zirtîrna inkalh eng nge a hmuh theih?

¹⁰ 1870-ah Charles Taze Russell-a chuan Pittsburgh, Pennsylvania, U.S.A. ramah Bible zirlai pâwl a din a. 1879-ah thla tin chhuak magazine, tûn laia Vênnainsâng ni ta hi a chhuah ṭan a ni. Hêng Bible Zirlai tia koh lo ni tate hian Kristianna ram chuan thlarau (soul) thi thei lo te, hremhmun meidîl te, sual kan faina hremhmun tênau te, Pathian pakhata mi pathum awm rinna te, leh nausên baptisma chantîr ang te hi Pathian thu ni lo, sakhaw nei lo zirtîrna aṭanga an lâkluh a ni tih an hre chuak thuai a.

¹¹ Nimahsela, thil pawimawh zâwk mah chu, hêng Bible thutak hmangaihtute hian hetiang Bible zirtîrna dân bulte: Isua Krista inthawina zâra tlanna leh Pathian Lalram hnuaia remna lei paradis-a chatuana nung tûra thawhlehna hi an siam ṭha leh a. A pawimawh ber chu, lei leh vâna Lal Chungnung ber anga Pathian Jehova nihna thiam chantîrna lo thleng thuai tûr chu an uar a ni. Bible Zirlaite chuan Lal Ṭawngṭaina: “Kan Pa vâna mi, i hming zahawm rawh se. I ram lo thleng rawh se. I duhzâwng vâna an tih angin leia mi’n ti rawh se,” tih hi chhân a ni thuai dâwn tih an ring tlat a ni. (Matthaia 6:​9, 10) Anni chu khawvêl pum huap remna-hmangaih Kristian pâwlah Pathian thlarau thianghlima chhûnin an awm a ni.

12. Engtin nge Bible Zirlaite khân hun pawimawh tak an lo hriat theih?

¹² Daniela bung 4-na leh hrilh lâwkna dangte thûk taka zirna aṭangin Bible Zirlaite chuan, Lal Messia anga Isua lo awm lehna a hnai hle a ni tih an ring nghet tlat a. “Jentailte nî” tâwp hun tûr chu 1914-ah a ni dâwn tih an hre bawk a ni. (Luka 21:24; Ezekiela 21:​26, 27) Bible Zirlaite chuan United States pumpuiah chuan Bible zirna school-te (a hnua kohhran tia koh) chu dinin, an rawngbâwlna chu an tizau thut a ni. Kum zabi a inher chhuah chuan, mumal taka an Bible zirtîrna hna chu Europe leh Australasia-ahte tihzauh a ni a. Ruahmanna mumal tak chu a pawimawh ta êm êm a ni.

13. Eng dân phal dinhmun nge Bible Zirlaite khân an hmuh a, eng rawngbâwlna langsâr tak nge Society hotu hmasa berin a hlan?

¹³ Bible Zirlaite chu dân phal dinhmun nei tûrin, Zion Watch Tower Tract Society chu kum 1884-ah U.S.A. ramah dân phal pâwl ni tûra din a ni a, a hmunpui chu Pittsburgh, Pennsylvania-ah a ni. A kaihruaitute chuan Awptu Pâwl laipuiah an ṭang a, khawvêl pumpuia Pathian Lalram thuhrilna an endik a ni. Society hotu hmasa ber Charles T. Russel-a chuan Pathian Lehkhathu Zirna (English) tih lehkhabu bu ruk inzawmte ziakin, thuhrilh zinvahna zau tak a awmtîr bawk. Bible a zirna a ṭan hmaa a lo khâwl tawh sum tam tak chu khawvêl puma Lalram rawngbâwlnaah a thawh bawk a ni. 1916, Europe ramah Indopui a nasat hle laiin, Unau Russell-a chau tak mai chu thuhrila a zinna lamah a boral ta a ni. Pathian Lalram chungchâng hriattîrna tihzauh nân a neih zawng zawng a hlân ta a ni.

