Chatuana Nunna A Awm Thei Tak Tak Em?

“Zirtîrtu chatuan nunna ka neih theih nân ṭhil ṭha engnge ka tih ang?”—MATTHAIA 19:16.

1. Mihring dam hun chhûngah engnge sawi theih awm?

PERSIA Lal Xerxes I-na Bible-ah A­has­u­er­a ti a hriat chuan, a sipate chu B.C.E. 480-a indona tûrin a lo endik vek tawh a. (Estheri 1:​1, 2) Greek History ziaktu Herodotus sawi angin, a mite a thlîrin lal chuan a mittui a seng hial a. Engvângin maw? “Miti lungngai a ni,” tiin, “mihring dam chhûng hun tawite ka ngaihtuah hian, hêng mi zawng zawngte hi, tumah tûn aṭang hian kum sângkhat an dam dâwn si lo va,” tiin, Xerxes chuan a sawi. Nang pawhin nun chu lungchhiatthlâk taka tawi leh tuman tarna, dam lohnate leh thihna te an duh lo tiin i ngai ngei ang. Aw, kan ṭhat hrisêl leh hlimna hun chauhva nun kan chên thei a nih chuan aw!​—Joba 14:​1, 2.​—Joba 14:​1, 2.

2. Mi tam takin eng beiseina nge an hlimpui a, engvâng nge?

² Awmze nei takin, The New York Times Magazine September 28, 1997 chuan “Nun an Duh” tih thu ziak a târ lang a ni. Hei hi chhuichîkmi sawichhuah: “Chatuana nung tûr chhuan hmasa ber kan ni thei tih ka ring tak zet a ni!” tih chu lâkchhuah a ni. Nang pawhin cha­tuan nunna chu a theih a ni tih i ring ve thei mahna. He leiah chatuanin kan nung thei a ni tih chu Bible-in min tiam avângin chutiang chuan i ngaihtuah mai thei bawk. (Sâm 37:29; Thu Puan 21:​3, 4) Chu bâkah, mi ṭhenkhat chuan Bible-a kan hmuh bâkah chhan dangte avângin chatuana nun chu a theih an ring bawk a ni. Hêng thil pahnihte ngaihtuahna chuan cha­tuan­a nun a theih a ni tih ngai sâng tûrin min ṭanpui ang.

Chatuana Nung Tûra Ruahman

3, 4. (a) Engvângin nge chatuanin kan nung thei tih chu mi ṭhenkhatten an rin? (b) Davida’n a taksa siam zia chungchâng engnge a sawi?

³ Mi tam takin mihringte chatuana an nung thei tih an rinna chhan kawng khat chu thil titûra siam kan nih dân mak tak mai avâng hian a ni. Entîr nân, nu pum chhûnga siam kan nih dân pawh hi a mak tak zet a ni. Hruaitu pakhat chuan ṭhan upat dân: “Mak taka siam zawh-ah chu chuan ruahmanna aṭangin min pian chhuahtîr a; chutah mipat hmeichhiatna kawnga puitlinna kawng leh puitling nihna-ah, chûng thil mak tak insiam dân mâwl ang taka lang site chu mihring hriatthiamna hian a ngaihtuah chhuak thei si lo va ni.” Ni e, kan siam zia mak tak ngaihtuahin, zawhna awm ta chu, Engvângin nge kan thih ṭhin? tih a ni.

⁴ Kum sâng tam tak kal ta khân Bible ziaktu Davida chuan tûn lai zirchîkmite hmuh ang chuan pum chhûng chu hmu thei lo mah sela siam a nih dân mak tak chungchâng a chhût a ni. ‘A ziah lai hian nu pum chhûnga khuh’ a nih lai thu a ngaihtuah a ni. Chutih lai chuan, ‘a rilru chu siam’ a nih thu a sawi bawk. Tin, a “ruh” siam zia pawh a sawi bawk a, ‘A rûka siamin ka awm a’ tiin. Davida chuan “ka riruang la famkim lo chu” ti a sawiin leh a nu pum chhûnga a pian zia la ṭha famkim lo chungchângah: “Ka pêngte zawng zawng hi ziak vek a ni,” tiin, a ziak a.​—Sâm 139:​13-16.

