‘Tisaa Hlîng’ Tuar Chhuakin

“Ka khawngaihna i tân a tâwk e.”​—2 KORINTH 12:9.

1, 2. (a) Engvângin nge fiahna leh harsatnate kan tawh hunah mak kan tih loh vang? (b) Engvângin nge fiahna kan tawh hunah inrintâwkna kan neih theih?

“TUPAWH Krista Isuaa Pathian ngaihsaka awm tum apiang chuan tihduhdahnate an tuar bawk ang.” (2 Timothea 3:12) Engvângin nge? Setana’n mihringte hian mahni hmasialna avâng chuahvin Pathian rawng an bâwl a ni a ti tlat a, a thu sawi chu a dik tih lantîr a duh tlat vâng a ni. Ṭum khat chu Isua chuan a tirhkoh rinawmte chu: “Setanan buh thlei anga a thlei theihna tûr che uin, nangniho hi a dîl che u asin,” tiin a vaukhân a. (Luka 22:31) Harsatna nasa tak takte hmanga Setana min fiah chu Pathianin a phal a ni tih Isua chuan a hre chiang êm êm a ni. Chutiang a tih avângin, kan nuna harsatna kan tawh apiang hi Setana leh a ramhuaiho awmtîr a ni vek tihna erawh a ni lo. (Thuhriltu 9:11) Amaherawhchu, Setana chuan a thiltihtheihna engpawh chu kan rinawmna tihchhiat nân a hmang châk zek zek a ni.

² Bible chuan fiahna kan tawhte hi mak kan ti tûr a ni lo tih min hrilh a. Kan tawh apiang hi thil mak a ni lo va, beisei loh thil pawh a ni hek lo. (1 Petera 4:12) ‘Kan unau khawvêla awmhote chungah chuan chutiang tuarna chu a thleng ve a ni.’ (1 Petera 5:9) Tûn laiah, Setana chuan Pathian chhiahhlawh tinte chungah chuan nêksâwrna nasa tak a awmtîr a. Diabola chuan a theih anga tam hlîng ang buainain min nghaisak vêl lai hmuh chu nuam a ti hle a. Chutianga a tih theih nân, a khawvêl thilte chu ‘kan tisaa hlîng’ tipung tûr emaw, tizual tûr emawin a hmang a ni. (2 Korinth 12:7) Nimahsela, Setana min beihna chuan kan rinawmna a tichhe tûr a ni lo. Thlêmna kan tawrh theihna tûra Jehova’n “tlân chhuahna kawng a siam” ang bawk khân, min tibuai thei kan tisaa hlîng ata pawh tlân chhuahna a siam ngei ang.​—1 Korinth 10:13.

Hlîng Tawrh Chhuah Dân

3. Paula’n a tisaa hlîng paih bo tûra a ngen khân, Jehova’n engtin nge a chhân lêt?

³ Tirhkoh Paula chuan a tisaa hlîng chu paih bo tûrin Pathian a ngên a. “Chu mi chungchâng thuah chuan mi kiansan theih nân Lalpa chu vawi thum ka dîl a,” a ti. Paula ngenna chu Jehova’n engtin nge a chhân? “Ka khawngaihna i tân a tâwk e; ka thiltihtheihna hi chak lohnaah asin tihfamkimin a awm ni,” tiin a chhâng a ni. (2 Korinth 12:​8, 9) He a chhânna hi ngaihtuah chiangin, hlîng anga min chhuntu apiangte tuar chhuak thei tûra min ṭanpui theih dân i lo en ang u.

