Jehova Chu Dawhtheihna Pathian A Ni

‘Jehova chu, Pathian lainatnaa khat, mi khawngaih thei tak, thin nel tak, ngilneihna ngah tak a ni.’​—EXODUS 34:6.

1, 2. (a) Tûn hma khân, tute’n nge Jehova dawhtheihna hlâwkpui? (b) “Dawhtheihna” tih thumal hi engtin nge i hrilhfiah dâwn?

NOVA hun laia mi te, Mosia hova thlalêra kal tlang Israel mi te, leh he leia Isua a awm laia Juda mi te​—khâng mi zawng zawngte kha dinhmun chi hrang hrang hnuaiah an ding a. Nimahsela an zâin, Jehova mize duhawm tak, dawhtheihna chu an hlâwkpui ṭheuh a ni. Ṭhenkhatte tân Jehova dawhtheihna chu dam khawchhuahna a ni a. kan tân pawh a ni ve thei a ni.

² Dawhtheihna chu eng nge ni ta? Jehova chuan dawhtheihna chu eng hunah nge a lantîr a, engvângin nge? “Dawhtheihna” tih thu mal chu sual emaw, intihthinurna emaw pawh zâwldawh taka tuar tihna a ni a; inlaichînna ṭha awm lo mah se, dinhmun a ṭhat leh theih beisei tlatna a kâwk a ni. Chuvângin, he mizia hian thil tum a nei a. Chu chu a bîk takin, inrem lohna awmtîrtu hmakhaw en hi a ni. Nimahsela, dawtheihna chu sual ngaihhnathiamna a ni lo. Dawhtheihnain a tum ber a tihhlawhtlin hnu emaw, dawh theih zui zêlin awmzia a neih tawh loh hunah emaw chuan dawhtheihna chu a tâwp ve ta ṭhîn a ni.

3. Jehova dawhtheihnain a tum chu eng nge ni a, eng chen nge a dawh theih dâwn?

³ Mihringte hian dawhtheihna lantîr thei ve tho mah se, he mi chungchângah hian Jehova chu entawn tûr ṭha ber a ni. Jehova leh a thil siam mihringte inlaichînna a chhiat tâk aṭangin, min Siamtu chuan chhel takin mi a dawh hrâm hrâm a, inchhîrna nei apiangin amah nêna inlaichînna ṭha an neih leh theih nân ruahmanna a siam bawk a ni. (2 Petera 3:9; 1 Johana 4:​10) Nimahsela, a dawhtheihnain a thil tum a hlen hunah chuan, Pathianin duhrêng vânga suahsual rawng bâwlte chungah chuan kut a thlâk ang a, he kalhmang suaksual hi a titâwp ang.​—2 Petera 3:7.

Pathian Mize Bulte Nunpui Reng Rawh

4. (a) Dawhtheihna awmzia hi Hebrai Pathian Lehkha Thuah engtin nge sawi a nih? (Footnote en bawk rawh.) (b) Zâwlnei Nahuma’n Jehova chungchâng engtin nge a sawi a, chu chuan Jehova dawhtheihna chungchâng eng nge a târ lan?

⁴ Hebrai Pathian Lehkha Thuah chuan dawhtheihna chu Hebrai thu mal pahnih hmanga sawi a ni ṭhîn a, a awmzia tak chu “hnârkaw sei” tihna a ni a, kan Mizo Bible-ah chuan “thin nel” tia lehlin a ni.a Pathian dawhtheihzia chungchâng chu zâwlnei Nahuma chuan: “LALPA chu a thin a nel a, nasa taka thiltithei a ni a, mi sual chu thiam a chantîr rêng rêng lo vang,” tiin a sawi a ni. (Nahuma 1:3) Chuvângin, Jehova dawhtheihna chu chak lohzia lantîrna a ni lo va, chintâwk nei lo a ni lo bawk. Pathian engkimtitheia chuan a thin nel rualin thiltihtheihna nasa tak a nei a, chu chuan tum neia a thunun tlat avângin dawhtheihna a nei a ni tih a lantîr a ni. Mi hrem tûrin thuneihna a nei a; mahse, thiltisualte hnêna inthlâkna hun pêk a duh avângin hrem nghâl mai lovin, a inthunun lui a ni. (Ezekiela 18:​31, 32) Chuvângin, Jehova dawhtheihna chu a hmangaihna lantîrna a ni a; chu chuan a thiltihtheihna fing taka a hmanzia a târ lang bawk a ni.

