Kan Rinpui Tarte Chu I Hlut Em?

HMAN lai Israelte’n Pathian nêna thuthlunga inlaichînna an neih khân: “Lûa kêlsam ṭote hmaah chuan i ding zêl ṭhîn tûr a ni a, tar hmêl chu i zah tûr a ni a, i Pathian chu i ṭih tûr a ni; kei hi LALPA chu ka ni,” tia thu pêk an ni. (Leviticus 19:32) Chuvângin, tarte zah chu tih tûr thianghlim, Pathian hnêna intukluhna nêna inzawm tlat thil a ni. Tûn laiah Kristiante chu Mosia Dân hnuaiah awm tawh lo mah se, Jehova chuan a rawngbâwltu tarte chu a ngaihluin, a hlut êm êm a ni tih min hriattîr a ni. (Thufingte 16:31; Hebrai 7:18) Jehova thlîr dân chu i nei ve em? Kan Kristian unaunu leh unaupa tar tawhte chu kan hlut em?

A Aia Upa Zâwk A Ṭhian Hluttu Mi Pakhat

Tarte zahna chungchâng târ lanna chu Bible thuziak pakhat Lalte pahnihna buah hmuh a ni a. Chutah chuan zâwlnei naupang zâwk Elisa’n zâwlnei Elija dinhmun a luah thu a chuang a ni. Elija’n Israel hnam sâwmte lalrama zâwlnei a thawh hnuhnun ber nia thilthleng kha lo ngaihtuah ta ila.

Chu mi nî chuan, Jehova’n zâwlnei târ tak Elija chu Gilgal aṭanga Bethel-ah, Bethel aṭanga Jeriko-ah, Jeriko aṭanga Jordan Luiah zin tûrin a tîr a ni. (2 Lalte 2:​1, 2, 4, 6) Chu a zin kawng chu kilomiter 50 dâwn lai a ni a, Elija chuan Elisa chu amah zui tawh lo tûrin vawi thum lai a hrilh a. Amaherawhchu, a hma kum zabi engemaw zâta Ruthi’n Naomi kalsan a duh tlat loh ang khân, Elisa’n zâwlnei upa zâwk kalsan chu a duh tlat lo. (Ruthi 1:​16, 17) Elisa chuan vawithum lai: “LALPA nunna leh i nunna chhâlin ka sawi e, ka awmsan tawp lo vang che,” a ti a ni. (2 Lalte 2:​2, 4, 6) Chutih lai chuan, Elisa chuan Elija chu kum ruk lai a lo ṭanpui tawh a. Mahse, a theih chen chen Elija nêna rawngbâwl chu a duh a ni. Thuziak chuan: “Tin, an kal dûn zêl a, an titi lai chuan heti hi a ni a, ngai teh . . . Elija chu . . . a chho ta a,” tih a sawi zawm a ni. (Châng 11) Israel rama Elija rawngbâwlna a tâwp thleng rakin Elija leh Elisa chu an tîtî dûn a ni. Zâwlnei naupang zâwk chuan a aia thiltawn ngah, zâwlnei upa zâwk hnên aṭangin zirtîrna leh fuihna a tam thei ang ber dawn chu a duh niin a lang. A ṭhian upa zâwk chu a hlut ngei a ni tih a chiang hle.

‘Nu leh Pate Angin’

Elisa’n zâwlnei upa zâwk chu a ṭhian ang​—thlarau lama a pa ang hiala a hmangaih chhan chu hriat harsa a ni lo. (2 Lalte 2:12) Israel rama Elija rawngbâwlna a tâwp hma lawk khân, Elisa hnênah: “I hnên ata lâk bova ka awm hma hian eng nge ka tihsak ang che mi dîl rawh,” a ti a. (Châng 9) Hetiang hian, a rawngbâwlna a tâwp thleng rakin, Elija chuan amah thlâktu zâwlnei thlarau lam ṭhatna tûr leh Pathian hna thawh chhunzawm a nih tûr a veizia a tilang a ni.

Tûn laiah, kan Kirstian unaunu leh unaupa tar tawhte chuan an hriatna leh an finna zawng zawng naupang zâwkte hnêna phal taka pêkna hmanga nu leh pate anga ngaihsakna an lantîr tih hriat chu a phûrawm hle. Entîr nân, Jehova Thuhretute branch office-a kum rei tak inpea rawngbâwlte chuan, Bethel chhûngkuaa member tharte chu an hna thawha thiamna an neih theih nân, inhuam takin an ṭanpui a ni. Chutiang bawkin, kum tam tak chhûng kohhrante lo tlawh tawh bial kantute leh an nupuite chuan bial kantu ni tûra zirtîrna dawng tharte hnênah an thiltawn tam tak chu lâwm takin an zirtîr a ni. Chu bâkah, khawvêl puma Jehova Thuhretute kohhranah hian kum sâwmbi têla Jehova rawng rinawm taka lo bâwl tawh unaunu leh unupa tar tawhte chuan kohhrana mi tharte hnênah an finna leh an thiltawn ṭangkai tak takte chu lâwm takin an hrilh bawk.​—Thufingte 2:7; Philippi 3:17; Tita 2:​3-5.

Hêng kan duh tak Kristian tar tawhte lanchhuahtîr tih tak zeta mite ngaihsakna chuan an chunga zahna lantîr chu thil hlimawm tak a nihtîr a ni. Chuvângin, rinpui tarte zahna thûk tak lantîrna kawnga Elisa entawn chu kan duh a ni. Tirhkoh Paula min hriatnawntîr angin, “putar deuhte . . . pa angin” leh “pitar deuhte chu nu angin” i cheibâwl zêl ang u. (1 Timothea 5:​1, 2) Chutianga tihna hmangin, khawvêl pum puia Kristian kohhran chu nasa taka kal tluantîrin, kan ṭhan chhohtîr a ni. (w03 9/1)

[Phêk 30-naa milem]

Elisa chuan a theih chen chena Elija nêna rawngbâwl chu a duh

[Phêk 31-naa milemte]

Naupang zâwkte chuan Kristian tarte hnên aṭangin hlâwkna nasa tak an dawng