Ênga Kalte Tâna Hlimna

“Lo haw ula, LALPA êngah i lêng ang u.”​—ISAIA 2:5.

1, 2. (a) Êng hi engti fakauva pawimawh nge? (b) Thimin leilung hi a khuh dâwn tih vaukhânna chu engvângin nge a pawimawh êm êm?

JEHOVA chu êng lo Chhuahna a ni a. Bible chuan “chhûn tiêng tûra nî petu, thla leh arsite tâna dânte ruatsaka, zân tiêng tûra petu,” tiin a ko va ni. (Jeremia 31:35; Sâm 8:3) Ani chu kan nî Siamtu a ni a. Ni chhûng lairil aṭang chuan nuclear chakna nasa tak a chik chhuak chur chur a, chûng zînga ṭhenkhat chu kan awmna leilungah hian ni êng leh sâ angin a rawn thleng thla a ni. Chu chakna them te tak tê, ni êng anga lo thleng chuan he leia nunna hi a chhawmdâwl a ni. Ni êng tel lo chuan kan nung thei lo va. Leilung hi nunna awm lohna khawvêl a ni mai dâwn a ni.

² Chu chu rilrua vawng rengin, zâwlnei Isaia sawi dinhmun pawimawhzia hi kan hrethiam thei a ni. Hetiang hian a sawi a: “Ngai teh, thimin leilung hi a khuh dâwn si a, thim chhah mupin mite a khuh bawk dâwn a ni,” tiin. (Isaia 60:2) Heta thim a sawi hi a ngial a ngana thimna a ni lo va. Nî te, thla te, leh arsi te chu engtik nîah emaw chuan an la thim vek dâwn a tihna a ni lo. (Sâm 89:​36, 37; 136:​7-9) Thlarau lama thimna chungchâng a sawina a ni zâwk. Mahse, thlarau lam thimna chu thihna a ni a. Chuvângin, khua reiah chuan tisa lam êng tel lova kan nun theih loh aia nasa zâwkin, thlarau lam êng tel lo chuan kan nung thei lo zâwk a ni.​—Luka 1:79.

3. Isaia thute han ngaihtuah hian, Kristiante’n eng nge an tih tûr?

³ Hei hi hre rengin, Isaia thute ngaihven chu a pawimawh êm êm a; chûngte chu hmân lai Juda hunah thlengfamkim tawh mah se, a thlen famkimna pui zâwk chu tûn lai hunah a ni. Chutiang dinhmun hlauhawm takah chuan, thlarau lam êng tluka pawimawh engmah a awm lo. Chuvângin kristiante chuan Krista fuihna thu: “In êng chu mi mit hmuhin êng rawh se,” tih hi an ngaihven tûr a ni. (Matthaia 5:16) Kristian Rinawmte chuan thuhnuairawlhte tân êng an pe chhuak thei a; chu chuan nunna an neih theih nân hun remchâng a pe a ni.​—Johana 8:12.

Israel Rama Thimna Hunte

4. Isaia hrilhlâwk thute thlen famkimna hmasa kha eng tik nge ni a, ama hun lai ngei pawh khân eng ang dinhmun nge awm?

⁴ Thimin leilung a khuh chungchânga Isaia thute hi Judai ram tihchhiat a nih a, a mipuite Babulon-a vahvaihtîr an nih khân a thleng famkim a. Mahse, chu mi hma, amah Isaia hun lai ngei pawh khân chûng hnam mi tam takte chu thlarau lam thimah an lo awm reng tawh a, chu mi dinhmun tak chu a ni: “Aw Jakoba chhûngte u, lo haw ula, LALPA êngah i lêng ang u,” tia a khaw mite fuihtîrtu chu!​—Isaia 2:5; 5:20.

5, 6. Eng thilte’n nge Isaia hun laia thimna kha awmtîr?

