Isua Thihna leh A Thawhlehna—I Tâna Awmzia A Neih Chu

Mihringte chu thi tûra siam an ni lo

“Tin, LALPA Pathian chuan mihring chu a hruai a, Eden huanah chuan a enkawl leh a vêng tûrin a dah ta a. Tin, LALPA Pathian chuan mihring hnênah chuan, ‘Huana thing tinrêng rahte hi i duh duhin i ei thei e; a chhia leh a ṭha hriatna thing rah erawh hi chu i ei tûr a ni lo: i ei chuan i ei nî la lain i thi ngei tûr a ni,’ tiin thu a pe a.”—Genesis 2:15-17.

Pathian chuan mihring hmasa ber Adama chu Eden huan, ramsa tam tak leh thlai chi tinrênga khatah chuan a dah a ni. Chutah chuan Adama tân a duh anga ei tûr thing rah eimi tinrêng chu a awm a. Mahse, Pathian Jehova chuan chuta awm thing rah pakhat erawh chu ei lo tûrin thu a pe a, a ei chuan Adama chu a thi ang tiin a vaukhân a ni.

Adama’n chu khapna chu a hre thiam em le? Ani chuan ramsa thite chu a hmuh tawh avângin thihna chu eng nge a nih a hria a. Adama chu a tâwpa thi tûra siam a nih chuan, Pathian vaukhânna pêk chuan awmzia a nei hauh lo vang. Chu aimahin, Adama chuan chu thing rah chu a ei lohva, Pathian thu a âwih chuan, a thi lo vang a, chatuanin a nung dâwn tih a hria a ni.

Mi ṭhenkhat chuan chhia leh ṭha hriatna thingin mipat hmeichhiatna a entîr niin an ngai a; mahse, chu chu a ni thei lo. A nihna takah chuan, Jehova chuan Adama leh a nupui Evi chu ‘chi tam tak thlaha lo punga, leilung hi luah khat a, an thu thua awmtîr tûrin’ a duh a ni. (Genesis 1:28) Chuvângin chhia leh ṭha hriatna thing chu thing tak tak a ni. Mihringte tâna a chhia leh a ṭha thliar tûra dikna a neih entîrtu a nih avângin, Pathian Jehova chuan chu thing chu “a chhia leh a ṭha hriatna thing” tiin a ko a ni. Adama chuan chu thing rah ei lohna hmang chuan, a thu âwihna a lantîr mai ni lovin, amah Siam a, malsâwmna nasa tak vûrtu a ngaihhlutna a lantîr a ni bawk ang.

Adama thih chhan chu Pathian thu a âwih loh vâng

“[Pathian] chuan Adama hnênah: ‘A rah i ei tûr a ni lo tia thu ka pêk che kha, a rah i ei avângin, . . . lei a i kîr leh hma loh chuan i hmaia thlantui luang zawih zawihin chaw i ei tawh ang, lei aṭanga lâk chhuah i ni si a. Vaivut i ni a, vaivutah i kîr leh tûr a ni,’ a ti a.”—Genesis 3:17, 19.

Adama chuan thing rah ei phal loh chu a ei a. Chu thu âwih lohna thiltih chu ho lam taka lâk tûr a ni lo. Chu chu helna a ni a, Jehova’n a tâna thil ṭha a tihsak zawng zawng ngaihnêpna a ni. Chu thei rah eina hmangin Adam chuan Jehova chu hnâwlin, nghawng râpthlâk tak nei tûr Pathian laka inlâk hranna nun kawng chu a thlang a ni.

Jehova sawi lâwk ang ngeiin, a tâwpah Adama chu a thi ta a. Pathianin Adama chu “leia vaivutin” a siam a, ani chu “vaivutah i kîr” leh ang tiin a hrilh a ni. Adama chu taksa dang puin hmun dangah a nung lo. A thih hian, amah siam a nihna vaivut angin nunna nei lovah a chang leh a ni.—Genesis 2:7; Thuhriltu 9:5, 10.

Adama thlah kan nih avângin kan thi

“Mi pakhat avângin sual khawvêlah a lût a, sual avângin thihna a lût bawk a, chutiang bawkin mi zawng zawngin thil an lo tihsual avângin thihnain mi zawng zawng a fan chhuak ta a.”—Rom 5:12.

Adama thu âwih lohna—a nih loh leh sualna—chuan nghawng thui tak a nei a. A sual avângin, Adama chuan mi pângngai dam chen, kum 70 kum 80 vêl mai ni lovin, chatuana nun beiseina a chân a ni. Chu bâkah, a sualna avângin a nun ṭha famkim chu a hlohva, a thlah zawng zawngte hnênah ṭhat famkim lohna a hlân chhâwng a ni.

Kan vai hian Adama thlahte kan ni a. Kan duh thlanna ni lovin, a hnên aṭangin sual leh thihnaa min hruaitu tîsa ṭha famkim lo chu kan ro chun a ni. Paula chuan chu kan dinhmun lungchhiatthlâk tak chu a târ lang chiang hle. Heti hian a ziak a ni: “Kei erawh chu tîsa lama mi, sual bâwiha hralh tawh ka ni. Mi rethei ka va ni tehlul êm! He thihna taksa lakah hian tuin nge min chhan chhuak ang?” tiin. A hnuah amah ngeiin heti hian a chhâng a ni: “Isua Krista kan Lalpa avângin Pathian hnênah lâwmthu ka sawi a ni,” tiin.—Rom 7:14, 24, 25.

