Nangmah Chhan Chhuah Nana Pathian Jehova Thiltihte Chu I Hlut Em?
“Lalpa, Israela Pathian chu fakin awm rawh se, A mite chu a rawn tlawh a, tlanna a siamsak a.”—LK. 1:68.
1, 2. Tûn kan dinhmun hlauhawmzia hi eng anga tehkhin theih nge ni a, eng zawhnate nge kan sawiho vang?
DAMDAWI IN khuma mu angah han inchan teh. I awmna pindana awm zawng zawng chuan a tihdamna la hriat loh natna chu in vei vek a ni. Doctor pakhatin hmahruaiin a tihdamna a zawng tih i han hriat chuan, beiseina i nei a. A zirnain hma a sâwn dân engpawh chu i ngaihven hle a ni. Ni khat chu, a tihdamna hmuh chhuah a ni tih i hre ta hlauh mai le! A tihdamna hmu chhuaktu, chu doctor chu a hnaah nasa takin a inpe a ni. Chu thawhrimna chu engtin nge i chân lêt ang? Nangmah leh mi dang tam takte thihna aṭanga chhan chhuah theihna kawng hawnsaktu che zahna leh hlutnain i thinlung chu a khat ngei ang.
2 Chu dinhmun chu phuahchawp niin a lang mai thei; mahse, chutiang dinhmun angah chuan kan awm a ni. A nihna takah chuan, chu dinhmun aia chhe zâwk daihah kan awm vek a. Chhan chhuaktu kan mamawh hle a ni. (Rom 7:24 chhiar rawh.) Min chhan chhuak tûrin, Pathian Jehova chuan thil tam tak a ti a. A Fapa pawhin inpêkna liantham tak a nei bawk. Chuti chu, zawhna pawimawh pali i lo ngaihtuah ang u. Engvângin nge chhan chhuah kan ngaih? Min chhan chhuah nân Isua’n eng nge a tih ngai? Pathian Jehova’n eng nge a chân ngai? Tin, Pathian chhan chhuahna kan hlutzia chu engtin nge kan lantîr theih?
Chhan Chhuah Kan Ngaih Chhan
3. Engtin nge sual chu hrilêng nêna khaikhin theih a nih?
3 Tûn hnaia chhût dân chuan, mihring chanchina hrilêng hlauhawm berte zînga pakhat chu kum 1918-a Spanish influenza kha a ni a, mi maktaduai sâwm têlin an thih phah a ni. Mahse, natna dangte chu nunna atân a hlauhawm zâwk a tih theih ang. Chûng natna dangte veitu an tam lo pawh a ni thei; mahse, a vei apiang deuh thaw chuan an thihpui zêl a ni.a Amaherawhchu, sualna leh chutiang natna hrite chu khaikhin ta ila, eng nge kan hmuh theih? Rom 5:12 thute hi han hre chhuak teh: “Mi pakhat avângin sual khawvêlah a lût a, sual avângin thihna a lût bawk a, chutiang bawkin mi zawng zawngin thil an lo tihsual avângin thihnain mi zawng zawng a fan chhuak ta a,” tih hi. Mi ṭha famkim lo zawng zawng chu mi sual an lo nih tâk avângin, mi zawng zawngin sual hri an vei vek a ni. (Rom 3:23 chhiar rawh.) A nih leh, mi eng zât nge sual avângin an thih? Paula chuan sual avânga thihnain “mi zawng zawng” a fan chhuak tih a ziak a ni.
4. Kan dam chhûng chungchâng Pathian Jehova thlîr dân chu eng nge ni a, engtin nge chu thlîr dân chu tûn laia mi tam takte thlîr dân nên a inan loh?
4 Tûn laia mi tam takte chuan sualna leh thihna chu hrilêng angin an ngai lo. Hun lo taka thih chu an hlau ngei mai; mahse, tar avânga mihringte thihna chu thil “pangngai tak” angin an ngai a ni. Mihringte nun chungchânga Siamtu thlîr dân theihnghilh mai chu a awl hle. A tum aia nasain kan nun chu a tawi hle a. A nihna takah chuan, Pathian Jehova thlîr dân aṭang chuan mihring tumah hi “ni khat” pawh an dam tling lo a ni. (2 Pet. 3:8) Chuvâng chuan Pathian Thu chuan kan dam chhûng chu a hun têa ṭo hlobet chuai leh mai ṭhîn emaw, chhûm rei lo tê lo lang a, ral leh mai ṭhîn emaw ang niin a sawi a ni. (Jak. 4:14; 1 Pet. 1:24) Chutianga nun thlîr dân chu rilrua kan vawn reng a ngai a ni. Engvângin nge? Min tlâkbuaktu “natna” chu a hlauhawm dân kan hriat thiam chuan, a “tihdamna”—chhan chhuahna—hlutzia chu kan hre thiam lehzual ang.