5. Pum chhûnga kan siam zia-ah eng thil mak tak nge tel?

⁵ Dik takin Davida a nu pum chhûnga a insiam zia chu pen tui hmanga ziak tak tak a ni lo va. Mahse, Davida ngaihtuahna-ah chuan a “rilru,” a “ruh,” leh a taksa pêng hrang hrang te chu a tân chuan ruahman sa ang thlapa siam​—engkim mai chu “ziak vek” ang chiah a ni. A nu chuan a pumah chuan cell ṭha tak pindan zau tak lehkhabu-a khat leh naute siam a nih dân kaihhruaina kim chang nei ang chiah leh hêng zirtîrna khirhkhân tak takte chu cell tin­te chuan an nei ang chiah a ni. Chuvângin, Science World magazine pawhin ziaka ‘chhinchhiahna hrang hrang chi kim pum chhûng chuan nei angin’ thu sawi uar nân thu danglam deuh bîk a hmang a ni.

6. Davida’n “mak taka siam” ti a a ziak angin kei mahni a thil chiang tak chu engnge ni?

⁶ Kan taksa hna thawh dân mak tak chungchâng hi i ngaihtuah tawh ngai em? Thilnung chanchin zirmi Jared Diamond chuan: “Cell ril tuamtu hi ni tlêmtê hnu apiangah kan thlâk zêl a, zun bâwm tuamtu pawh thla hnih dânah vawikhat zêl; tin, kan thisen cell chu thla lî danah vawi khat zêl,” ti a sawiin, “thil inruahman dân chu nî tina inthlâk danglam reng a ni,” tiin, a titâwp a ni. Chumi awmzia dik tak chu engnge ni? A awmzia dik tak chu kum eng zât pawh dam mah ila​—kum 8, 80, a nih loh leh kum 800 lai pawh ni sela​—kan taksa la awmte chu a naupang êm êm tho tihna a ni. Zirchîkmi pakhat chuan: “Kum khat chhûng hian chawhrualin keimahni-a awm atom za-ah 98 chu boruak aṭanga kan lâk luh, chaw aṭanga kan hmuh leh intûr aṭanga kan hmuh hmangin atom dang inthlâk tûr a ni,” tiin, a sawi a ni. Dik takin, Davida fakna hla angin, “mak taka siam” chu kan ni.​—Sâm 139:14.

7. Kan taksa siam zia-a ṭanchhanin thu tâwp ṭhenkhat engnge awm?

⁷ Kan taksa ruangâm ruahmanna nghahchhanin thu neitu pakhat chuan ṭhan upatna chungchâng chu: “Upat hun lo thlen chhan chu thil ruahman awm sa a ni lo,” tiin, a sawi a ni. Chatuana nung tûr chu kan nih hmêl tak zet a ni. Chuvângin, hei hi an thiamnate hmanga tihhlawhtlin tumin an bei a ni. Hun rei vak lo kalta-ah khân, Dr. Alvin Silverstein chuan a lehkhabu Thihna hnehna (Conquest of Death) tih-ah chuan: “Nun nihna tak tak kan tifiah dâwn a. Mite ṭhan upat dân . . . kan hrethiam thei dâwn,” tiin, inring tâwk takin a ziak a ni. Eng nghawngchhuah nên nge? A ni chuan: “Hriatna chuan thihna hnehna a siam dâwnin leh chatuana naupanna-ah a hruai dâwn avângin ‘tar’ an awm leh tawh lo vang,” tiin, a sawi. Mihring siam zia chungchânga tûn lai zîrchîkmite finfiahna ngaihtuahin, chatuana nunna awm rinna chu ngaihtuah harsa tak em ni? Chatuana nunna a awm thei a ni tih rin theih chhan kawng ṭha tak dang pawh a la awm.

Chatuana Nung Tûra Duhthlan

8, 9. Mipui zawng zawngin eng duhthlanna awmsa nge an pawm?