5. Eng kawngin nge Jehova dawhtheihna chu a rorêl dikna nên a inrem?

⁵ Jehova dawhtheihna chu a rorêl dikna leh a felna nên pawh a inrem bawk a ni. Mosia hnênah chuan, “Pathian lainatnaa khat, mi khawngaih thei tak, thin nel [“dawhthei,” King James Version] tak, ngilneihna leh thu tak ngah,” tiin a inhriattîr a ni. (Exodus 34:6) Chu mi hnu kum tam takah chuan, Mosia chuan hetiang hian Jehova fakna hla a sa a: “Lungpuia chu, a thiltih a fel famkim; a awm dân zawng zawng chu dân a ni: Pathian rinawm, khawlohna nei lo, fel leh ṭha a ni,” tiin. (Deuteronomy 32:4) Ni e, Jehova lainatna te, dawhtheihna te, rorêl dikna te, leh felnate chuan inrem takin hna an thawkho a ni.

Tuilêt Hmaa Jehova Dawhtheihna

6. Adama leh Evi thlahte chungah Jehova chuan a dawhtheihzia chhinchhiah tlâk tak eng nge a lantîr?

⁶ Eden huana Adama leh Evi helna chuan hmangaihnaa khat anmahni Siamtu, Jehova nêna an inlaichînna hlu tak chu chatuanin a tichhe ta a. (Genesis 3:​8-13, 23, 24) Chu Pathian laka inmihranna chuan an thlahte a nghawng a; anni chuan sualna te, ṭhat famkim lohna te, leh thihna te chu an rochung a ni. (Rom 5:​17-19) Nupa tuak hmasate chu duh rêng vânga sual mah ni se, Jehova chuan fa an neih chu a phalsak a. Chu mi hnu-ah, Adama leh Evi thlahte chu amah nêna an inrem leh theih nân hmangaih takin ruahmanna a siam leh ta a ni. (Johana 3:​16, 36) Tirhkoh Paula chuan heti hian a sawifiah a: “Pathian chuan a mi hmangaihna chu fak tlâkin a lantîr a, mi sualte kan la nih laia Krista kan aia a thih avâng khân. Chutichuan a thisena thiam chantîra kan awm tawh hnu hian, amah avângin Pathian thinurna lak ata chu chhandamin kan awm ngei ang. Hmêlma kan nih lai maha a Fapa thihna avânga Pathian nêna lo inrem tawh kan nih si chuan, inrema kan awm tawh hnu hian a nunna avângin chhandamin kan awm ngei ang,” tiin.​—Rom 5:​8-10.

7. Tuilêt hmain engtin nge Jehova’n dawhtheihna a lo lantîr a, Tuilêt hma chhuan a tiboral chu engvângin nge a thiam awm?

