Tisaa Hlîng An Tuar Chhuak
“Tisaah hlîng mi pe a ni, Setana tirhkoh kut thak hnawih nâna mi hmangtu tûr chu.”—2 KORINTH 7.
1. Tûn laia mite harsatna tawh ṭhenkhatte chu eng nge ni?
FIAHNA inzawm zat engemaw i hmachhawn reng em? I hmachhawn a nih pawhin i mal lo ve. He ‘hun khirh takah’ hian Kristian rinawmte chuan dodâlna nasa tak te, chhûngkaw harsatna te, natna te, sum leh pai lungkhamna te, lunghnualna te, hmangaihte thihnaa chânna te, leh thil dang dangte an tuar a ni. (2 Timothea 3:1-5) Ram ṭhenkhatah chuan ṭâm leh indo avângin mi tam takte nun chu a derthâwng êm êm a ni.
2, 3. Hlîng ang mai harsatna kan tawhte hian eng beidawnna rilru put hmang nge a rah chhuah theih a, chu chu eng anga hlauhawm nge ni?
2 Chûng harsatnate chuan min tihrehawm êm êm thei a ni, a bîk takin harsatnate a ruala kan hmachhawn phei chuan a harsa lehzual a ni. Thufingte 24:10 sawi hi lo chhinchhiah teh: “Mangan nîa i chauh [“lunghnual,” NW] mai chuan i chakna a bei tham a ni,” tih hi. Ni e, fiahna kan tawhte avânga lunghnualna chuan kan mamawh chakna tam tak chu a la bo thei a, a tâwp thlenga tuar kan tumna chu a tichau thei a ni. Engtin nge a tihchauh?
3 Lunghnualna chuan thilte a nihna taka hmuh thiamna chu min hlohtîr thei a ni. Entîr nân, harsatna kan tawhte chu a nihna bâka nasaah ngaiin, mahni inkhawngaihna neih a awlsam hle a. Ṭhenkhat phei chuan “Engvângin nge he thil hi ka chungah i thlentîr?” tiin Pathian an chhuahchhâl hial thei. Chutiang beidawnna rilru put hmang chu thinlunga a intuh chuan, chu chuan hlimna leh inrintâwkna chu a tichhe thei a ni. Pathian chhiahhlawh chu “rinna intihsiakna ṭha” a beihna tâwp ṭhak khawpin a lunghnual thei a ni.—1 Timothea 6:12.
4, 5. Engemaw chângin, engtin nge harsatna kan tawhah hian Setana a inrawlh a, chuti chung pawhin eng nge kan rin tlat theih?
4 Fiahna kan tawhte hi Pathian Jehova awmtîr a ni lo va. (Jakoba 1:13) Fiahna ṭhenkhat chu a laka rinawm kan tum avâng maia tâwk kan ni. Dik takin, Jehova rawngbâwltu zawng zawngte chu a hmêlma lian ber, Diabol-Setana beih tum berah an insiam a ni. “He khawvêl pathian” suaksual tak hian hun tlêm tê a neih chhûngin, Jehova hmangaihtu rêng rêng chu A duhzâwng tih lohtîr a tum tlat a. (2 Korinth 4:4) Setana chuan khawvêl pum puia unauhote chungah a theih anga nasain hrehawmna a thlentîr a ni. (1 Petera 5:9) Kan harsatna zawng zawngte hi Setana awmtîr a ni vek lo va; mahse, kan harsatna tawhte chu remchânga hmangin, min tihchak loh lehzual a tum tlat a ni.
5 Nimahsela, Setana leh a râlthuamte chu eng anga hlauhawm pawh ni se, kan hneh thei a ni! Engtin nge kan hriat chian theih? Pathian Jehova’n min do sak avângin. Ani chuan a chhiahhlawhte chu Setana mi beih dân a hriattîr vek a ni. (2 Korinth 2:11) Pathian Thu chuan Kristian dikte tihrehawmtu fiahna chungchâng tam tak min hrilh bawk. Tirhkoh Paula chungchângah chuan, Bible chuan ‘tisaa hlîng’ tih ṭawngkauchheh a hmang a. Eng nge a chhan? Aw le, Pathian Thuin chu ṭawngkauchheh a hrilhfiah dân i lo en ang u. Tichuan, fiahnate hneh tûra Jehova ṭanpuina mamawhtu awmchhun kan nih lohzia kan hre mai ang.
