Mihring Chak Lohnate Hnehna
“Tisa lam thilte duh chu thihna a ni si a.”—ROM 8:6.
1. Mi ṭhenkhat chuan mihring taksa chu eng angin nge an thlîr a, eng zawhnain nge kan ngaihtuah phû?
“I HNENAH lâwm thu ka hrilh ang che; hlauhawm tak leh mak taka siam ka ni si a.” (Sâm 139:14) Fakna hla phuahtu Davida chuan Jehova thil siamte zînga pakhat—mihring taksa—ngaihtuahin chûng thu chu a sawi a ni. Mahse, chutiang chhan ṭha tak nei fakna kalhin, sakhaw zirtîrtu ṭhenkhat chuan taksa chu sual tawm rûkna hmun leh sual hmanrua ang lekah an ngai a. Taksa chu “âtna thuptu, sual lo chhuahna bul, chhiatna thir kawr, sual awmkhâwmna hmun, hrehawmna nun, ruang nung, ruang kal thei,” tia koh a ni ṭhîn. Tirhkoh Paula pawhin: “Ka tisaah . . . thil ṭha rêng a awm lo,” tiin a lo sawi ngei a. (Rom 7:18) Mahse, chu chu beisei bo khawpin tisa sualah kan tâng tlat tihna a ni em?
2. (a) “Tisa thilte duh” tih chu eng tihna nge ni? (b) Pathian tihlâwm tum mihringte chhûngah “tisa” leh “thlarau” inkâra eng indona nge awm?
2 Pathian Lehkha Thu chuan, hel hmang Adama thlah kan nih anga kan ṭhat famkim lohna dinhmun sawi nân “tisa” tih thu mal hman châng a nei a. (Ephesi 2:3; Sâm 51:5; Rom 5:12) A laka kan rochun chuan ‘tisa chak lohna’ a awmtîr a ni. (Rom 6:19) Tin, Paula chuan: “Tisa thilte duh chu thihna a ni,” tiin min vaukhân bawk. (Rom 8:6) “Tisa thilte duh” tih chu tisa ṭha famkim lo châknaa thunun leh chêttîra awm hi a ni. (1 Johana 2:16) Chuvângin, Pathian tihlâwm kan tum a nih chuan, kan thlarau lam leh “tisa thiltihte” ti tûra min tur reng kan ṭhat famkim lohna inkârah indona a awm reng a ni. (Galatia 5:17-23; 1 Petera 2:11) Amaha awm he indona nasa tak a sawi hnuah, Paula chu: “Mi rethei ka va ni tehlul êm! He thihna taksa lakah hian tuin nge min chhan chhuak ang?” tiin a rûm a ni. (Rom 7:24) Paula chuan humtu nei lovin thlêmna a tuar ringawt tihna em ni? A nih lohzia Bible chuan chiang leh fiah takin a sawi lang!
Thlêmna leh Sual Nihphung Dik Tak
3. Sual leh thlêmna chu mi tam takin engtin nge an thlîr a; mahse, Bible chuan chutiang rilru put hmangte kalhin engtin nge min vaukhân?