5. Sualna avânga kan thil chân chu eng nge ni?
5 Sual leh chu miin a nghawng chhuah a hlauhawm dân hre thiam tûr chuan, sual avânga kan thil chân chu kan hriat thiam a ngai a ni. Sual avânga kan thil chân chu, kan la tawn ngai loh thil a nih avângin, atîrah chuan hriat thiam a har mai thei. Adama leh Evi te khân, atîrah chuan nun ṭha famkim chu an nei a. Rilru leh taksa ṭha famkim an neih avângin, anni chuan an ngaihtuahna te, rilru veizâwng te, leh thiltihte chu an duh ang angin an thunun thei a. Chuvângin, Pathian Jehova chhiahhlawh niin, mizia ṭha tak tak an nei chho zêl thei a ni. Chutianga tih ai chuan, chu thilpêk hlu tak chu an paih bo ta zâwk a. Pathian Jehova duhzâwng kalha thil sual tih chu an thlan avângin, anmahni leh an thlahte chu an nun dân tûra Pathian ruahman ang chuan an nung thei ta lo a ni. (Gen. 3:16-19) Chutih rual chuan, kan sawiho mêk “natna” hlauhawm tak chu an vei a, keini pawhin kan lo vei phah ta bawk a ni. Inâwm takin, Pathian Jehova chuan anni chu thiam loh a chantîr a. Mahse, kan tân chhan chhuah beiseina chu min pe a ni.—Sâm 103:10.
Min Chhan Chhuah Nâna Isua Thiltih Ngai Chu
6, 7. (a) Engtin nge Pathian Jehova chuan min chhan chhuahna man a to hle ang tih a lo târ lan hmasak? (b) Abela leh Dân awm hmaa thlahtute inthawina aṭangin eng nge kan zir theih?
6 Pathian Jehova chuan Adama leh Evi thlahte chhan chhuah man chu a to hle ang tih a hria a. Genesis 3:15-a chhinchhiah hrilh lâwkna aṭangin chhan chhuah nâna thil ṭûl chu kan hre thei a ni. Pathian Jehova chuan engtik nîah emaw chuan Setana lû tithitlinga tiboraltu tûr, chhan chhuaktu ‘thlah’ chu a awmtîr ang. Mahse, chu chhan chhuaktu chuan a ke artui tihthitlinna anga sawi theih tûr chu a tuar phawt dâwn a ni. Chu chu a hrehawmin, a râpawm hmêl hle a; mahse, chu chuan eng awmzia nge a neih? Pathian Jehova Mi Thlana chuan eng chiah nge a tawrh dâwn?
7 Mihringte sualna aṭanga chhan chhuak tûr chuan, a chhan chhuaktu chuan sual thiltih rah chhuahte sût lêta mihringte Pathian nêna inremtîr nân, inremna siamna tûr a pêk a ngai ang. Chutah chuan eng nge tel? Inthawina hlan a ngai ang tih târ lanna ṭhenkhat chu mihring chanchin inṭan tirh lamah a lo awm tawh a ni. Mi rinawm hmasa ber, Abela’n Pathian Jehova hnêna rana inthawina a hlan chu Pathianin a lo pawm a. A hnuah chuan, thlahtu rinawm Nova te, Abrahama te, Jakoba te, leh Joba te pawhin chutiang bawkin Pathian tilâwmtu inthawinate chu an lo hlân a ni. (Gen. 4:4; 8:20, 21; 22:13; 31:54; Job. 1:5) A hnu kum zabi engemaw zâtah chuan, Mosia Dân chuan mite chu inthawina chungchâng a hriat belhtîr a ni.
