“Ngai Teh U, Hei Hi Kan Pathian A Nih Hi”
He thuziak pahniha thute hi, kum 2002/03 district inkhâwmpuite neih laia tlângzarh lehkhabu thar, Draw Close to Jehovah, aṭanga lâk chhuah a ni.—Phêk 8-naa, “Ka Thinlunga Hmunruak A Hnawhkhat,” tih thuziak en rawh.
“Ngai teh u, hei hi kan Pathian a nih hi; ani hi kan nghâk reng a, tichuan min chhandam ang: hei hi LALPA chu a nih hi.”—ISAIA 25:9.
1, 2. (a) Engtin nge Jehova’n thlahtu Abrahama chu a koh va, chu chuan eng nge min ngaihtuahtîr mai theih? (b) Engtin nge Bible-in Pathian nêna inṭhian ṭhat chu kan neih theih thil a ni tih a sawi?
“KA ṬHIAN.” Hei hi lei leh vân Siamtu, Jehova’n thlahtu Abrahama a koh dân a ni. (Isaia 41:8) Ngaihtuah teh—mihring satliah mai hi lei leh vâna Lal Chungnungbera nêna han inṭhian tâk mai chu! ‘Ka tân chutianga Pathian hnaih chu a theih ang em le?’ i ti mai thei.
2 Bible chuan Pathian nêna inṭhianna chu kan neih theih thil a ni tih min hrilh a. Abrahama chuan “Pathian a ring a,” chuvângin chutianga inṭhianna chu pêk a ni. (Jakoba 2:23) Tûn laiah pawh, Jehova chuan “mi ṭha famkim erawh chu a ṭhian a ni.” (Thufingte 3:32) Jakoba 4:8-ah Bible chuan: “Pathian hnaih rawh u, tichuan anin a hnaih ang che u,” tiin min fuih a. Jehova hnaih tûra hma kan lâk chuan ani’n min chhâng lêt ang. A ni, min hnaih ngei ngei ang. Mahse, he thâwk khum thute chuan keini—mi sual leh ṭha famkim lote—hian hma kan la hmasa a tihna a ni em? Ni lo ve. Jehova nêna inṭhianna chu min hmangaihtu kan Pathianin rahbi pawimawh tak pahniha hma a lâk vânga lo awm thei chauh a ni.
3. Jehova chuan kan inṭhian theih nân eng kawng chi hnihin nge hma a lâk?
3 A hmasain, Jehova chuan Isua chu ‘mi tam tak tlan nâna a nun pe tûrin’ a ruahman a. (Matthaia 20:28) Chu tlanna inthawina chuan kan tân Pathian chu hnaih theihin a siam a ni. Bible chuan: “Amahin min hmangaih hmasak avângin kan hmangaih a ni,” a ti. (1 Johana 4:19) A ni, Pathianin “min hmangaih hmasak” avângin, a ṭhian kan nih theih nâna mamawh lungphûm chu a lo phûm a ni. A pahnihnaah, Jehova chuan a chanchin min hriattîr a ni. Ṭhian kan siam rêng rêngin, chu inṭhianna chu inhriat chianna, leh ama mize bîkte ngaihsânna leh ngaihhlutnaah a innghat a. Hei hi ngaihtuah rawh. Jehova chu Pathian hriat chian theih loh leh inthup tlat a nih chuan, amah chu kan hnaih thei ngai lo vang. Mahse, inthup ahnêkin, Jehova chuan amah hriaah min duh a ni. (Isaia 45:19) A Thu, Bible-ah chuan, ani chu kan hriatthiam theih tûr zâwngin a insawi a ni—min hmangaihzia finfiahna mai ni lovin, kan Pa vâna mi anga amah kan hriata kan hmangaih a duhziate pawh.
