Pathian Hming Nei Lova Siamtu Dâwt Thu

MI TAM TAKTE RIN DAN

“Pathianin hming a neih leh neih loh chungchângah leh a nei a nih chuan eng nge a nih tih chungchângah kan inlungrual thei lo.”—Professor David Cunningham, Theological Studies.

BIBLE THUTAK CHU

Pathian chuan: “LALPA chu ka ni. Chu chu ka hming a ni,” a ti a. (Isaia 42:8) Mizo Bible-ah chuan Pathian hming Jehova chu “LALPA” tih hawrawp puia thlâk a ni. Chu chu Hebrai hming a ni a, “A nihtîr” tihna a ni.

Jehova chuan a hming lam tûrin min duh a. Bible chuan: “A hming lam ula, mi tin zîngah hriattîr ula, a hming chu chawmawiin a awm tih sawi rawh u,” tiin a sawi a ni.—Isaia 12:4.

Isua chuan Pathian hming a lam a. Jehova hnêna a ṭawngṭainaah: “An [Isua zirtîrte] hnênah i hming ka hriattîr a, ka hriattîr leh fo vang,” tiin a sawi a. Engvângin nge Isua chuan a zirtîrte hnênah Pathian hming a hriattîr? Heti hian a chhan a sawi a ni: “Nangin kei mi hmangaihna kha anmahniah a awm a, kei pawh anmahnia ka awm theihna tûrin,” tiin.—Johana 17:26.

A PAWIMAWH CHHAN

Theologian Walter Lowrie-a chuan: “Pathian hming hre lotu chuan Pathian a hre tak tak lo va, mize nei lo chakna ang leka hretu lahin ani chu a hmangaih thei hek lo,” tiin a ziak a ni.

Victor-a chu chawlhkâr tin an kohhranah a inkhâwm ziah a, mahse, Pathian hre chiang niin a inhre lo. Heti hian a sawi a ni: “Chutah Pathian hming chu Jehova a ni tih ka hriat chuan, chu chu dân ang thlapa amah nêna inhmêlhriattîrna ang a lo ni a. A chanchin ka lo hriat hrep tawh Tuemaw a tâwpa hmu ta ang niin ka inhria. Ani chu Mi awm tak tak angin ka hmu a, amah nên inṭhianna ka nei chho ta a ni,” tiin.

Jehova pawhin a hming lamtute chu a hnaih ve thung a. Pathian chuan “a hming ngaihsaktute” chungchângah heti hian min tiam a ni: “Miin a fapa, a rawngbâwlsaktu chu a zuat angin anni chu ka zuat ang,” tiin. (Malakia 3:16, 17) Pathianin a hming lamtute chu lâwmman a pe ṭhîn bawk. Bible chuan “Tupawh Lapa [“Jehova,” New World Translation] hming lam apiangte chu chhandamin an awm ang,” tiin a sawi a ni.—Rom 10:13. (w13-E 11/01)