⁸ Chatuana nunna hi mihringte duhthlan chiang saa ni tih chu i ngaihtuah tawh ngai em? Doctor pakhatin German chanchinbu-a a ziah dânin: “Chatuana nun duhna nasa tak chu mihringte ang a upa ang a ni awm e,” tiin, a ziak a ni. Hmân lai Europe mite rin dân hrang hrang hrilhfiahin, The New Encyclopædia Britannica chuan: “Mi ṭhate chu rangkachak a luan pindan êng takah kumkhuain an chêng ang,” tiin, a sawi a. Châkna bulpui chatuana nunna tihlungawi nâna beihna-ah mihringte an va kal thui tawh êm!

⁹ The Encyclopedia Americana-in kum 2,000 kalta khân China ramah “puithiam Taoist a hruaina hnuai-ah lal leh mipuiten nunna tidanglam thei tui an zawnna lamah ei leh bar zawnna kawnga an hlamchhiah phah a”​—ṭhalai tuikhûr hnâr ti a koh chu, tiin, a sawi a ni. Dik takin, hmân lai chanchin pumpuiah mite chuan hêng buatsaihna chi hrang hrang hmang hian, leh tui hrang hrang inna chuan mi a tinaupang thei niin an ring a ni.

10. Nun theihna siam zau thei tûrin tûn laiah eng beihna nge tih a nih?

¹⁰ Chatuana nunna atâna mihringte duh­thlan awmsa chu lungawina nei tûrin chutiang bawka chhinchhiahtlâk chuan tûn laiah nasa taka beih a ni. Entîrna langsâr tak chu mihringte natna hrik laka thite vawn ṭhata zirna neih hi a ni. Hun lo thleng tûr engtik-ah emaw, natna tihdam theih huna nun siam ṭhat leh beiseina nêna hei hi tih a ni. He mitthi ruang, natna tihdam huna nunna pêk lêt leh theih beiseia dah ṭhat chin dân hi ukil pakhat chuan: “Engtin nge natna zawng zawngte tihdam emaw, leh chu kan beisei ṭha tak chu a dikna tihlan emaw, siam ṭhat emaw a nih chuan​—upatna avânga chak lohnate huam-in​—tûna ‘thi’ te hian hma lam-ah tâwp nei lo nun an nei dâwn a ni,” tiin, a ziak.

11. Engvangin nge miten chatuana nunna an duh?

¹¹ Engvângin nge chatuana nun duhna hi kan ngaihtuahna-ah a intuh nghet êm êm? tih i inzâwt a ni mai thei. “[Pathianin] mihring rilru-ah chuan chatuan a dah” vâng em ni? (Thuhriltu 3:​11, 3:​11, Revised Standard Version) Hei hi a nghawngchhuah thil tak tak a va ni êm! Han ngaihtuah teh: Chatuana nun​—he duhthlanna duhawm tak mai hi kan Siamtu rem ruat a nih loh chuan​—engvângin nge tâwp nei lo va nun duhna rilru kan neih sa? A tân chuan chatuana nunna duhna nêna min siama, chu duhna chu tichiang tûrin phal lohna hmanga min dan leh si chuan hmangaihna a ni dâwn em ni?​—Sâm 145:16.

Tunge Kan Rin Ang?

12. Ṭhenkhat-in eng rin tawkna nge an neih a; chu chu nghahchhan ṭha niin i ring em?

¹² Chatuana nunna kan neih theihna tûrin khawi-ah nge, a nih loh leh engah nge kan rinna kan nghah ang? Kum zabi 20-na emaw, 21-naa hring mite thil siamna khawl lam chanchin zirna-ah em ni ang? The New York Times Mag­a­zine chuan hetiang hian a ziak a “Nun an Duh” tih-ah chuan, “khâwl lam thiamna hrang hrang, thiamna” leh “khâwl lam chakna phûrna chungchâng” a sawi a ni. Chhuichîkmi tak ngial pawhin “rin tâwkna hlimawm tak . . . upatna tihtâwpna hmanga, thlâkthlengna hmangin emawa min chhanhim tûrin mihring inthlahchhâwng rem hre taka enkawl dân chu a lo awm thuai dâwn,” tiin, an sawi. Dik takin, chutiang chu nimahsela, mihringte beihna chuan tarna emaw, thihna hnehna emaw atân chuan a ṭangkai tam lo tih a tichiang a ni.

