Engvangin Nge Kan Tar A, Kan Thih?

Pathianin Adama hnênah: “[A chhia leh a ṭha hriatna thing rah] i ei chuan i ei nî la lain i thi ngei tûr a ni,” tiin a hrilh a. (Genesis 2:17) Adama chu tar a, thi mai tûra siam a nih chuan, chu thupêk chuan awmzia a nei lo vang. Adama pawhin chu thei rah chu a ei loh chuan a thi lo vang tih a hria a ni.

Chu huanah chuan ei tûr thing tinrêng a awm avângin Adama leh Evi te chuan an nun zawm zêl nân a chhia leh a ṭha hriatna thing rah chu an ei a ngai lo va. (Genesis 2:9) Chu thing rah ei lohna hmangin, nupa tuak hmasa ber chuan anmahni nunna petu thu an âwihzia an lantîr ang a. Pathianin an nun kawng kaihruai tûrin dikna a nei tih an pawm a ni bawk ang.

ADAMA LEH EVI TE THIH CHHAN

Adama leh Evi te thih chhan hre tûr chuan, nghawng thui tak nei inbiakna kan zir chian a ngai a. Diabol Setana chuan dâwt huatthlala tak sawi nân rûl a hmang a. Bible chuan: “LALPA Pathianin ram sa a siam zawng zawngah chuan rûl a fing vervêk ber a. Tichuan ani chuan hmeichhe hnênah chuan, Pathianin, ‘Huana thing rah rêng rêng hi in ei tûr a ni lo,’ a ti elo maw? a ti a,” tiin a sawi.—Genesis 3:1.

Evi chuan: “Ti lo ve, huana thing rahte hi kan ei thei asin: huan lai taka thing awm rah erawh chu Pathianin, ‘In ei tûr a ni lo, tawh pawh in tawk tûr a ni lo, chutilochuan in thi ang,’ a ti a ni,” tiin a chhâng a. Tichuan, rûl chuan Evi hnênah: “Thi teh suh e: in ei nî apang chuan in mit a lo vâr ang a, a chhia leh a ṭha hriain Pathian ang in lo ni dâwn tih Pathianin a hre reng a nih chu,” tiin a sawi a. Chuvângin, Setana chuan Jehova chu kan nu leh pa hmasa berte hnêna thil ṭha pe duh lo, leh dâwt sawiah a puh ta a ni.—Genesis 3:2-5.

Evi chuan a thu hriat chu a ring ta a. Tichuan, thingkûng chu a en a, a rahte chu mit la tak leh îtawm tak niin a hmu ta tlat mai le! A han ban a, a rah ṭhenkhat a lo va, tichuan a ei ta a. Bible chuan heti hian a sawi zawm a ni: “A pasal a pe ve a, ani pawhin a ei ve ta a,” tiin.—Genesis 3:6.

Pathianin a hmangaih tak a fate’n duh rêng vânga a thu an zâwm lo tih a hriat chuan a rilru a va na dâwn tak êm! Pathian Jehova chuan eng nge a tih tâk? Adama hnênah: ‘Leiah i kîr leh ang; lei aṭanga lâk chhuah i ni si a: vaivut i ni a, vaivutah i kîr leh tûr a ni,’ tiin a hrilh a ni. (Genesis 3:17-19) Chuvângin, “Adama dam chhûng zawng zawng chu kum 930 a ni a: tin, a thi ta a.” (Genesis 5:5) Adama chu vânah a kal lo va, thlarau khawvêl hmun pakhatah a insawn hek lo. Pathian Jehova’n vaivut aṭanga a siam hma khân ani chu a awm lo. Chuvângin, a thih khân, a nun chu a hloh ta a, vaivutah a kîr leh a ni. Ani chu a awm tawh lo. A va lungchhiatthlâk tak êm!

KAN ṬHAT FAMKIM LOH CHHAN

Duh rêng vânga thu an âwih loh avângin, Adama leh Evi chuan ṭhat famkimna leh chatuan nun beiseina chu an hloh va. An taksaah inthlâk danglamna a lo awm a; ṭha famkim lo leh sual fa an lo ni ta a ni. Mahse, an thuâwih lohna sual chuan anmahni chauh a nghawng lo. An ṭhat famkim lohna chu an thlahte hnênah an hlân chhâwng a. Rom 5:12-na chuan: “Mi pakhat [Adama] avângin sual khawvêlah a lût a, sual avângin thihna a lût bawk a, chutiang bawkin mi zawng zawngin thil an lo tihsual avângin thihnain mi zawng zawng a fan chhuak ta a,” tiin a sawi.

Bible chuan sual leh thihna chu “mi tinrêng an vawm khuhna pâwn lam leh, hnam tinrêng an khuhna,” angin a sawi a. (Isaia 25:7) Chu vawm khuhna chuan mihringte chu pumpelh theih loh, tûr pai boruak angin a khuh tlat a ni. Ni e, “Adama-ah chuan mi zawng zawng an thi” a ni. (1 Korinth 15:22) Tirhkoh Paula zawh anga, zawhna lo awm ta chu: “He thihna taksa lakah hian tuin nge mi chhan chhuak ang?” tih hi a ni. Pakhat tal an awm thei ang em?—Rom 7:24.