Jehova Khawngaihna Chu Entawn Rawh

1. Engtin nge Jehova’n Mosia hnênah a inhriattîr? Engvângin nge chu chu a pawimawh?

ṬUM khat chu, Pathianin Mosia hnênah A hming leh A mize ṭhenkhat a hriattîr a. Jehova’n a thiltihtheihna leh finna chu ropui takin lantîr thei mah se, lainatna leh khawngaihna a lantîr hmasa zâwk a ni. (Exodus 34:5-7 chhiar rawh.) Mosia chuan Jehova’n a ṭanpui dâwn leh dâwn loh a hriat a ngai a. Chuvângin, Jehova chuan a chhiahhlawhte chu ṭanpui a duh tak zet tih hriattîr nân a miziate a târ lang a ni. (Exodus 33:13) Jehova’n min ngaihsak tak zet tih i hriat chuan engtin nge i awm? He thuziakah hian mi dangte hrehawmna tawrhpui leh anmahni ṭanpui duhna mizia, khawngaihna chungchâng kan sawiho vang.

2, 3. (a) Mihringte hian khawngaihna kan lantîr ṭhîn hi thil pângngai a ni tih engin nge târ lang? (b) Khawngaihna chungchâng Bible sawi chu engvângin nge i ngaihven ang?

² Jehova chu mi khawngaih thei tak a ni a, mihringte chu a anpuia siam kan ni. Chuvângin, mihringte’n mi dangte kan ngaihsak ṭhîn hi thil pangngai tak a ni. Jehova hre lo mite pawhin khawngaihna an lantîr ṭhîn a. (Genesis 1:27) Bible-ah, khawngaihna lantîrtu mi tam takte chanchin târ lan a ni. Entîr nân, Solomona’n hmeichhe pahnih chu a tu zâwk nge naute nu dik tak tih hriat nân, naute chu bung hniha bung tûra thu pein a fiah a. A nu dik tak chuan naute chu a lainat êm avângin hmeichhe pakhat zâwk hnêna pe tûrin lal chu a ngên a ni. (1 Lalte 3:23-27) Khawngaihna chungchânga entîrna dang leh chu Pharaoa fanu hi a ni a. Nausên Mosia a hmuh chuan, Hebrai mi a ni tih leh tihhlum tûr a ni tih pawh a hria a. Mahse, “a khawngaih ta êm êm a,” tichuan a fa anga enkawl a tum ta a ni.—Exodus 2:5, 6.

³ Engvângin nge khawngaihna chungchâng kan zir belh ang? Jehova’n amah entawn tûra min duh vâng a ni. (Ephesi 5:1) Khawngaihna lantîr thei tûra siam kan ni chung pawhin, kan ṭhat famkim loh avângin hmasial duhna kan nei ṭhîn a. A châng chuan, mi dangte kan ṭanpui dâwn nge mahni kan inngaihsak zâwk dâwn tih kan hre nghâl mai ṭhîn lo. Mi dangte ngaihvenna nei lehzual tûrin engin nge min ṭanpui thei? A hmasain, Jehova leh mi dangte’n khawngaihna an lantîr dân kan en chiang ang a. A dawtah, Pathian khawngaihnna kan entawn theih dân leh chutianga tih chu kan tân a ṭhat chhan kan hmu ang.

JEHOVA—KHAWNGAIHNA KAWNGA ENTAWN TUR ṬHA BER

4. (a) Engvângin nge Jehova’n Sodom khuaah vântirhkohte a tîrh? (b) Lota chhûngkua thiltawn aṭangin eng nge kan zir theih?

⁴ Khawngaihna chungchânga Jehova entawn tûr siam tam tak chu Bible-ah a chuang a. Entîr nân, Lota tâna a thiltih hi han ngaihtuah teh. Lota chu mi fel a ni a, Sodom leh Gomorraa chêngte nungchang bawlhhlawhna avângin a “lungngai êm êm” a ni. Chûng mite chuan Pathian zahna an nei lova, Jehova’n anni chu thi tlâkah a ruat a ni. (2 Petera 2:7, 8) Jehova’n Sodom leh Gomorra a tihchhiat dâwn avângin, chuta ṭanga tlân chhuak tûra Lota hrilh tûrin vântirhkohte a tîr a. Bible chuan: “[Lota] a la muang hle si a; tichuan LALPAN amah a khawngaih avângin mite [vântirhkohte] chuan a kutah leh a nupui kutah leh a fanute pahnih kutah chuan an chelh a, tichuan an hruai chhuak a, khaw pâwnah chuan an dah ta a,” tiin a sawi. (Genesis 19:16) Jehova’n Lota dinhmun a hre thiam ang bawkin, kan harsatna engpawh a hre thiam ang tih kan chiang thei a ni.—Isaia 63:7-9; Jakoba 5:11, 2 Petera 2:9.