⁷ Jehova dawhtheihna chu Nova hun laiah a hmuh theih a. Tuilêt hma kum zabi khat vêlah chuan, “Pathianin lei hi a en a, tin, ngai teh, a chhe zo tawh a, tisa zawng zawngin leiah hian an awm dân an tichhe zo tawh” tih a hmu a ni. (Genesis 6:12) Amaherawhchu, hun engemaw chen chu mihringte a dawh a ni. Hetiang hian a sawi: “Ka thlarau chuan mihring chu kumkhuain a bei fo lo vang, anni pawh chu tisa an ni si a: nimahsela kum za leh kum sawmhnih chu an la dam ang,” tiin. (Genesis 6:3) Chûng kum 120 chhûngin mi rinawm Nova chuan nupui neiin chhûngkua a din hman a; tin, chu mi hun chhûng vêk chuan lawng tuk tûr leh a hun laia mite hnêna Tuilêt lo thleng tûr thu hrilh tûra Pathian thupêk hna chu a thawk hman a ni. Tirhkoh Petera chuan heti hian a ziak: “Hmâna Nova dam laia, lawng siam chhûng zawnga Pathian dawhtheihnain a nghah lai khân an âwih lo va; chu lawngah chuan mi tlêm tê (chu chu mi pariat tihna a ni) tuia chhandamin an awm ta,” tiin. (1 Petera 3:20) A dik a ni, Nova chhûngkuate chauh lo chuan a thu hrilh chu an “an ngaihsak lo” a ni. (Matthaia 24:​38, 39 NW) Mahse, Nova chu lawng tuktîrin, leh kum sâwmbi engemaw zât “felna thu hriltu” anga rawng bâwltîrin, Jehova chuan Nova hun laia mite chu an tharum thawhna ata hawikîr a, A rawng bâwl leh tûra inlamlêtna hun tam tâwk a pe a ni. (2 Petera 2:5; Hebrai 11:7) A tâwpa chûng chhuan suaksual tak a tiboral chu a thiam awm a ni.

Israelte Chunga Lantîr Dawhtheihna Entawn Tlâk

8. Engtin nge Israel hnam chungah Jehova’n dawhtheihna a lantîr?

⁸ Jehova chu Israelte chungah kum 120 aia rei a dawh thei a. Pathian hnam thlân an nih chhûng, kum 1,500 chuang chhûng zawng khân, vawi tam tak chu a vawrtâwp thlengin Pathian dawhtheihna an fiah ṭhîn a ni. Aigupta aṭanga mak taka a hruai chhuah hnu chawlhkâr engemaw zât lekah milem biakna lama hawisanin, anmahni Chhandamtu zah lohna nasa tak an lantîr a ni. (Exodus 32:4; Sâm 106:21) Chu mi hnu kum sâwmbiahte chuan, Israelte chuan thlalêra mak taka Jehova châwmnate chu an sawisêl a, Mosia leh Arona laka an phunnawi bâkah, Jehova an sawisêl bawk a, milem biate nên mipat hmeichhiatna an hmang a; tin, Baal biaknaah an tel hial a ni. (Number 11:​4-6; 14:​2-4; 21:5; 25:​1-3; 1 Korinth 10:​6-​11) Jehova chuan a mite a timang phiar thei nâ a, chutianga ti lovin, dawhtheihna a lantîr zâwk a ni.​—Number 14:​11-21.

9. Rorêltute leh lalte hun chhûng khân, Jehova chuan dawhtheihna Pathian a nihzia engtin nge a lantîr?

⁹ Rorêltute hun chhûng khân, Israelte chu milem biaknaah vawi duai lo an tlu lût a. Chutianga an tih châng chuan Jehova chuan an hmêlmate kuta pein a kalsan a. Mahse, inlamlêt a, a ṭanpuina dîla an ṭawngṭai chuan a dawhtheihna lantîrin anmahni chhanchhuak tûrin rorêltute a ruahmansak leh ṭhîn a ni. (Rorêltute 2:​17, 18) Lal awp chhûng hun rei tak chhûng khân, lal tlêm tê chauh chuan Jehova hnêna inpumpêkna pumhlûm an lantîr a. Tin, lal rinawm takte lal laiah takngial pawh, mite chuan biakna dik leh dik lo chu an chawhpawlh tho a ni. Rinawm lohna laka vaukhân tûra Jehova’n zâwlneite a tirh lahin, mipuite chuan puithiam suaksual takte leh zâwlnei derte thu ngaihthlâk chu an thlang zâwk si ṭhîn. (Jeremia 5:31; 25:​4-7) Dik tak chuan, Israelte chuan Jehova zâwlnei rinawmte chu an tiduhdahin, ṭhenkhat phei chu an that hial a ni. (2 Chronicles 24:​20, 21; Tirhkohte 7:​51, 52) Chutichung pawh chuan, Jehova chuan dawhtheihna a la lantîr zêl a ni.​—2 Chronicles 36:15.

