Bible Zirna Ṭanna Tûr Thuziak Tharte
1. Vênnainsâng-ah eng thuziak tharte nge tih chhuah a nih ang a, chu chu eng atâna ziak nge ni?
1 Thla leh aṭanga inṭanin, Vênnainsâng chhuak ṭhenkhatah Bible zirna ṭannaa min ṭanpuitu tûr thuziak tharte chu tih chhuah a ni ang a. A thupui chu “Pathian Thu Aṭangin Inzir Rawh” tih a ni. Thu hrilhna biala mi ṭhenkhat chuan thuziak tinte chu chhiar nuam an ti ngei ang a; mahse, hêng thuziakte hi sawiho atâna ziak a ni.
2. Thuziak thara tel hmêlhmang ṭhenkhat chu eng nge ni?
2 Thuziaka Tel Tûrte: A thupui leh a thupui tête chu sawiho chhûnga in neitu hnêna zawh tûr zawhna anga ziah a ni a. In neituin Bible aṭang ngeia a zir theih nân Bible châng pawimawhte chu la chhâwng lo va, târ lan zâwk a ni. Paragraph-te chu a tâwi avângin kawngkâ aṭang pawha sawipui theih a ni a. A remchân huna Bible Zirtîrna lehkhabu i zirpui theih nân thuziak tin chuan chu lehkhabu chu a kawhhmuh a ni.
3. In tina kal hunah, engtin nge hêng thuziakte hi kawngkâ-a Bible zirna ṭan nâna kan hman theih?
3 A Hman Dân Tûr: Magazine i sem chhuah hunah in neitu tuizâwng tûr thuziaka tel zawhna chu i zâwt thei ang a. Entîr nân, July thla chhuakah chuan Bible hlutna chungchâng a chuang a. Heti hian i zâwt thei a ni: “Bible hi Pathian Thu angin i thlîr nge ni a, lehkhabu ṭha satliah mai angin i thlîr zâwk? [A chhânna nghâk rawh.] He mi chungchângah thil ngaihvenawm tak ka’n hmuhtîr ang che aw,” tiin. Zawhna hmasa ber chu kawhhmuhin, paragraph hmasa ber chu chhiarsak la; tichuan, Bible châng târ lan chu keuvin, chhiar ang che. Zawhna chu chhiar nawn leh la, in neitu chu a ngaih dân zâwt rawh. Number pêk zawhnate chu sawihona kaihruaitu ber atâna hmangin, a âwm tâwka seiin sawipui rawh. I kalsan hmain, a dawta zawhna chu kawhhmuh la, sawiho leh tûra tlawhkîr tûrin ruahmanna chiang tak siam ang che. Magazine thar a lo thlen hma chu thuziaka thu dangte sawipui tûrin va tlawhkîr leh ṭhîn rawh. Tih theih dân dang leh chu tuina nei in neitu hnêna tlang taka Bible zirpui tûra sâwm hi a ni a. Tichuan, magazine-a thuziak chu zirpui dân entîr nân hmang ang che.
4. Tlawhkîr kan neih hunah engtin nge hêng thuziakte hi kan hman ang?
4 Hêng thuziak tharte hi magazine i pêk ṭhinte leh i tlawhkîrte hnênah ṭangkai takin i hmang thei bawk a. Heti hian i sawi thei a ni: “He Vênnainsâng hian hmêlhmang thar a nei a. A hman dân tûr ka’n hmuhtîr ang che aw,” tiin. He thuziak tharte avânga mi tam takin ‘thutak an rawn hriat’ chu kan duh tak zet a ni.—1 Tim. 2:4.