5. Engtin nge Pathian Thuin khawngaihna lantîr dân min zirtîr?

⁵ Jehova chuan a mite pawh khawngaihna lantîr tûrin a zirtîr a. Israelte hnêna dân a pêkte zînga pakhat hi han ngaihtuah teh. Miin pawisa a pûktîr chuan, a pûktu hnên aṭanga a dawn leh ngei theih nân a puan a kawlsak thei a ni. (Exodus 22:26, 27 chhiar rawh.) Mahse, a pûktu chu zâna lum taka a mut theih nân a pûttîrtuin ni tlâk hma ngeiin a puan chu a pe leh tûr a ni. Khawngaihna nei lotu chuan puan chu a pe leh duh lo pawh a ni mai thei; mahse, Jehova chuan a mite chu khawngaihna lantîr tûrin a zirtîr a ni. He dân phênna thu bul hian eng nge min zirtîr? Kan Kristian unaute mamawh chu kan ngaihthah tûr a ni lo tih hi a ni a. Hrehawm tuar unau tuemaw kan ṭanpui hunah chutianga tih chu kan duh a ni.—Kolossa 3:12; Jakoba 2:15, 16; 1 Johana 3:17 chhiar rawh.

6. Thil sual titu Israelte chunga Jehova khawngaihna lantîrna aṭangin eng nge kan zir theih?

⁶ Israel mite’n a chungah thil sual an ti chung pawhin Jehova chuan anni chu a khawngaih a. Heti hian kan chhiar a ni: “LALPA, an pi leh pute Pathian chuan an hnênah theihpatâwpa ṭhahnemngaiin mi a tîr a, a mite leh a awmna hmun chu a lainat avângin,” tiin. (2 Chronicles 36:15) Chutiang bawkin, keini pawhin Jehova la hre lo, inchhîra a ṭhian rawn ni theite chu kan khawngaih tûr a ni. Jehova chuan a rorêlna a lo thlen hunah tuma boral a duh lo va. (2 Petera 3:9) Chuvângin, hun a la awm laiin, he vaukhânna thuchah hi mi zawng zawng hnêna hrilh kan duh a, mi a tam thei ang berin Pathian khawngaihna an hlâwkpui kan duh a ni.

7, 8. Engvângin nge chhûngkhaw khat chuan an chungah Jehova’n khawngaihna a lantîr nia an rin?

⁷ Tûn laia Jehova chhiahhlawh tam takte chuan a khawngaihna an dawng a. Entîr nân, kum 1990 chho bâwr vêl khân, Bosnia ramah hnam chi hrang hrangte chu an indovin, an inthat a. Chuta chêng chhûngkaw pakhatah chuan naupang pakhat kum 12 mi Milan-a a awm a. Milan-a, a nau, a nu leh pate, leh Thuhretu dangte chu Bosnia ram aṭangin Serbia ramah motorin an zin a. Inkhâwmpui chhim tûra zin an ni a, chutah chuan Milan-a nu leh pate chuan baptisma chan an tum a ni. Ram ri an thlen chuan, an chhûngkua chu hnam dang mi an ni tih sipaite’n an hriat chuan motor aṭangin an chhuktîr a. Motor-a chuang unau dangte chu an kal tlangtîr a. Sipaite chuan ni hnih hnuah pawh chu chhûngkua chu an la chhuah duh lo va. A tâwpah, siapai hotu pakhatin a aia lal zâwk hnênah anni hi engtin nge ka tih ang tiin a zâwt a. An chhûngkua chu an bul hnaiah an ding reng a, “hruai chhuak la, kap hlum rawh!” tia sipai hotu ber sawi chu an hria a ni.

⁸ Sipaite an inbiak laiin, mi pahnihin chu chhûngkua chu an rawn pan a. Anni chuan Thuhretute an nih thu leh motor-a chuang unaute khân thil awm dân an hrilh thu zawi têin an rawn hrilh a. Sipaite’n naupangte lehkha an chek loh avângin Thuhretu pahnih chuan Milan-a leh a nau chu an motorah chuanga ram ri kân tûrin an hrilh a. Unaute chuan Milan-a nu leh pa chu ram ria sipaite awmna hmun hnung lam aṭanga lo kal a, râl lehlam an thlen huna inhmu tûrin an hrilh a ni. Milan-a chuan a hlauh êm avângin awm ngaihna pawh a hre lo va. A nu leh pate chuan, “Sipaite’n min kal tlangtîr mai in ring em ni?” tiin an zâwt a. An han kal tâkah chuan, sipaite’n an hmu lo niin a lang. Milan-a leh a nau chuan an nu leh pa chu râl lehlamah an hmu leh a, tichuan inkhâwmpui tûrin kan kal zawm zêl a. Jehova’n an ṭawngṭaina a chhâng niin an ring tlat a ni! Jehova chuan a chhiahhlawhte chu chutiang kawng chuan a vênghim rêng lo tih Bible aṭangin kan hria a. (Tirhkohte 7:58-60) Mahse, he thil thlengah hian, Milan-a chuan: “Vântirhkohte’n sipaite mit an tidel a, Jehova’n mi chhanchhuak niin ka ngai,” tiin a sawi.—Sâm 97:10.