Jehova Dawhtheihna A Tâwp Mai Lo

10. Engtikin nge Jehova dawhtheihna chuan a vâwrtâwp a thlen?

¹⁰ Nimahsela, Pathian dawhtheihna chuan chintâwk a nei tih thilthleng chanchin chuan a târ lang a. B.C.E. 740-ah chuan Israel hnam sâwmte chu Assuria kuta an tlâwm leh a chhûnga mi chêngte râl lâka an lâk chu a phal a. (2 Lalte 17:​5, 6) Tichuan, chu mi hnu kum zabi dang tâwpna lamah chuan Babulon chu hnam pahnih infinkhâwm, Judai lalram chu rûn a, a khawpui Jerusalem leh a biak in a tihchhiat chu a remti leh bawk a ni.​—2 Chronicles 36:​16-19.

11. Jehova chuan hremna a thlentîr chung pawhin engtin nge dawhtheihna a la lantîr?

¹¹ Israel leh Judai ram te chunga a rorêlna a thlentîr hnu-ah pawh, Jehova chu a la dawh thei zêl a. A zâwlnei Jeremia hmangin, Jehova chuan a mi thlante din thar lehna thu chu a lo hrilh lâwk a ni. Heti hian a ti: “Babulon tân kum sawmsarih chu a kin veleh ka rawn kan ang che u a, in hnêna ka thutiam ṭha tak chu ka hlen ang a, he hmunah hian ka kîrtîr leh ang che u. Tin, nangmahni hmuhin ka awm ang a, . . . in awm dân ka let ang a, hnam zawng zawng zînga ka tihdarhna che u hmun ata kha ka hruai khâwm leh ang che u,” tiin.​—Jeremia 29:​10, 14.

12. Messia lo lanna chungchângah Juda mi labângte Judai rama an kîr lehna chu eng angin nge Pathian kaihhruaina a ni a tih theih?

¹² Juda vâkvaite zînga a labângte chu Judai ramah chuan an kîr leh ngei a, Jerusalema biak in sak tharah chuan Jehova chibai bûkna pawh an chhunzawm leh ngei a ni. Jehova thiltum thawh chhuahnaah chuan, chûng a labângte chu harhchhuahna leh hausakna thlentu, “LALPA aṭanga dai tla” ang an ni ang a. Anni chu “ramhnuai sate zînga sakeibaknei vânglai” ang an ni bawk ang. (Mika 5:​7, 8) He a hnuhnûng zâwka thu hi Juda hovin Maccabee chhûngkaw kaihhruaina hnuaia an hmêlmate Ram Tiam aṭanga an hnawh chhuah a, biak in hlamchhiah tawh an hlan ṭhat lehna Meccabean hun lai khân a thleng famkim a nih a rinawm. Chutiang chuan, mi rinawm labâng dangte’n Pathian Fapa chu Messia anga a lo lan huna an lo pawm theih nân chu ram leh a biak in chu vawn him a ni.​—Daniela 9:25; Luka 1:​13-17, 67-79; 3:​15, 21, 22.

13. Engtin nge Judate’n a Fapa an thah hnuah pawh, Jehova chuan dawhtheihna a la lantîr zêl?

¹³ Juda hovin a Fapa an tihhlum hnuah pawh, Jehova chuan kum thum leh a chanve chhûng chu an chungah dawhtheihna a lantîr zui zêl a, mi dangte neih theih loh Abrahama thlarau lam chi thlah zînga mi ni thei tûra kohna chu an la chang zêl a ni. (Daniela 9:27)b C.E. 36 hma leh hnu lamah chuan Juda mi ṭhenkhatte chuan chu kohna chu an pawm a; chuvângin, a hnua Puala sawi ang khân, “khawngaiha thlan ang zia ziain paih thlâk bâk chu an la awm” a ni.​—Rom 11:5.