Chatuana kan nun theihna tûrin Isua’n a nun a hlân

‘Pain a Fapa chu khawvêl Chhandamtua awm tûrin a rawn tîr a ni.’—1 Johana 4:14.

Pathian Jehova chuan sual nghawng ata leh chatuana thihna ata min chhuah zalên tûrin ruahmanna a siam a. Engtin nge a siam? Ani chuan a hmangaih tak a Fapa chu, Adama anga mihring ṭha famkima piang tûrin vân aṭangin a rawn tîr a. Mahse, Adam ang lo takin, Isua chuan “thil rêng a tisual lo.” (1 Petera 2:22) Mi ṭha famkim a nih avângin thi lovin mihring ṭha famkim angin chatuanin a nung thei dâwn a ni.

Mahse, Jehova chuan Isua chu a hmêlmate tihhluma a awm a phal ta zâwk a. Ni thum hnuah, Jehova chuan a hnua vâna a kîr leh theih nân ani chu thlarauvah a kaitho a ni. Vâna a kal chuan Isua chuan Pathian hnênah a mihring nun ṭha famkim hlutna chu a hlân a, Adama’n a tân leh a thlahte tâna a hloh tawh chu a tlan chhuak leh a ni. Jehova chuan chu inthawina chu a pawm a, chu chuan Isua ringtute tân chatuana nun theihna a siamsak a ni.—Rom 3:23, 24; 1 Johana 2:2.

Chutiang chuan, Isua chuan Adam thil chân chu a lei leh a. Ani chu chatuana kan nun theih nân a thi a ni. Bible chuan Isua thihna chu “Pathian khawngaihna zârah thihna chu mi tin tân a temsakna tûrin” a ni tih a sawi.—Hebrai 2:9.

He ruahmanna hian Jehova chungchâng tam tak a târ lang a. A rorêl dikna chuan mihring ṭha famkim lote tân mahnia intlan chu thil theih loh a nihtîr a ni. Mahse, a hmangaihna leh a zahngaihna chuan ama thil phût tlin nân chânna nasa tak pawh ti tûrin a chêttîr a ni—a Fapa neih chhun tlanna man atâna pêkna chu.—Rom 5:6-8.

Isua chu thihna ata a tho leh a, mi dangte pawh an tho leh ang

“Krista chu mitthi zîng ata kaihthawhin a awm tak zet a ni, muhîlte thawh hmahruaitu a lo ni ta. Mihring vânga thihna a lo awm avângin mihring avâng vêkin mitthi thawhlehna a lo awm ta bawk a. Adama-ah chuan mi zawng zawng an thi ṭhîn ang hian Krista-ah chuan mi zawng zawng tihnunin an awm bawk ang.”—1 Korinth 15:20-22.

Isua chu a nunga a thi tih chu rinhlelh rual a ni lo; mahse, a thia a tho leh tih finfiahna eng nge awm? Finfiahna zînga chiang ber chu, tho leh Isua chu hun leh hmun hrang hrangah mi tam takte hmaa a inlârna hi a ni. Ṭum khat chu, mi 500 aia tam hmaah a inlâr a. Tirhkoh Paula chuan Korinth mite hnêna a lehkha thawn a ziahah, chu inlârna hmutu ṭhenkhat chu an la dam tih târ langin, an thil hmuh leh an thil hriatte an la sawi thei tih a sawi hmuh a ni.—1 Korinth 15:3-8.

Paula’n Krista chu tho lehte “hmahruaitu” tia a ziah hian, mi dangte pawh nakinah an tho leh dâwn tih a târ lang a. Isua ngei pawhin ‘thlâna awm zawng zawng an lo chhuah vek’ hun a lo thleng ang tih a sawi a ni.—Johana 5:28, 29.

Chatuana nung tûrin Isua kan rin a ngai

“Pathianin khawvêl a hmangaih êm êm a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zâwk nân.”—Johana 3:16.

Bible phêk hmasa lam chuan thihna a lo awm dân leh Paradis hloh a nih thu a sawi a. Phêk hnuhnûng ber lam chuan thihna a bo hun tûr leh Pathianin lei hi Paradis-a a chantîr leh tûr thu a sawi a ni. Chu mi hunah chuan mite chu chatuanin hlim takin an nung thei dâwn a ni. Thu Puan 21:4 chuan: “Thihna a awm leh thei tawh lo vang,” tiin a sawi si a. Chu thutiam a rin tlâkzia sawi uar nân, châng 5-na chuan: “Hêng thu hi a rinawmin a dik si a,” tiin a nemnghet bawk. Jehova chuan thu a lo tiam tawhte chu tifamkim tûrin thiltihtheihna a nei a ni.

“Hêng thu hi a rinawmin a dik” tih hi i ring em? I rin chuan, Isua Krista chanchin zir belhin, amah chu ring ang che. Chutianga i tih chuan Jehova pawm i hlawh ang. Tûna malsâwmna nasa tak i dawn mai bâkah, ‘thihna a awm tawh lohna, lungngaih te, ṭah te, nat te awm leh tawh lohna,’ lei Paradis-a chatuana nun beiseina chu i dawng bawk ang. (w15-E 03/01)