Bible Ṭanchhan Zawhnate Chhânna

Engvângin nge Isua chu Pathian Fapa tia koh a nih?

Pathian chuan fa neih nân nupui a nei lo. Ani chu thil nung zawng zawngte Siamtu a ni. Mihringte hi Pathian miziate entawn thei tûra siam kan ni a. Chuvângin, Pathianin mihring a siam hmasak ber Adama chu “Pathian fa” tia koh a ni. Chutiang bawkin, Isua pawh a Pa miziate ang neia siam a nih avângin “Pathian Fapa” tia koh a ni.—Luka 3:38; Johana 1:14, 49 chhiar rawh.

Eng hunah nge Isua siam a nih?

Pathian chuan Adama a siam hma daihin Isua a siam tawh a. Dik takin, Pathianin Isua a siam a, tichuan vântirhkohte pawh tiamin thil dang zawng zawngte siam nân Isua chu a hmang a ni. Chuvângin, Bible chuan Isua chu Pathian “thil siam zawng zawnga piang hmasa ber,” tiin a ko a ni.—Kolossa 1:15, 16 chhiar rawh.

Isua chu Bethlehem-a a pian hma khân vânah thlarau thil siam niin a lo awm tawh a. A hun a lo thlen chuan, Pathianin Isua nunna chu mihring anga a pian theih nân vân aṭangin Mari chhûlah a sawn ta a ni.—Luka 1:30-32; Johana 6:38; 8:23 chhiar rawh.

Engvângin nge Pathianin Isua chu mihring anga leia a piantîr? Eng chanvo danglam bîk nge Isua’n a hlen? Hêng zawhnate chhânna hi Bible-ah i hmu thei a, chûngte chuan i tâna Pathian leh Isua thiltihte i hriatthiamna leh ngaihhlutna a tipung lehzual ang. (w13-E 03/01)