I Fate I Zirtîrnaah Jehova Entawn Rawh
“Nu leh pa zawng zawng chuan an fate an zilh ṭhîn lo vem ni?—HEBRAI 12:7, Contemporary English Version.
1, 2. Tûn lai hian engvângin nge nu leh pate’n an fate enkawl chu harsa an tih?
KUM engemaw zât kalta khân Japan ramah enfiahna pakhat neih a ni a, chu enfiahna chuan, puitling an biangbiakte zînga a chanve vêl chuan nu leh pate leh fate inkârah inbiakpawhna awm mang lo va an hriat thu leh pate’n an fate chu an thlahthlam lutuk nia an hriat thu a târ lang a ni. Chu mi ram vêka enfiahna dang neihah chuan, biangbiakna chhâng lêttu hmun lia ṭhena hmun khatte chuan an fate kawm dân an thiam loh thu an puang a ni. Hei hi Khawchhak-ho nihphung bîk a ni lo. “Canada rama nu leh pa tam tak chuan nu leh pa tling tak nih dân an hriat chiah loh thu an sawi” tiin The Toronto Star chanchinbu chuan a târ lang. Hmun tina nu leh pate chuan an fate enkawl chu harsa an ti ṭheuh a ni.
2 Engvângin nge nu leh pate chuan an fate enkawl chu harsa an tih? A chhan bul ber chu ‘ni hnuhnûng’ leh “hun khirh takte” kâra kan awm vâng a ni. (2 Timothea 3:1) Chu bâkah, Bible chuan “mihring rilru ngaihtuahnate chu an naupan têt ata a sual” a ti bawk. (Genesis 8:21) Tin, thiltawn nei lote seh tuma “sakeibaknei rûm ṭhîn” ang mai Setana beihna lakah chuan ṭhalaite chu an him lo bîk a ni. (1 Petera 5:8) An fate ‘Lalpa thununnaah leh zilhnaa enkawl’ tum Kristian nu leh pate chuan harsatna tam tak an tâwk a ni. A nih leh, engtin nge nu leh pate chuan an fate chu “chhia leh ṭha” fiah thei, Jehova chibai bûktu mi puitling ni tûrin an enkawl ang?—Hebrai 5:14.
3. Hlawhtling taka fate enkawl tûr chuan, engvângin nge nu leh pate zirtîrna leh kaihhruaina a ṭûl?
3 Lal fing Solomona chuan: “Naupang thinlungah chuan âtna a bet tlat” a ti a. (Thufingte 13:1; 22:15) Chutiang âtna hnawt bo tûr chuan naupangte chuan nu leh pate hmangaih taka zilhna an mamawh a ni. Amaherawhchu, naupangte chuan chutiang zilhna chu an pawm duh zen zen ṭhîn lo. Tu pawhin zilh se, an hnâwl tlat ṭhîn a ni. Chuvângin, nu leh pate chuan ‘naupang chu a kalna âwm kawnga zirtîr’ dân an zir tûr a ni. (Thufingte 22:6) Naupangte’n chutiang thununna an pawm chuan, an tân nunna a ni. (Thufingte 4:13) Chuvângin, naupangte zirtîrnaah hian engte nge tel tih hriat chu nu leh pate tân a va pawimawh tak êm!
Thununna Awmzia Chu
4. Bible-a “thununna” tia hman awmzia tak chu eng nge ni?
4 Naupangte chu tisa, ṭawngkam, a nih loh leh rilru lama tih khaw loh an hlauh avângin, nu leh pa ṭhenkhat chuan an fate an zilh duh lo va. Chutiang hlauhna chu kan neih a ngai lo. Bible-a “thununna” tih thu mal chuan tihkhaw lohna leh nunrâwnna lam a kâwk lo rêng rêng. “Thununna” tia lehlin Grik thu mal chu a nihna takah chuan kaihhruaina te, zirtîrna te, zilhna te leh, a châng chuan, hmangaihna avânga hremna te nên a inkungkaih a ni.