14. Engtin nge J. F. Rutherford-a khân ‘intihsiakna ṭha chu a beih’? (2 Timothea 4:7)

¹⁴ Joseph F. Rutherford-a, Missouri ram rorêltu-a ṭang lailâwka chu hotu a lo ni ta a. Huaisen taka Bible thutak a humhalh avângin, Kristianna ram puithiamte chuan ‘dâna thiltihsualnaah’ ram hruaitute nên an thawkho ta a. June 21, 1918-ah Unau Rutherford-a leh Bible Zirlai hruaitu dang pasarihte chu hremna chi hrang hrang a ruala tlâk tûrin kum 10 emaw, kum 20 emaw tang tûra an chung thu rêl a ni ta a. Bible Zirlaite chuan an khing lêt a. (Sâm 94:20; Philippi 1:7) Rorêlna sâng zâwk an thlenin, March 26, 1919-ah chhuah an ni a; tichuan, chumi hnuah mi heltîr anga puhna zawng zawng ata thiam chantîr hulhual an ni.b He thiltawn hian, thutak nghet taka humhalh tûrin anni chu a chhûng a ni. Chanchin ṭha hril tûra thlarau lam indonaah Babulon Khaw Ropui dodâlna awm mah se, Jehova ṭanpuinaa hneh tûrin kawng eng kimin an bei a ni. Chu indona chu tûn kum 1999 thlengin chhunzawm zêl a ni.​—Matthaia, bung 23; Johana 8:​38-47.

15. Envângin nge 1931 hi chhinchhiah tlâka pawimawh a nih?

¹⁵ 1920 leh 1930 chho bawrvêl chhûngin hriakthih Pathian Israelte chu Bêlvawtu Ropui khaihhruaina hnuaia chhûn an ni chho zêl a. Pathian Lehkhathu aṭanga lo chhuak hrilh lâwkna êng chuan, Jehova hnênah chawimawina a hlân a, Isua Messia Lalramah a innghat bawk a ni. 1931-ah chuan Bible Zirlaite chuan hming thar Jehova Hriatpuitute tih chu lâwm takin an pawm ta a ni.​—Isaia 43:​10-12; Matthaia 6:​9, 10; 24:14.

16 phêk 11-naa bâwm nên. Engtikin nge 1,44,000 tûrte an kim a, hemi chungchângah hian eng nge a chianna awm?

¹⁶ 1930 chho bawrvêlah chuan “kohva te, thlana te leh rinawma te” zât tûr 1,44,000 chu a famkim tawh niin a lang a. (Thu Puan 17:14; phêk 11-na bâwm en rawh.) Kum zabi pakhatnaah hriak thih engzât nge seng a nih kan hre lo va; tin, Kristianna ram thurin phatsanna ropui, kum zabi thimte chhûngin “buh lem” zîng ata engzât nge seng a nih kan hre lo bawk. Mahse, 1935-ah chuan mi 56,153 zînga khawvêl pumpuia thuchhuahtu belhkhâwm 52,465-te chuan Hriatrengnaah entîrnate eiin an vân lam beiseina chu an tilang a ni. La seng tûr mi tam takte dinhmun tûr chu eng nge ni ang?

“Ngai Teh! Mipui Tam Tak”

17. Kum 1935-ah eng hmasâwnna hriatreng tlâk nge thleng?

¹⁷ 1935, May ni 30 aṭanga June ni 3 thleng Washington, D.C., U.S.A. rama inkhâwmpuina neihah Unau Rutherford-a chuan “Mipui Nasa Tak” tih thupuia hmangin chhinchhiah tlâk tak thu a sawi a.c He pâwl “tuma chhiar sên loh” chu thlarau lam Israel 1,44,000-te chhinchhiahna tâwp hun a hnaih hunah a lo lang a ni. Hêngte hian Isua krista, “Berâm No thisena” tlanna thiltihtheihnaah chuan an rinna an tilangin, Jehova biak inah rawngbâwlna thianghlim an hlân bawk a ni. Anni chu hokhat angin ‘thihna awm leh tawhlohna’ hmun, leilam Paradis chang tûra ‘hrehawm nasa tak ata dam khawchhuakhote’ an ni. Chu Inkhâwmpui neih hma kum engemaw zât kaltaah khân, he pâwl hi Jonadaba anga sawi a ni.​—Thu Puan 7:​9-17; 21:4; Jeremia 35:10.