4. Eng kawngin nge Paula chuan Jehova khawngaihna a hlâwkpui?

⁴ Pathian chuan Paula chu Krista hmanga khawngaihna a lantîr chunga lâwm tûrin a fuih a ni tih hria la. Paula chu kawng tam takin nasa taka mal sâwm a ni a. Isua hnungzuitute nasa taka dodâltu ni ṭhîn mah se, Jehova chuan hmangaih takin zirtîr nihna chanvo hlu chu a pe a ni. (Tirhkohte 7:58; 8:3; 9:​1-4) Chu mi hnuah Jehova chuan Paula chu chanvo ropui tam tak dang a pêk belh bawk a ni. Kan zir tûr chu a chiang ta hle mai. Dinhmun chhe ber hnuaiah pawh lâwmna tûr chhan malsâwmna tam tak kan dawng a ni tih hi. Chûng Jehova ṭhatna zozaite chu fiahna kan tawnte hian min theihnghilhtîr ngai suh se.​—Sâm 31:19.

5, 6. (a) Engtin nge Jehova’n Paula chu Pathian thiltihtheihna chu ‘chak lohnaah tihfamkimin a awm’ tih a zirtîr? (b) Engtin nge Paula entawn tûr siam chuan Setana chu dawheh a ni tih a târ lan?

⁵ Jehova khawngaihna chu kawng dangah pawh a ṭha tâwk hle a. Pathian thiltihtheihna chu fiahna kan tawhte tuar chhuak tûra min ṭanpui tûrin a tâwk mai piah lam a ni. (Ephesi 3:20) Jehova chuan Pathian thiltihtheihna chu ‘chak lohnaah tihfamkimin a awm a ni,’ tih a zirtîr a ni. Engtin nge a zirtîr? Fiahna a tawhte tuar chhuak thei tûra a mamawh chakna chu hmangaih takin a pe a ni. Tichuan, Paula chhelna leh Jehova a rinchhanna pum hlûm chuan Pathian thiltihtheihnain, he mi chak lo leh sual chungah hnehna a pe a ni tih Kristian zawng zawngte hnênah a târ lang a ni. Tûnah chuan, mihringte hian an nuna buaina leh harsatna an neih loh lai chauhvin Pathian rawng an bâwl titu Diabola a ngawng dân han ngaihtuah teh. Paula rinawmna chuan sawichhetu hmaiah a bêng a tih theih a ni!

⁶ Paula chu tûn hmaa Pathian dodâlna kawnga Setana ṭanpuitu ni ṭhîn, Kristiante nasa taka tiduhdahtu, Pharisai ruh tak, mi lian chhûngkuaa piang a nih avânga nuamsa taka khawsa ṭhîn a ni a. Tûnah chuan “tirhkoh zînga tê ber,” angin Jehova leh Krista rawng a bâwl ta a ni. (1 Korinth 15:9) Chutiang a nih angin, kum zabi pakhatnaa Kristian governing body thuneihna hnuaiah inngaitlâwm takin a intulût a ni. Tin, tisaa hlîng pai reng chung pawhin rinawm takin a tuar chhuak bawk. Nuna fiahna a tawhte chuan Paula ṭhahnemngaihna chu a tikiam chuang lo va, chu chuan Setana a tilunghnual hle a ni. Paula chuan Krista van lam Lalramah chuan chan a nei ve dâwn tih a beiseina chu a theihnghilh ngai lo. (2 Timothea 2:12; 4:18) Eng ang pawhin na mah se, eng hlîng mahin a ṭhahnemngaihna chu a tikiam lo rêng rêng a ni. Kan ṭhahnemngaihna pawh chutiang bawk chuan chak zui zêl rawh se! Fiahna kan tawh laia min enkawl zêlin, Jehova chuan Setana chu dawheh a ni tih tihchianna chanvo hlu tak min pein, min chawimawi a ni.​—Thufingte 27:11.

Jehova Châwmna A Pawimawh

7, 8. (a) Eng hmangin nge Jehova’n tûn laia a chhiahhlawhte a tihchak? (b) Engvângin nge nî tina Bible chhiar leh zir chu kan tisaa hlîng tawrh chhuah nân a pawimawh êm êm?