5. Jehova’n a mite a dâwr dân ngaihtuah chu engvângin nge a ṭangkai?
5 Chutiang thununna pêkna kawngah chuan Jehova chuan entawn tûr ṭha tak a siam a. Jehova chu tisa lama pa nên khaikhinin, tirhkoh Paula chuan: “Nu leh pa zawng zawng chuan an fate an zilh ṭhîn lo vem ni? . . . Tisa lama kan pate chuan an theih tâwpa ṭhain ni rei lo te chhûng min zilh a. Pathian erawh chuan kan thianghlim a duh avângin, kan ṭhatna tûrin min zilh a ni,” tiin a ziak. (Hebrai 12:7-10, Contemporary English Version) A ni, Jehova chuan a mite chu an thianghlimna tûr, a nih loh leh bawlhhlawh an kai lohna tûrin a thunun a. Jehova’n a mite a zirtîr dân ngaihtuahna hmangin naupangte thununna kawngah thil tam tak kan zir thei a ni.—Deuteronomy 32:4; Matthaia 7:11; Ephesi 5:1.
Hmangaihna—A Turtu Ber Chu
6. Engvângin nge nu leh pate tân Jehova hmangaihna entawn chu a harsat theih?
6 Tirhkoh Johana chuan “Pathian chu hmangaihna a ni,” a ti. Chuvângin, Jehova zirtîrna pêkte chu hmangaihna avânga a pêk a ni. (1 Johana 4:8; Thufingte 3:11, 12) Chu chu, an fate chunga pianpui hmangaihna nei nu leh pate tân he mi kawnga Jehova entawn chu a awlsam dâwn tihna a ni em? A ni kher lo. Pathian hmangaihna chu thu bula innghat hmangaihna a ni. Grik mi thiam pakhat chuan chutiang hmangaihna chu “pianpui ngaihtuahna nên a inthurual reng lo” a ti. Pathian chu rilrua veirûkna thil mai chuan a hneh ve ngai lo. A mite tâna thil ṭha ber chu a ngaihtuah reng zâwk a ni.—Isaia 30:20; 48:17.
7, 8. (a) Jehova chuan a mite a dâwrnaah thu bula innghat hmangaihna entîrna eng nge a lo siam? (b) Bible thu bulte zâwm tûra an fate an ṭanpuina kawngah nu leh pate chuan engtin nge Jehova an entawn theih?
7 Israel mite a dâwrna kawnga Jehova’n hmangaihna a lantîr dân han chhût teh. Mosia chuan hnam thar la naupang takte chunga Jehova hmangaihna sawi nân, tehkhin thu mawi tak hi a hmang a. Heti hian kan chhiar a ni: “Mupuiin a bua no a chawk tho va, a no chunga thla a zâp a, a thlate a zâr a, a la a, a thlaa a chawi ṭhîn angin: LALPA chauhvin [Jakoba] a hruai ṭhîn,” tiin. (Deuteronomy 32:9, 11, 12) Mupuiin a no hnêna thlawh dân a zirtîr nân, ‘a bu a chawk tho va,’ thlawh châkna a neih ve theihna tûrin a no hmaah chuan a thla a zâp vêl a ni. A notê chu, khâm kâr lung khawkrawka awm ṭhîn a bu aṭanga a lo chhuah chuan, a pui chuan a chungah a “thla a zâp a.” Leia insawh dâwn tak ngiala a lan chuan a pui chu rang taka bir thlain, a no chu ‘a thlain a chawi’ ṭhîn a ni. Chutiang bawkin, Jehova chuan hnam thar Israel chu hmangaih takin a enkawl a ni. An hnênah Mosia Dân a pe a. (Sâm 78:5-7) Tichuan, Pathianin chu hnam chu fîmkhur takin a vêng a, harsatna an tawn apianga ṭanpui tûrin a inpeih reng a ni.