14. (a) Tute chungah nge C.E. 36-ah chuan Abrahama thlarau lam chi thlah nih theihna chanvo hlu chu pêk a nih? (b) Engtin nge Jehova’n thlarau lam Israel ni tûrte a thlan dânah Paula’n fakna thu a chham chhuah?

¹⁴ C.E. 36-ah chuan, Juda ni lo, Juda saphun lah ni hek lote tân Abrahama thlarau lam chi thlah nih theihna chanvo hlu chu pêk ṭan a ni ta a. A pawm apiang chuan, Jehova ngilneihna leh dawhtheihna chu an dawng ve ta bawk a ni. (Galatia 3:​26-29; Ephesi 2:​4-7) Thlarau lam Israelte a kima kohtîr thei, Jehova dawhtheihna zahngai tak finna leh a thil tum chu a hlutzia tilangin, Paula’n hetiang hian a sawi chhuak a ni: “Pathian finna leh hriatna ngahzia chu a va thûk êm! A rorêlnate chu hriat theih rual leh, a kawngte chu chhui theih rual a va ni lo êm!” tiin.​—Rom 11:​25, 26, 33; Galatia 6:​15, 16.

A Hming Avânga Dawhtheihna

15. Pathianin dawhtheihna a lantîr chhan bul ber chu eng nge ni a, eng thil chinfel nân nge hun a pêk ngai?

¹⁵ Engvângin nge Jehova chuan dawhtheihna a lantîr? A chhan bul ber chu, a hming thianghlim chawimawi nân leh a lalchungnunna thiam chantîr nân a ni. (1 Samuela 12:​20-22) Jehova’n a lalchungnunna a hman dân chungthua Setana chona chu thil siam zawng zawng hmaa lungawi thlâk taka chingfel tûr chuan hun a pêk a ngai a ni. (Joba 1:​9-11; 42:​2, 5, 6) Chuvângin, a mite Aigupta rama tihhrehawm an nih pawh khân Jehova chuan Pharaoa hnênah: “He mi avâng ngawt hian ka tungding chia, ka thiltihtheihna entîr tûr che leh khawvêl zawng zawnga ka hming a lo than theih nân,” tiin a sawi a ni.​—Exodus 9:16.

16. (a) Engtin nge Jehova dawhtheihna chuan a hming pu tûr mi a siamtîr theih? (b) Engtin nge Jehova hming chu tihthianghlim a nih ang a, a lalchungnunna chu thiamchantîr a nih ang?

¹⁶ Tirhkoh Paula’n A hming thianghlim tihropuina kawnga Pathian dawhtheihna chanvo a sawifiah hian, Pharaoa hnêna Jehova thusawite kha a sawi chhuak a. Chu mi hnu chuan, Paula chuan: “Khawngaihna bêl, ropui tûra a lo buatsaih lâwkate chungah chuan a khawngaihna ngahzia a entîr theih nân, thinurna bêl boral tlâkte chungah chuan, Pathianin a thinur leh a thiltihtheihna lantîr duh mah sela, a dawh hrâm hrâm chuan engnge pawi ang? (Chu khawngaihna bêlte chu Judate zîng ata chauh ni lovin, Jentailte zîng ata pawh kohte kan ni.) Hosea lehkhabuah chuan, ‘Ka mite ni ngai lo chu, “Ka mite,” ka ti ang,’” tiin. (Rom 9:17, 22-25) Dawhtheihna a lantîr avângin, Jehova chuan Jentailte zîng ata “ama hming pu” tûr mi a la chhuak thei a ni. (Tirhkohte 15:14) Hêng “mi thianghlimte” hi an Hotu, Isua Krista hnuaiah, Jehova’n a Hming ropui tak tih thianghlim nân leh, A lalchungnunna thiam chantîr nâna a hman tûr Lalrama ro luahtu tûrte an ni.​—Daniela 2:​44; 7:​13, 14, 27; Thu Puan 4:​9-​11; 5:​9, 10.