3 Tûn lai mi tam takte chuan, sual awm hi an pawm duh vak tawh lo. A ṭhen chuan “sual” chu, mihring chak lohna tê nau sawina ṭawng upa ang lekin an ngai ho hle a ni. Anni chuan: “Mi tinin taksaa thil tihte, a chhia a ṭhain, kan tih ang zêla kan hmuh ṭheuh theihna tûrin, Krista rorêlna ṭhutphah hmaah chuan tihlanin kan awm vek tûr a ni,” tih an hre lo. (2 Korinth 5:10) Mi dangte chuan: “Thlêmna tih loh chu eng pawh ka do thei!” an tiawlsam êt mai thei. Ṭhenkhat chu ei leh in te, mipat hmeichhiatna te, hlimhlâwp bâwlna te, a nih loh leh duhzâwng tihhlawhtlinna te pawh ni se, lungâwina hmuh nghâl duhna hmunah an khawsa a. Thil engkim an duh mai ni lovin, tûn la laa neih an duh a! (Luka 15:12) Nakina hlimna tûr “nunna taktak” chu an thlîr pha lo a ni. (1 Timothea 6:19) Mahse, Bible chuan kan thlarau lam leh thil danga mi tichhe thei thilte pumpelh tûrin fîmkhur taka ngaihtuah a, thui tak thlîr tûrin min zirtîr a ni. Thlarauva thâwk khum thufing chuan: “Mi fing chuan thil ṭha lo a hmu a, a biru ṭhîn a, mi mâwl erawh chuan a tâwn ṭhîn a, a tuar phah ṭhîn,” a ti a ni.—Thufingte 27:12.
4. Paula chuan 1 Korinth 10:12, 13-ah eng fuihna thu nge a pêk?
4 Korinth—a nungchang bawlhhlawhna avânga hriat hlawh tak—khuaa Kristiante hnêna lehkha a thawn khân, Paula chuan thlêmna leh sual thiltihtheihna chungchângah vaukhânna thu fing tak a pe a ni. “Dinga inring chu fîmkhur rawh se, chutilochuan a tlu dah ang e. Mihring tuar theih ang chauh lo chu thlêmna rêng rêng in chungah a thleng ngai lo. Pathian zawng a rinawm a ni, ani chuan in tuar theih tâwk aliam chu thlêmna in tawh a phal lo vang; in tuar theihna tûrin thlêmna rualin tlân chhuahna kawng a siam nghâl zâwk ang,” tiin. (1 Korinth 10:12, 13) Kan zain—a hmei a pa, a pui a pangin—school-ah te, hnathawhna hmunah te, a nih loh leh hmun dang dangah te thlêmna tam tak kan tawng a. Chuvângin, Paula thu bihchiangin kan tâna awmzia a neih chu i lo en ang u.
Inringtâwk Lutuk Suh
5. Mahni inrintâwk lutukna chu engvângin nge hlauhawm tak a nih?
5 Paula chuan: “Dinga inring chu fîmkhur rawh se, chutilochuan a tlu dah ang e,” a ti a. Kan chakna rin lutuk chu a hlauhawm a ni. Chutianga inrintâwkna chuan sual nihphung leh a thiltihtheihna kan hriat tlêmzia a ti lang a. Mosia te, Davida te, Solomona te, leh tirhkoh Petera te thlenga suala an tlûkchhiat laiin, dinhmun hlauhawma awm lo angah kan inngai tûr em ni? (Number 20:2-13; 2 Samuela 11:1-27; 1 Lalte 11:1-6; Matthaia 26:69-75) “Mi fing chuan a hlauhthâwng a, sual a kalsan ṭhîn a; mi â erawh chu a intihuai a, mahni a inring ṭhîn,” tiin Thufingte 14:16 chuan a sawi a. Chu bâkah, Isua pawhin: “Thlarau zawngin a peih a, tisa erawh chu a chak lo a ni,” a ti bawk. (Matthaia 26:41) Châkna ṭha lo ata mihring ṭha famkim lo tumah hi humhim an nih loh avângin, thlêmna do tûra Paula vaukhânna chu kan pawisa tûr a ni, chuti a nih loh chuan kan tlûk mai a hlauhawm a ni.—Jeremia 17:9.