8. Kum tina Inremna Nîah puithiam lal chuan eng nge a tih ṭhin?
8 Dânin a phût inthawina pawimawh berte zîngah chuan kum tina neih Inremna Nîa hlan inthawinate a tel a. Chu nîah chuan, puithiam lal chuan entîr nei thiltih tam tak chu a ti a ni. Ani chuan Pathian Jehova hnênah a hmasain puithiam chite tân, a hnuah puithiam ni lo hnamte tân sual inthawina a hlân a. Puithiam lal chu kum khata chu mi nî chauh, amah chuahva a luh theihna hmun, biak bûk emaw, biak in emaw chhûnga Hmun Thianghlim Berah chuan a lût a. Chuta thuthlung bâwm hmaah chuan inthawina ran thisen chu a theh a ni. Chu bâwm thianghlim chungah chuan Pathian Jehova’n a awm chilh tih târ langtu chhûm êng tak a awm a ni.—Ex. 25:22; Lev. 16:1-30.
9. (a) Inremna Nîah, puithiam lal chuan tunge a entîr a, a inthawina hlan chuan eng awmzia nge a neih? (b) Puithiam lal Hmun Thianghlim Bera a luhna chuan eng nge a entîr?
9 Tirhkoh Paula chu chûng entîr nei thiltihte awmzia târ lang tûra thlarauva thâwk khum a ni a. Inthawina hlan chuan inthawina atâna Krista thihna a entîr laiin, Puithiam lal chuan Messia, Isua Krista chu a entîr a ni. (Heb. 9:11-14) Chu inthawina ṭha famkim chuan pâwl hnih—Krista unau thlarauva hriak thih puithiam chi mi 144,000 leh “berâm dang”—tân inremna dik tak a pe thei a ni. (Joh. 10:16) Puithiam lal Hmun Thianghlim Bera a luhna chuan Pathian hmaa a inthawina hlutna hlân tûra Isua vâna a luhna chu a entîr a ni.—Heb. 9:24, 25.
10. Bible hrilh lâwkna chuan Messia thil tawn tûr eng nge a târ lan?
10 Adama leh Evi thlahte chhan chhuahna man chu a to ang tih a chiang hle. Messia chuan a nun a pêk a ngai tlat si a! Hebrai Pathian Lehkha Thua chuang zâwlneite chuan chu chu kim chang lehzualin an târ lang a ni. Entîr nân, zâwlnei Daniela chuan ‘khawlohna thianfai tûrin’ “hriakthiha, lal” chu “tihbo,” a nih loh leh tihhlum a ni ang tih tlang takin a sawi a. (Dan. 9:24-26) Isaia chuan Messia chu mi ṭha famkim lote sualna phur tûrin mite hnâwl, tihduhdah, tihhlum, a nih loh leh feia chhunin a awm dâwn tih a sawi lâwk bawk.—Is. 53:4, 5, 7.
11. Pathian Jehova Fapa chuan min chhan chhuah nâna inpêk a inhuamzia eng kawngin nge a târ lan?
11 Leia a lo kal hma khân, Pathian Fapa mal neih chhun chuan min chhan chhuah nâna a thiltih ngai tûr chu a hria a. Ani chuan hrehawm nasa tak a tuar ang a, a hnuah tihhlum a ni dâwn a ni. A Pain chûng thute a hrilh lai chuan, a hnial emaw, a hel emaw mai em? Chutianga tih ahnêkin, a Pa kaihhruaina chu châk takin a zawm zâwk a ni. (Is. 5:4-6) Chutiang bawkin, leia a awm lai khân, a Pa duhzâwng chu thuâwih takin a hlen chhuak a ni. Engvângin nge? “Pa ka hmangaih,” tih ṭawngkam hmang hian a chhan pakhat chu a sawi a. A chhan dang leh chu: “Mihringin a ṭhian aia a nun a paih aliama hmangaihna nasa zâwk tuman an nei lo,” tiin a sawi bawk a ni. (Joh. 14:31; 15:13) Chuvângin, chhan chhuah kan nih chhan chu Pathian Jehova Fapain min hmangaih vâng a ni deuh ber a. A nun ṭha famkim chu pêk ngai mah se, min chhan chhuah nân lâwm takin a pe a ni.
Min Chhan Chhuah Nâna Pathian Jehova Thil Chân Ngai Chu
12. Tlanna hi tu duhzâwng târ lanna nge ni a, ani chuan engvângin nge tlanna a ruahman?
12 Isua chu tlanna inthawina ruahmanna Siamtu emaw, Bul Tumtu emaw a ni lo va. He chhan chhuahna hi Pathian Jehova duhzâwng ber a ni zâwk mah a ni. Tirhkoh Paula chuan inthawina hlanna, biak ina maichâm chuan Pathian Jehova duhzâwng a entîr tih a târ lang a. (Heb. 10:10) Chuvângin, Krista inthawina avânga chhan chhuah kan nih chhan ber chu Pathian Jehova vâng a ni. (Lk. 1:68) Chu chu a duhzâwng ṭha famkim leh mihringte a hmangaihna a nasatzia târ lanna a ni.—Johana 3:16 chhiar rawh.