8 Kristian nu leh pate chuan Jehova hmangaihna chu engtin nge an entawn ang? A hmasa berin, an fate chu Pathian Thua awm thu bulte leh tehnate an zirtîr tûr a ni. (Deuteronomy 6:4-9) Chu zirtîrnain a tum chu, Pathian thu bulte mila mahnia thu tlûkna siam thei tûra naupangte ṭanpui a ni. Chutianga an tih chuan, hmangaihna nei nu leh pate chuan an fate’n thu bul an zirte chu a taka an hman dân ngun taka enthlain, an chungah thla an zâp a tih theih a ni. Naupangte chu an lo upat deuh chuan zawi zawia zalenna tam zâwk pêk an lo ni a. Chutiang hunah an fate dinhmun hlauhawma an din apiangin, fate ngaihsak tak nu leh pate chu “bir thla” a, ‘an fate an thlaa chawi’ tûrin an inpeih reng a ni. Eng ang hlauhawma an dinin maw?
9. Hmangaihna nei nu leh pate chu eng hlauhawmna lakah nge an harhvân bîk ang? Hrilhfiah rawh.
9 Jehova chuan Israel mite chu ṭhiansual kawm hlauhawmzia a hrilh a. (Number 25:1-18; Ezra 10:10-14) Mi ṭha lote kawm chu tûn laiah pawh chhiatna thlentu a ni tih kan hre tlâng ṭheuh a ni. (1 Korinth 15:33) Kristian nu leh pate chuan he mi kawngah hian Jehova an entawn tûr a ni. Tleirâwl kum 15 mi Lisa-i chuan an chhûngkaw nungchang leh thlarau lam hlutnate ṭâwmpui ve lo tlangvâl pakhat a duh tlat mai a. Lisa-i chuan: “Ka nu leh pate chuan ka rilru put hmang inthlâk thleng chu an man thuai a, an mangang hle a. A châng chuan mi an zilh a, a châng chuan hmangaih takin mi an fuih a ni,” a ti. Anni chuan Lisa-i chu ṭhutpuiin a thusawi chu dawhthei takin an ngaithla a; tichuan, a buaina bul ber nia an hriat—ṭhiante pawm nih a duhna—chu hma chhawn a, hneh thei tûrin an ṭanpui ta a ni.a
Inbiakpawhna Kawng Hawng Reng Rawh
10. Eng kawngte hmangin nge Jehova chuan Israel mite nêna inbiakpawhna kawngah entawn tûr ṭha tak a siam?
10 Naupangte zirtîrna kawnga hlawhtling tûr chuan, nu leh pate chuan an fate nêna an inbiakpawhna kawng chu hawn reng an tum hrâm hrâm tûr a ni. Jehova chuan kan thinlung ngaihtuahnate hre vek mah se, amah nêna inbiakpawhna nei tûrin min fuih a. (1 Chronicles 28:9) Israel mite chu Dân a pêk hnuah pawh, Jehova chuan Levia chite chu anmahni zirtîr tûrin a ruat a; tin, anmahni fuih tûr leh zilh tûrin a zâwlneite a tîr bawk a ni. An ṭawngṭainate a ngaihthlâk duhzia pawh a lantîr bawk.—2 Chronicles 17:7-9; Sâm 65:2; Isaia 1:1-3, 18-20; Jeremia 25:4; Galatia 3:22-24.
11. (a) Nu leh pate’n an fate nêna inbiakpawhna ṭha engtin nge an siam theih? (b) An fate nêna an inbiak hian nu leh pate tân ngaithlatu ṭha nih chu engvângin nge a pawimawh?
11 Nu leh pate chuan an fate nêna an inbiakpawhnaah engtin nge Jehova an entawn theih ang? A pawimawh berah chuan, an fate tân hun an duang tel ngei tûr a ni. Nu leh pate tân innuihsawhna ṭawngkam, “Chûng mai chu maw? A pawimawh viau dâwn emaw tih nâk laia”; “A ho êm mai”; “Aw, eng nge i la beisei cheu le? Naupang chhia mai i la nih hi,” tih ang chite an pumpelh a ṭha ang. (Thufingte 12:18) Naupangte’n an rilru chhûngril an phawrh chhuah nân, nu leh pa fingte chuan ngaithlatu ṭha nih an tum a ni. Nu leh pate’n an fate an têt laia an ngaihsak loh chuan, an lo upat hunah an fate chuan anni chu an pawisa lo mai ang. Jehova chuan a mite chu a ngaithla duh reng a. Inngaitlâwm taka ṭawngṭaia a lam hawitute lamah chuan a beng a chhi reng a ni.—Sâm 91:15; Jeremia 29:12; Luka 11:9-13.