Fiahnate Hling Ang A Nih Chhan
6. Paula’n ‘tisaa hlîng’ a tih hi eng a tihna nge ni a, chu hlîng chu eng nge ni?
6 Fiahna nasa tak tâwktu Paula chu hetianga ziak tûra thlarauva thâwk khum a ni: “Ka inngaihhlut lutuk loh nân tisaah hlîng mi pe a ni, Setana tirhkoh kut thak hnawih nâna mi hmangtu tûr chu,” tiin. (2 Korinth 12:7) Paula tisaa hlîng chu eng nge ni? Han ngaihtuah ta la, tisa thûk taka hlîng a luh chuan a na hle a. Chutiang chuan he entîr nei ṭawngkam hi Paula tinatu thil engemaw sawina a ni—tisa lam emaw, rilru lam emaw, a nih loh leh a pahnih emawa Paula tinatu chu. Chu chu a mit ṭhat lohna emaw, tisa lama natna dang a neih emaw a ni mai thei. A nih loh vêk leh, chu hlîngah chuan Paula tirhkoh nihna hnial buaia, a thuhrilh leh zirtîr siam rawngbâwlna ringhleltute pawh an tel mai thei bawk. (2 Korinth 10:10-12; 11:5, 6, 13) A enga pawh chu ni se, chu hlîng chu a hnênah a awm reng a, lâk bo theih a ni lo.
7, 8. (a) “Kut thak hnawih” tih ṭawngkam hi eng tihna nge? (b) Engvângin nge tûna min chhuntu hlîng rêng rêng hi kan tawrh chhuah a pawimawh?
7 Chu hlîng chuan Paula chu kutthak hnawih nân a hmang reng tih hria la. Mak tak maiin, heta Paula Greek thumal hman hi “kut châng” sawina thumal aṭanga lâk a ni a. He thu hi Matthaia 26:67, 68-ah chuan a tak taka hman a ni a, 1 Korinth 4:11-ah erawh tehkhin neia hman a ni thung. Chûng Bible chângte chuan kuttum hmanga mite hnekna a kâwk a ni. Setana’n Jehova leh A mite a huat nasatzia kan ngaihtuah chuan, hlîngin kut thak hnawih nâna Paula a hman chu Diabola lâwm zâwng a ni tih kan hre chiang thei a ni. Tûn laiah pawh, chutiang bawka tisaa hlîngin min tihbuai hian Setana chu a lâwm hle a ni.
8 Chuvângin, Paula ang bawka chutiang hlîng tawrh dân chu kan hriat a ngai a. Kan nunna hi chutianga kan tih leh tih lohvah a innghat a ni. Jehova chuan hlîng ang harsatnate’n min tihhrehawm leh ngai tawh lohna hmun, a khawvêl thara chatuana kan nun chu a duh a ni tih hre reng ang che. Chu lâwmman ropui tak kan dawn theihna tûrin Pathian chuan a Thu thianghlim, Bible-ah chuan kan entawn atân a chhiahhlawh rinawmte’n tisaa hlîng hlawhtling taka an tawrh chhuah dân tam tak min pe a ni. Anni pawh keimahni ang bawka ṭha famkim lo leh mihring pângngai ve bawk an ni a. Hêng ‘chhûmpui nasa tak ang thlîrtute’ zînga ṭhenkhat chanchin zirna chuan “kan hmaa intlânsiakna tûr awmah hian chhel taka tlân zêl” tûrin min ṭanpui ang. (Hebrai 12:1, 2) Chhel taka an tawrhte ngaihtuahna chuan Setana’n min beih nâna a hman hlîng engpawh chu kan tuar chhuak thei a ni tih min rinnghehtîr thei a ni.
