Jehova’n Chaute A Tichak Ṭhîn
“[Jehova chuan] chau hnênahte chuan thiltihtheihna a pe ṭhîn a; chakna rêng nei lote chu a tichak ṭhîn.”—ISAIA 40:29.
1. Pathian thil siama chakna awm chu hrilhfiah rawh.
JEHOVA thiltihtheihna chuan tâwpintai a nei lo. A thil siamahte chuan chakna a va awm nasa tak êm! Atom tereuh tê—thil engkim insiamna—chu a tê tham êm a, tui far khat lekah pawh atom tlûklehdingawn za hmun tlûklehdingâwn khat a awm a ni.a Leilunga nunna zawng zawng chu nî-in a pêk chhuah atom chaknaah a innghat vek a ni. A nih leh leia nuna awm zawng zawng châwm tûrin nî chakna eng zât nge ngai? Leilung hian nîin a pêk chhuah chakna chhe tê chauh a dawng a ni. Amaherawhchu, kan Leilungin a dawn, ni chakna chhe tê chu khawvêla thil siam chhuahna khâwlte’n a hman chakna zawng zawng nên tehkhin rual a ni lo.
2. Isaia 40:26-na chuan a bul berah Jehova thiltihtheihna chungchâng eng nge a sawi?
2 Atom chanchin kan ngaihtuah a ni emaw, vânlâwt zau tak chanchin kan ngaihtuah emaw pawh ni se, Jehova thiltihtheihna mak tak chuan min hneh hle a ni. Chuvângin, “Chung lamah khian in mitte lên chho ula, khîngte khi tu siam nge ni en rawh u; ani chuan sipaihote khi indawt zêlin a hruai chhuak ṭhîn a, an hmingin a ko ṭheuh ṭhîn a; a chakna nasatna avâng leh, thiltihtheihna lama a chak avângin pakhat mah kim lo an awm ngai lo,” tia a sawi thei pawh hi a mak lo ve! (Isaia 40:26) A ni, Jehova chu ‘thiltihtheihna lamah a chak’ a, ‘chakna nasa tak’ Hnâr a ni bawk a, chûng chu vânlâwt zau tak siam nân a hmang a ni.
Chakna Narân A Tâwk Lo
3, 4. (a) Min tichau thei thil ṭhenkhat chu engte nge ni? (b) Eng zawhna nge ngaihtuah ngai?
3 Pathian thiltihtheihna chuan tâwpintai a neih loh laiin, mihringte erawh chu an chau ṭhîn. Kan kalna apiangah chau tak takte kan hmu ṭhîn a. Chau chungin zîng an tho va, hna thawhnaah emaw, school-ah emaw chau chungin an kal a, chau êm êmin an lo haw leh a; tin, chau satliah pawh ni lovin chau chhe derin zân an mu ṭhîn. Ṭhenkhat chuan khawi lai emawa kala an mamawh êm êm chawlhhahdamna neih theih chu an châk a ni. Pathian ngaihsakna nun kawnga kan beih hrâm hrâm a ngaih avângin, keini Jehova chhiahhlawhte pawh kan chau ve bawk. (Marka 6:30, 31; Luka 13:24; 1 Timothea 4:8) Tin, kan chakna la botu thil dang tam tak a awm bawk a ni.
4 Kristian ni mah ila, mi dangte hmachhawn harsatna leh buainate lak ata humhim kan ni chuang lo. (Joba 14:1) Natna te, sum leh pai lama tlâkchhiatna te, a nih loh leh nun harsatna pângngai dangte chuan min tilungngaiin, min tilunghnual thei a ni. Chûng thilte belhchhahtu chu felna avânga tihduhdahna tuarte tâna fiahna maksak takte a ni. (2 Timothea 3:12; 1 Petera 3:14) Khawvêl aṭanga ni tin nêksâwrna leh Lalram thuhrilhna dodâlnate avângin, kan zînga ṭhenkhat chu an chau chhiain, Jehova rawngbâwlna bânsan duh hialte pawh kan awm thei. Chu bâkah, Pathian laka kan rinawmna tihchhiat tumin Diabol-Setana chuan thil engkim a hman theih apiang a hmang bawk si a. Chuvângin, chau va, kan bânsan mai lohna tûrin thlarau lam chakna chu engtin nge kan neih theih ang?