12. Naupangte’n pan nuam an tih theih nân, nu leh pate chuan eng miziate nge an lantîr theih?
12 Pathian mize ṭhenkhatte chuan a mite tâna pan nuam tak a nihtîr dân ngaihtuah bawk teh. Entîr nân, hmân lai Israel lal, Lal Davida chuan Beth-sebi uirêin, thil sual nasa tak a ti a. Mihring ṭha famkim lo a nih avângin, Davida chuan a damchhûngin sual nasa tak dang pawh a ti a ni. Chutichung pawhin, Jehova panin a ngaihdamna leh a zilhhauna a dîl hmaih ngai lo. Pathian ngilneihna leh lainatna chuan Davida tân Jehova lama kîrleh chu a tiawlsam a ni tih rinhlelh rual a ni lo. (Sâm 103:8) Chutiang Pathian mizia, khawngaihna leh lainatna angte lantîrna chuan, nu leh pate chu naupangte’n thil sual an tih hun pawha inbiakpawhna kawng hawng reng tûrin a ṭanpui thei a ni.—Sâm 103:13; Malakia 3:17.
Nunnêm Rawh
13. Nunnêmnaah hian eng dang nge tel?
13 An fate thusawi an ngaihthlâk laiin, nu leh pate chu an nunnêm tûr a ni a, “chung lam aṭang finna lo chhuak” chu an lantîr tûr a ni. (Jakoba 3:17) Tirhkoh Paula pawhin: “In dawhtheihzia [nunnêmzia] mi zawng zawng hriat ni rawh se,” tiin a ziak a. (Philippi 4:5) Nunnêm tih chu eng tihna nge ni ang le? “Nunnêm” tia lehlin Grik thu mal hrilhfiahna pakhat chu “khirh taka dân phût luih loh” tih hi a ni. A nih leh, nungchang leh thlarau lam tehnate kengkawh reng chungin, nu leh pate chu engtin nge an nunnêm theih ang?
14. Lota a dâwrnaah Jehova chuan engting nge nunnêmna a lantîr?
14 Jehova chuan nunnêmna kawngah entawn tûr ropui tak a siam a. (Sâm 10:17) Sodom khawpui tihchhiat mai tûr aṭanga chhuak tûra Lota a nawr khân, Lota chu “a la muang hle” a ni. A hnua Jehova vântirhkohvin tlâng rama tlânchhe tûra a hrilh khân, Lota chuan: “Tlângah saw zawng ka tlân thei lo vang . . . Ngai teh, saw [Zoar] khua saw tlân nân a hnai ber a, khaw tê tak tê a ni bawk si a: aw, chutah chuan—khaw tê tak tê a ni lâwm ni?—min tlântîr zâwk rawh,” a ti a ni. Jehova chuan engtin nge a chhân lêt? Ani chuan: “Ngai teh, chu thil kawngah pawh chuan ka zâwm che a ni, khua i sawi chu ka tiboral lo mai ang e,” a ti. (Genesis 19:16-21, 30) Jehova chuan Lota ngenna chu pawm a duh a ni. A ni, nu leh pate chuan Jehova’n a Thu, Bible-a a târ lan tehnate chu an zawm a ngai ngei mai. Chutichung pawh chuan, Bible thu bulte a tikhaw lo a nih loh chuan naupangte duhzâwng chu an phalsak thei tho a ni.
15, 16. Isaia 28:24, 25-a tehkhin thu kan hmuh aṭangin nu leh pate chuan eng nge an zir theih?
15 Nunnêmnaah chuan fuihna thute dawngsawng thei tûra naupangte thinlung buatsaih pawh a tel a. Isaia chuan Jehova chu lo nei mi nêna tehkhinin: “Leilettu chuan chi theh nân lei a let reng ngai em ni? A lei tlangte chu a tikehin a tisawm reng ngai em ni? A chung chu a chawh rual zawhin mohuri te chu a theh darh lo vem ni? Zîra te pawh a theh lo vem ni? Buh te pawh atlarin, barli te pawh a hmun ruatah, vai buhtun te pawh a vau hrûlah a tuh ṭhîn lo vem ni?” a ti a ni.—Isaia 28:24, 25.