4. Jehova miziate kan hriatthiam lehzual hian a chungchângah eng ngaih dân nge kan neih dâwn?
4 Naupangin a pa kâwk chunga hlim tak leh chhuang taka, “Saw saw ka pa a nih saw,” a ti lai i hmu tawh ngai em? Pathian betute chuan chutianga Jehova chhuan chhan tûr tam tak an nei a ni. Bible chuan mi rinawm zawng zawngin: “Ngai teh u, hei hi kan Pathian a nih hi,” an tih hun a lo thleng dâwn tih a sawi lâwk a. (Isaia 25:8, 9) Jehova miziate kan hriatthiam tam poh leh duh thusâma Pa ṭha leh Ṭhian ṭha ber nei niin kan inhre ting mai dâwn a. Jehova miziate hriatthiamna chuan amah hnaih lehzualna tûr chhan min pe dâwn a ni. Chuvângin, Bible-in Jehova mize pawimawh ber—thiltihtheihna, rorêl dikna, finna, leh hmangaihna—te a târ lan dân chu i lo bihchiang ang u. He thuziakah hian a hmasa pathumte kan sawiho vang.
‘Thiltihtheihnaah A Ropui’
5. Engvângin nge Jehova chauh hi “Engkimtithei” tia koh tlâk a nih a, eng kawngin nge a thiltihtheihna nasa tak chu a hman?
5 Jehova chu ‘thiltihtheihnaah a ropui’ a ni. (Joba 37:23) Jeremia 10:6 chuan: “Aw LALPA, nang ang tumah an awm lo ve, i ropui a, i hming chaknain a thang lian e,” a ti. Thil siam dangte ang lo takin, Jehova chuan thiltihtheihna chintâwk awm lo a nei tlat a. Chu mi avângin, amah chauh chu “Engkimtithei” tia koh a ni. (Thu Puan 15:3) Jehova chuan a thiltihtheihna nasa tak chu thil siam nân, tih chhiat nân, humhim nân, leh siam ṭhat nân a hmang a. Entîrna pahnih lek lo en ta ila—a thil siam theihna leh humhim theihna târ langtu chu.
6, 7. Nî chu eng ang taka thiltithei nge a nih a, chu chuan thu dik pawimawh tak eng nge a finfiah?
6 Nipui laia pâwna i din hian engtin nge i awm? Ni sa chu i dawng a ni. A nihna takah chuan, thil siam kawnga Jehova thiltihtheihna i dawng a ni. Ni chu eng ang taka thiltithei nge ni? A laimu satzâwng chu maktaduai 15 degree Celsius vêl a ni a. Chu a laimu chu hriau hmâwr tiat lek la chhuak a, leilung khawi emaw laia i dah theih chuan, chu thil sa tereuh tê aṭanga kilometer 140-a hlaah pawh him takin i awm thei lo vang! Second tin maiin, ni hian nuclear bomb maktaduai za têl puak keh chakna ang vêl chu a tichhuak reng a ni. Mahse, leilung hian chu nuclear meipui chu a hlatzâwng âwmtâwk takah a hêl a. Hnaih lutuk se chuan, leia tui zawng zawng hi tui hu-ah a chang zo vek ang; a inhlat lutuk erawh chuan a khal vek thung ang. A lutuk ve ve chuan kan leilung hi nunna awm theih lohnaah a siam ang.
7 An nun ngei chu nîah innghat mah se, mi tam tak chuan ni hnathawh dân chu an ngaihtuah ngai lo va. Chuvângin, nîin min zirtîr theih chu an hmuh hmaih a ni. Sâm 74:16 chuan Jehova chungchângah: “Nangin êntu . . . nî khi i buatsaih a,” a ti. A ni, nî chuan, “lei te, vân te . . . siamtu” Jehova chu a chawimawi a ni. (Sâm 146:6) Chutiang a ni chung pawhin, nî chu Jehova thiltihtheihna nasa tak min zirtîrtu thil siam tam tak zînga pakhat mai chauh a ni a. Thil siam lama Jehova thiltihtheihna kan zir tam poh leh, amah kan zahna chu a thûk ting mai a ni.
8, 9. (a) Tehkhin thu duhawm tak eng hian nge Jehova’n amah betute humhim leh enkawl a duhzia târ lang? (b) Bible hun laia berâm vêngtu chuan a berâmte engtin nge a enkawl a, chu chuan Berâm Vêngtu Ropuia chanchin eng nge min zirtîr?