Mephibosetha Tihrehawmtu Hlîng
9, 10. (a) Engtin nge Mephibosetha chuan tisaa hlîng a lo pai? (b) Eng zahngaihna nge Lal Davida’n Mephibosetha hnênah a lantîr a, engtin nge Davida chu kan entawn theih ang?
9 Davida ṭhianpa Jonathana fapa Mephibosetha chungchâng thu hi han ngaihtuah teh. Kum nga mi lek a la nih laiin, a pa Jonathana leh a pu Lal Saula thih thu an hria a. Amah enkawltu chu a chîai ta hle mai a. “A pawm a, . . . tin, heti hi a ni a, tlân bo tûra a hmanhmawhna lamah a titla a, a ke a lo bai ta a.” (2 Samuela 4:4) Chu a rual ban lohna chu Mephibosetha tân chuan tawrh chhuah ngai hlîng ang a ni ngei ang.
10 Kum engemaw zât hnuah chuan Lal Davida chuan Jonathana a hmangaih êm avângin Mephibosetha chungah chuan zahngaihna a lantîr a. Davida chuan Saula ram zawng zawng chu a hnênah a pe kîrleh vek a, Saula chhiahhlawh Ziba chu a ram enkawl tûrin a ti bawk a. Chu bâkah, Davida chuan Mephibosetha hnênah chuan: “Ka dawhkânah chaw i kîl ve fo tawh ang,” tiin a hrilh a ni. (2 Samuela 9:6-10) Davida zahngaihna chuan Mephibosetha chu a thlamuanin, a rual ban lohna avânga a tawrhna chu a tinêp ngei ang tih a hriat theih a ni. Zir tûr ṭha a va ni em! Keini pawhin tisaa hlîng tuartute chungah chuan zahngaihna kan lantîr ve tûr a ni.
11. Ziba’n Mephibosetha chungchâng eng nge a sawi a, engtin nge a thusawi chu dâwt a ni tih kan hriat? (Footnote en rawh.)
11 Chu mi hnu chuan, Mephibosetha chuan tisaa hlîng dang a tuar leh a. A chhiahhlawh Ziba chuan a fapa, Absaloma hel avânga Jerusalem tlânchhiatsan mêk Lal Davida hnênah a sawichhia a ni. Ziba chuan Mephibosetha chu lalna chan tumin rinawm lo taka Jerusalema châmbâng ta angin a sawi a.a Chu Ziba dâwt sawi chu Davida chuan a âwih ta a, Mephibosetha ram zawng zawng chu chu dawhehpa hnênah chuan a pe ta vek a ni!—2 Samuela 16:1-4.
12. Engtin nge Mephibosetha’n a dinhmun a hmachhawn a, engtin nge kan tâna entawn tûr ṭha tak a nih?
12 Nimahsela, a tâwpa Mephibosetha’n Davida a hmuh leh chuan thil awm dân chu lal hnênah a hrilh ta vek a. Ani chu Davida hnêna kal ve tûrin a inpuahchah a. Mahse, Ziba chuan amah chu bumin a aiah a kal ta zâwk a lo ni a. Chu thil dik lo tak chu Davida chuan a tidik em? Engemaw chen chu a tidik ve a. Ram chu an hnênah a inzât vê vêin a insemtîr a ni. Tichuan, Mephibosetha tân tisaah hlîng dang ni thei tûr chu a lo lang leh a ni. A nih leh, Mephibosetha chu a lunghnual viau em? Davida thutâwp siam chu a dik lo tiin a phunnawi em? Phunnawi lo. Lal duh dân chu inngaitlâwm takin a pawm zâwk a. Thil ṭha lam chu ngaihtuah zâwkin, Israel lal dik tak chu him takin a lo kîr leh avângin a hlim hle zâwk a ni. Mephibosetha chuan rual ban lohna te, sawichhiatna te, leh lunghnualna te tuarchhuahna kawngah entawn tûr ṭha tak a siam a ni.—2 Samuela 19:24-30.
Nehemia’n A Hrehawmna A Tuar Chhuak
13, 14. Jerusalem kulh tungdingleh tûra Nehemia a rawn kîr khân eng hlîng nge a tuar ngai?