5. Kristian rawngbâwlnaa tel nân engvângin nge mihring chakna mai a tâwk loh?
5 Thlarau lam chakna nei tûr chuan, Siamtu engkimtithei Jehova chungah kan innghat ngei ngei tûr a ni. Tirhkoh Paula chuan Kristian rawngbâwlnaah mihring ṭha famkim lote chakna narân a tâwk dâwn lo tih a kawhhmuh a. Ani chuan: “Thiltihtheihna nasatzia chu keimahni hnêna mi ni lovin, Pathian ta a nih theih zâwkna tûrin chu ro chu hlum bêlahte kan vawng a ni,” tiin a ziak a. (2 Korinth 4:7) Hriak thih Kristiante chuan an ṭhian, lei lam beiseina neite ṭanpuina zârah “inremna rawngbâwl hna” an thawk a ni. (2 Korinth 5:18; Johana 10:16; Thu Puan 7:9) Mihring ṭha famkim lo kan nih bâkah, tihduhdahna tuar reng chunga Pathian rawngbâwl kan nih avângin, kan chakna mai chuan engmah kan ti thei lo. Jehova chuan a thlarau thianghlim hmanga min ṭanpui avângin, kan chak lohna chuan a thiltihtheihna a târ lang a ni. “Mi fel erawh chu LALPAN a chelh reng ṭhîn,” tih thutiam chuan min va thlamuan tak êm!—Sâm 37:17.
‘Jehova Chu Kan Chakna’
6. Engtin nge Pathian Lehkha Thu hian Jehova chu kan chakna Hnâr a nihzia min tiam?
6 Kan Pa, vâna mi chu ‘thiltihtheihna lamah a chak’ a, awlsam têin min tichak thei a ni. Dik tak chuan, “[Jehova chuan] chau hnênahte chuan thiltihtheihna a pe ṭhîn a; chakna rêng nei lote chu a tichak ṭhîn. Tleirâwlte meuh pawh an chauvin an hah ang a, tlangvâlte pawh an tlu dêr ang: LALPA nghâktute erawh chuan an chakna chu an siam ṭha leh ang a; mupuite angin thlain an thlâwk chho vang a; hah lovin an tlân ang a; chau lovin kêin an kal ang,” tia hrilh kan ni. (Isaia 40:29-31) Harsatnate a zual zêl avângin, intlânsiak mi chau lutuk, pên khat lek pawh pên thei tawh lo tûr khawpa chau anga inngaih châng kan nei mai thei. Mahse, nun atâna intlânsiakna tâwpna chu a thleng ṭêp tawh, chuvângin kan tlâwm mai tûr a ni lo. (2 Chronicles 29:11) Kan Hmêlma, Diabola chu “sakeibaknei rûm ṭhîn angin” a phi ruai a, kan tlân lai min tihdin a tum reng a ni. (1 Petera 5:8) ‘Jehova chu kan chakna leh kan phaw a ni’ tih i hre reng ang u. Tin, ani chuan ‘chaute hnêna chakna pe tûrin’ châwmna hnianghnâr takin a buatsaih tih i hre reng bawk ang u.—Sâm 28:7.
7, 8. Jehova’n Davida te, Habakuka te, leh Paula te a tichak a ni tih finfiahna eng nge awm?
7 Jehova chuan harsatna nasa takte hneh thei tûrin Davida chu chakna a pe a. Chuvângin Davida chuan rinna leh rinngamna nên: “Pathian zârah huai takin kan ti ang: ani chu min dotute rap bettu tûr a ni si a,” tiin a ziak a ni. (Sâm 60:12) Jehova chuan Habakuka chu a zâwlnei hna thawk zo tûrin a tichak bawk a. Habakuka 3:19 chuan: “Lalpa, Jehova, ka chakna, ka ke a siam, sakhi ke ang, ka hmun sângah mi lêntîr ang,” a ti a ni. Chu bâkah: “Mi tichaktuah [Pathianah] chuan engkim ka ti thei a ni,” tia ziaktu tirhkoh Paula entîr siam pawh hi chhinchhiah tlâk tak a ni bawk.—Philippi 4:13.
8 Davida te, Habakuka te, leh Paula te angin, Pathian mi tihchak theihnaah leh min chhandam tûra a thiltihtheihnaah rinna kan nei tûr a ni. Lalchungnung ber, Jehova hi kan “chakna” Hnâr a ni tih hre rengin, Pathianin hnianghnar taka a buatsaih ruahmannate aṭanga thlarau lam chakna kan lâk theih dân kawng ṭhenkhat i ngaihtuah ang u.