8 Jehova chuan a thiltihtheihna nasa tak chu a chhiahhlawhte ngaihsak nân leh humhim nân a hmang bawk a. Bible chuan Jehova humhimna tiamte sawifiah nân tehkhin thu nung tak leh rilru khawih tak tak a hmang a ni. Entîr nân, Isaia 40:11 en ta ila. Chutah chuan Jehova chu berâm vêngtu angin a intehkhin a, a mite chu berâm angin a tehkhin thung a ni. Heti hian kan chhiar: “Ani chuan berâm vêngtu angin a pâwl chu a châwm ang a, berâm note chu a bânin a pawm khâwm ang a, a ângchhûnga dahin a kalpui ang a, no hruai laite chu zawi têin a hruai dial dial ang,” tiin. Thil awm dân tûr chu i mitthla thiam em?
9 Ina ran khawite zîngah berâm anga ṭanpui ngai a awm mang lo va. Bible hun laia berâm vêngtute chu chinghniate, savawmte, leh sakeibakneite lak aṭanga a berâmte vênghim tûrin a huaisen tâwk a ngai a ni. (1 Samuela 17:34-36; Johana 10:10-13) Mahse, berâmte humhim leh enkawlna kawngah dimdawih a ngaih hun a awm. Entîr nân, berâmin a rual zîng aṭanga hmun hla taka notê a neih hian, engtin nge berâm vêngtu chuan berâm notê chu a vênhim ang? Ani chuan ni engemaw zât chhûng chu “a ângchhûnga” dahin a paw mai thei a ni—a kâwr chung thâwl takah dahin. Mahse, engtin nge berâm notê chu berâm vêngtu ângchhûnga a lo awm theih? Berâm notê chuan berâm vêngtu chu panin, a kête dîm têin a va nâwk a ni thei. Amaherawhchu, kûn a, va ban a, chawi kâng a, hmun him lai a ângchhûnga dahtu chu berâm vêngtu a ni. Berâm Vêngtu Ropuiin a chhiahhlawhte humhim a, enkawl a duhzia târ langtu tehkhin thu duhawm tak a va ni êm!
10. Tûn laiah eng ang humhimna nge Jehova’n min pêk a, engvângin nge chutiang humhimna chu a pawimawh bîk?
10 Jehova chuan humhimna min tiam mai bâka tam a thawk a. Ani chuan mak danglam takin ‘amah ngaihsaktute chu thlêmna ata a chhan chhuah’ theihzia Bible hun lai khân a lo târ lang tawh a ni. (2 Petera 2:9) Tûn laiah eng nge ni ve le? Tûn lai hian chhiatna zawng zawng ata min humhim nân a thiltihtheihna chu a hmang tawh lo tih kan hria a. Nimahsela, chu aia pawimawh zâwk—thlarau lam humhimna—chu min pe thung a ni. Hmangaihnaa khat kan Pathian chuan thlêmna tawrh theih nân leh amah nêna kan inlaichînna vawn reng theih nâna min thuamin, thlarau lam chhiatna ata min humhim a ni. Entîr nân, Luka 11:13 chuan: “Nangni mi sual mahin in fate thil ṭha pêk nachâng in hriat chuan, in Pa vâna mi chuan a dîltute chu thlarau thianghlim a va pe dâwn êm!” a ti. Chu thiltithei tak chakna, thlarau thianghlim chuan thlêmna emaw, harsatna emaw kan tawhte tiveng thei tûrin min thuam thei a ni. (2 Korinth 4:7) Chuvângin, Jehova chuan rei lo te chhûng atân ni lovin, chatuan atâna kan nun humhim tûrin hna a thawk a ni. Chu beiseina chu rilrua vawng rengin, he khawvêla kan thil tawrh rêng rêng chu “nêp tak, tûn mit khap kâr chhûng chauhva awm tûr” angin kan thlîr ang. (2 Korinth 4:17) Kan tâna a thiltihtheihna hmangtu Pathian lama hîpin kan awm a ni lâwm ni?
