Lalram Chanchin Puangtute Report

Hnathawhna Hmuna Thuhrilhna

TIRHKOH Matthaia te, Petera te, Andria te, Jakoba te, leh Johana te hian inanna eng nge an neih? An vaiin, Isua’n an hnathawhna hmun aṭangin a ko vek a ni. Petera te, Andria te, Jakoba te, leh Johana te chu sangha mana an buai hle laiin Isua’n: “Mi zui rawh u,” tiin a sâwm a ni. Matthaia chuan chhiah chawina hmuna a awm laiin Isua zirtîr ni tûra sâwmna chu a dawng bawk.​—Matthaia 4:​18-21; 9:9.

Hnathawhna hmuna thuhrilh chu a manhla thei hle a. Chu chu hriain, Japan rama Jehova Thuhretute chuan tûn hnai mai khân he rawngbâwlna pêngah hian beihpui an thlâk a ni. Eng nge a rah chhuah? Thla engemaw zât lek chhûngin, tlawhkîr sâng têl neih a ni a, Bible zirpui 250 vêl chu ṭan a ni. A hnuaia thiltawnte hi han ngaihtuah teh.

Tokyo khawpuia hun bikima rawngbâwltu pakhat chuan tûn hma kum 30 vêl kaltaa school naupang a nih laia Thuhretu pakhat nêna inbe tawh restaurant manager pakhat chu a tawng a. School naupang a nih laia a thu ngaihthlâkte chu hre thiam chiah lo mah se, Bible thu chu a tuipui a ni. Tûnah a tuina chu chawh thawhsak a ni leh a, Chatuan Nunnaa Hruaitu Hriatna bu hmanga Bible zirna neih chu a duh nghâl a ni.a Chu bâkah, zan tin a mut hmain mahnia Bible chhiarna hun chu a nei ṭan bawk a ni.

Special pioneer rawngbâwltu pakhat chuan office pakhat a va tlawh a. Chuta manager chu be fuh thei lo mah se, manager phone lo chhângtu hmeichhe pakhat chuan, “Keimah min be duh em?” tiin a zâwt a. Telephone-a rei lo tê an inbiak hnuah, hmeichhia chu lo chhuakin, Bible a chhiar tui thu a hrilh a. Special pioneer chuan Bible kenga tlawhkîr tûra ruahmanna siamin, Bible a zirpui ṭan a, a hnathawh hun hmain a hnathawhna hmun bula park-ah a zirpui a ni.

Office dang lehah, mi pakhat chuan a hna thawhpuinuin Vênnainsâng leh Awake! a dawng a; mahse, Thuhretuin a kalsan veleh a paih lehnghâl zêl chu a hmu a. Chu pa chu ina a haw chuan, a nupui Thuhretu hnênah chu thil awm dân chu a hrilh a, amah ni se chuan rei lo tê tal a ngaihthlâksak tûr thu a hrilh a ni. A thusawi lo hre rutu a fanu chuan, chu mi chungchâng chu, hnathawhna biala thuhriltu Thuhretu pakhat hnênah a hrilh a. Thuhretu chuan a hnathawhna hmunah chuan a va tlawh nghâl a, Bible chu a zirpui ta a. Rei lo te chhûngin chu pa chu Chawlhni inkhâwmah a tel ta ziah a ni.

Mite an hnathawhna hmuna thuhrilhna chuan hlâwkna dang pawh a thlen a. Japan rama thuchhuahtu tam takte chu dâwrhmun te, thil siamchhuahna hmun te, leh office hmun tea tlawhkîrna siam chu an thiam phah a ni. Chu bâkah, hetianga thuhrilhna hmang hian, tawlh bo tawh mi tam tak chu tlawhpawh an niin, zirna neihpui ṭan a ni. A rahchhuah chu a langsâr hle. Tûn hnai mai khân central Tokyo khawpuia kohhran pakhat chuan in lama Bible zirna 108 a nei a, ni kum aiin a lêt hnih chuangin a tam a ni. (w04 4/1)

[Footnote]