13, 14. Engtin nge Abrahama entîrna chuan kan tâna Pathian Jehova thiltihte hre thiam tûr leh hlut tûrin min ṭanpui?
13 Hetiang kawnga a hmangaihna târ lan nân Pathian Jehova’n eng nge a chân ngai? Chu chu kan tân hriat thiam harsa tak a ni. Amaherawhchu, thil nih dân hre thiam lehzual tûra min ṭanpui theitu Bible thuziak pakhat a awm. Pathian Jehova chuan mi rinawm Abrahama hnênah thil harsa tak—inthawi nâna a fapa Isaaka hlân tûrin a ngên a. Abrahama chu pa hmangaihna ngah tak a ni. Pathian Jehova chuan Isaaka chungchâng sawi nân “i fapa neih chhun, i hmangaih tak,” tih ṭawngkam a hmang a ni. (Gen. 22:2) Chuti chung pawh chuan, Abrahama chuan Jehova duhzâwng tih chu Isaaka a hmangaihna ai pawhin a pawimawh zâwk tih a hria a. Pathian thu chu a zâwm a ni. Mahse, Pathian Jehova chuan Amah ngeiin engtik nî emawa a la tih tûr chu Abrahama’n a tih tak tak a phal ta lo va. A fapa a hlan dâwn chiah chuan, a dang tûrin Pathianin a vântirhkoh a rawn tîr a ni. Abrahama chuan fiahna khirh tak hnuaia thu âwih a tum ngheh tlat avângin, a fapa chu kaihthawh a nih chauhvin a hmu leh dâwn tih a hre chiang a. Chutih rual chuan Pathianin a kaitho ngei dâwn tih a ring tlat bawk a ni. Paula chuan Abrahama’n Isaaka chu tholeh ‘ang maia’ a hmuh kîr leh ngei thu a sawi a ni.—Heb. 11:19.
14 Abrahama’n a fapa hlân tûra a inbuatsaih laia hrehawm a tih dân tûr chu i mitthla ṭan thei em? Abrahama thiltawn chuan Pathian Jehova’n “ka Fapa duh tak” tia a koh a hlan laia a tawrh dân hre thiam tûrin min ṭanpui a tih theih a. (Mt. 3:17) Mahse, Pathian Jehova hrehawm tawrh chu a nasa zâwk ngei ang tih hre reng ang che. Amah leh a Fapa chuan kum chhiarsên loh khawpa tam chhûng chu hun an hmang dûn a. Fapa chuan Pa “mi themthiam” duh tak leh a Thusawitu, ‘Thua’ angin a bulah hlim takin hna a thawk a ni. (Thuf. 8:22, 30, 31; Joh. 1:1) A fapa chu nghaisak a, nuihzat a, a hnua mi sual anga tihhlum a nih laia Pathian Jehova hrehawm tawrh dân tûr chu kan hriat phâk a ni lo. Min chhan chhuah nân Jehova chuan thil a va chân nasa tak êm! A nih chuan, engtin nge chu chhan chhuahna kan hlutzia chu kan lantîr theih ang?
Engtin Nge Chhan Chhuahna I Hlutzia I Lantîr Theih?
15. Engtin nge Isua’n inrem nâna thiltih ropui tak chu a hlen chhuah a, chu chuan eng nge a awmtîr theih?
15 Isua chuan vâna kaihthawh a nih hnuah inrem nâna a thiltih ropui tak chu a hlen chhuak a. A Pa duh tak nêna awm dûn lehin, a inthawina hlutna chu A hnênah a hlân a ni. Chu chu malsâwmna ropui tak chuan a zui a. A hmasain, Krista hriak thih unaute sual ngaihdamna leh, a hnuah “khawvêl zawng zawng” sual ngaihdamna pumhlûm chu a awmtîr a ni. Chu inthawina avâng chuan, tûn laia an sualte avânga inchhîr tak zet a, Krista zuitu dik tak lo ni zawng zawngte chuan Pathian Jehova nêna inlaichînna ṭha tak an nei thei a ni. (1 Joh. 2:2) Engtin nge chu chu i tân a nih ve theih?