“LALPA Chuan Rorêlna Fel A Ngaina”
11, 12. (a) Engvângin nge Jehova rorêl dikna chuan a lamah min hîp? (b) Jehova rorêl dikna chungchângah Davida chuan eng thutâwp nge a siam a, engtin nge he thâwk khum thute hian min thlamuan theih?
11 Jehova chuan fel takin thil a ti a, duhsak bîk nei lovin a ti reng a ni. Pathian rorêl dikna chu, khawngaihna nei lova min hnartu nunrâwng tak a ni lo, Jehova lama min hîptu mize duhawm tak a ni zâwk. Bible chuan he mize nihphung duhawm tak chu chiang takin a sawi a ni. Chuti chuan, Jehova’n a rorêl dikna a hman dân kawng chi thum i lo ngaihtuah ang u.
12 A hmasa berin, Jehova rorêl dikna chuan a chhiahhlawhte chungah rinawmna leh rinawm nghehna lantîr tûrin a tur a. Fakna hla phuahtu Davida chuan he Jehova rorêl dikna hmêlhmang chu amah ngeiin a lo tawng a ni. A thiltawn aṭangin leh Pathian kawngte a zirna aṭangin, Davida chuan eng thutâwp nge a siam? Heti hian a puang: “LALPA chuan rorêlna fel a ngaina si a, a mi thianghlimte chu a kalsan ngai lo; kumkhua atân vawn ṭhatin an awm a,” tiin. (Sâm 37:28) Min thlamuantu intiamkamna a va ni êm! Kan Pathian chuan a mi thianghlimte chu englai mahin a kalsan ngai lo rêng rêng a. Chuvângin, min ṭhianna leh min enkawlnaah kan innghat tlat thei a ni. A rorêlna dik chuan min tiam tlat si a.—Thufingte 2:7, 8.
13. Israelte hnêna Dân pêkah hian engtin nge Jehova’n mi chanhaite a veizia a lan?
13 A pahnihnaah, Pathian rorêl dikna chuan mi retheite mamawh a ngaihven a. Jehova’n mi chanhaite a veizia chu Israelte hnêna a Dân pêkah hian a lang a ni. Entîr nân, Dân thu chuan fahrahte leh hmeithaite chu an inenkawl theih nân ruahmanna a siamsak a. (Deuteronomy 24:17-21) Chutiang chhûngkuate harsatna tawrh chu hre thiamin, amah Jehova ngei chu pa angin an tân Rorêltu leh Humhimtuah a ṭang a ni. (Deuteronomy 10:17, 18) Israelte’n humhimtu nei lo hmeichhia leh naupangte an tihretheih chuan, an au thâwm chu a ngaithla ang. Exodus 22:22-24-a chhinchhiah angin, “Ka thinur chu a ling phut mai ang,” a ti. Thinur chu Pathian mize langsâr tak ni lo mah se, rorêl dik lohna thiltih chuan a thinur a chawk tho ṭhîn, a bîk takin a tuartute chu mi derthâwng tak an nih hian.—Sâm 103:6.
14. Eng hi nge Jehova duhsak bîk neih lohna târ langtu ropui tak chu?
14 A pathumnaah, Deuteronomy 10:17-ah hian, Bible chuan, Jehova chu “tumah duhsak bîk nei lo va, thamna pawh la ngai lo a ni,” tih a sawi a. Thiltihtheihna leh thuneihna nei mi tam takte ang lo takin, Jehova chu hausakna leh pâwn lam lan dân hian a hneh ve lo. Inpâwng huatna leh thlei bîk neihna ata a fihlîm a ni. Duhsak bîk a neih lohzia a lanna chhinchhiah tlâk tak chu hei hi a ni: Tâwp nei lo nun beiseina neia amah betu dik tak nih theihna chanvo chu mi fing tlêm tête tân chauhva a khuahkhirh lohnaah hian. Chutih ahnêkin, Tirhkohte 10:34, 35 chuan: “Pathianin mi duhsak bîk a nei lo tih dik takin ka hria e; nimahsela hnam tin zîngah tupawh amah ṭiha fel taka ti apiang a lâwmzâwng mi an ni ṭhîn,” a ti. He beiseina hi mi zawng zawng tân a ni a, neihnun dân te, vun rawng te, leh chênna ram te hian kawngro a su lo. Chu chu rorêl dikna chungnung ber a ni dâwn lâwm ni? Jehova rorêl dikna hriatthiam lehzualna chuan a lamah min va hîp tak êm!
