Thu Kan Hrilh Chhan Sawm Pahnihte

Engvângin nge mite hnêna chanchin ṭha kan hrilh a, kan zirtîr? A chhan bul ber chu mi rilru ṭhate nunna kawnga kal tûra ṭanpui hi a ni em? (Mt. 7:14) Chu chu a hnuaia a chhan târ lante zînga hmasa ber a ni a; mahse, a chhan bul ber erawh a ni lo. Rawngbâwlnaa kan tel chhan a hnuaia târ lan 12-te zîngah hian eng nge pawimawh bera i rin?

1. Nun a chhanhim avângin.—Joh. 17:3.

2. Mi suaksualte vaukhânna a nih avângin.—Ezek. 3:18, 19.

3. Bible hrilh lâwkna thlen famkimna a nih avângin.—Mt. 24:14.

4. Pathian felna târ lanna a nih avângin. Mi suak sualte hnêna inlamlêtna hun pawh pe lova tiboral anga sawi theih a ni dâwn si lo.—Tirh. 17:30, 31; 1 Tim. 2:3, 4.

5. Isua thisena lei tawh mite thlarau lama ṭanpui kan batte min pêk tlâktîr avângin.—Rom 1:14, 15.

6. Thisen mawha min hultîrtu a nih avângin.—Tirh. 20:26, 27.

7. Chhandam kan nih theih nân a pawimawh avângin.—Ezek. 3:19; Rom 10:9, 10.

8. Kan vêngte kan hmangaihzia lantîrna a nih avângin.—Mt. 22:39.

9. Pathian Jehova leh a Fapa thu kan âwihzia târ lanna a nih avângin.—Mt. 28:19, 20.

10. Kan biakna peng pakhat a nih avângin.—Heb. 13:15.

11. Pathian kan hmangaihzia kan lantîrna a nih avângin.—1 Joh. 5:3.

12. Jehova hming tihthianghlimna a nih avângin.—Is. 43:10-12; Mt. 6:9.

Hêng hi rawngbâwlnaa kan tel chhan awmchhun a ni lo. Entîr nân, thuhrilhna chuan kan rinna a tichakin, Pathian hnathawhpuite nih theihna chanvo ṭha min pe bawk a ni. (1 Kor. 3:9) Amaherawhchu, rawngbâwlnaa kan tel chhante zînga a pawimawh ber chu number 12-na hi a ni. Mite’n an ngaithla emaw, ngaithla lo emaw pawh ni se, kan rawngbâwlna chuan Pathian hming a tithianghlim tho thovin, Jehova hnênah amah sawichhetu chhân theihna hun remchâng a pe tho bawk a ni. (Thuf. 27:11) Chuvângin, ‘chanchin ṭha zirtîr leh hrilh bân loh’ chhan tûr ṭha tak kan nei tak meuh a ni.—Tirh. 5:42.