6. Thlêmna hmachhawn tûrin, eng hunah leh engtin nge kan inpuahchah ang?
6 Beisei lo taka lo thleng thei harsatna atâna lo inbuatsaih lâwk chu a finthlâk a. Lal Asa pawhin remna hun chu inhumna tûr kulh sak hun a ni tih a hria a ni. (2 Chronicles 14:2, 6, 7) Hmêlmate’n an rawn beih huna lo inpuahchah chu a tlai lua ang tih a hre bawk. Chutiang bawkin, thlêmna lo thlen huna tih dân tûr chu remna a awm lai, rilru fîm laia ngaihtuah a, thutlûkna siam lâwk tûr a ni. (Sâm 63:6) Daniela leh Pathian ṭihna nei a ṭhiante chuan lal chaw ei tûra tih an nih hma aṭang rêngin, Jehova dân rinawm taka zawm chu an lo tumsa reng tawh a. Chuvângin, an thutlûkna zawm chu an hreh lo va, chaw thianghlim lote chu an ei lo a ni. (Daniela 1:8) Thlêmna a lo thlen hmain, nungchang thianghlimna vawn reng kan tumna chu i tinghet sauh sauh vang u. Chutianga kan tih chuan, sual kan do thei ang.
7. Mi dangte’n thlêmna an do hneh dân hriat chu engvângin nge thlamuanthlâk tak a nih?
7 Paula thusawi: “Mihring tuar theih ang chauh lo chu thlêmna rêng rêng in chungah a thleng ngai lo,” tih chu a va thlamuanthlâk êm! (1 Korinth 10:13) Tirhkoh Petera chuan: “In unau khawvêla awmhote chungah chuan chutiang tuarna chu a thleng ve a ni tih hriain, ring nghet taka awmin amah chu do rawh u,” tiin a ziak a ni. (1 Petera 5:9) Ni e, mi dangte pawhin chutiang thlêmna chu an tuar a, Pathian ṭanpuina zârah an do thei a ni; chuvângin, keini pawhin kan do hneh thei a ni. Amaherawhchu, khawlohnaa khat khawvêla awm Kristian kan nih avângin, thlêmna chu eng hunah pawh kan beisei thei a ni. A nih leh, mihring chak lohna leh sual tûra thlêmna chu kan hneh ngei ang tih inrintâwkna chu engtin nge kan neih theih?
Thlêmna Kan Do Thei!
8. Thlêmna pumpelh theih dân bul ber chu eng nge ni?
8 “Sual bâwiha” kan awm loh theih dân pawimawh ber pakhat chu a theih chhûng zawng thlêmna pumpelh chu a ni. (Rom 6:6) Thufingte 4:14, 15 chuan: “Mi suaksual kawngah chuan lût suh la, mi sual kawngah chuan kal suh. Pumpelh la, a kiangah kal suh; hawisan la, kal zêl rawh,” tiin min fuih a ni. Suala min hruai thei dinhmunte chu kan hre lâwk thei fo va. Chuvângin, châkna ṭha lo min neihtîr thei tupawh, engpawh, leh khawi hmun pawh “hawisan” a, kal zêl chu Kristiante tih tûr a ni.
9. Thlêma awm theihna dinhmun tlânchhiatsan chu Pathian Lehkha Thu-ah eng anga sawi pawimawh nge ni?
9 Thlêmna awm theihna dinhmun tlânchhiatsan chu thlêmna hneh theih dân rahbi pawimawh dang a ni. Paula chuan: “Inngaih hi tlânsan rawh u,” tiin min vaukhân a. (1 Korinth 6:18) “Milem biak hi tlânsan rawh u,” tiin a ziak bawk. (1 Korinth 10:14) Tirkoh chuan Timothea chu hausak châk lutukna leh “tleirâwl châknate chu tlânsan” tûrin a vaukhân bawk a ni.—2 Timothea 2:22; 1 Timothea 6:9-11.