“Pathian Finna . . . Ngahzia Chu A Va Thûk Êm!”
15. Finna hi eng nge ni a, engtin nge Jehova’n a lantîr?
15 Tirhkoh Paula chu, Rom 11:33-a chhinchhiah angin: “Pathian finna leh hriatna ngahzia chu a va thûk êm!” tia au chhuak tûra chêttîrin a awm a. Ni e, Jehova finna hmêlhmang chi hrang hrang kan ngaihtuah hian, amah zahna thûk tak nei lo thei kan ni lo. Mahse, engtin nge he mizia hi kan sawifiah ang? Finna chuan hriatna te, hriat theihna te, leh hriatthiamna te chu lakhâwmin hna a thawhtîr a. A hriatna zau tak leh a hriatthiamna thûk tak hmangin, Jehova chuan thu tlûkna ṭha ber berte a siam a, chûng chu hriat theih zînga kawng ṭha ber berin a hlen chhuak a ni.
16, 17. Engtin nge Jehova thil siamte chuan a finna a zauzia a târ lan? Entîrna pe rawh.
16 Jehova finna zau tak târ langtu thil ṭhenkhat chu engte nge ni? Sâm 104:24 chuan: “Aw LALPA, i thiltihte chu a va tam êm! Finnain i siam vek a ni: leilung hi i hausaknain a khat a nih hi,” a ti a. A nihna takah chuan, Jehova thil siamte kan zir tam poh leh, a finna hi mak kan tiin, kan zah telh telh a ni. Scientist-te’n Jehova thil siam aṭanga an thil zir tam tak chu han ngaihtuah teh! Zirna sâng pêng pakhat, leilunga thil awmte pianhmang lâk tumna biomimetics engineering thlengin a awm a ni.
17 Entîr nân, maimawm in mawi tak chu mak ti takin i lo en tawh mai thei a. A in sak dân chu a nalh tak zet a ni. Hrui sîn tak leh tlo lo tak anga langte chu a tiatpuia siam thîr aiin a fei zâwk a, silaia kah tlang theih loh (bulletproof) kawra hrui sînte aiin a sak zâwk a ni. Chu chu eng tihna nge ni ta ang? Sangha manna lawnga hman lênkhang ang tiata siam maimawm in pakhat ngaihtuah chhin teh. A fei êm leh a chak êm avângin, chu chuan khualzin mite chuanna thlawhna vân lai zâwla thlâwk mêk chu a pawt ding thei ang. A ni, Jehova chuan chûng zawng zawng chu a “finnain” a siam a ni.
18. A Thu, Bible ziak tûra mihringte a hmanna kawngah, engtin nge Jehova finna a lan?
18 Jehova finna ropui ber chu a Thu, Bible-ah hmuh theihin a awm a. A chhûnga thurâwn fing tak takte chuan nun kawng ṭha ber min kawhhmuh tak zet a ni. (Isaia 48:17) Mahse, Jehova finna tehkhin rual loh chu Bible ziak a nih dân aṭangin hmuh theih a ni bawk. Engtin nge? A finna avângin Jehova chuan a Thu ziak tûrin mihringte a hmang a. Bible chu vântirhkohte ziahtîr ta sela chuan, tûn angin mite a hîp ang em? Vântirhkohte chuan Jehova chu anmahni thlîr dân aṭangin an ziak ang a, a hnêna an inpêk dân chauh an ziak ngei ang. Mahse, keini aia hriatna leh chakna lama sâng zâwk tak, thlarau thil siam ṭha famkimte thlîr dân chu kan hre thiam thei dâwn em ni?—Hebrai 2:6, 7.