⁵ Isaia chuan ‘Juda-ho lal Uzia te, Jothama te, Ahaza te, Hezekia te lal laiin’ Judai ramah thu a hrilh lâwk a ni. (Isaia 1:1) Chutih lai chu ram chhûng buaina te, sakhaw vervêkna te, dik lo taka rorêlna te, leh mi retheite rahbehna te a nasat êm êm hun lai a ni a. Lal rinawm tak tak Jothama te ang lal lai ngei pawhin tlâng chhîp hmun tam takahte chuan pathian dik lo maichamte chu hmuh theihin a awm tho a. Lal rinawm lote awpna hnuaiah phei chuan dinhmun chu a chhe lehzual a. Entîr nân, lal Ahaza chu a fate Molek pathian hnêna hlân hial khawpin a kal sual a ni. Thimna a va ni chiang tak êm!​—2 Lalte 15:​32-34; 16:​2-4.

⁶ Khawvêl pum dinhmun pawh a thim hle bawk. Moab te, Edom te, leh Philistia te chu Judai ram vauvin ramri-ah an awm reng tawh a. Tin, hmar lam Israel lalram pawh hmêlma rama puan a ni ta bawk. Chu mi piah lama Suria ram pawhin Judai ram chu a tirâlmuang lo hle bawk a. Chu ai maha ram hlauhawm zâwk chu, a thuneihna zauh theihna hun remchâng zawng reng, Assuria nunrâwng tak a ni. Isaia thu hrilh lâwk chhûngin, Assuria chuan Israel ram chu a hnehin, Judai ram pawh a nuai chhe ṭêp a. Ṭum khat phei chu, Jerusalem tih chauh lo Judai rama khawpui kulh nghet nei zawng zawng chu a la fai vek a ni.​—Isaia 1:​7, 8; 36:1.

7. Israel leh Juda hnamte khân eng kawng nge an thlan a, engtin nge Jehova’n a chhânlêt?

⁷ Israel leh Judai ramte kha Jehova chunga an rinawm loh avângin khâng chhiatnate kha an tuar a. Thufing bua târ lan mite ang chiahin, anni chuan “kawng thima kal tûrin kawng dik chu an kalsan,” a ni. (Thufingte 2:13) Jehova chu a mite chungah chutiang chuan thinrim mah sela, anni chu a phatsan ṭhak lo. Chûng mite zînga Jehova rawng rinawm taka bâwl zêltute tân chuan thlarau lam êng pe tûrin Isaia leh zâwlnei dangte a tîr zâwk a ni. Chûng zâwlneite hmanga pêk êng chu a hlu takzet a. Nunna a pe thei a ni.

Tûn Laia Thimna Hunte

8, 9. Eng thilte’n nge tûn lai khawvêl thimna awmtîr?

⁸ Isaia hun lai dinhmun chu tûn lai dinhmun nên a inang hle a. Kan hunah pawh hian khawvêl hruaitute chuan Jehova leh a Lal ṭhutthlênga ṭhu, Isua Krista chu an hawisan a ni. (Sâm 2:​2, 3) Sakhaw hruaitute lahin an berâm rualte an bum bawk a. Chûng hruaitute chuan Pathian rawngbâwlah inchhâl mah se, an zînga mi tam zâwkte chuan he khawvêl pathian​—ram leh hnam hmangaihna te, sipai chakna rinchhanna te, hausakna te, leh mimal challanna te​—milem beho thurinte chu an châwisâng zâwk a ni.

⁹ Hmun tinah Kristianna ram sakhuate chu indonate leh hnam inthliar bîkna avânga tualchhûng buaina leh thil râpthlâk tak tak dangahte an tel reng a. Chu bâkah, Bible ṭanchhan nungchangte chu vawn tlat ahnêkin, kohhran tam takte chuan nungchang bawlhhlawh tak inngaihna leh mawngkawhurna ang chite chu an ngaizam a, a nih loh leh an dah chungnung ta hial zâwk a ni. Chûng Bible tehfungte chu an hnâwl avângin, Kristianna rama berâmte chu hmân lai fakna hla phuahtu-in: “An hre lo va, hriat thiamna an nei hek lo; thimah chuan an vei an vei a,” tia a lo sawi mite ang mai an lo ni. (Sâm 82:5) Dik takin, Kristianna ram chu hmân lai Judai ram ang mai khân thim chhah takah a awm a ni.​—Thu Puan 8:12.

