2 Pathianin Min Ngaihsak Tak Tak Lo—Hei Hi A Dik Em?

I lo hriat tawh mai theih chu: “Pathianin mihringte ngaihsak tak zet sela chuan, khawvêl ata suahsualna leh hrehawm tawrhna hi a la bo ngei ang. Mipui vântlâng hmakhua a ngaihsak pawh lo ni ta tehrêng se, ka chunga thilthleng hi chu a ngaihsak lo.”

Bible zirtîrna chu: Jehova chuan suahsualna a awmtîr lo. (Jakoba 1:13) Suahsualna hi engtik lai pawhin la kiang thei reng mah se, mihringte awm ṭantirh lama lo chhuak thu buai chinfel nân tûna awm mêk mihringte rorêlna ṭha lo a awm hrih chu a phal a ni. Ani chuan mihringte ṭhatpui atân a rorêlna hnâwltute thlentîr buaina zawng zawng chu a sût lêt leh vek ang.—Genesis 3:1-6; Isaia 65:17.a

Pathianin mihring mi nâwlpuite ṭhatna tûr a ngaihtuah bâkah, a mi mala min ngaihsak nasatzia a târ lang bawk. Matthaia 10:29-31 chuan keimahni ngei pawhin kan hriat loh thilahte pawh ngun takin min en chhuak tih a târ lang a ni: “Chawngzawng pahnih dâr tangka pakhatah an hralh ṭhîn lo vem ni? nimahsela, an zînga pakhat mah in Pa lovin leiah a tla lo vang. In samzaite lam pawh hi chhiar vek a ni asin. Chuvângin hlau suh u; chawngzawng tam tak aiin in hlu zâwk a ni,” tiin.

Thutak hriatnain a ṭanpui dân che: Mi khirh leh mi ngaihsak lotute chu kan pumpelh tlângpui ṭhîn a. Chuvângin, Pathianin min ngaihsak lo tih dâwt thu chuan mi tam takte chu amah hriat tum lo law law tûr emaw, kawng dang a awm tawh miah loh huna amah pan chauh tûr emawa a chêttîr pawh hi a mak hran lo. Pathian Jehova’n a ngaihsak tak zet che tih hriatna chuan a chanchin zir belh duhna leh ṭhiana siam duhna a neihtîr thei che a ni.

Entîr nân, Pathian hnênah i ṭawngṭai a; mahse, mi ngaithlain mi chhâng ngût ang emaw chu tih i ngaihtuah pawh a ni thei. “Ṭawngṭaina Ngaithlatu” chuan tih tak zeta amah pantu zawng zawngte tân inbiakpawhna kawng a hawng reng tih Bible chuan min tiam a ni.—Sâm 65:2.

Pathian chuan ‘a ngaihsak ṭhin che avângin i manganna zawng zawng ama chunga nghat vek’ tûrin a sâwm che a ni. (1 Petera 5:7) Pathian Thu chuan: “LALPA chuan thinlunga lungchhiate chu a hnaih ṭhîn a, rilrua inchhîr apiangte chu a chhandam ṭhîn” a tih avângin, lungngaihna nasa tak kan tawh hunah pawh min ngaihsakna chu kan rinchhan thei a ni.—Sâm 34:18. (w11-E 10/01)

[Footnote]

[Phêk 5-naa thu lâk chhuah]

Pathianin min ngaihsak lo ni sela chuan, engah nge a hnêna ṭawngṭai tûra min sâwm ang?