9. Isua’n a hnungzuitu mipuite chu engtin nge a hmuh? (A thupui chunga milem en rawh.)

⁹ Isua chu khawngaihna lantîr kawnga entawn tûr ṭha tak a ni a. Mite chu “vêngtu nei lo berâmte anga hrehawm leh darha an awm” a hmuhin a khawngaih ta êm êm a. Chuvângin, eng nge a tih? “Thu tam tak a zirtîr ta” a ni. (Matthaia 9:36; Marka 6:34 chhiar rawh.) Pharisaite erawh chuan khawngaihna an neih loh avângin mite an ṭanpui duh lo. (Matthaia 12:9-14; 23:4; Johana 7:49) Isua angin, chhûngril taka mite ṭanpui duhna leh Jehova chungchâng zirtîr duhna i nei em?

10, 11. Engtih lai pawhin khawngaihna kan lantîr tûr a ni em? Hrilhfiah rawh?

¹⁰ Hei hian engtih lai pawhin khawngaihna kan lantîr tûr a tihna a ni lo. Entîr nân, Lal Saula chuan Pathian mite hmêlma, Amalek lal Agaga a that lo chu khawngaihna lantîr niin a inngai mai thei a. Chu bâkah, Amalek mite ran zawng zawng pawh a tihlum lo bawk. Mahse, Jehova chuan Amalek mite leh an ran zawng zawng tihlum tûrin a hrilh a. Saula thuâwih lohna avângin Jehova’n lal a nihna ata a hnâwl a ni. (1 Samuela 15:3, 9, 15.) Jehova chu thinlung hretu Rorêltu dik tak a ni a, mite chunga khawngaihna lantîr loh hun tûr pawh a hria a ni. (Ṭah Hla 2:17; Ezekiela 5:11) A thu âwihlotu zawng zawngte chungah ro a rêl thuai dâwn a. (2 Thessalonika 1:6-10) Chutih hunah chuan, Jehova’n mi sualte chu a khawngaih tawh lo vang. Mahse, chûng mi sualte a tihboralna hmangin, a chhandam mi felte chungah khawngaihna a lantîr ang.

¹¹ Mite chu thi tûr nge an nih nung tûr tih chungchâng chu keini rêl tûr a ni lo va. Chu aiin, tûnah, theih tâwp chhuahin mite kan ṭanpui zâwk tûr a ni. Mi dangte chunga khawngaihna kan lantîr theih dân kawng ṭhenkhat chu eng nge ni? A hnuaiah rawtna ṭhenkhatte kan hmu ang.

KHAWNGAIHNA KAN LANTIR THEIH DAN

12. Mi dangte i cheibâwl dânah engtin nge khawngaihna i lantîr theih?

¹² Nun kawng engkimah ṭanpuitu ni rawh. Jehova chuan Kristiante chu an ṭhenawmte leh an unaute chunga khawngaihna lantîr tûrin a phût a. (Johana 13:34, 35; 1 Petera 3:8) Khawngaihna tih awmzia pakhat chu “tawrhpui,” tihna a ni. Mi khawngaih theitu chuan hrehawm tuarte chu a ṭanpui ṭhîn a ni. Chuvângin, mi dangte ṭanpuina hun remchâng kan zawng thei a, entîr nân, inchhûng hnate kan ṭanpui theih bâkah, vahchhuahpuia thil engemaw leipuiin kan ṭanpui thei a ni.—Matthaia 7:12.

13. Pathian mite chuan leilung chhiatna a thlen hnuah eng nge an tih?

¹³ Chhawmdâwlna hnaah tel rawh. Leilung chhiatna avânga mite harsatna tawh kan hmuh hian an chungah khawngaihna lantîr kan duh a. Jehova mite chu, chutiang huna mi dangte an ṭanpuina avânga hriat hlawh an ni. (1 Petera 2:17) Entîr nân, Japan unaunu pakhat chu kum 2011-a lîrnghing leh tsunami-in a tihchhiatna hmuna awm a ni a. Inte leh Kingdom Hall-te saṭha tûra Japan ram hmun hrang hrang aṭang leh ram dang aṭanga lo kal tlâwmngai pâwlte a hmuhin: “Ka chak phah sawtin thlamuanna ka neih phah a ni. He ka thiltawn hian Jehova’n min ngaihsak tih leh Thuhretute chu an inngaihsak tawnin, khawvêl pumpuia an unaute an ṭawngṭai sak a ni tih min hriatchhuahtîr a ni,” tiin a sawi.