10. Tûn lai thimna hunah hian engtin nge êng chu a ên chhuah a, thuhnuairawlhte’n engtin nge an hlâwkpui?

¹⁰ Chûng thim chhah tak kârah chuan, Jehova chuan thuhnuairawlhte tân êng a pe chhuak a. Chu mi atân chuan he leia a chhiahhlawh hriak thih, “bawi rinawm, fing tak” a hmang a, anni chu ‘khawvêla tiêngtu anga lang ṭhînte’ an ni. (Matthaia 24:45; Philippi 2:​15) Chûng bawi pâwl chu an thawhpui “berâm dang” maktaduai tam takte’n an ṭawiâwm a, Pathian Thu, Bible-a innghat thlarau lam êng chu an en chhuahtîr a ni. (Johana 10:16) Chu chuan he khawvêl thimah hian thuhnuairawlhte hnênah beiseina a pe a, Pathian nêna inlaichînna nei tûrin a ṭanpui bawk a; tin, thlarau lama tlûkchhiatna awm theite chu pumpelh tûrin a ṭanpui bawk a ni. Chu chu a hlu-in, nunna a ni.

“I Hming Ka Fak Ang”

11. Isaia hun lai khân eng hriattîrna nge Jehovan a târlan?

¹¹ Isaia hun laia thimna hun leh chu mi hnu, chu aia thim chhah zâwk Babulon-hovin Jehova hnam sala an hruai khân, eng kaihhruaina nge Jehova’n a pêk? Nungchang lama kaihhruaina mai bâkah, a mite chungthua a thil tumte a a thlen famkim dân tûr pawh a hriat lâwktîr diam a ni. Entîr nân, Isaia bung 25 aṭanga 27 thlenga hrilhlâwk thu ropui tak chuangte hi han ngaihtuah teh. Hêng bunga thu chuangte hian hmân lai hun leh tûn lai huna Jehova thil ruahman dân a târ lang a ni.

12. Isaia khân thinlung tak takin eng ṭawngkam nge a sawi chhuah?

¹² Atîrin, Isaia chuan: “Aw LALPA, nang chu ka Pathian i ni a, ka chawimai ang chia, i hming ka fak ang,” tiin a sawi a. Thinlung tak taka fakna a va ni êm! A nih leh chutianga ṭawngṭai tûrin zâwlnei chu engin nge chêttîr le? A chhan dik tak chu a zawmpui châng hian a târlang a, heti hian kan chhiar a ni: “Hmasânga remruatte chu, rinawm tak leh thutakin i ti si a,” tiin.​—Isaia 25:1.

13. (a) Isaia’n Jehova a ngaihhlutna chu eng hriatnain nge tinghet? (b) Isaia entîrna aṭangin engtin nge kan zir theih?

¹³ Isaia hun lai chuan Jehova’n Israelte tân thilmak tam tak a ti a, chûngte chu ziaka chhinchhiah vek a ni. Chûng thuziakte chu Isaia chuan a hre chiang hle a. Entîr nân, Jehova’n a mite Aigupta sal ata a hruai chhuah dân leh Tuipui Sena Pharoa sipai thinrim takte lak ata a chhanchhuah dânte chu a hria a ni. Tin, Jehova chuan a mite chu thlalêr aṭanga Ram Tiama a hruai luh thu pawh a hre vek a ni. (Sâm 136:​1, 10-26) Chûng thil thleng zawng zawngte chuan Pathian Jehova chu a rinawmin a rin tlâkzia a târ lang a. A “remruatte”​—a thil tum zawng zawngte​—chu a thlêng dik vek a ni. Pathian pêk hriatna dik chuan Isaia chu ênga kal reng tûrin a tichak a. Chuvângin, ani chu kan tâna entawn tûr ṭha tak a ni. Pathian Thu ziak chîk taka kan zir a, kan nuna a taka kan hman chuan keini pawh êngah kan awm reng thei ang.​—Sâm 119:105; 2 Korinth 4:6.