Min Tichaktu Tûr Thlarau Lam Chaw
9. Kristian thu leh hla chhuahte chuan engtin nge thlarau lamah min châwm?
9 Pathian Lehkha Thu leh Kristian thu leh hla chhuah dangte taima taka zirna chuan min tichak theiin, min châwm thei a. Fakna hla phuahtu chuan mi engthâwl “lâwmna chu LALPA dânah a ni zâwk a; a dân thu chu achhûn azânin a ngaihtuah ṭhîn. Ani chu tuiluang kianga thing phun, a huntêa rah ṭhîn, a hnah pawh uai ngai lo ang hi a ni a; a thiltih apiang chu a hmuingîl zêl ang,” tiin a zai a ni. (Sâm 1:1-3) Taksa chakna thahrui kan neihna tûra thil kan ei a ngaih angin, kan thlarau lam chakna vawng tûr chuan Pathianin a Thu leh Kristian thu leh hla chhuahte hmanga min pêk thlarau lam chaw kan ei tûr a ni. Chuvângin, awmze nei taka zir leh zir tawhte chhût veng vengna chu a pawimawh a ni.
10. Eng hunah nge zir nân leh chhût nân hun kan neih theih?
10 “Pathian thu rilte” chhût chu a man hla tak zet a ni. (1 Korinth 2:10) Mahse, eng hunah nge chhûtna hun kan neih theih? Abrahama fapa Isaaka chu “tlai lamah phûlah inngaihtuah tûrin a va lêng chhuak a.” (Genesis 24:63-67) Fakna hla phuahtu Davida chuan ‘zânah Pathian chungchâng a suangtuah’ bawk. (Sâm 63:6) Pathian Thu chu zîngah te, tlaiah te, zânah te—eng hunah pawh—kan zirin kan chhût thei a. Chutiang zirna leh chhûtna chuan thlarau lama chak tûra Jehova min châwmna dangah min hruai thleng a ni—ṭawngṭainaah chuan.
11. Ṭawngṭai rengna chu engvângin nge kan ngaih pawimawh ang?
11 Pathian hnêna ṭawngṭai rengna chuan min tichak thei bawk. Chuvângin, i “ṭawngṭai fan fan” ang u. (Rom 12:12) Fiahna kan hmachhawnte hneh thei tûra finna leh chakna a bîk taka dîl kan ngaih châng a awm a. (Jakoba 1:5-8) Pathian thil tumte a hlawhtlinzia kan hmuh hunah emaw, a rawngbâwl tûra min tihchakzia kan hmuh hunah emaw a hnênah fakna leh lâwm thu sawi ṭawngṭaina i hlân ang u. (Philippi 4:6, 7) Ṭawngṭaia Jehova kan hnaih reng chuan, ani’n min kalsan ngai lo vang. Davida chu: “Ngaiteh, Pathian chu min ṭanpuitu a ni,” tiin a zai a ni.—Sâm 54:4.
12. Engvângin nge Pathian thlarau thianghlim kan dîl ang?
12 Kan Pa, vâna mi chuan a thlarau thianghlim, a nih loh leh a thiltihtheihnain min tichak a ni. Paula chuan: “A thlarau zârah mihring chhûngnung lamah chuan thiltihtheihnaa tihchakin a awmtîr theihna tûr che uin, Pa, . . . hmaah chuan ka ṭhingṭhi ṭhîn a,” tiin a ziak a ni. (Ephesi 3:14-19) Jehova’n min pe ngei ang tih ring chungin thlarau thianghlim dîlin kan ṭawngṭai tûr a ni. Isua chuan: A fapain sangha dîl sela, hmangaihna nei a pa chuan rûl a pe dâwn em ni? tiin a chhûtpui a. A pe hauh lo vang. Chuvângin, “Nangni [sual fa nih avânga engemaw chena sualna nei ṭheuh] mi sual mahin in fate thil ṭha pêk nachâng in hriat chuan, in Pa vâna mi chuan a dîltute chu thlarau thianghlim a va pe dâwn êm!” a ti a. (Luka 11:11-13) Chutiang rinna nên ṭawngṭaiin, a thlarau hmangin Pathian chhiahhlawhte chu “tihchakin” an awm thei tih i hre reng ang u.
Min Tichaktu Kohhran
13. Kristian inkhâwmnate chu eng angin nge kan thlîr ang?
13 Jehova chuan Kristian inkhâwmnate hmangin min tichak bawk. Isua chuan: “Mi pahnih emaw pathum emaw ka hminga an inkhâwmna apiangah chuan an zîngah ka awm si ṭhîn a,” a ti a. (Matthaia 18:20) Isua’n, chu thutiam a pêk lai chuan kohhrana hmahruaitute ngeihven tûr thil a sawi a ni. (Matthaia 18:15-19) Amaherawhchu, chu a thusawi chu ama hminga ṭanna leh bânna ṭawngṭaina kan hmanna kan inkhâwmnaahte, assembly-ahte, leh inkhâwmpuinaahte pawh hman a ni. (Johana 14:14) Tlêm tê kan ni emaw, a sângtêlin kan inkhâwm emaw pawh ni se, chutiang Kristian inkhâwmnaa tel chu chanvo hlu tak a ni. Chuvângin, thlarau lama min tichak tûr leh, hmangaih leh thilṭha tiha inchawh thawhna tûra ruahman chûng inkhâwmnate avânga kan lâwmna chu i lantîr ang u.—Hebrai 10:24, 25.