13. Kan thluak siam zia hian chatuana nun kan tum tih engtin nge a lantîr?

¹³ Hei hian chatuana nunna neih theihna kawng a awm lo a tihna em ni? Teh suh e! Kawng a awm! Kan thluak siam zia mak tak mai, zirna atâna theihna tâwp chin nei lo hian hêng thil-ah hian min hmin ang. Thil nung chanchin chhui mi James Watson chuan kan thluak hi “kan vânlâwta thil hmuhchhuah tawh a hriatthiam harsa ber a ni” a ti hial a ni. Tin, tha zâm awmze zirmi Richard Restak chuan: “Lei leh vân khawi hmun-ah mah a anpui tlêmtê tak ngial pawh engmah a awm lo,” tiin, a sawi bawk. Chatuana nung tûra ruahman kan ni lo a nih chuan engvângin nge dik taka thil khâwl khâwm leh vawn ṭhat nân tâwp nei lo va khâwl khâwm thei thluak ṭha tak kan neih?

14. (a) Bible ziaktuten eng thu titâwpna nge mihring dam chhûng chungchângah an sawi? (b) Engvangin nge mihring chungah ni lovin, Pathian chungah kan rinna kan nghah ang?

¹⁴ Anih leh, awmze nei tak chauh, thutlûkna dik tak kan neihna ngei tûr chu engnge ni? Chatuana kan nun theih nân siamtu thiam leh thil zawng zawng titheitu siam leh ruahman kan ni lo em ni? (Joba 10:​8; Sâm 36:6; 100:3; Malakia 2:​10; Tirhkohte 17:​24, 25) Chuvâng chuan, Bible-a sâm phuahtu-in a thu pêk: “Mi liante chu ring suh ula, mihring fapa ṭanpuina rêng rêng awm lohna chu ring hek suh u” a tih hi fing takin kan ngaihven dâwn lâwm ni? Engvangin nge mihring kan rin lo vang? A chhan chu sâm phuahtu ziak angin, “a thawin a chhuahsan a, a ni chu a leilungah a kîr leh a; chu mi nî ngei chuan a ngaihtuahna chu a bo ta nghal a,” ti a a ziah vângin. Dik tak chuan, chatuana nung thei a ni nachungin, mihringte chu thihna hmachhawnna-ah chuan engmah ṭanpuina nei lo an ni. Sâm phuahtu chuan: “LALPA [Jehova NW] Pa­thian­a beiseina neitu chu . . . lâwm takin a awm ṭhîn,” tiin, a titâwp a ni.​—Sâm 146:​3-5.

Pathian Thiltum a Ni Tak Tak Em?

15. Chatuana kan nun chu Pathian thiltum a ni tih engin nge lantîr?

¹⁵ Mahse, hetiang hian i zâwt mai thei a, chatuana nunna chu Jehova thiltum tak tak a ni em? tiin. Aw, a ni ngei a ni! Vawi tam tak a thu-in a tiam a ni. [‘Pathian thilthlâwnpêk erawh chu chatuana nunna a ni,’ NW] tiin, Bible-in min tiam ni. Pathian chhiahhlawh Johana chuan hetiang hian a ziak a: “Hei hi a ni amah [Pathian] ngeiin thil min tiama kha​—chatuana nunna hi,” tiin. Tlangval pakhatin Isua hnênah: “Zirtîrtu chatuana nunna ka neih theih nân engnge ka tih ang? tiin, a zawt a. (Rom 6:​23; 1 Johana 2:​25; Matthaia 19:16) Dik takin, tirh­koh Paula chuan ‘chatuana nunna chu Pa­thian, dâwt sawi thei lova’n khawvêl awm hmaa a tiam’ chungchâng a ziak a ni.​—Tita 1:​1, 2.

16. “Khawvêl awm hmain” Pathian chuan chatuana nunna thutiam eng kawngin nge a neih?

¹⁶ “Khawvêl awm hma-in” Pathianin chatuan nunnaa tiam tawh tih chu engnge a awmzia? Ṭhenkhat chuan tirhkoh Paula’n a sawi tum chu nupa hmasa ber Evi leh Adama siam an nih hma aṭangin, Pathian chuan mihringte chu chatuana nung tûrin a lo ruahman tawh a tihna niin an ngai a. Nimahsela, Paula hian Je­ho­va’n a thiltum a sawi chhuah hun chu mihringte a siam hnu-ah chauh ni-a a sawi a nih pawhin, Pathian chuan mihringte tân chatuan nunna chu a duang tel tih a la chiang cheu a ni.