⁷ Tûn laiah, Jehova chuan a Kristian rinawmte chu a thlarau thianghlim, a Thu, leh kan Kristian inunauna hmangin a tichak a. Tirhkoh Paula angin, kan phurrit chu Jehova hnênah ṭawngṭaiin kan nghat thei a ni. (Sâm 55:22) Pathian chuan fiahna kan tawhte chu tibo kher lo mah se, fiahna nasa tak, tawrh har takte pawh tuar chhuak thei tûrin finna min pe thei a. Chu bâkah, Jehova chuan chhel nâna kan mamawh chakna​—“thiltihtheihna nasa tak”​—min pe thei bawk a ni.​—2 Korinth 4:7.

⁸ Engtin nge chutiang ṭanpuina chu kan dawn? Taima takin Pathian Thu kan zir tûr a ni, chutah chuan a mi thlamuanna chu kan hmuh dâwn avângin. (Sâm 94:19) Bible-ah chuan Pathian chhiahhlawhte’n A ṭanpuina an dîlna ṭawngkam rilru khawih tak takte kan chhiar a ni. Jehova chhânlêtna ṭawngkam thlamuan thlâk tak takte chu ngaihtuah reng atân a ṭha hle. Zirna chuan “thiltihtheihna nasatzia chu keimahni hnêna mi ni lovin, Pathian ta a nih theih zâwkna tûrin” min thuam dâwn a ni. Hrisêl nân leh chak nâna nî tina chaw ei a ngai ang hian, Pathian thu pawh nî tin kan ei tûr a ni a, chu mi hmang chuan kan inchâwm reng tûr a ni. Chutiang chuan kan ti em? Kan tih chuan, “thiltihtheihna nasa tak” kan dawn chuan min tihrehawmtu entîr nei hlîng kan pai eng pawh chu tuar chhuak tûrin min ṭanpui a ni tih kan hmu ang.

9. Engtin nge upate’n harsatna neite an ṭanpui theih?

⁹ Pathian ṭih mi Kristian upate chu manganna “thlipui laka bîkna hmun” leh harsatna “thlihrâng laka inhumhimna” an ni thei a ni. He Pathian thâwk khum thuin a sawi ang ni duhtu upate chuan thu dik tak hmanga hrehawm tuarte chhân dân an hriat theih nân “zirtîrte lei” pe tûrin Jehova hnênah inngaitlâwm tak leh tih tak zetin an dîl a ni. Upate ṭawngkam chhuak chuan ruahtla ser ser ang maiin harsatna kan tawh laiin kan rilru a tihahdam a, a thlamuan thei a ni. ‘Rilru tête fuihin’ upate chuan an thlarau lam unaupa leh unaunu, tisaa hlîng an pai avânga rilru hrehmawm leh lungngaite chu an ṭanpui thei a ni.​—Isaia 32:2; 50:4; 1 Thessalonika 5:14.

10, 11. Engtin nge Pathian chhiahhlawhte chuan fiahna nasa tak tâwkte an fuih theih?

¹⁰ Jehova chhiahhlawh zawng zawngte chu a Kristian chhûngkaw inpumkhat zînga mi kan ni vek a. “A mal malin inpêng tawn ṭheuh” kan ni a, “inhmangaih tawn ṭheuh tûr” kan ni. (Rom 12:5; 1 Johana 4:11) Chu chu engtin nge kan tihfamkim? 1 Petera 3:​8 sawi angin, chutiang chu kan rinpuite chunga ‘inlainat tawnna, unau anga inhmangaihna, khawngaihna,’ lantîrna hmangin kan ti a ni. Tisaa hlîng engemaw bîk tuarte chu naupang emaw, puitling emaw pawh an ni thei a; chûng mite chu kan za hian kan ngaihsak thei vek a ni. Engtin nge kan ngaihsak theih?

