School Kal Tûrin I Inpeih Em?
1. School kal ṭan tûr emaw, lût leh tûr emaw in nih chuan eng hun remchângin nge hmuak reng che u?
1 School kal ṭan tûr emaw, lût leh tûr emaw pawh ni ula, nangni Kristian naupangte hian harsatna leh nêksâwrna thar tawn tûr in nei a. Chutih rualin, “thutak hriattîr” theihna hun remchâng thar pawh in nei bawk dâwn a ni. (Joh. 18:37) Thu hrilhna nei tûr chuan i inbuatsaih ṭhain, i inpeih bawk em?
2. Eng kawngin nge school kal tûra in inpeih?
2 Nun kawng engkima in hlawhtlin theih nân Pathian Jehova, in nu leh pa, leh bâwih rinawm leh fing tak hnên aṭangte hian zirtîrna tam tak in dawng a ni. (Thuf. 1:8; 6:20; 23:23-25; Eph. 6:1-4; 2 Tim. 3:16, 17) Tûnah chuan school-a harsatna in tawh tûr âwmte chu in hre tawh ngei ang a. Pathian thil phûtte zirna leh boruak in hmachhawn tûr chu hriain, thu hriattîr thei tûrin inbuatsaih ang che u. (Thuf. 22:3) Young People Ask lehkhabu pahnihte leh Awake! magazine-a chutiang lam thil thuziaka lang zirtîrna leh Bible thu nêna inmil rawtna siamte chu ngun takin ngaihtuah rawh u.
3. Eng kawngtein nge thu in hriattîr theih?
3 In thu hrilhna bial danglam bîk tak hian kawng chi hrang hranga thu hriattîr theihna hun ṭha a pe ang che u. Mi dangte’n entawn tlâk tak in silhfên leh incheina te, in nungchang leh ṭawngkam te, in ṭhiante leh zirtîrtute in zah thiamna te, leh lehkha in thiam theihnate an hmuh a, nun awmze nei tak in hmang a ni tih an hriat hian, ṭhenkhat chuan, “Engah nge i danglam bîk êm êm?” tiin an zâwt mai thei che u a. (Mal. 3:18; Joh. 15:19) Chutiang hunah chuan, thu hrilh theihna leh in rin tlatna chungchâng sawi theihna hun remchâng in nei thei ang. (1 Tim. 2:9, 10) Kum tluanin, hnam hmangaihna lantîrna kût nî leh chawlh ang chi harsatnate chu in tawh ngei a rinawm a. Chutiang thila in tel loh chhan zawh in nih hian, “Ka sakhuain a remti lo; Jehova Thuhretute zînga mi ka ni a,” in ti mai dâwn nge ni a, chu aia ṭha zâwkin chu hun remchâng chu hmangaihna Pa, in Pathian Jehova chanchin hriattîr nân in hmang ṭangkai dâwn? Pathian Jehova kaihhruaina hnuaia ṭha taka inbuatsaihna chuan zirtîrtute, school kalpuite, leh mi dangte hnêna thu hrilhna ṭha tak nei tûra inpeih rengin a awmtîr ang che u.—1 Pet. 3:15.
4. Engvângin nge hlawhtling takin school kal kum in hmang thei tih in rin tlat theih?
4 School kal chu tlêm chuan hreh deuh mah ula, hlawhtling taka school kal thei tûra duhsaktu mi tam takin an thlâwp che u tih in hre reng dâwn nia. Chu bâkah, in thu hrilhna bial danglam bîk taka mi dangte hnêna thu in hrilh thei tûr chu kan hlimpui hle che u a ni. Chuvângin, huaisen takin awm ula, school kal tûrin inpeih ang che u!