18. Kum 1938 chu eng kawngin nge a pawimawh?

¹⁸ Kum 1938 chu chiang taka pâwlhnihte thiarhrannaah hun pawimawh tak a ni. March 15 leh April 1, 1938, chhuak Vênnainsâng (English) chuan “A Berâmte” tih zirlai hmunhniha ṭhen a keng tel a; tin, hriakthih la bângte leh an thurualpui mipui nasa takte inlaichîn dân chiang takin a târ lang a ni. Tichuan, June 1 leh June 15 chhuak chuan zirlai thu ziak “Pâwl” tih Isaia 60:17 ṭanchhan chu a keng tel bawk a ni. Kohhran zawng zawngte chu Pathian duansa theocratic ruahmanna ṭhanlen nân tualchhûng chhiahhlawhte ruat tûra Awptu Pâwl hnêna dîlna thehlût tûra ngen an ni. Kohhrante chuan chutiang chiah chuan an ti a ni.

19 leh footnote. A tlângpuia ‘beram dangte’ kohna chuan tûn laiah kum 60 a chuang tawh a ni tih eng thil dik hian nge tifiah?

¹⁹ Jehova Hriatpuitute Kum Lehkhabu (English) 1939-in a sawi dânin: “Tûna leia awm hriak thih Krista Isua hnung zuitute chu an tlêm hle tawh a, an tam belh tawh ngai lo vang,” tiin, a sawi a. Anni chu Pathian lehkhathu chuan, Zion, Pathian inawpna pâwl thlah ‘a la awmte’ tiin, chiang takin a sawi a ni. (Thu Puan 12:​17) Lalpa chuan ‘mipui nasa tak’ lo ni tûr a ‘berâm dangte,’ chu amah ngeiin tûnah a khâwm a ni. (Johana 10:16) Tûna lâk khâwmte chu a la bângte thu rualpui an ni a, rawng an bâwl ho bawk. Tûn aṭangin ‘beram danga’ insiamte chu ‘mipui nasa tak’ an nih thlengin an pung zêl ang. Hriak thih la bângte chu mipui tam takte lâk khâwmna enkawl tûra chhûn an ni. Anni ho pawh hi tûna chhûn tûr an ni.d

20. 1942 aṭangin pâwl chungchânga inthlâkthlengna eng nge lo awm?

²⁰ 1942, Khawvêl Indopui II-na a nasat hle laiin, Joseph Rutherfort-a chu a thi a, Nathan Knorr-a chuan hotu nihna a rochung a. Society hotu pathumna chu kohhrana theocratic school a din leh missionary te inzir nân Gilead School a din avângin duhawm taka hriat reng a ni. 1944 Society kum tin inkhâwmnaah chuan, ani chuan Society thuthlungte chu ennawn leh a ni a, chuvângin pâwl zînga mi nihna chu sum thawhnaah innghat lovin, thlarau lam thilah a innghat zâwk ang tih a puang a ni. A hnu kum 30 chhûngin khawvêl pumpuia thlawhhma rawngbâwltute chu 1,56,299 aṭangin 2,179,256-ah a pung chho a ni. 1971-75 chhûngin pâwl chungchânga inthlâkthlengna dang a mamawh a. Hotu anga ding mi pakhat chauhvin lei pumpui Lalram rawngbâwlna chu chipchiar taka enkawl theih a ni tawh lo va. Kaihruaitu inthlâk kual, Awptu Pâwl chu hriak thih mi 18-a tihlen a ni a, an zînga a chanve deuhthaw chuan tûnah chuan an lei nun an hmang zo tawh a ni.

21. Lalram atân pâwl tlêma mite chu engin nge tlintîr?

²¹ Pâwl tlêmte zînga a la bângte chu fiahna rual tam tak kaltlanga chhûn an ni. ‘Hriatpuitu thlarau’ an dawnna avângin huai takin an tuar chhuak thei a ni. Isua’n: “Thlêmna ka tawh chhûng zawng nangni mi awmpuitu in ni a; tichuan ka rama ka dawhkâna in eia in bâr theihna tûrin, ka Pain ram mi ruatsak angin ram ka ruatsak che u a ni; tichuan Israel hnam sâwm leh hnam hnih rorêlsakin lalṭhutphahah in la ṭhu ang,” tiin, a hrilh a ni.​—Rom 8:​16, 17; Luka 12:32; 22:​28-30.

22, 23. Pâwl tlêmte leh berâm dangte kha eng anga chhûn nge an nih?