¹¹ An tawrhna chu hriatthiampui kan tum tûr a ni. Mite tuarpui thei lo, ngaihsak lo, a nih loh leh khawngaih lo kan nih chuan, an hrehawm tawrh chu kan tizual zâwk mah thei a ni. An fiahna tawhte kan hriatpuina chuan an hnêna kan thusawiah te, kan sawi dânah te, leh kan chêt dânah te fîmkhur tûrin min chêttîr tûr a ni. Beisei bova kan awm lohna leh kan fuihna te chuan an hlîng chhunna na tak chu a tiziaawm thei a. Chuti chuan anmahni tichak a, thlamuantu kan lo ni ang.​—Kolossa 4:11.

Ṭhenkhatte’n Hlawhling Taka An Tawrh Chhuah Dân

12-14. (a) Kristian pakhatin a cancer natna neih chu tuar chhuak tûrin eng nge a tih? (b) Engtin nge a thlarau lam unaupa leh unaunute’n an ṭanpui a, an fuih?

¹² He ni hnuhnûng tâwpna kan hnaih deuh deuh hian, ‘nau veina’ chu nî tin a pung deuh deuh va. (Matthaia 24:8) Chuvângin, fiahna chuan leia mi rêng rêng a fan vek dâwn; a bîk takin, Jehova chhiahhlawh rinawm, a duhzâwng tih tumtute hi a tihrehawm lehzual dâwn a ni. Entîr nân, hun bikima rawng bâwl Kristian pakhat chungchâng hi lo ngaihtuah ta ila. Ani chu cancer vei a ni a, a chil bâwm leh a ṭhalbe chu zai chhuah a ngai a. Amah leh a pasalin a natna vei an hriat veleh rei tak chhûng ṭawngtaiin Jehova an ngên nghâl a ni. A hnua a sawi dânin, rin phâk loh thlamuanna an nei a. Chuti chung pawh chuan, a bîk takin an enkawlna damdawiin side effect a neih laiin, hun khirh tak tak a tawng tho a ni.

¹³ A dinhmun a hmachhawn theih nân, unaunu chuan cancer chanchin a theih anga tam a zir a. Amah enkawltu Doctor-te a râwn bawk a. Vênnainsâng, Awake!, leh Kristian thu leh hla chhuah dangahte chuan, mi dangin a natna ang an tawrh chhuah dân te a hmu a. Tin, a mite an harsat laia ṭanpui tûra Jehova thiltihtheihna lantîr Bible châng inâwm tak takte leh thu ṭangkai dang dangte pawh a hmu bawk a ni.

¹⁴ Lungngaihna tawrh chhuah dân chungchânga thuziak pakhat chuan he thu fing tak: “Mi inkulh hrang mi chuan mahni duhzâwng a zawng ṭhîn a,” tih hi a ziak chhuak a. (Thufingte 18:1) Tichuan, thuziak chuan: “Inkulh hrang suh,” tih thurâwn hi a pe nghâl a ni.a Unaunu chuan: “Mi tam takin ka tân an ṭawngṭai thu min hrilh a; a ṭhenin min phone bawk a. Upa pahnihin ka dinhmun hre tûrin min phone reng bawk a. Pangpâr leh card tam tak kan dawng a. Ṭhenkhat phei chuan chaw min pe hial a ni. Chumai bâkah, mi tam takin ka inenkawlna hmunah min hruai ṭhîn a ni,” a ti.

15-17. (a) Engtin nge Kristian pakhat chuan motor chêtsualna avânga a harsatna neihte a tawrh chhuah? (b) Kohhrana mite’n eng ṭanpuina nge an pêk?