10. Thlêmna tlânchhiatsan hlâwkzia chu eng entîrna pahnihte hian nge târ lang?
10 Israel Lal Davida chanchin han ngaihtuah teh. A lal in chung aṭanga a thlîr chuan nu hmêl ṭha tak inbual lai a va hmu a; tin, châkna bawlhhlawh hian a thinlung a luah khat ta a. Kal sawnin, chu thlêmna chu a tlânchhiatsan tûr a ni a. Mahse, chu nu—Bethsebi—chanchin chu mi a zawhtîr a, a rah chhuah chu râpthlâk tak a ni. (2 Samuela 11:1–12:23) Kawng leh lamah chuan, nungchang bawlhhlawh tak, a pu nupuiin mutpuia a sâwm lai khân Josefa’n engtin nge a tih? A chanchin ziaknaah chuan: “Nî tin maiin Josefa chu be thîn mah sela, amah mutpui lam thu emaw ama hnêna awm lam thu emaw a pawm duh lo,” tiin min hrilh a ni. Mosia Dân hi pêk la ni lo mah se, Josefa chuan: “Engtin nge he sual lian tak hi tiin Pathian chunga thil ka tihsual theih ang?” a ti a. Tin, ni khat chu: “Min mutpui rawh,” tiin a silhfênah a lo man a. Josefa chu tlânchhe lovin, a dinhmun chu hrilhfiah a tum em? Tum lo ve. A “tlânsan a, a chhuak ta daih” a ni. Josefa chuan mipat hmeichhiatna lama thlêmna chu hun a pe lo. A tlânchhiatsan zâwk a ni!—Genesis 39:7-16.
11. Thlêmna kan tawng reng a nih chuan eng nge tih theih?
11 Tlânchhiat chu a châng chuan dawihzepna anga ngaih a ni nâ a, thlêmna dinhmun aṭanga inlâkhran chu a finthlâk ṭhîn. Hna thawhna hmunah thlêmna kan tawng reng a ni thei a. Kan hna chu thlâk thei lo mah ila, thlêmna dinhmun thlânchhiatsan dân kawng dang a awm thei tho a ni. Thil dik lo nia kan hriat tawh phawt chu tlânchhiatsan a, thil ṭha chauh tih kan tum tlat tûr a ni. (Amosa 5:15) A châng chuan, thlêmna tlânsan chuan zahmawh rawng kai internet sites leh intihhlimna hmun ṭha lote pumpelh pawh a huam thei a. Tin, chanchinbu hnâwl emaw, ṭhian thar—Pathian hmangaihtute leh min ṭanpui thei tûr—siam pawh a ngai thei bawk. (Thufingte 13:20) Engpawhin sual titûrin min thlêm mah se, hnâwl tum tlat chu a finthlâk a ni.—Rom 12:9.
Ṭawngṭainain Min Ṭanpui Theih Dân
12. “Thlêmnaah min hruai lût suh ang che,” tia Pathian hnêna kan ṭawngṭai hian eng nge kan dîl?
12 Paula chuan he thu tiam duhawm tak mai hi min pe a: “Pathian zawng a rinawm a ni, ani chuan in tuar theih tâwk aliam chu thlêmna in tawh a phal lo vang; in tuar theihna tûrin thlêmna rualin tlân chhuahna kawng a siam nghâl zâwk ang,” tiin. (1 Korinth 10:13) Jehova’n min ṭanpui dân kawng khat chu thlêmna do thei tûra a ṭanpuina dîla kan ṭawngṭaina min chhânna ni a ni. Isua chuan ṭawngṭai dân tûr hetiang hian min zirtîr a: “Sual tûra thlêmnaah min hruai lût suh la, mi sual lakah chuan min chhandam zâwk ang che,” tiin. (Matthaia 6:13) Chutianga tih tak zeta ṭawngṭaina chhângin, Jehova chuan thlêmna lakah min ensan lo vang a; Setana ngamthlêmna lak ata min chhandam zâwk ang. (Ephesi 6:11) Thlêmna chu thliarhrâng thiam tûr leh do thei tûra chakna nei tûrin Pathian ṭanpuina kan dîl tûr a ni. Thlêm kan nih huna min tlâwmtîr lo tûra kan dîlna chuan, “mi sual,” Setana’n min hneh loh nân min ṭanpui dâwn a ni.