14. Engtin nge dam lote leh kum upate chu i ṭanpui theih?

¹⁴ Dam lote leh kum upate chu ṭanpui rawh. Natna leh kum upatna avânga mite hrehawm tuar kan hmuh hian, kan khawngaih tak zet a. Chûng harsatnate tâwp hun chu hmuh kan châk tawh hle avângin Pathian Ram lo thleng thuai tûrin kan ṭawngṭai a ni. Tûnah chuan, dam lote leh kum upate chu theih tâwp chhuahin kan ṭanpui a ni. Lehkha ziaktu pakhat sawi dân chuan, ni khat chu Alzheimer natna vei kum upa tak a nuin a thawmhnawah thil a ti kai palh a. A nuin a tihfai lai mêk chuan kawngka bell a rawn ri a. Rawn tlawh ṭhîntu Thuhretu pahnihte chu an lo lêng a. Unaunute chuan ṭanpui an duh thu an hrilh a. Chu nu chuan: “In hmaizahawm vaui nân, min ṭanpui thei e,” a ti a. Anni chuan a thawmhnaw chu an tihfaisak ta a. Tichuan thingpuite siamsakin hun engemaw tichhûng chu an titipui a ni. A fapa chuan a lâwm êm avângin Thuhretute chu “an thu hrilh angin an nung” tiin a sawi. Dam lote leh kum upate i khawngaihna chuan i theih ang tâwka ṭanpui tûrin a chêttîr che em?—Philippi 2:3, 4.

15. Engtin nge kan thu hrilh hna hian mi dangte a ṭanpui?

¹⁵ Jehova hre tûrin mite chu ṭanpui rawh. Mite kan ṭanpui theih dân kawng ṭha ber chu Pathian leh a Lalram chanchin zirtîr hi a ni a. Ṭanpui dân kawng dang leh chu Jehova tehnate zawm chu an ṭhatna tûr a ni tih hre thiam tûra ṭanpui hi a ni. (Isaia 48:17, 18) Rawngbâwlna hi Jehova chawimawina leh mi dangte chunga khawngaihna lantîr dân kawng ṭha tak a ni. Chuvângin, rawngbâwlnaah tam lehzualin i tel thei ang em?—1 Timothea 2:3, 4.

KHAWNGAIHNA LANTIR CHU I TAN PAWH A ṬHA!

16. Khawngaihna kan lantîr hian engtin nge hlâwkna kan hmuh?

¹⁶ Rilru hrisêlna lama mi thiamte chuan khawngaihna lantîrnain kan hrisêlna leh mi dangte nêna kan inlaichînna a ti hmasâwn thei tiin an sawi a. Hrehawm tuarte i ṭanpui hian i hlim lehzual ang a, beiseina i nei lehzual ang. Chu bâkah, mal nia inhriatna i nei tlêm lehzual ang a, a êng zâwngin thil i thlîr thiam lehzual bawk ang. Chuvângin, khawngaihna lantîr chu i tân a ṭha a ni. (Ephesi 4:31, 32) Hmangaihnain mi dangte ṭanpui tûra min chêttîr hian, Jehova’n kan tih atâna a duhte kan ti tih inhriatna kan neih avângin chhia leh ṭha hriatna thiang tak kan nei a ni. Khawngaihnain nu leh pa ṭha zâwk ni tûr te, nupui pasal ṭha zâwk ni tûr te, leh ṭhian ṭha zâwk ni tûrtein min ṭanpui a. Chu bâkah, mi dangte chunga khawngaihna lantîrtu chuan a mamawh hunah ṭanpuina an dawng ṭhîn a ni.— Matthaia 5:7; Luka 6:38 chhiar rawh.

17. Engvângin nge khawngaihna lantîr i duh?

¹⁷ Khawngaihna lantîr chu kan tân ṭha mah se, khawngaihna kan lantir chhan ber chu Jehova kan entawn duh vâng leh chawimawia a awm kan duh vâng a ni. Ani chu hmangaihna leh khawngaihna hnâr a ni a. (Thufingte 14:31) Kan tân entawn tûr ṭha famkim a siam a ni. Chuvângin, khawngaihna lantîrin Pathian kan entawnnaah theih tâwp i chhuah ang u. Tichuan, kan unaute kan hnaih lehzual ang a, kan vêla mite nên inlaichînna ṭha lehzual kan nei thei ang.—Galatia 6:10; 1 Johana 4:16.