¹⁵ New Mexico, U.S.A. rama kum rei tak chhûng Jehova chhiahhlawh lo ni tawh unaunu pakhat chu motor insutnaah a tel a. A nghâwng leh a kokîah hliam tuarin, chu chuan kum 25 chuang ruhseh natna a tawrh chu a tizual hle a ni. Hetiang hian a sawi: “Ka lu lek kân har ka ti êm êm a, kilogram hnih aia rit rêng rêng chawi har ka ti bawk. Mahse, Jehova hnêna ṭawngṭai fan fanna chuan min ṭanpui nasa hle a ni. Vênnainsâng kan zirte pawhin min ṭanpui bawk. Thuziak pakhat chuan Mika 6:8 chungchâng sawiin Pathian nêna thuhnuairawlh taka lên dun tih awmzia chu mahni tlintâwk inhriat hi a ni a ti a. Chu chuan ka dinhmun avângin ka duh angin rawngbâwlnaah tel tam thei loh mah ila, lunghnual tûr ka ni lo tih min hriat thiamtîr a ni. Rilru dik taka a rawng bâwl hi thil pawimawh ber a ni,” tiin.

¹⁶ Heti hian a sawi belh bawk: “Upate chuan ka inkhâwm hrâm hrâm avâng te, thlawhhma rawngbâwlnaa ka tel hrâm hrâm avângte hian min fak reng a. Ṭhalaite chuan min kuahin, min chibai a. Pioneer rawngbâwltute lah ka lakah an dawhthei êm êm a, ka ṭhat loh zual nî chuan an hun duan an siam danglam fo a ni. Khua a nawm loh deuh nî lahin, an thlawhkîrnaah leh an Bible zirpuinaah min hruai ve ṭhîn a. Chu bâkah, lehkhabu dahna iptê ka ken theih loh avângin, thuhrilha ka chhuah apiangin thuchhuahtu dangte chuan ka lehkhabu chu an iptêah min ahsak ṭhîn a ni,” tiin.

¹⁷ Kohhran upate leh an rinpuite’n hêng unaunu pahnihte hi an dam lohna hlîngte tuar chhuak tûra an ṭanpui dân hi chhinchhiah teh. An thlarau lam, tisa lam, leh rilru lam mamawh bîkte phuhrûk theih nân ṭanpuina ṭangkai tak leh ṭha tak an pe a ni. Chu chuan unau dang harsatna neite ṭanpui tûrin a chêttîr che a ni lâwm ni? Nangni ṭhalaite pawh in kohhrana tisaa hlîng paite ṭanpuitu in ni thei a ni.​—Thufingte 20:29.

18. Vênnainsâng leh Awake! magazine-tea tih chhuah mi mal nun kawng chanchinahte chuan min tichak thei tak fuihna eng nge kan hmuh theih?

¹⁸ Vênnainsâng leh Awake! magazine-te chuan tisaa hlîng tuar chhuak tawh te leh tuar mêk Thuhretu tam takte nun kawng chanchin a ziak lang ṭhîn a. Chutiang thuziakte i chhiar ziah chuan, khawvêl pumpuia thlarau lama in unaute’n ei leh bar lama harsatna te, leilung chhiatna avânga hmangaihte chânna te, leh indona hlauhawm tak te an tawrh dân i hria ang. Mi dangte chu natna khirh tak tuarin an awm mêk a. Mi hrisêlte’n an ngaihhlut lêm loh thil ho tê tête pawh mi tam tak chuan an ti thei lo. An hrisêl lohna chuan anmahniah fiahna nasa tak a siam a, a bîk takin, Kristian rawngbâwlnaa an duh anga an tel theih lohvin a siam zual a ni. An unau a hmei a pa, a pui a pangte’n ṭanpuina an pêk avângin an va lâwm tak êm!