13. Thlêmna kan tawn reng hunah eng nge kan tih tûr?
13 A bîk takin, thlêmna inzawm zata kan tawn hunah kan ṭawngṭai fan fan a ngai zual a. Thlêmna ṭhenkhat chuan rilru chhûngril lam ngaituahna leh rilru put hmang a tibuai thei takzet a; chu chuan kan chak lohzia min hriatchiantîr a ni. (Sâm 51:5) Entîr nân, tûn hmaa kan nungchang bawlhhlawhnate hriat chhuah lehna hian min tibuai a nih chuan eng nge kan tih ang? Chu mi dinhmuna kal kîr leh kan châk chuan engtin nge ni ang? Chutiang ngaihtuahna chu danbeh mai tum lovin, Jehova hnênah ṭawngṭai zâwk rawh—a ṭûl chuan vawi tam tak pawh ṭawngṭai ang che. (Sâm 55:22) A Thu leh thlarau thianghlim thiltihtheihna hmangin, ani chuan kan ngaihtuahna bawlhhlawhte tithianghlim tûrin min ṭanpui thei a ni.—Sâm 19:8, 9.
14. Thlêmna do tûrin engvângin nge ṭawngṭai a pawimawh êm êm?
14 13. Gethsemane huana a zirtîrte mutchhuahzia a hmuhin Isua chuan heti hian a fuih a: “Thlêmnaa in luh loh nân inring rengin ṭawngṭai rawh u; thlarau zawngin a peih a, tisa erawh chu a chak lo a ni,” tiin. (Matthaia 26:41) Thlêmna hneh theih dân kawng khat chu thlêmna lo thlen theih dân chi hrang hrangte hriat leh a hmêlmang hriatthiam har takte hriat hi a ni. Tin, thlêmnate do thei tûra thlarau lama kan inthuam theih nân, nghâk khawtlai lova ṭawngṭai vat pawh a pawi mawh êm êm bawk. Thlêmna hian kan chak lohna lai berah min beih ṭhin avângin, mahni chuan kan do thei lo a ni. Mahse, Pathian chakna chuan Setana laka kan invênna a ṭanpui theih avângin ṭawngṭai hi a pawimah êm êm a. (Philippi 4:6, 7) Chu bâkah, thlarau lama “kohhran upa” ṭanpuina leh ṭawngṭaisakna pawh kan mamawh mai thei bawk.—Jakoba 5:13-18.
Thlêmna Do Fan Fan Rawh
15. Thlêmna do fan fannaah eng nge tel?
15 A theih huna thlêmna kan pumpelh mai bâkah, thlêmna-in min kiansan hma emaw, dinhmunte a inthlâk hma emaw chu kan do fan fan tûr a ni. Setana thlêmna hnuaia a awm lai khân, Isua chuan Diabola kal bo hma chu a do fan fan a ni. (Matthaia 4:1-11) Zirtîr Jakoba chuan: “Diabola dodâl rawh u, tichuan a tlân bosan ang che u,” tiin a ziak a. (Jakoba 4:7) Diabola dodâlna chu Pathian Thu-a kan rilru thuamnghehna leh a tehkhâwngte vawn tumna aṭangin a inṭan a. Kan chak lohna bîkte chungchâng sawina Pathian Lehkha Thute hriain kan chhût reng tûr a ni. Kan thil veite kan hrilhna tûr leh thlêmna kan tawh laia ṭanpuina kan dîl ngamna tûr Kristian mi puitling—upa emaw—neih chu a finthlâk ang.—Thufingte 22:17.