19. Eng entîrna hian nge Bible ziak tûra mihringte hmannain Bible chu nêlawm tak leh duhawm tak a nihtîr tih târ lang?
19 Mihring lehkha ziaktute a hman avângin, Bible chuan nêlawmna leh duhawmna nasa tak a nei a. A ziaktute chu keimahni nungchang ang pu mihring bawk an ni. Ṭha famkim lo an nih avângin, keimahni ang bawkin fiahna leh nêksâwrnate chu an tawng a. Hmun ṭhenkhatah chuan, anmahni rilru veizâwng leh hrehawm tawrhte chu mahni chanchin ziak ang maiin an ziak a ni. (2 Korinth 12:7-10) Chutichuan, vântirhkoh tumahin an sawi chhuah theih loh tûr angin an ziak a ni. Entîr nân, Sâm 51-a Davida thute kha ngaihtuah ta ila. A bung chunga thuziak aṭangin, Davida chuan he fakna hla hi sual nasa tak a tih hnua a phuah a ni tih a hriat theih a. A thinlung zawng zawng a leih bua a, a lungngaihna nasa tak lantîrin, Pathian ngaihdamna a dîl a ni. Châng 2 leh 3-na chuan: “Ka khawlohnate hi mi silfaisak var la, ka sual hi mi tlenfaisak ang che. Ka bawhchhiatnate hi ka hre ta si a: ka sual hi ka hmâah a awm fo ṭhîn a ni,” a ti. Châng 5-na chuan: “Ngai teh, khawlohnaa dinin ka awm a; ka nu’n sualin mi pai a,” a ti a. Châng 17-na chuan: “Pathian duhzâwng inthawinate chu thlarau lungchhia hi a ni. Aw Pathian, thinlung lungchhia leh inchhîr ngawih ngawih hi i hmusit lo vang,” a tih belh a ni. A ziaktu rilru natzia chu i hre thei em? Mihring ṭha famkim lote tih loh tu dangin nge chutiang rilru natnate chu sawi chhuak thei ang?
20, 21. (a) Engvângin nge ziaktu atân mihringte hman ni mah se, Bible-ah Jehova finna a chuang a tih theih? (b) A dawta thuziakah eng nge sawiho a nih dâwn?
20 Chutiang mihring ṭha famkim lote hmangin, Jehova chuan kan mamawh tak—“Pathian thâwk khuma pêk” thuziak, mihringte hriatthiam tûr ṭawngkama ziak—chu min pe a ni. (2 Timothea 3:16) A ni, Bible ziaktute chu thlarau thianghlima kaihhruai an ni a. Chuvângin, anmahni finna ni lovin, Jehova finna chu an lo ziak zâwk a ni. Chu finna chu a rin tlâk pumhlûm a ni. Pathianin hmangaih taka hetianga min fuih pawh hi kan finna aiin nasa takin a chungnung a ni: “I thinlung zawng zawngin LALPA ring la, nangma hriatnaah innghat suh; i kawng zawng zawngah amah hre reng la, i kawngte chu a kawhhmuh zêl ang che,” tih hi. He fuihna fing tak zâwmin, kan Pathian fing ber chu kan hnaih a ni.
21 Jehova miziate zînga duhawm ber leh ṭha ber chu hmangaihna a ni a. Jehova’n hmangaihna a lantîr dân chu a dawta thuziakah kan sawiho vang. (w03 7/1)
I Hre Thei Em?
• A ṭhian kan nih theih nân, Jehova chuan engtin nge hma a lâk?
• Jehova thil siam theihna leh humhim theihna târ langtu entîrna ṭhenkhat chu engte nge ni?
• Eng kawngin nge Jehova chuan a rorêl dikna chu a kenkawh?
• Jehova finna chu thil siam zawng zawngah leh Bible ziak a nih dânah engtin nge a hmuh theih?
[Phêk 10-naa milem]
A ângchhûnga berâm dahtu berâm vêngtu angin, Jehova chuan A berâmte chu dimdawih takin a enkawl
[Phêk 13-naa milem]
Bible ziak a nih dânah Jehova finna a lang