Chhelnain Hlimna A Thlen

19. Engvângin nge Paula chu fiahna hlîng leh chak lohna nei chung pawha a lâwm theih?

¹⁹ Pathian tihchak dân a hmuhin Paula chu a hlim hle a: “Krista thiltihtheihna chu ka chunga a awm theih nân lâwm êm êmin ka chak lohnate hi ka chhuang tawh zâwk ang. Chuvângin Krista avângin chak lohnaahte, chhiatnaahte, nêksawrnaahte, tihduhdahnaahte, hnawhchêpnaahte ka lâwm ṭhîn a ni; ka chak loh apiangin a ni ka chak ṭhin ni,” a ti. (2 Korinth 12:​9, 10) Paula chuan ama thiltawn avângin: “Ka tlâkchham thu sawi zawng ka ni lo ve; kei zawng eng ang pawhin awm mah ila, lungawi zêl ka chîng tawh si a. Tlâwm taka awm dân ka thiam a, hausaa awm dân pawh ka thiam bawk a; thil tinrêngah leh thil zawng zawngah tlai leh rilṭâma awm dân, hausa leh thlachhama awm dân thurûk chu ka hre chhuak tawh. Mi tichaktuah chuan engkim ka ti thei a ni,” tiin inringtâwk takin a sawi thei a ni.​—Philippi 4:​11-13.

20, 21. (a) Engvângin nge “thil hmuh theih lohte” ngaihtuahna aṭangin hlimna kan hmuh theih? (b) Lei Paradis-a hmuh i inbeisei “thil hmuh theih lohte” zînga ṭhenkhat chu engte nge ni?

²⁰ Chuvângin, kan tisaa hlîng engpawh chu tuarchhuahna hmangin Jehova thiltihtheihna chu kan chak lohnaah tihfamkimin a awm a ni tih mi tin hnêna lantîrna kawngah hlimna nasa tak kan hmu thei a ni. Paula chuan tihian a ziak a: “Kan dawl [tlâwm] lo va, . . . kan chhûng lam mihring chu ni tin siam thar zêlin a awm zâwk a ni. Kan hrehawm nêp tak, tûn mit khap kâr chhûng chauhva awm tûr hian ropuina nasa tak chatuan atân min siamsak nasa tulh tulh a ni; . . . thil hmuh theih lohte chu kan en zâwk si a; . . . thil hmuh theih lohte erawh chu chatuan atân a ni si a,” tiin.​—2 Korinth 4:​16-18.

²¹ Tûn laia Jehova mi a tam zâwkte chuan lei Paradis-a a thuthiam malsâwmnate dawn chu an inbeisei a. Chutiang malsâwmnate chu “hmuh theih lohte” tia sawi theih a ni. Nimahsela, chûng malsâwmnate kan mit ngeia kan hmuh a, chatuana kan chen hun tûr chu a lo thleng ṭêp tawh a ni. Chutiang malsâwmna zînga pakhat chu harsatna hlîng engmah pai tawh ngai loh hi a ni! Pathian Fapa chuan ‘diabola hnathawhte a tiboral’ anga, ‘thihna thuneitu a tiboral’ bawk ang.​—1 Johana 3:8; Hebrai 2:14.

22. Eng rintâwkna leh tumruhna nge kan neih tûr?

²² Chuvângin, tûn laiah kan tisaah eng hlîng pawhin min tina mah se, i tuar hrâm hrâm zêl ang u. Paula angin, phal taka thiltihtheihna min petu, Jehova ṭhatna zârah tuar zêl tûrin chakna kan nei ang. Lei Paradis-a kan chên hunah chuan kan Pathian Jehova chu kan tâna thil mak a tih zawng zawngte avângin nî tin kan chawimawi tawh ang.​—Sâm 103:2. (w02 2/15)

[Footnote]

Engtin Nge I Chhân Ang?

• Engtin nge Diabola chuan Kristian dikte rinawmna chu tihchhiat a tum a, engvângin nge?

• Engtin nge Jehova thiltihthiehna chu “chak lohnaa tihfamkim” a nih?

• Engtin nge upate leh mi dangte’n harsatna neite an fuih theih?

[Phêk 24-naa milem]

Paula chuan a tisaa hlîng la bo tûrin Pathian hnênah vawithum lai a ṭawngṭai