Khawpui Chu Tihchhiat A Ni

14. Khawpui chungchângah eng hrilhlâwkna nge awm a, chu chu eng khawpui nge nih hmel?

¹⁴ Isaia 25:​2-ah hian Pathian zilhna thu pakhat kan hmu thei a, chutah chuan: “Khawpui pawh lei pâwngah i chantîr a; khua kulhpui nei pawh khaw chhiaah i chantîr a; ram dang mite lal in pawh khua lovah i chantîr si a; engtikah mah sakin a awm leh tawh lo vang” tih kan chhiar a ni. Chu chu eng khawpui nge? Isaia chuan Babulon khaw chungthu a sawi lâwkna a ni thei ngei ang. A ni, chutiang chiah chuan Babulon chu lei pâwng maia a chan hun a lo thleng ta tak tak rêng a ni.

15. Tûn laiah eng “khaw ropui” nge awm a, a chungah eng nge thleng dâwn?

¹⁵ Isaia sawi khawpui khân tûn lai hunah anpui a nei em? Nei teh rêng mai. Thu Puan bu chuan “khaw ropui, leia lalte chunga rorêltu” chungchâng a sawi a. (Thu Puan 17:18) Chu khaw ropui chu “Babulon Khaw Ropui,” sakhuana dik lo khawvêl lalram hi a ni. (Thu Puan 17:5) Tûn laia Babulon Khaw Ropui pêng pawimawh ber chu Kristianna ram hi a ni a, chuta sakhaw hruaitute chuan Jehova mite Lalram thuhrilh dodâlnaah hma an hruai a ni. (Matthaia 24:14) Amaherawhchu, Babulon Khaw Ropui chu hmân lai Babulon ang bawkin, rei lo têah tihchhiat a ni ang a, engtikah mah a ding chhuak leh tawh lo vang.

16, 17. Hmân lai leh tûn lai hunah Jehova hmêlmate’n engtin nge amah an chawimawi?

¹⁶ “Khua kulhpui nei” chungchânga Isaia hrilhlâwkna dang chu eng nge ni? Jehova hnênah Isaia chuan: “Mi chak takte chuan an chawimawi ang chia, hnam hlauhawm takte khawpui chuan an hlau vang che,” a ti a. (Isaia 25:3) Engtin nge he hmêlma khawpui, “hnam hlauhawm takte khawpui,” hian Jehova a chawimawi ang? Aw le, Babulon Lal chak ber Nebukadnezzara chunga thil thleng kha hre reng la. A chak lohzia lan chhuahtîrna thil a hmachhawn meuh chuan, Jehova ropuizia leh A thiltihtheihzia chu puang lo thei lo dinhmunah a ding ta a ni. (Daniela 4:​34, 35) Jehova’n a thiltihtheihna a hman chuan, a hmêlmate tak ngial pawh a thilmak tihte chu hreh chung chunga hriat luihtîr an ni ṭhîn.

¹⁷ Babulon Khaw Ropui chu Jehova thilmak tihte hriat luihtîr a ni ngai em? Ni ngai e. Indopui pakhatna chhûng khân, Jehova chhiahhlawh hriak thihte chuan tihduhdahna kârah thu an hril a. Kum 1918-a Watch Tower Society hotute tân in-a khung an nih khân thlarau lam sala hruai an ni. Thuhril hna pawh a tâwp ṭhelh a. Mahse, kum 1919-ah Jehova chuan a din thar lehin, a thlarauvin a tichak thar bawk a; tichuan, khawvêl pum puia chanchin ṭha hril tûra thuchah chu hlen chhuak tûrin an kal chhuak ta a ni. (Marka 13:10) An hmêlmate chunga thil tleng tûr hrilh lâwk a nih ang bawkin, chûng zawng zawng chu Thu Puan buah a chuang vek a ni. Chûng mite chuan “an hlau va, vân Pathian chu an chawimawi ta a.” (Thu Puan 11:​3,7,11-13) An vaiin thuhretuah an inlet vek lo va; mahse, Isaia lo sawi lâwk ang chiahin, chutih lai chuan Jehova thilmak tih chu hriat luihtîr an ni.