13 B.C.E. kum zabi panganaah khân Nehemia chu Jerusalem khawpui kulh sak lohvah a rawn kîr a; chu mi ṭuma entîr nei hlîng a tawrh chu han ngaihtuah teh. Khawpui chu chhantu nei miah lovin a awm tih a hmu a, chuta Juda mi kîrlehte lah chu an inkaihruai ṭha lo va, an beidawng a; tin, Jehova mithmuhah an thianghlim lo bawk a ni. Lal Artazerzia’n Jerusalem kulh chu tungdingleh tûrin thu pe mahse, a bul vêl ram awptute’n an duh lo hle tih Nehemia chuan a hre thuai a. Chûng ram awptute chu “Israela thlahte thawvenna ngaihtuah tûrin mi an lo kal zu nia tiin an lo lungni lo hle mai,” a ni.—Nehemia 2:10.
14 Chûng dodâltu hnam dang mite chuan Nehemia hnathawh chu tihtâwp tumin theihtâwp an chhuah a. Amah tilunghnual tûra enthlatu tirh te pawh tiamin an vauna te, dâwtsawi te, sawichhiatna te, leh tihṭhaihnate chu atân chuan tisaa hlîng pai reng ang a ni ngei ang. Chûng hmêlmate ngamthlêmnate chuan ani chu a hneh mai em? Teuh lo mai! Tha tiṭhum mai lovin, Pathian a rinchhan tlat a ni. A tâwpa Jerusalem kulh chu sak zawh a nih tâkah chuan, chu chuan Jehova’n hmangaih taka Nehemia a ṭanpuizia chu a târ lang ta a ni.—Nehemia 4:1-12; 6:1-19.
15. Juda hote zînga eng buainain nge Nehemia tilungngai êm êm?
15 Ram awptu a nih angin, Nehemia chuan Pathian mite zînga buaina tam tak pawh a hmachhawn a ngai a. Chûng buainate chuan Jehova leh mipuite inlaichînna a nghawng avângin, chûng chu mi tibuai thei tak hlîng ang mai a ni. Mi hausate chuan a pung tam tak ûmin sum an pûktîr a, an unau rethei zâwkte chuan an sum batte rulh nân leh Persia Lal hnêna chhiah chawi tûr an neih theih nân, an ram an chân a, an fate ngei pawh sala an hralh a ngai hial a ni. (Nehemia 5:1-10) Juda mi tam takte chuan Sabbath an bawhchhia a; Levia mite leh biak in chu an ṭanpui ta lo va. Chu bâkah, ṭhenkhat chuan ‘Asdod te, Amon te, leh Moab hmeichhiate nupuiah’ an nei bawk. Chûng chuan Nehemia rilru chu a va tina tak êm! Mahse, chûng hlîng engamah chuan ani chu a tâwptîr lo. Pathian dân felte vuantu ṭhahnemngai tak a nihzia chu a târ lang fo a ni. Nehemia ang bawkin, mi dangte rinawm lohna thiltih chu rinawm taka Jehova rawng kan bâwlna i tihtâwptîr ngai lo vang u.—Nehemia 13:10-13, 23-27.
Mi Rinawm Dang Tam Tak Pawhin An Tuar Chhuak
16-18. Engtin nge chhûngkaw buaina chuan Isaaka leh Rebeki te, Hani te, Davida te, leh Hosea te a tihlungngaih?
16 Bible-ah chuan hlîng pai ang maia dinhmun hrehawm tak tuartute entawn tûr siam dang tam tak a awm bawk a. Chutiang hlîng lo chhuahna bul tlânglâwn tak pakhat chu chhûngkaw harsatna a ni. Esauva nupui pahnihte chu Essauva nu leh pa “Isaaka leh Rebeki thinlung tiretheitute an ni.” Rebeki chuan Esauva nupuite avângin a nun pawh a ninzia a sawi hial a ni. (Genesis 26:34, 35; 27:46) Hani chanchin leh a ching avânga a pasala nupui dang Penini’n a “deusawh ṭhin” dân hi ngaihtuah bawk teh. Hani chuan he deusawhna hi in lamah pawh a tuar reng a nih a rinawm. Penini chuan Silo khuaa kût hmang tûra chhûngkuaa an kal lai pawhin Hani chu mi hriatah a deusawh bawk a; chhûngte leh ṭhiante hmaah pawh a ti ngei ang tih chu rinhlelh rual a ni lo. Chu chu Hani tisaa hlîngin thûk taka a chhun ang a ni ngei ang.—1 Samuela 1:4-7.