14. Kristian upate thawhrimna aṭangin eng hlâwkna nge kan dawn?
14 Kristian upate chuan thlarau lam ṭanpuina leh thlamuanna min pe a. (1 Petera 5:2, 3) Paula chuan tûn lai bial kantute anga a tlawh kohhrante chu a ṭanpuiin, a thlamuan a ni. Dik takin, inthlamuan tawnna a awm theihna tûrin unaute nêna awmho chu a thlahlel a ni. (Tirhkohte 14:19-22; Rom 1:11, 12) Chuvângin, thlarau lama mi tihchakna kawnga mawhphurhna lian tak nei kan tualchhûng upate leh Kristian enkawltute kan hlutzia i lantîr reng ang u.
15. Kan kohhrana unaute chu engtin nge min ‘tichaktu’ an nih?
15 Kohhrana mi, kan rinpuite pawh ‘min tichaktu’ an ni thei. (Kolossa 4:10, 11) Anni chuan ‘ṭhian ṭha’ angin mangan nîah min ṭanpui thei a ni. (Thufingte 17:17) Entîr nân, kum 1945-a Nazi tâng vênna Sachsenhausen concentration camp ata tâng an chhuahnaah Pathian chhiahhlawh mi 220 an tel a, chûngte chu mêl 120 lai kêa an kal a ngai a ni. Pathian chhiahhlawhte chu a huhovin an zin a, a chak zâwkte chuan a chaute chu tawlailîr têah an hnûk a ni. Chu chuan eng rah nge a chhuah? Chu thihna kawng zawhnaah tâng 10,000 aia tam an thih laiin, Jehova Thuhretu pakhat mah an thi ve lo. Chutiang chanchin chu Yearbook of Jehovah’s Witnesses leh Jehovah’s Witnesses—Proclaimers of God’s Kingdom, te tiamin Watch Tower thu leh hla chhuahahte a tel a, chûng chuan Jehova’n a mite chu an chauhchhiat loh nân a tichak a ni tih a lantîr a ni.—Galatia 6:9.b
Kan Thlawhhma Rawngbâwlnaa Tihchaka Awmin
16. Rawngbâwlnaa tel rengna chuan engtin nge thlarau lamah min tihchak?
16 Lalram thuhrilhnaa tel rengna chuan thlarau lamah min tichak bawk. Chutiang hnathawh chuan Pathian Lalram dah hmasa reng tûrin min ṭanpui a, chatuan leh a malsâwmna dinhmunte thlîr reng tûrin min ṭanpui bawk a ni. (Juda 20, 21) Kan rawngbâwlnaa kan sawi ṭhîn Bible thutiamte chuan beiseina min neihtîr a; tin, zâwlnei Mika angin thutlûkna min siamtîr a ni. Ani chuan: “Keini pawh LALPA kan Pathian chu kumkhuain kan bia ang,” a ti a ni.
17. In lama Bible zirna chûngchângah eng rawtnate nge pêk a nih?
17 Mi dangte zirtîrna kawnga Pathian Lehkha Thu kan hman tamna chuan Jehova nêna kan inlaichînna a tinghet a ni. Entîr nân, Chatuan Nunnaa Hruaitu Hriatna tih lehkhabu hmanga in lama Bible zirna neihpui hunah, Bible châng târ lante tam tham tak chhiarpui a, titipui chu a finthlâk a ni. Chu chuan zirlai chu a ṭanpui mai bâkah keimahni thlarau lam hriatthiamna pawh a tipung a ni. Zirlaiin Bible thu kalphung emaw, tehkhin thu emaw chu hriatthiam harsa a tih chuan, Hriatna bua bung khat chu vawi hnih vawi thum vêl a zir theih ang. Mi dangte’n Pathian an hnaih theihna tûra kan inpuahchah a, kan thawk rim thei chu kan va lâwm êm!
