“Khawngaihna Nei” Rawh
1. Tûn laia mite mamawh ngawih ngawih chu eng nge ni?
1 Tûn ang tluk rênga khawngaihna nêna ṭanpuina mamawh ngawih ngawih an la tam ngai lo. Khawvêl dinhmun chhe tak avângin hlim lohna te, beidawnna te, leh beisei bona te chu a hluar hle a. Maktaduai tam tak chuan ṭanpuina an mamawh a, Kristian kan nih anga vêngte kan ngaihsak tak zetzia lantîr thei dinhmunah kan ding a ni. (Mt. 22:39; Gal. 6:10) Engtin nge chutiang ngaihsakna chu lantîr theih a nih?
2. Khawngaihna kan lantîr theih dân kawng ṭha ber chu eng nge ni?
2 Khawngaihna Hna Chu: Pathian chu thlamuanna dik leh daih rei tak lo chhuahna awmchhun a ni a. (2 Kor. 1:3, 4) Jehova chuan “khawngaihna nei” tak nihna hmanga amah entawn tûrin min fuih a, Ram chanchin ṭha kenga vêngte tlawh tûrin min ti a ni. (1 Pet. 3:8) Pathian Ram chu hrehawm tuar mihringte tâna beisei tûr dik awmchhun a nih avângin, chu hnaa taima taka tel chu “thinlung lungchhiate” thlamuan theihna kawng ṭha ber a ni. (Is. 61:1) Jehova chuan a mite a khawngaih avângin suahsualna a thian faiin, felna khawvêl thar a rawn din thuai ang.—2 Pet. 3:13.
3. Engtin nge mite chu Isua thlîr dân anga kan thlîr ang?
3 Mite Chu Isua Thlîr Angin Thlîr Rawh: Isua chuan mipui tam tak hnêna thu a hrilh pawh khân anni chu mipui ang maiin a thlîr lo. Thlarau lam mamawh an nei ṭheuh tih a hria a ni. Anni chu kaihruaitu tûr vêngtu nei lo berâm ang an ni a. Isua rilru chu a thil hmuh chuan a khawih hle a, dawhthei taka anmahni zirtîr tûra chêttîrin a awm a ni. (Mk. 6:34) Isua thlîr dân anga mite kan thlîrna chuan mi mal tinte hnêna khawngaihna dik tak lantîr ṭheuh tûrin min chêttîr ang. Chu chu kan hmêl lan dân leh kan aw phawiah a lang ang. Thu hrilh chu kan ngai pawimawh ber ang a, kan thusawite chu mi mal tinte ngaihven tûr zâwngin kan sawi ang.—1 Kor. 9:19-23.
4. Engvângin nge khawngaihnaa kan inthuam ang?
4 Hnam tin zînga mipui tam takte chuan Lalram thuchah leh an chunga lantîr ngaihsakna duhawm takte chu an chhâng lêt a. Khawngaihnaa kan inthuam zawm zêlna chuan mi khawngaih thei tak, kan Pathian Jehova chu kan chawimawiin kan tilâwm ang.—Kol. 3:12.