17 Davida’n a puzawn, Lal Saula thîkna âtthlâk tak a tawrh chhuah pawh hi han ngaihtuah bawk la. A nun humhim nân Davida chu lungpui khawkrawk hlauhawm tak tak kaltlangin En-gedi thlalêra pûkahte a tawm rûk a ngai a ni. Chu dik lo taka incheibâwlna chu a hrehawm ngei ang, Saula lakah thil ṭha lo engmah a ti si lo va. Chutichung chuan, Saula thîkna avângin Davida chu a kuma kum têl a tlânchiat reng a ngai a ni.—1 Samuela 24:14, 15; Thufingte 27:4.
18 Zâwlnei Hosea chu an chhûngkaw buainain a tihlungngaih tûrzia han ngaihtuah teh. A nupuiin a uiresan a. A nupui nungchang bawlhhlawhna chu a thinlunga hlîng chhun ang mai a ni ngei ang. Chu mai bâkah, mi dang laka fa pahnih a han hrin leh phei chuan a thinlung chu a va na dâwn tak êm!—Hosea 1:2-9.
19. Eng tihduhdahnain nge zâwlnei Mikaia chu a tihhrehawm?
19 Tisaa hlîng dang leh chu tihduhdahna a ni. Zâwlnei Mikaia thiltawn hi ngaihtuah teh. Zâwlnei derte hualvêla awm Lal suaksual Ahaba leh an dâwt sawi chiang takte Ahaba’n a âwih tlat laite a hmuhna chuan Mikaia thinlung fel tak chu a tihrehawm ngei ang. Tichuan, Mikaia’n chûng zâwlnei zawng zawngte chu ‘thlarau dawthei’ hmanga thusawi an ni tih a Ahaba a hrilh chuan, chûng dawhehte hruaitu chuan eng nge a tih? “Mikaia biangah a rawn bêng” a nih chu! Chûng aia chhe zâwk chu, Ahaba’n Ramoth-gilead beihna chu a hlawhtling dâwn lo tih Jehova vaukhânna a chhân lêt dân hi a ni. Ahaba chuan Mikaia chu lung ina khunga, chaw tlêm tê chauh pe tûrin thu a pe ta a ni. (1 Lalte 22:6, 9, 15-17, 23-28) Jeremia chungchâng leh amah tiduhdahtute cheibâwl dânte hi hre chhuak bawk ang che.—Jeremia 20:1-9.
20. Eng hlîng nge Naomi’n tawrh chhuah tûr a neih a, engtin nge a tawrh chhuah avânga lâwmman pêk a nih?
20 Hmangaihte thihnaa chân chu dinhmun lungngaih thlâk tak, tisaa hlîng dang ang a ni. Naomi chuan a pasal leh fapa pahnihte thihnaa chânna râpthlâk tak mai chu a tawrh chhuah a ngai a. Chûng vânduaina râpthlâk tak chu tuar chungin, Bethlehem-ah a kîrleh a. A ṭhiante hnênah chuan Naomi ti lova Maraii tia ko tûrin a ti a, chu hming chuan a thiltawn râpthlâkzia a târ lang a ni. Nimahsela, a tâwpah Jehova chuan tupa pein a chhelna chu lâwmman a pe a, chu a tupa pêk chu Messia thlahtute zînga mi a lo ni ta a.—Ruthi 1:3-5, 19-21; 4:13-17; Matthaia 1:1, 5.
21, 22. Engtin nge Joba’n thil a chân a, engtin nge a chhân lêt?