16 Jehova chuan “chi theh nân lei a let” a, “a lei tlangte chu a tikehin a tisawm,” bawk a ni. Hetiang bawk hian, thununna a pêk hmain, a mite thinlung chu a buatsaih a ni. An fate an zilhnaah nu leh pate chuan an fate thinlung chu engtin nge ‘lei leh angin an leh’ theih ang? Pa pakhat chuan a fapa kum lia upa a zilhnaah Jehova a entawn a. A fapain an ṭhenawm naupang pakhat kut a thlâk ṭum chuan, a fapa thiamthu sawina chu dawhthei takin a ngaihthlâksak phawt a. Chutah, a fapa thinlung ‘lei leh anga leh’ nân, a pa chuan mi sawisak hmang kut tuar naupang khawngaihthlâk tak pakhat thawnthu chu a hrilh ta a ni. Chu thawnthu a ngaihthlâk hnu chuan naupang chuan, mi sawisak hmanga chu hrem tûr a ni a ti hial a ni. Chutiang ‘lei lehna’ chuan naupang thinlung chu a buatsaih a, ṭhenawm naupangte chunga kut thlâk chu sawisak hmang nihna a ni a, thil dik a ni lo tih pawm chu a tiawlsam zâwk a ni.—2 Samuela 12:1-14.
17. Isaia 28:26-29-ah hian nu leh pate zilhna pêk chungchângah zir tûr eng nge awm?
17 Isaia chuan Jehova zilhna chu lo nei mi thiltih pakhat nên a khaikhin leh a—buh chîl nên chuan. Lo neitu chuan buh chîlna hmanrua chi hrang hrang chu an buh chîl sakzia mil zêlin a hmang a. Mohuri vuak nân tiang an hmang a, zira vuak nân talhtum an hmang ṭhîn a; mahse, chûng aia sakhat zâwk leh sak zâwk chîl nân chuan khâwl hriam emaw, tawlailîr kê emaw chu an hmang thung ṭhîn. Chutichung pawh chuan, buh chu a sawm thlenga chîl a ni lo vang. Chutiang bawkin, Jehova chuan a mite laka thil duh awm lote paihbo nân, a ṭûl dân leh dinhmun azirin, dâwr dân chi hrang hrang a hmang a ni. Ani chu nunrâwng leh tawrhhlelhawm a ni ngai lo. (Isaia 28:26-29) Naupang ṭhenkhat tân chuan nu leh pate mitmei hmuh mai hi a tâwk a, a aia nasa a ngai tawh lo. A dangte chu hriatnawntîr fo an ngai a; tin, a dang lehte erawh chuan chûng aia nasa zâwk pawh an mamawh mai thei a ni. Nu leh pa nunnêm takte chuan an fate mi mal mamawh ang zêlin zilhna an pe ang.
Chhûngkaw Sawihona Chu Hlimawm Tak Nihtîr Rawh
18. Engtin nge nu leh pate’n mumal taka chhûngkuaa Bible zir nân hun an neih theih?
18 I fate zirtîrna kawng ṭha berte zîngah chuan mumal taka chhûngkaw Bible zirna leh nî tina Pathian thu sawihona a tel a. Chhûngkaw zirna chu mumal taka tih a nih hian a ṭangkai ber a. Ruahman lâwkna awm lova remchân huna neih mai emaw, ngaituah lâwk lova neih thut emaw a nih chuan, hun ṭha tak kârah pawh a mumal thei lo vang. Chuvângin, nu leh pate chuan zirna hun neih nân ‘hun an lei’ tûr a ni. (Ephesi 5:15-17) Chhûngkuaa mi zawng zawngte awm remchân hun thlan chu a harsa mai thei. Chhûngkaw pa ber pakhat chuan naupangte an lo upat a, tihtûr chi hrang hrang an neih tâkah chuan chhûng kim hun a awm mang lo tih a hria a. Mahse, kohhran inkhâwm zânah chuan an kim vek ṭhîn a ni. Chuvângin, pa ber chuan chhûngkaw zirna chu kohhran inkhâwm zân pakhata nei tûrin ruahmanna a siam a. Chu ruahmanna chu a hlawhtling a ni. A fate pathum chu tûnah chuan baptisma chang tawh Jehova chhiahhlawh an ni vek tawh a ni.