²² He leia thlarau hriak thih la bângte chu an tlêm tawlh tawlh avângin, khawvêl pumpuia kohhran tin deuhthawah mipui tam taka mi unau puitlingte chu thlarau lama enkawlna chanvo pêk an ni. Hriatpuitu hriak thih upa takte lei lam nun kawng a tâwp zêl avângin, berâm dang zînga hotu sa·rimʹ te chuan lal pâwl angin he leia inawpna hna hlen chhuak thei tûra ṭha taka zirtîr an ni tawh ngei ang.​—Ezekiela 44:3; Isaia 32:1.

²³ Pâwl tlêmte leh berâm dangte chu bungbêl hlu takah inangkhata chhûn zêl tûr an ni. (Johana 10:​14-16) Kan beiseina chu “vân tharte” emaw, “lei thar” emawa innghat pawh ni se, Jehova sâwmna: “Ka thil siamah chuan kumkhuain lâwmin hlim rawh u: ngai teh u, [vân lam] Jerusalem chu hlimnaah ka siam a, a mite chu lâwmnaah ka siam a nih hi,” tih hi thinlung zawng zawngin i chhâng lêt ang u. (Isaia 65:​17, 18) Keini mihring derthawng takte chuan ‘thiltihtheihna nasa tak’​—Pathian thlarau thianghlim thiltihtheihna​—hmanga chhûna awmin inngaitlâwm takin a rawng i bâwl reng ang u!​—2 Korinth 4:7; Johana 16:13.

[Footnote-te]

I La Hre Reng Em?

◻ A Pa chhûnnaa a intukluhnaah, engtin nge Isua chu kan entawn tûr a nih?

◻ Hmân lai Israel ramah eng chhûnna nge thleng?

◻ “Pathian Israelte” chu tûn thlengin eng anga chhûn nge an nih?

◻ Eng thil tum atân nge ‘berâm dangte’ chhûn an nih?

[Phêk 18-naa bâwm]

Kristianna Rama Chhûnna Dang

Greece ram Athen aṭanga Associated Press thu thawn chhuah chuan tûn hnaia Greek Orthodox Church hotua an ruat chungchâng chu a hnuaia mi angin report a pe a: “Ani hi remna palai ni tûra ngaih a ni a; mahse, Greek Orthodox Church hruaitu chu indona atâna a tlângpuia inbuatsaih a ang zâwk a ni.

“‘A ṭul a nih chuan thisen chhuah tûrin leh inpumpêk tûrin kan inpeih reng a ni. Kohhran (church) angin, remna atân kan ṭawngṭai a . . . Mahse, indona bungrua thianghlimte chu a ṭûl chuan mal kan sâwm ṭhin,’ tiin, Puithiam hotu Christodoulos-a chuan tûn hnaia Nula thianghlim Vâna Lâkchhohna nî-ah a sawi a, chu mi nî chu Greece sipaite nî a ni bawk,” tiin.

[Phêk 19-naa bâwm]

“Belh a Ni Tawh Lo Rêng Rêng!”

1970 Gilead zirna zawh nî-in, Frederick Franz-a, chutih hun laia Watch Tower Society hotu pahnihna chuan anni, lei lam beiseina nei berâm dang zirlaite hnênah thil ni thei tak thlarau hriak thih la bângte zînga mi anga inchâl tu emaw an baptist mai theih thu a hrilh a. Hei hi thil thleng thei a ni em? Awle, Baptistu Johana pawh berâm dangte zînga mi a ni a; mahse, Isua Krista leh tirhkoh ṭhenkhatte a baptist thu a hrilhfiah a. Tichuan, a la bâng dang kohna a awm leh awm loh a zawhzawm leh a. Ani chuan: “Awm lo, belh a ni tawh lo rêng rêng!” a ti a. “Chu kohna chu 1931-35-ah a tâwp daih tawh! Belh a ni tawh lo rêng rêng. Anih leh, Hriatrengnaa entîrna eitu mi thar tlêmtê te chu tute nge ni ang? A la bângte an nih chuan anni chu a thlâkna an ni ang! Anni chu hriak thihte zât tihpunna ni lovin, rinna lama tla tate thlâkna an ni,” a ti bawk.

[Phêk 15-naa milem]

Kan rawngbâwlna ro chu kan va hlut êm!

[Phêk 16-naa milem]

Hmân lai Israelte chu tihchhiat tûra chhûn an lo ni