Jehova Dawhtheihna Chuan Chhandamna A Thlen

17, 18. (a) Eng kan tihin nge hre lo chunga Jehova dawhtheihna kan sawisêl palh theih? (b) Jehova dawhtheihna chu eng anga thlîr tûrin nge fuih kan nih?

¹⁷ Mihringte suala an tlûk aṭanga tûn thlengin Jehova chuan dawhtheihna Pathian a nihzia a la lantîr zêl a. TuiLêt hmaa a dawhtheihna chuan vaukhânna thu pêk hun leh chhandamna tûr lawng tuk hun a pe a ni. Nimahsela, a dawhtheihna chuan a vâwrtâwp a thleng a, Tuilêt a lo thleng ta a. Chutiang bawkin tûn laiah pawh, Jehova chuan dawhtheihna nasa takin a lantîr a, chu a lantîr chhûng chu mi ṭhenkhatte rin aiin a rei mai thei a ni. Nimahsela, beidawn tûr a ni lo. Chu chu a dawhtheihna avânga Pathian sawisêlna a ni dâwn si a. Paula chuan: “Pathian ṭhatnain simna tûrin a hruai ṭhîn che tih hre lovin, a ṭhatna ngahzia leh, a entheihzia leh, a dawhtheihzia te chu i ngainêp em ni?” tiin a zâwt a ni.​—Rom 2:4.

¹⁸ Chhandamna chang tûra Pathian dawhtheihna kan mamawh chen chu tuman kan hre thei lo va. Paula chuan ‘hlau leh khûr chunga mahni chhandamna thawk chhuak’ tûrin min fuih a ni. (Philippi 2:12) Tirhkoh Petera chuan a Kristianpuite hnênah heti hian a ziak a: “Mi ṭhenkhatin muanga an ruat angin Lalpa chu a thutiam kawngah chuan a muang lo ve; tuma boral duh lova, mi zawng zawng lo sim duhin, nangmahni lamah a dawhthei a ni zâwk e,” tiin.​—2 Petera 3:9.

19. Eng kawngin nge Jehova dawhtheihna chu kan hman ṭangkai theih?

¹⁹ Chuvângin, Jehova thil tih vêl dânah hian i dawhthei lo lo vang u. Petera min fuih zawmna thu chu zâwmin, ‘kan Lalpa dawhtheihzia chu chhandamnaah i ruat’ zâwk ang u. Tu chhandamnaah maw? Keimahni leh, “lalram chanchin ṭha” la hre tûr mi tam takte chhandamnaah hian. (2 Petera 3:15; Matthaia 24:14) Hei hian Jehova dawhtheihna nasatzia chu hlut tûrin min ṭanpui ang a, mi dangte nêna kan indâwrnaah dawhtheihna lantîr ve tûrin min chêttîr ang. (w01 11/01)

[Footnote-te]

I Hrilh Fiah Thei Em?

• Bible-a “dawhtheihna” tih thumal hi eng tihna nge?

• Tuilêt hma te, Babulon-a saltân hnu te, leh C.E. kum zabi pakhatna laite khân engtin nge Jehova’n a dawhtheihzia a lantîr?

• Eng chhan pawimawh tak avângin nge Jehova’n dawhtheihna a lantîr?

• Engtin nge Jehova dawhtheihna chu kan thlîr ang?

[Phêk 9-naa milem]

Tuilêt hmaa Jehova dawhtheihna chuan inlamlêtna hun ṭhahnem tâwk a pe

[Phêk 10-naa milem]

Babulon tlûkchhiat hnuah, Judate chuan Jehova dawhtheihna an hlâwkpui

[Phêk 11-naa milem]

Kum zabi pakhatnaa Judate leh Juda ni lote chuan Jehova dawhtheihna an hlâwkpui

[Phêk 12-naa milemte]

Tûn laia Kristiante chuan Jehova dawhtheihna an hmang ṭangkai