2 Pathian Hriatna Dik Nei Rawh

“He hi chatuana nunna a ni, nang Pathian tak chauh leh I tirh Isua Krista hriat hi.”—Johana 17:3.

ENG NGE A HARSATNA? Ṭhenkhat chuan Pathian a awm lo an ti a. Mi dangte chuan Pathian chu mi ni lo, thiltihtheihna thahrui chak tak ang niin an ring a. Mi tak tak a ni tih ringtute pawhin, a nihna leh a miziate chungchângah thurin inkalh tak tak an zirtîr a ni.

ENGTIN NGE HARSATNA CHU I TIHKIAN THEIH? Pathian hriat theih dân kawng khat chu a thilsiamte en hi a ni a. Tirhkoh Paula chuan: “[Pathian] thil hmuh theih loh (a chatuan thiltihtheihna leh a Pathianzia chu) khawvêl siam tirh ata fiah taka hmuhin a awm a, thil siamah chuan a lang a ni,” a ti. (Rom 1:20) Thilsiamte ngun taka enin, min Siamtu finzia leh thiltihtheihzia chungchâng tam tak i zir thei a ni.—Sâm 104:24; Isaia 40:26.

Mahse, Pathian mize hriatna dik nei tûr chuan, Pathian Thu, Bible chu mahni ngeia kan chhiar a, kan chhût ngun ṭheuh a ngai a ni. I ngaihtuahna chu mi dangte thununtîr suh ang che. Bible thurâwn: “He khawvêl dân ang hian awm suh ula; Pathian duhzâwng, a ṭha leh lawm tlâk leh, ṭhat famkim chu in hriatfiah theih nân, in rilru athara awmin lo danglam zâwk tawh rawh u,” tih chu zâwm zâwk ang che. (Rom 12:2) Entîr nân, Bible-in Pathian chungchâng a târ lan a hnuaia thute hi i lo ngaihtuah ang u.

Pathian chuan hming a nei. Atîra ziak Bible bu pumah chuan Pathian hming a sâng têl a chuang a. Bible lehlin tam tak chuan Sâm 83:18-ah Jehova hming chu an telh a ni: “Nangmah chauh hi JEHOVA hming pu, leilung zawng zawng chunga Chungnungber i nih an hriat theih nân,” tiin.

Pathian Jehova chuan rilru veizâwng a nei a, mihringte thiltihin chu a rilru veizâwng chu a nghawng. Jehova’n Aigupta sal tânna aṭanga Israelte a hruai chhuah hnu khân, anni chuan a thurâwn fing takte ngaihthah châng an nei a. An helna chuan amah an “tilungngai” a, an thiltihte chuan “Israel-ho Mi Thianghlim chu an tivui ṭhîn.”—Sâm 78:40, 41.

Pathian Jehova chuan mi mal tinte min ngaihsak. A zirtîrte hnênah, Isua chuan: “Chawngzawng pahnih dâr tangka pakhatah an hralh ṭhîn lo vem ni? nimahsela, an zînga pakhat mah in Pa lovin leiah a tla lo vang. In samzaite lam pawh hi chhiar vek a ni asin. Chuvângin hlau suh u; chawngzawng tam tak aiin in hlu zâwk a ni,” a ti a ni.—Matthaia 10:29-31.

Pathian chuan hnam emaw, chi leh kuang emaw duhsak bîk a nei lo. Tirhkoh Paula chuan Atheni khuaa Grik mite hnênah Pathianin “lei chung zawng zawnga awm tûrin bul hmun khat vekin hnam tin mi a siam,” tih a hrilh a. Pathian “chuan min hlat lo ṭheuh si a,” tiin a sawi belh bawk. (Tirhkohte 17:26, 27) Tirhkoh Petera pawhin: “Pathianin mi duhsak bîk a nei lo . . . nimahsela hnam tin zîngah tupawh amah ṭiha fel taka ti apiang a lâwmzâwng mi an ni ṭhîn,” tiin a sawi.—Tirhkohte 10:34, 35.

ENG NGE A HLAWKNA? Ṭhenkhat chuan “Pathian lamah ṭhahnem an ngai . . . a ni, hre famkim ang erawh chuan an ngai lo.” (Rom 10:2) Pathian chungchânga Bible zirtîrna dik tak i hriat chuan, hruai sualin i awm lo vang a, ‘Pathian i hnaih’ thei bawk ang.—Jakoba 4:8. (w09 5/1)

Hriat belh nân, Bible Zirtîrna Dik Tak Chu Eng Nge Ni? a tih lehkhabu bung 1-na “Bible-in Pathian Dik Chungchâng Eng Nge Min Zirtîr?,” tih chu en rawh.

[Footnote]

[Phêk 6-naa milem]

Pathian hriatna neih theih dân kawng khat chu a thilsiamte en hi a ni