21 Joba’n a thil neih leh chhiahhlawh zawng zawngte bâkah, a fa duh tak sâwmte thâwklehkhata a chân thut avânga a tawrh dân tûr hi han ngaihtuah teh. Thâwklehkhatah a tân khawvêl a tâwp a ni ringawt alâwm! Tichuan, chûng thilte’n Joba chu a tihhrilhhai laiin Setana’n natna a tawrhtîr zui lehnghâl a. Joba chuan a natna chu a thihpui ngei a ring ngei ang. A na tawrh chu a nasat êm avângin, thihna chu a chhâwk zângkhaitu a nih a ring hial a ni.—Joba 1:13-20; 2:7, 8.
22 Chu mai pawh chu la duhtâwk lo ang hrimin, a nupui chuan lungngai leh hrehawm a tih êm avângin a rawn pan a: “Pathian chu sawichhia la, thi la a ni mai,” a rawn tihkhum leh bawk nên. A tisa hrehawm tak chhuntu hlîng a va ni êm! Chutah, Joba ṭhian pathumte chuan thlamuan ahnêkin, ngaihtuahna dik lo tak tak hmangin an rawn bei a, a thil sual tih rûk avânga chhiatna tâwkah an puh tlat pek a. An thusawi dik lo tak chuan a tisaa hlîng chu a vit thûk tial tial a ni. Joba chuan chu thil râpthlâk tak a tawh chhan chu a hre hauh lo va; a dam chhuak dâwn nge dâwn lo tih lah a hre hek lo. Mahse, “hêng zawng zawngah hian Joba chu a sual lo va, Pathian chu a mawhchhiat hek lo.” (Joba 1:22; 2:9, 10; 3:3; 14:13; 30:17) A rualin hlîng tam takin chhun mah se, a rinawmna chu a bânsan chuang lo. Min va tiphûr tak êm!
23. Mi rinawm kan sawi tâkte khân an tisaa hlîng chi hrang hrangte chu engvângin nge an tuar chhuah theih?
23 Hêng entîrna kan sawi tâkte hian entîrna dang tam tak a awm a ni tih a ti chiang hle. Bible-ah hian entîrna dang tam tak a la awm a ni. Hêng chhiahhlawh rinawm zawng zawngte hian entîr nei hlîng tawrh tûr an nei ṭheuh va. Tin, an harsatna tawhte chu a va han inang lo hlawm tak êm! Mahse, thil engemawah inanna an nei a ni. Tumahin Jehova rawngbâwlna an bânsan lo hi an inanna a ni. Fiahna nasa tak takte an tuar chung pawhin, Jehova chakna pêk rinchhanin Setana chu an hneh thei a ni. Engtin nge an hneh? A dawta thuziak chuan he zawhna hi a rawn chhâng ang a; tin, keini pawhin kan tisaa hlîng engpawh kan tawrh chhuah theih dân min hrilh bawk ang. (w02 2/15)
[Footnote]
a Chutiang thiltum chu lâwm nachâng hria leh mi inngaitlâwm tak Mephibosetha mizia a ni dâwn lo hrim hrim a. A pa, Jonathana’n rinawmna lama entawn tûr a siamte chu a hre ngei ang tih rinhlelh rual a ni lo. Lal Saula fapa mah ni se, Jonathana chuan Davida chu Israel lal tûra Jehova thlan a ni tih chu inngaitlâwm takin a pawm a ni. (1 Samuela 20:2: 12-17) Mephibosetha pa, Pathian ṭih mi leh Davida ṭhian rinawm a nih angin, Jonathana chuan a fapa chu lalna chuh tûrin a zirtîr hauh lo vang le.
Engtin Nge I Chhân Ang?
• Engvângin nge harsatna kan tawhte hi tisaa hlîng nên a tehkhin theih?
• Mephibosetha leh Nehemia te tawrh hlîng ṭhenkhat chu engte nge ni?
• Pathian Lehkha Thua tisaa hlîng chi hrang hrang tuar chhuaktute zîngah khawi ber hian nge i rilru khawih ber a, engvâng nge?
[Phêk 19-naa milemte]
Mephibosetha chuan rual ban lohna te, sawichhiatna te, leh lunghnualnate a tuar chhuah a ngai
[Phêk 20-naa milem]
Nehemia chu dodâlna a tâwk chung pawhin a beidawng lo