17. Engvangin nge Evi leh Adama chu huan a­ṭang­a hnawhchhuah an nih a, engvangin nge cherub-te kawngah dah an nih?

¹⁷ Bible-in Eden huan-ah chuan “Lei aṭangin LALPA [Jehova NW] Pathianin thing mit la tak leh ei mi tinrêng a ṭotîr a . . . nunna thing pawh,” tiin, a sawi. Adama huan pâwna dah a nihna chhan chu, ‘a kuta ban a, nunna thing rah chu lova eiin a nun lohna’ tûrin a ni​—ni e, chatuanin! Eden huan aṭanga Evi leh Adama hnawhchhuah an nih hnu chuan, Jehova chuan “nunna thing kawng chu vêng tûrin Eden huan chhak lampangah chuan Cherub-te leh mei khandaih vir tawn zawk zawk chu” a awmtîr ta bawk a.​—Genesis 2:9; 3:22-24.

18. (a) Nunna thing rah eina chuan Evi leh A­dam­a tân eng awmzia a neih tûr? (b) Chu thing rah eina chuan engnge awmzia a neih?

¹⁸ Evi leh Adamate chu nunna thing rah chu ei phalna pêk lo ni ta se, chu chuan an tân awmzia engnge a neih ang? Paradis-a chatuana nunna pe theitu a ni alâwm! Bible zirlai pakhat chuan: “Mihring taksate kum upat avânga tha ṭhumna te, a nih loh leh thihnaa tâwp tûra tichhe tûrin nunna thing chuan thiltihtheihna riau a nei a ni ngei ang,” tiin, a suangtuah a ni. Tin, “paradis-ah chuan ṭhan upatna thlentu dolêtna thlai eng emaw thiltithei tak a awm,” niin, a ring bawk a ni. Nimahsela, Bible chuan nunna thing chuan nunna pe thei hlutna hrang hrang a neih thu a sawi lo. Chu thing chuan chu thei chu ei tûra phalte hnêna chatuana nunna Pathian tiamna chu tluangmâwl takin a entîr zâwk a ni.​—Thu Puan 2:7.

Thlâkthleng Theih Loh Pathian Thiltum

19. Engvângin nge Adama a thih a, engvângin nge kei ni a thlahte pawh kan thih?

¹⁹ Adama’n thil a tihsual khân, atân leh a thlah la piang zêl tûrte tân chatuana nunna kawng chu a hlauhva ni. (Genesis 2:​17) A thu zawm lohna avânga misual a lo nih khân ṭha famkim lo, hneh theih a lo ni ta a ni. Chumi hun aṭang chuan, Adam taksa chu thi tûra ruah­man a ni ta ni. Bible chuan, “sual man chu thihna a ni si a,” ti a a lo sawi ang chiahin. (Rom 6:​23) Chuvangin, ṭha famkim lo Adama thlahte pawh chu chatuana nung lo va, thi tûra tih an lo ni ta a ni. Bible chuan: “mi pakhat avângin sual khawvêlah a lût a, sual avângin thihna-ah a lût bawk a, chutiang bawkin mi zawng zawngin thil an lo tihsual avângin thihnain mi zawng zawng a fan chhuak ta a,” tiin, a hrilhfiah a ni.​—Rom 5:​12.

