A KAWM THU | BIBLE CHHIAR HLAWKPUI THEIH DAN
Chhiar Nuam Ti Tûrin Engin Nge Ṭanpui Ang Che?
Bible chhiar a ninawm nge, a phûrawm zâwk? I tân eng ang nge ni ve? I chhiar dânah a innghat thui hle ang. Nuam tak leh phûr taka i chhiar theih dân tûr i lo eng ang u.
Rin tlâk leh hriat thiam awl ṭawng lehlin thlang rawh. Hriat thiam har thu leh ṭawng un tak tak telna thute i chhiar chuan, chhiar nuam i ti lo ngei ang. Chuvângin, i thinlung khawih thei hriat thiam awl Bible chu zawng rawh. Mahse, fîmkhur tak leh dik taka lehlin Bible a ni tûr a ni.a
Tûn lai thiamna hmang rawh. Tûn laiah, Bible hi a bu mai ni lovin, digital-te pawhin a hmuh theih tawh a. Bible ṭhenkhat chu online-ah a chhiar theih a, computer, tablet leh cell phone-ahte pawh mahnia chhiar atân a download theih bawk. Version ṭhenkhatah chuan, Bible chângte chu Bible lehlin dangte nên khaikhin nghâl mai theih tûrin hmanraw ṭhenkhat a tel a ni. Chhiar aia ngaihthlâk i duh zâwk chuan, aw thunsa pawha neih theih a ni a. Mi tam tak chuan zin pah te, thawmhnaw sûkpah te, leh thil engemaw an thawhpahte pawhin ngaihthlâk an duh ṭhîn a ni. I tâna rem tûr a engemaw ber chu i tichhin ve dâwn lâwm ni?
Bible zirna hmanruate hmang rawh. Bible zirna hmanruate chuan i chhiarte hlâwkpui tûrin a ṭanpui thei che a. Chu hmanruaahte chuan Bible ram mâpte a awm a, Bible-a chuang hmunte chu khawiah nge a awm tih hre tûr leh mitthla thei tûrin a ṭanpui ang che. He magazine-a thuziakte, leh jw.org website-a kan thu leh hlate chuan Bible bu hrang hranga thute hre thiam tûrin a ṭanpui thei che a ni.
Tih dân chi hrang hrang hmang rawh. Bible bu pum chhiar chhuah i huphurh a nih chuan, engvângin nge i chhiar duh berna aṭanga i chhiar ṭan mai loh vang? Bible-a mi langsârte chungchâng hriat i duh chuan, i chhiar duh ber mi langsârte thu aṭangin i chhiar ṭan thei a ni. Tih theih dân tluangtlam tak chu he thuziaka “Bible-a Chuang Mite Chanchin Hriat Tum Rawh,” tih bâwmah hian a awm a. A nih loh leh, Bible thupui azirin emaw, thil theng azirin emaw i chhiar duh zâwk pawh a ni mai thei. Chûng tih dânte chu engvângin nge i hman chhin loh vang?
a Mi tam tak chuan New World Translation of the Holy Scriptures chu a dikin, a rinchhan tlâkin, leh chhiar awlsam tak a ni tih an pawm a. He Bible hi Jehova Thuhretute tihchhuah a ni a, ṭawng 130-a hmuh theih a ni. jw.org website, a nih loh leh JW Library app aṭangin i download thei ang. A bua i duh a nih chuan, Jehova Thuhretute’n i inah an rawn pe thei che a ni.