16. Engtin nge nungchang ṭha kan neih reng theih ang?
16 Pathian Lehkha Thu chuan mihring thara inthuam tûrin min fuih a. (Ephesi 4:24) Chu chu Jehova thunun leh tihdanglama awm tihna a ni. Paula chuan a rawngbâwlpui Timothea hnênah heti hian lehkha a thawn a: “Felna te, Pathian ngaihsakna te, rinna te, hmangaihna te, dawhtheihna te, thuhnuairawlhna te ûm zêl rawh. Rinna intihsiakna ṭha chu bei la, chatuan nunna chu vuan rawh; chu mi chang tûrin koh i ni,” tiin. (1 Timothea 6:11, 12) Pathian miziate hriatna dik neih nân leh a thil phûtte mila nung tûra Pathian Thu taima taka zirna hmangin ‘felna kan ûm’ thei a ni. Kristian rawngbâwlna, chanchin ṭha hrilhna te, inkhâwmnaa telna te ang pawh hi a pawimawh êm êm bawk. Pathian hnaih leh a thlarau lam châwmnate hlâwkpui veknapumhlûmna chuan thlarau lama ṭhang tûr leh nungchang ṭha nei reng tûrin min ṭanpui ang.—Jakoba 4:8.
17. Thlêma kan awm chhûngin Pathianin min thlahthlam ngai lovang tih engtin nge kan hriat theih?
17 Pathian min pêk thlêmna do theihnain a hneh loh tûr thlêmna kan chungah a lo thleng lo vang tih Paula chuan min tiam a. Jehova chuan ‘kan tuar theihna tûrin thlêmna rualin tlân chhuahna kawng a siam nghâl zâwk’ ang. (1 Korinth 10:13) Ni e, Pathian chuan amaha kan innghah zêl phawt chuan, a laka rinawmna vawng nâna mamawh thlarau lam chakna tlachham tûr khawp chuan thlêmna awm a phal lo vang. Ani chuan a mithmuha sual ti tûra thlêmna kan do fan fannaah chuan hlawhtling ngei tûrin min duh a ni. Chu bâkah, he a thutiam: “Engtikah mah ka thlahthlam tawp lo vang chia, kal pawh ka kalsan tawp lo vang che,” tihah hian rinna kan nei thei a ni.—Hebrai 13:5.
18. Mihring chak lohna kan hneh thei a ni tih engvângin nge kan chian theih?
18 Paula chuan mihring chak lohna a dona rah chhuah tûr chu a hre reng a. Tisa châknate sala tâng mi khawngaih thlâk takah a inruat lo va. Chutih ahnêkin, heti hian a sawi zâwk a ni: “Tiam chin lam panin ka tlân ngat ngat a ni, boruak mai hnek lovin mahni ka inhnek zâwk ṭhîn a, chuvâng chuan ka taksa ka tichhel a, ka thuhnuaiah ka dah tawh a ni, chutilochuan mi dangte hnêna ka tlângaupui hnu pawhin eng emaw tiin keimah ngei hi paih thlâkin ka awm dah ang e,” tiin. (1 Korinth 9:26, 27) Keini pawh tisa ṭha famkim lo kan beihnaah hian kan hlawhtling thei a ni. Pathian Lehkha Thu, Bible ṭanchhan thu leh hla chhuahte, Kristian inkhâwmnate, leh kan Kristianpui puitling tak takte hmangin, hmangaihna ngah kan Pa vâna mi chuan kawng dik zawh reng tûra min ṭanpui thei hriattîrna min pe reng a ni. Chu mi ṭanpuina hmangin, mihring chak lohnate chu kan hneh thei a ni! (w01 3/15)
I Hre Chhuak Em?
• ‘Tisa lam thil duh’ tih chu eng tihna nge ni?
• Thlêmna do tûrin engtin nge kan inrinlâwk theih?
• Thlêmna do tûrin eng nge kan tih theih?
• Thlêmna kan donaah ṭawngṭainain eng chanvo nge a neih?
• Mihringte chak lohna chu a hneh theih tih engtin nge kan hriat?
[Phêk 22-naa milemte]
Bible chuan kan tisa châknate sala tâng kan ni tih a sawi lo
[Phêk 24-naa milem]
Thlêmna tlânchhiatsan chu sual pumpelhna kawng pakhat a ni