20. Mihringte leia chatuana nung tûra tih chu engin nge tichiang?

²⁰ Mahse Adama chu sual ta lo se engnge ni ang? Pathian thu lo awihin leh nunna thing rah chu ei phalna lo nei ta se engtin nge ni ang? Pathian thilthlâwnpêk chatuan nunna chu khawiah nge chen tûr a neih? Vânah em ni? Ni love! Pathianin Adama chu vâna lak tûr a nih chungchâng engmah a sawi lo. A hnathawhna tûra ruahman chu leiah hian a ni. Bible chuan hetiang hian a hrilhfiah a “LALPA Pathianin thing mitla tak leh ei mi tinrêng a ṭotîr a,” tin, heti hian a sawi bawk a: “LALPA Pathian chuan mihring chu a hruai a, Eden huanah chuan a enkawl leh a vêng tûrin a dah ta a,” tiin. (Genesis 2:​9, 15) Adama kawppui atân a Evi siam hnu-ah, he leiah hian an pahnihin thawh belh tûr hna chanvo pêk an ni. Pathian chuan: “Chi tam tak thlaha lo pungin, leilung hi luahkhat ula, in thu thuin awmtîr rawh u; tuifinriata sangha chungah te, chunglêng sava chungah te, thil nung leia bawkvâka kal zawng zawng chungah te thu nei bawk rawh u,” tiin, an ni chu a hrilh a ni.​—Genesis 1:​28.

21. Mihring hmasa berte khân eng nghahfâk mak chungchuang tak nge an chen?

²¹ Lei lam nghahfâk mak chungchuang tak Evi leh Adama tâna chûng Pathian kaihhruainate chu han ngaihtuah teh! He lei lam Paradis-a ṭha famkima hrisel taka fate hring tûr an ni. An fa duh takte an lo ṭhanlen chuan, chu paradis chu enkawl a huan nuam tak siam hna chu thawkin leh rah ṭha chhuahin an ṭâwmpui tûr a ni a. Ramsa zawng zawngte chu mihringte hnênah intulûtin, mihringte chu an lungawi em em dâwn a ni. Eden huan tihzauhna hlim­awm tak a hnu-a lei pumpui paradis-a ni vek tûr chu han ngaihtuah teh! Tarna leh thihna chungchâng ngaihtuah ngai lo va chutiang ang lei lam in mawi taka ṭha famkim fate nêna nun chen chu i duh ang em? Chûng zawhna te chu i ruilru puakchhuak phûrna-in chhantîr ang che.

22. Engvângin nge Pathianin lei chungchânga a thiltum a thlâk lo tih kan chian theih?

²² Evi leh Adama’n thu pêk an awih lo va Eden huan aṭanga hnawhchhuah an nih khân Pathian chuan mihringte hnêna lei Paradis-a kumkhuaa chen theihna chungchânga a thiltum chu a thlâk em? Thlâk teh suh e! Pathian chuan a tîr aṭanga a thiltum hlen chhuak tûra a theihna tipuitling tûrin tihtûr a nei a ni. Amah ngeiin: “Chutiang bawkin ka kâ aṭanga ka thu chhuak chu a awm ang: engmah tih nei lovin ka hnênah a kîr leh lo vang a, ka duh ang chu a tizo zâwk ang a, thil ti tûra ka tirhnaah chuan a hlawhtling bawk ang,” ti a a sawi angin, Pathianin a thu tiam chu a tingei ṭhin tih kan chiang thei a ni.​—Isaia 55:11.

23. (a) Mi ṭhate he leia chatuana nun neih chu Pathian thiltum a ni tih tihchianna engnge ni? (b) A leh pêkah engnge kan sawi ho dâwn?

²³ Lei chungchânga Pathian thiltum chu thlâk danglam loh a nih thu Bible-ah chiang takin kan hmu a: “Mi felte chuan ram hi an luah ang a, a chhûngah hian kumkhua-in an awm ang,” tiin, hetiang hian aman a lo tiam a ni. Isua’n Tlâng chunga a Thu sawina-ah pawh khân thuhnuairawlhten ram an luah tûr thu a sawi bawk a ni. (Sâm 37:29; Matthaia 5:5) A nih leh, engtin nge chatuana nunna chu kan neih theih anga, chutiang nun chu chên tûrin engnge kan tihtûr? Hei hi zir leh tûr-ah sawi ho tûr a ni.

Engtin Nge I Chhân Ang?

◻ Engvang nge mi tam takin chatuana nun chu thil theih a ni tih an rin?

◻ Chatuana nung tûr ka ni tih chu engin nge min hmin ang?

◻ Mihring leh lei chungchânga a tîra Pathian thiltum chu engnge ni?

◻ Pathian chuan a tîra a thiltum a tifamkim ngei dâwn tih engvangin nge kan chian theih?