“Mi Retheite Tân Kulhbîng”

18, 19. (a) Jehova mite rinawmna nuaibo tuma hmêlmate beihna chu engvângin nge an hlawhchham? (b) Engtin nge ‘mi hlauhawmho hla sak tihreha a awm’ ang?

¹⁸ Tûnah chuan ênga kalte Jehova’n zâwldawh taka a dâwr dân chungchâng sawiin, Isaia chuan Jehova hnênah: “Mi hlauhawmte thaw chu thlipuiin bang a nam sawk sawk anga a lo awm laite hian, nang chu mi rethei tân kulhbîng, pachhe mangan lai atân kulhbîng, thlipui laka inhumhimna, ni sa hliahna i ni si ṭhîn a. Hmun rova khaw lum chu i tireh ṭhîn ang hian, ram dang mite thâwm chu i tireh ang; khaw lum chu chhûm hliaha tihreha a awm ṭhîn ang hian, mi hlauhawmho hla sa chu tihrehin a awm ang,” tiin a sawi a ni.​—Isaia 25:​4, 5.

¹⁹ Kum 1919 aṭang khân mi hlauhawmho chuan Pathian chibai bûktu dik takte rinawmna chu nuaibo tumin theih tâwp chhuah mah se, an hlawhtling lo. Engvângin maw? Jehova chu a mite tân inhumhimna leh kulhbîng a nih tlat vang a ni. Ani chuan tihduhdahna khaw lum tak atân daihlim nuam tak a pe a, dodâlna thlipuiin a nam sawk sawk pawhin kulh bang nghet tak angin a ding tlat a ni. Keini Pathian ênga kalte hian ‘mi hlauhawmho hla sak tihreha a awm’ hun tûr chu rinngamna nên kan thlîr reng a ni. A ni, Jehova hmêlmate nuaibova an awm hun chu kan nghâkhlel êm êm a ni.

20, 21. Eng ruai ropui nge Jehova’n a ṭheh a, chu ruai ropui chuan khawvêl tharah eng nge a huam tel ang?

²⁰ Jehova chuan a chhiahhlawhte chu a humhim mai ni lo vin, hmangaihnaa khat an Pa angin, an tân thil tam tak a pe a. Kum 1919-a Babulon Khaw Ropui aṭanga a mite a chhuah hnuah, thlarau lam chaw hnianghnar taka pein hnehna ruai a ṭhehsak a ni. Chu chu Isaia 25:​6-ah hetiang hian sawi lâwk diam a ni: “He tlângah hian sipaihote LALPA chuan mi tinrêngte tân thil thautein ruai a ṭheh ang, uainte a fê nêna inchiah reng, thil thau takte thlînga khat, uainte a fê nêna inchiah reng ṭha taka thlit fai chu,” tiin. Chutianga chaw ṭha hnianghnar tak dawng theia kan awm hi kan va nihlawh tak êm! (Matthaia 4:4) “Lalpa dawhkân” chu ei tûr ṭha mi-in a khat tak meuh a ni. (1 Korinth 10:21) “Bawi rinawm, fing tak” kal tlangin thlarau lama kan mamawh tûr apiang chu pêk kan ni.

²¹ He thlarau lam ruai buatsaihah hian thil dang tam tak pawh a awm a. Tûna thlarau lam chaw hnianghnâr tak hian, Pathian tiam khawvêl thâra tisa lam chaw hnianghnâr tak a awm tûr thu min hriattîr a ni. Tichuan, ‘thil thautea ruai ṭhehnaah’ chuan tisa lam chaw duhtâwk a ei tûr a awm bawk dâwn tihna a ni. Tisa leh thlarau lamah tumah an rilṭâm leh tawh lo vang. Krista lo awm lehna “chhinchhiahna” zînga ‘ṭâm tlâk tûr’ a sawi lâwk thlen famkimnain a nghawng, kan hmangaih rinpuite tân, chu chu inhnemna ṭha tak a va ni êm! (Matthaia 24:​3, 7) Fakna hla phuahtu thusawi hi an tân thlamuantu a ni tak zet ang. Ani chuan: “Leiah, tlâng chungahte hian, buh tam tak a awm ang a” tiin a sawi a ni.​—Sâm 72:16.