19. Chhûngkaw zirna an kaihhruai hunah nu leh pate’n engtin nge Jehova an entawn theih?
19 Amaherawhchu, zirna neih chhûnga Pathian thu ṭhenkhat ngaihtuahho mai chu a tâwk lo. Jehova chuan Israel dinthar lehte chu puithiamte hmangin a zirtîr a, chûng puithiamte chuan Dân chu “a awmzia an hrilhfiah a, an chhiar chu an hriat chiantîr zêl” a ni. (Nehemia 8:8) A fa pasarihte Jehova hmangaih tûra ṭanpuitu chhûngkaw pa pakhat chuan, chhûngkaw zirna an neih hmain inpuahchah tûr leh an thu zir tûr chu naupang tinte mamawh ang zêla siam tûrin a pindanah chuan a lût hmasa ziah ṭhîn a ni. Ani chuan zirna chu naupangte tân hlimawm tak a nihtîr a. A fapa puitling tawh pakhat chuan: “Kan chhûng zirna neih chu a hlimawm hle a. Pâwna inkhêl lai pawh ni mah ila, chhûngkaw zirna nei tûra koh kan nih hian ball chu kan dah thuai a, kan tlân lût nghâl vat zêl a ni. Chu chu chawlhkâr khat chhûnga tlai hlimawm ber a ni ṭhîn,” a ti.
20. Naupangte enkawlnaa harsatna awm thei eng nge ngaihtuah tûr la awm cheu?
20 Fakna hla phuahtu chuan: “Ngai teh, fanaute hi LALPA laka kan rochan an ni a: rîla rah hi a lâwmman mi pêk a ni,” tih a puang a. (Sâm 127:3) Kan fate zirtîr tûr chuan hun leh tha leh zung sên a ngai a; mahse, ṭha taka tih a nih chuan, chu chu kan fate tân chatuan nunna a ni. Lâwmman ṭha a va ni dâwn êm! Chuvângin, kan fate kan zirtîrnaah phûr takin Jehova i entawn ṭheuh vang u. Amaherawhchu, nu leh pate chu an fate “Lalpa thununnaah leh zilhnaah chuan enkawl” tûra mawhphurhna pêk ni mah se, an hlawhtling ngei ang tih tiamna a awm lo. (Ephesi 6:4) Ṭha taka enkawl a ni chungpawhin, naupang chu a sualin, Jehova rawngbâwl a duh lo mai thei. Chutiang dinhmunah chuan eng nge kan tih ang? Chu chu thuziak dawt leha kan sawiho tûr chu a ni. (w01 10/1)
[Footnote]
a He thuziak leh a dawt leha thuziaka thiltawn târ lante hi i awmna ram nunphung nên a inang lo thei a. A thu bulte hriat thiam tum la, chûng chu in ram nunphung nêna inmilin hmang ang che.
I Chhânna Chu Eng Nge Ni?
• Deuteronomy 32:11, 12-a târ lan Jehova hmangaihna chu nu leh pate’n engtin nge an entawn theih ang?
• Jehova’n Israela mite a biakpawh dân aṭangin eng nge i zir le?
• Lota dîlna Jehova ngaihthlâkna hian eng nge min zirtîr?
• Isaia 28:24-29-na thu aṭangin naupangte zilhna kawngah eng nge i zir?
[Phêk 8, 9-naa milem]
Mosia chuan Jehova’n a mite a zirtîr dân chu mupuiin a notê a zirtîr dân nên a khaikhin
[Phêk 10-naa milemte]
Nu leh pate chuan an fate tân hun an pêk a ngai
[Phêk 12-naa milem]
“Chu chu chawlkâr khat chhûnga tlai hlimawm ber a ni ṭhîn”