16. Engtin nge Pathian Jehova’n kan tâna chhan chhuahna a siam avânga kan lâwmzia kan lantîr ang?
16 Atîra târ lan tehkhin thu-ah khân kîr leh ta ila. Natna tihdamna hmu chhuaktu doctor chuan i awmna pindana dam lote hnênah: Inenkawlna dawng a, a hnua tih ngaite titu apiang chu an dam chhuak ngei ngei ang, a ti a. Dam lo a tam zâwkte chuan doctor kaihhruaina chu zui duh lovin, inenkawl emaw, a hnua tih ngaite tih emaw chu a harsa lutuk ti ta se engtin nge ni ang? A tidam thei tak zet tih finfiahna chiang tak i nei chung pawhin, mi tam zâwkte ngaih dân ang chu i zui ve mai ang em? I zui ve hauh lo vang! A tihdam che avânga i lâwmzia chu sawiin, doctor kaihhruaina ang chu fîmkhur takin i zui ang a, mi dangte pawh i duhthlanna chungchâng i hrilh ngei ang tih chu rinhlelh rual a ni lo. Chu aia nasain, Pathian Jehova’n a Fapa tlanna inthawina zâra a awmtîr, chhan chhuahna avânga kan lâwmzia târ lan chu kan châk ṭheuh tûr a ni.—Rom 6:17, 18 chhiar rawh.
17. Nangmah chhan chhuah nâna Pathian Jehova thiltihte avânga i lâwmzia chu eng kawngin nge i lantîr theih?
17 Sualna leh thihna lak ata min chhan chhuah nâna Pathian Jehova leh a Fapa thiltihte avânga kan lâwm chuan, chu chu kan lan chhuahtîr ang. (1 Joh. 5:3) Sual tih duhna kan neih chu kan do vang a. Duh rêng vânga thil sual tiin, chu miin a zui fo ṭhin vervêk taka nun chi hniha nunah kan tlu lût ngai miah lo vang. Chutiang nun kawng zawh chu tlanna kan hlut lo emaw, chu mi avângin kan lâwm miah lo emaw tihna ang tluk a ni ang. Chutianga tih ai chuan, Pathian mithmuha thianghlim taka awm tum tlatin kan lâwmzia chu kan lantîr zâwk ang. (2 Pet. 3:14) Chhan chhuah nih beiseina kan neih ropui tak chu mi dangte hnêna hrilhin kan lâwmzia kan lantîr ang a, chutiang chuan anni pawhin Pathian Jehova hmaa thianghlim taka awmin, chatuana nun beiseina chu an nei ve thei ang. (1 Tim. 4:16) Pathian Jehova leh a Fapa chuan anmahni fak nâna kan hun leh tha leh zung zawng zawng kan pêk chu an phu ngei mai! (Mk. 12:28-30) Han ngaihtuah teh! Sualna aṭanga tihdam hlen kan nih hun tûr chu kan thlîr thei a. Pathianin kan nun dân tûra a tum ang ngeiin, ṭha famkimin chatuanin kan nung thei ang—min chhan chhuak tûra Pathian Jehova thiltih zawng zawngte avângin.—Rom 8:21. (w09 9/15)
[Footnote]
a Chutih hun laia khawvêl mipui zaa 20 aṭanga 50 vêlin Spanish influenza vei anga sawi a ni a. Chu natna chu a veitu mi zaa 1 aṭanga 10 vêlin an thihpui niin a lang. Chu mi nêna inang lo takin, natna vâng zâwk daih, hlauhawm tak si, Ebola an tih chu a veitu mi zaa 90 dâwn laiin an thihpui thung a ni.
Engtin Nge Kan Chhân Ang?
• Engvângin nge chhan chhuah vat kan ngaih?
• Isua inthawina chuan engtin nge a nghawng che?
• Pathian Jehova tlanna thilpêk chu engtin nge i ngaih?
• Pathian Jehova chhan chhuahna chhân lêt nân engti tûrin nge chêttîr i nih?
[Phêk 30-naa milem]
Inremna Ni-ah chuan, Israel puithiam lal chuan Messia a entîr
[Phêk 31-naa milem]
Abrahama’n a fapa hlan a inhuamna chuan Pathian Jehova inpêkna nasa zâwk tak min hriatthiamtîr