22, 23. (a) Eng “vawm khuhna,” a nih loh leh “khuhna” nge tihbo ni dâwn a, engtin nge tihbo a nih ang? (b) Engtin nge ‘Jeova mite sawichhiatna’ chu tihbo a nih ang?

²² Tûnah, thutiam mak lehzual hi han ngaithla teh mah. Sual leh thihna chu “vawm khuhna” emaw, “khuhna” emaw nêna tehkhinin, Isaia chuan: “Mi tinrêng an vawm khuhna pâwn lam leh, hnam tinrêng an khuhna chu he tlângah hian a tichhia ang,” tiin a sawi a ni. (Isaia 25:7) Han ngaihtuah chiang teh! Kawmawl ang maia mihringte thaw ipik taka khuh bet tlat rengtu sualna leh thihna chu a awm tawh dâwn lo. Chuvângin, mi thuâwih leh rinawmte tâna Isua tlanna inthawina a kima kan hlâwkpui hun tûr chu kan va han nghâkhlel tak êm!​—Thu Puan 21:​3, 4.

²³ Chu hun mak danglam tak chungchâng chu sawiin, thlarauva thlâwkkhum zâwlnei chuan: “Thihna chu a lem hlen ta; Lalpa PATHIAN chuan mi zawng zawng hmai ata chu mittuite a hru fai ang a; a mite hming chhiatna chu leilung luah zawng zawng ata a la bo vang; LALPAN chu chu a sawi tawh si a,” tiin min tiam a ni. (Isaia 25:8) Leilung chhiatna avângin tumah an thi tawh lo vang a, thihnaa hmangaihte ṭhen avânga mittui tlâkna a awm tawh hek lo vang. Malsâwmnaa inthlâkthlengna ropui a va ni dâwn êm! Chu bâkah, Pathian leh a chhiahhlawhte’n rei tak an lo tawrh tawh, insawichhiatna leh dâwt thu tlângzarhnate chu khawiah mah hriat tûr a awm tawh lo vang. Engvângin nge a awm tawh loh vang? Jehova’n chutiang thil lo chhuahna bul ber​—dâwt pa, Diabol-Setana chu a tih boral dâwn vâng a ni.​—Johana 8:44.

24. Ênga kalte chuan an hminga Jehova thiltih makte chu engtin nge an chhânlêt? (w01 3/1)

²⁴ Chutiang Jehova thiltihtheihna lantîrnate avâng chuan, ênga kalte chu: “Ngai teh u, hei hi kan Pathian a nih hi; ani hi kan nghâk reng a, tichuan min chhandam ang: hei hi LALPA chu a nih hi; ani hi kan nghâk reng a, a chhandamnaah chuan kan lâwmin kan hlim ang,” tiin an au chhuak a ni. (Isaia 25:9) Rei lo têah mi felte chu an la hlîm êm êm dâwn a ni. Thim chu tihbo hlen vang vang a ni ang a, mi rinawmte erawh chu Jehova êngah chatuanin an awm reng ang. Chu aia ropui zâwk beiseina a awm thei ang em? Thei teh suh e!

I Hrilhfiah Thei Em?

• Tûn laiah engvângin nge ênga kal a pawimawh?

• Engvângin nge Isaia’n Jehova hming a fak?

• Engvângin nge hmêlmate’n Pathian mite rinawmna an nuaibo theih loh vang?

• Ênga kalte chu eng malsâwmna nasa takin nge hmuak?

[Phêk 9-naa milem]

Judai rama mite chuan Moleka hnênah an fate an hlân

[Phêk 11-naa milem]

Jehova thiltih ropui a hriat avângin Isaia’n Jehova hming a fak

[Phêk 12-naa milem]

Mi fel chu Jehova êngah chatuanin an awm ang