18. Hriatna bu hlawhtling taka hman a nih dân hrilhfiah rawh.
18 Kum tinin, Hriatna bu chuan mi sâng tam takte chu Jehova hnêna inpumpêk a chhiahhlawh ni tûrin hlawhtling takin a ṭanpui a, chûng zîngah chuan Bible chanchin la hre ngai lo mi tam tak an tel a ni. Entîr nân, Sri Lanka rama Hindu pa pakhat chuan a naupan laiin Thuhretu nu pakhatin Paradis chanchin a sawi chu a lo hre thawi a. Kum engemaw zât a liam hnuah, chu nu chu a rawn pan a, rei lo têah a pasal chuan Bible a zirpui ta a ni. Chu mi chu zirna nei tûrin ni tin a lo kal a, tichuan Hriatna bu chu rei lo têah a zir zo nghâl a. Inkhâwmna zawng zawngah a tel ṭan a, a sakhuana hmasa nêna a inzawmna zawng zawng pawh tichatin, Lalram thuchhuahtu a lo ni a. Baptisma a chan meuh chuan a hmêlhriatpa chu in lama Bible zirna a lo neihpui reng tawh a ni.
19. Lalram kan dah hmasak phawt chuan eng nge kan chian theih?
19 Lalram dah hmasakna chuan mi tichak thei hlimna a awmtîr a. (Matthaia 6:33) Fiahna chi hrang hrang tâwk mah ila, chanchin ṭha chu hlim tak leh ṭhahnemngai takin kan puang chhunzâwm zêl a ni. (Tita 2:14) Kan zînga tam takte chu hunbi kima pioneer thawk tûrin kan tling a, ṭhenkhat chuan chanchin ṭha puangtu mamawh zualna hmunah rawng an bâwl a ni. Hemi kawng emaw, kawng dang emawa hlim taka Lalram rawng kan bâwl hian, Jehova chuan kan rawngbâwlna leh a hming hmangaihna kan lantîr chu a theihngilh lo vang.—Hebrai 6:10-12.
Jehova Chaknain Thawk Rawh
20. Chakna min pe tûrin Jehova kan beisei a ni tih engtin nge kan lantîr theih?
20 Thinlung zawng zawng leh inhuam takin, Jehova kan beisei a, chakna min pêk kan nghâk a ni tih i lantîr ang u. Chu chu “bawi rinawm” hmanga thlarau lam chaw a siam zawng zawng eina hmangin kan lantîr thei a ni. (Matthaia 24:45) Mi mal leh kohhrana Kristian thu leh hla chhuahte hmanga Pathian Thu zirna te, tih tak zeta ṭawngṭaina te, upate thlarau lam ṭanpuina te, unau rinawmte entawn tûr siam ṭha tak tak te, leh rawngbâwlnaa tel zat zatna te chu Jehova nêna kan inlaichînna tinghet thei leh a rawngbâwl thei tûra min tihchaknate zînga mi a ni.
21. Engtin nge tirhkoh Petera leh Paula te chuan Pathian pêk chakna kan mamawhzia an sawi?
21 Jehova ṭanpuinaa kan innghah phawt chuan, mihring ṭha famkim lo mah ni ila a rawngbâwl tûrin min tichak ang. Chutiang ṭanpuina hre rengin, tirhkoh Petera chuan: “Mi tupawhin rawng a bâwl chuan Pathianin chakna a pêk ang zêlin bâwl rawh se,” tiin a ziak a ni. (1 Petera 4:11) Tin, Paula chuan: “Krista avângin chak lohnaahte, chhiatnaahte, nêksawrnaahte, tihduhdahnaahte, hnawhchêpnaahte ka lâwm ṭhîn a ni; ka chak loh apiangin a ni ka chak ṭhin ni,” tiin Pathian pêk chaknaa a innghahzia a târ lang a ni. (2 Korinth 12:10) Chutiang rin tlatna chu lantîrin, chaute tichaktu, Lalchungnung Ber Jehova chu i chawimawi ang u.—Isaia 12:2.
[Footnote-te]
a He number hi, U.S. chhiar dân a ni a, 1 hnungah bial hlîr 20 awm hi a ni.
b Watchtower Bible and Tract Society chhuah a ni.
Engtin Nge I Chhân Ang?
• Engvângin nge Jehova mite tân chakna narân a tâwk loh?
• Pathianin a chhiahhlawhte a tichak a ni tih Pathian Lehkha Thu aṭanga finfiahna eng nge awm?
• Min tichak tûra Jehova buatsaih thlarau lam châwmna ṭhenkhat chu eng nge ni?
• Chakna min pe tûrin Pathian kan beisei tih engtin nge kan lantîr theih?
[Phêk 10-naa milemte]
Bible hmanga mi dangte kan zirtîrna hian Jehova nêna kan inlaichînna a tichak