ZIRLAI 11

Bible Chhiar I Hlâwkpui Theih Ber Dân

Chhut Chhuah Edition

Hna lian tak thawk ṭan tûr anga i inngaihtuah hian i huphurh ṭhîn em? I huphurh lutuk loh nân chu hna chu i ṭhen hrang pawh a ni thei. Bible chhiar pawh hi chutiang chiah chu a ni. Heti hian i inzâwt mai thei, ‘Khawi aṭangin nge ka chhiar ṭan ang?’ tiin. He zirlaiah hian Bible chhiar leh zir nuam i tih theihna tûra ṭanpui theitu che thil awlsam tak ṭhenkhat kan ngaihtuah ang.

1. Engvângin nge Bible kan chhiar ziah ang?

Bible, a nih loh leh “Lalpa dân” chhiar ziah ṭhîntu chu a hlimin, a hlawhtling ṭhîn. (Sâm 1:1-3 chhiar rawh.) A ṭan nân, nî tin minute rei lo tê tê chhiar tum ziah la. Pathian Thu i hriat tam poh leh Bible chhiar chu nuam i ti lehzual ang.

2. Engin nge Bible chhiarna hlâwkpui tûrin ṭanpui ang che?

Bible chhiarna aṭanga hlâwkna a tam thei ang ber hmu tûr chuan chawlh lawk a, kan thu chhiar lai ngaihtuah a ngai a. Chuvângin, chhiar mai lovin, kan “ngaihtuah,” a nih loh leh kan chhût ngun tûr a ni. (Josua 1:8) I chhiar laiin hêng zawhnate hi inzâwt rawh: ‘Hei hian Pathian Jehova chungchâng eng nge min hrilh? He thu hi engtin nge ka nunpui theih ang? Engtin nge hêng Bible chângte hi mi dangte ṭanpui nân ka hman theih ang?’

3. Engtin nge Bible chhiar nân hun i insiam theih ang?

Bible chhiarna atân hun neih harsa i ti ṭhîn em? Kan zînga tam tak hian harsa kan ti a. Bible chhiar nân “remchânnate lei zêl” chu tum rawh. (Ephesi 5:16) Chumi atân, nî tin Bible chhiar nân hunbi insiam ang che. Mi ṭhenkhat chuan zîng hma takah Bible chhiarna hun an insiam a. Mi dangte chuan chhûn chaw ei chawlh chhûngin an chhiar ṭhîn a. Mi dang lehte chuan zânah mut hmain an chhiar ṭhîn a ni. I tân eng hun nge ṭha ber ang?

ZIR BELHIN HMUH BELH RAWH

Bible chhiar nuam i tih lehzual theih dân zir la. I Bible zirna aṭanga hlâwkna nasa ber i hmuh theihna tûra ṭha taka inbuatsaih dân hria ang che.

Milem: Mipa naupang pakhatin hun hrang hrangah chaw chi hrang hrang ngainat a zir. 1. Mipa naupang pakhatin a chaw a khâl. 2. A rawn ṭhan len hnuah, naupang chuan chaw a ei. 3. Tlêma a rawn len lehzual deuh hnuah, chaw chu tui ti takin a ei. — Chaw chi hrang hrang eia tui kan lo tih tâk ang hian, Bible chhiar nuam tih dân pawh kan zir thei

4. Bible chhiar nuam tih dân zir rawh

Bible chhiar ṭan chu a awlsam lo mai thei. Mahse, chutianga tih chu kan “châk” thei a, mi tuemawin chaw thar a ei a, tui a ti ṭan ang hian. Petera thawn khat 2:2 chhiarin, he zawhna hi sawiho vang che u:

Nî tina Bible i chhiar chuan chu chu nuam i tih tûr leh chhiar chhunzawm zêl theih tûr angin i ngai em?

Mi ṭhenkhatin Bible chhiar nuam an tih ṭan dân hriat nân VIDEO chu chhuah la. Tichuan, a hnuaia zawhnate hi sawiho vang che u.

VIDEO: Ṭhalaite’n Pathian Thu Ngainat Dân An Zir (5:33)

Video-ah khân eng harsatnate nge ṭhalaite’n an hneh?
Bible chhiar an tum tlatnaah engin nge ṭanpui?
Engtin nge an Bible chhiar chu phûrawm lehzual tûra an tih?

I chhiar ṭan theihna tûra ṭanpuitu tûr rawtnate:

Tûn lai ṭawnga lehlin leh rin tlâk Bible thlang rawh. In ṭawnga a awm a nih chuan New World Translation Bible chhiar tum ang che.
I rilru la ber thute chu chhiar hmasa ang che. A tih dân tûr hriat nân “Bible Chhiar Ṭan Rawh” tih chart chu en ang che.
I chhiar tawhte chu chhinchhiah rawh. He lehkhabua “I Bible Chhiar Chin Chhinchhiahna” tih chart chu hmang ang che.
JW Library^® app hmang rawh. I smartphone leh electronic hmanraw dangtea chumi app i neih chuan khawi hmunah pawh Bible i chhiarin, i ngaithla thei.
New World Translation-a thu belhna chu hmang rawh. Chuta tel map te, chart te, leh thu har hrilhfiahnate chuan nuam ti lehzualin a chhiartîr thei che.

5. Bible zirna nei tûrin inbuatsaih rawh

Sâm 119:34 chhiarin, he zawhna hi sawiho vang che u:

Engvângin nge Bible chhiar, a nih loh leh Bible zirna nei tûra i inbuatsaih hmaa ṭawngṭai chu a ṭhat?

Engtin nge zirna i neih apiangin hlâwkna nasa ber i hmuh theih ang? He zirlaia thute i inbuatsaih laiin hetiang hian tihchhin tum ang che:

Zirlaia paragraph hmasa lamte chu chhiar rawh.
Bible chângte chu keuvin chhiar la, a thute nêna a inkûngkaih dân hriatthiam tum ang che.
Zawhna chhângtu thute chu chhinchhiah ang che; chu chuan nangmah zirpuitu nêna in sawi dun hunah a ṭanpui ang che.

Milem: Nu pakhat chu Bible zirna nei tûrin a inbuatsaih. A. Chu nu chuan zirlaia paragraph hmasa ber a chhiar. B. Bible châng târ lante Bible aṭangin a chhiar. C. Zirlaia thu pawimawh laite chu a rîn.

I lo hre tawh em?

Jehova Thuhretute chuan Bible lehlin hrang hrang an hmang ṭhîn a. Mahse, a bîk takin New World Translation of the Holy Scriptures hi an duh hle a ni, a chhan chu a thu a dik a, a fiah a, Pathian hming a hman avângin.—“Jehova Thuhretute’n Anmahniin Bible Hran An Nei Em?” tih website thuziak en rawh.

MI ṬHENKHAT SAWI DAN: “Bible zir chu a harsa lutuk. Zir tûrin hun leh tha ka nei lo.”

Nang engtin nge i ngaih?

KHAIKHAWMNA

Bible aṭanga hlâwkna nasa ber nei tûr chuan chhiar tûrin hun duan insiam la, i chhiarte hre thiam tûrin ṭawngṭai la, zirna i neih hmain inbuatsaih ṭhîn rawh.